ແຜນພັທນາເຂດເມືອງເຟືອງ

• ສົມຫວັງ
  2009-12-08

ການວາງແຜນພັທນາ ດ້ານເສຖກິຈ ໃນເມືອງເຟືອງແຂວງວຽງຈັນ ຍັງສັບສົນຢູ່ ຍ້ອນຂາດການສຶກສາຄົ້ນຄວ້າ ແລະປັບປຸງແກ້ໄຂ ໃຫ້ມີການລົງທຶນຫລາຍຂຶ້ນ ເພື່ອປະຊາຊົນ ທັງຫລາຍຈະມີ ລາຍຮັບຈາກມີວຽກ ເຮັດງານທຳ ແລະຈະຫລຸດພົ້ນຈາກ ຄວາມທຸກຍາກໄດ້ໃນອານາຄົດ. ດັ່ງນັ້ນຈຶ່ງຕ້ອງການຄົ້ນຄວ້າ ແຜນພັທນາເສຖກິຈ ໃຫ້ຄັກແນ່. ອິງຕາມທ່ານສຸກັນ ວິໄລລັກ ເຈົ້າແຂວງວຽງຈັນ ຜູ້ເປັນຫົວໜ້າຜແນກ ການເງີນໄດ້ກ່າວວ່າ:

”ໃນການສ້າງແຜນການນີ້ ເວົ້າແທ້ກໍແມ່ນສ້າງ ໃຫ້ມີແຫລ່ງລາຍຮັບເກີດຂຶ້ນ ໃນໝູ່ສັງຄົມ. ແຕ່ສຳຄັນນີ້ກໍລົງທຶນ ໄສຊິມັນຈະເກີດ ເກີດຖານລາຍຮັບ ແຫລ່ງລາຍຮັບເກີດຂຶ້ນເຮົາຈຶ່ງໄດ້ ຄືນແລະກໍພັທນາຕໍ່ໆໄປ.”

ນອກນີ້ ທ່ານສຸກັນ ໄດ້ກ່າວວ່າການຈັດຕັ້ງ ບຸຄລາກອນໃນຂັ້ນເມືອງ ແລະຂັ້ນບ້ານນັ້ນ ຍັງຄົງມີຈຸດບົກພ່ອງ ໃນບາງດ້ານ ຊຶ່ງຊີ້ໃຫ້ເຫັນວ່າວຽກງານ ແຜນການ ທາງດ້ານການເງີນ ໃນຂັ້ນເມືອງແລະ ໃນທົ່ວແຂວງ ຍັງບໍ່ສາມາດເຮັດໄດ້ ຢ່າງມີປະສິດທິພາບ ດ້ວຍເຫດນີ້ ຈຶ່ງມີການສະເໜີ ໃຫ້ທາງການປົກຄອງເມືອງ ໄດ້ແນະນຳວຽກງານ ແຜນການການພັທນາ ດ້ານເສຖກິຈ ແລະ ດ້ານການເງີນເພີ້ມຂຶ້ນ.

ເມືອງເຟືອງເປັນເຂດ ທ້ອງຖິ່ນທີ່ທຸກຍາກ ປັດຈຸບັນນີ້ ທົ່ວເມືອງເຟືອງມີ ຄອບຄົວທີ່ທຸກຍາກ 334 ຄອບຄົວຊຶ່ງມີຈຳນວນ 1,690 ຄົນ ຕາມແຜນ ທີ່ກຳນົດໄວ້ນັ້ນ ໃນປີ 2014 ຈະຕ້ອງແກ້ໄຂ ໃຫ້ປະຊາຊົນໄດ້ຫລຸດພົ້ນ ຈາກຄວາມທຸກຍາກ ຈາກຂັ້ນພື້ນຖານໃຫ້ໄດ້.

ພ້ອມກັບສ້າງໃຫ້ຄອບຄົວ ໄດ້ມີລາຍໄດ້ທີ່ເພີ້ມຂຶ້ນ ຫລາຍກວ່າແຕ່ກ່ອນ ການການແກ້ໄຂຄວາມ ທຸກຍາກຂອງປະຊາຊົນ ໃນເມືອງເຟືອງຢ່າງຈິງແທ້ ຂອງປີນີ້ນັ້ນ ຕ້ອງມີການສຶກສາ ຄົ້ນຄວ້າເພີ້ມເຕີມ ແລະຕ້ອງປັບປຸງແກ້ໄຂ ໃນບາງຈຸດໃຫ້ດີຂຶ້ນ. ດັ່ງທ່ານສຸກັນ ໄດ້ກ່າວໃນຕອນທ້າຍ.