ໄທ ກຽມຮັບມື ກັບສິນຄ້າຈີນ ທີ່ຈະລັ່ງເຂົ້າໄປ ທາງຊາຍແດນ ຕາມເສັ້ນທາງເສຖກິດ ເໜືອ-ໃຕ້

ກັມມະການ ພັທນາ ເສຖກິດ ພາກເໜືອ ຂອງໄທ ຄາດຫວັງວ່າ ຈະຫາລື ກັບໂຕແທນ ພາກຣັດ ແລະ ເອກະຊົນ ໄທ, ລາວ, ພະມ້າ ແລະ ຈີນ ທີ່ຊຽງຮາຍ ໃນເດືອນມີນາ, ເພື່ອໄກ່ເກັ່ຍ ອຸປະສັກ ສິນຄ້າ ໄທ ເຂົ້າຈີນ, ໃນຂະນະທີ່ ມີແນວໂນ້ມ ວ່າສິນຄ້າ ຈາກຈີນ ຈະຫລັ່ງໄຫລ ເຂົ້າໄທ ຜ່ານຖນົນ R3a ທີ່ຈະແລ້ວ ສົມບູນ ໃນບໍ່ເທົ່າໃດເດືອນຂ້າງໜ້າ, ອີງຕາມຣາຍງານ ຂອງໜັງສືພິມ ຜູ້ຈັດການຂອງໄທ ໃນມື້ວັນທີ 30 ມົກກະຣາຜ່ານມາ.

ທ່ານ ວິໂຣດ, ຮອງເລຂາທິການ ຫໍການຄ້າໄທ, ໃນຖານະ ປະທານ ຄະນະກັມມະການ ການພັທນາ ເສຖກິດ ພື້ນທີ່ ພາກເໜືອ ຫໍການຄ້າໄທ ກ່າວວ່າ ໄທ ຈະຕ້ອງ ພັທນາຣະບົບ ຂົນສົ່ງ ເພື່ອສນັບສນູນ ການຄ້າ ຊາຍແດນ ໃຫ້ເຂັ້ມແຂງ.

ທ່ານ ວິໂຣດ, ຮອງເລຂາທິການ ຫໍການຄ້າໄທ, ໃນຖານະ ປະທານຄະນະກັມມະການ ການພັທນາ ເສຖກິດພື້ນທີ່ ພາກເໜືອ ຫໍການຄ້າໄທ ກ່າວວ່າ ໄທ ຈະຕ້ອງພັທນາ ຣະບົບ ຂົນສົ່ງ ເພື່ອສນັບສນູນ ການຄ້າ ຊາຍແດນ ໃຫ້ເຂັ້ມແຂງ. ເນື່ອງຈາກວ່າ ໃນກາງປີ 2008 ນີ້, ຖນົນ ເສຖກິດ ເໜືອ-ໃຕ້ R3a ທີ່ເຊື່ອມຣະຫວ່າງ ຄຸນໝິງ, ສິບສອງປັນນາ ຂອງຈີນ, ຜ່ານ ສປປລາວ, ໄປຍັງທ່ານ ຊຽງຂອງ ຊຽງຮາຍ ຈະສໍາເຣັດ, ຊຶ່ງຈະເຮັດໃຫ້ ພາກທຸຣະກິດ ທີ່ຕ້ອງການຂຍາຍຖານ ແລະ ນໍາສິນຄ້າ ລົງມາ ໃນຕອນໃຕ້ ຫລື ຕລາດອິນໂດຈີນ ທັງໝົດຫລາຍຂຶ້ນ, ໂດຍສະເພາະ ຕລາດ ໃນປະເທດໄທ, ຈາກເດີມ ທີ່ຄ້າຂາຍ ສິນຄ້າ ສະເພາະ ດ່ານຊາຍແດນເທົ່ານັ້ນ.

ເສັ້ນທາງ ທີ່ສະດວກຂຶ້ນ ເຮັດໃຫ້ພາກທຸຣະກິດຈີນ ນໍາສິນຄ້າຂນາດນ້ອຍ ແລະໃຫຍ່ ກະຈາຍລົງມາຕີຕລາດໄທ ດ້ວຍຕົ້ນທຶນ ທີ່ຕໍ່າ. ຜ່ານມາ ສິນຄ້າສ່ວນໃຫຍ່ ຜ່ານທາງທ່າເຮືອ ແຫລມສບັງ, ຊຶ່ງນັກທຸຣະກິດ ຊາວໄທ ຈະຕ້ອງສ້າງເຄືອຄ່າຍ ການຂົນສົ່ງ, ຖ້າບໍ່ດັ່ງນັ້ນ ການຂົນສົ່ງສິນຄ້າ ໄປຂາຍ ຍັງພູມີພາກ ເອເຊັຍ ຂອງໄທ ຈະມີຕົ້ນທຶນສູງ, ແລະ ເປັນໄປໄດ້ ຈະຕ້ອງເຮັດແບບ One Stop Service ຈຶ່ງຈະເຮັດໃຫ້ສິນຄ້າ ຜ່ານຊາຍແດນ ສາມາດກະຈາຍສິນຄ້າ ໄປຍັງປະເທດເພື່ອນບ້ານໄດ້ ຢ່າງວ່ອງໄວ. ອີກຢ່າງນຶ່ງ ເພື່ອບໍ່ໃຫ້ສິນຄ້າເສັຍຫາຍ ແລະ ເຮັດໃຫ້ບັນດາຣົດບັນທຸກ ສາມາດ ຖືເອກະສານ ຜ່ານແດນພຽງສບັບດຽວ ເຂົ້າໄປທຸກປະເທດ ຢ່າງສະດວກທັນການ.

ຈະເຣີນສຸກ ຣາຍງານ