ນັກວິຊາການ ເຄືອຂ່າຍແມ່ນໍ້າເອເຊັຽຕາເວນອອກຊ່ຽງໄຕ້ ເຫັນວ່າເອກກະຊົນທີ່ເຂົ້າມາ ສໍາຣວດຄວາມເປັນໄປໄດ້ ໃນການສ້າງເຂື່ອນປາກລາຍ ພະຍາຍາມເລັ່ງລັດການກໍ່ສ້າງເຂື່ອນ ໂດຍບໍ່ໃຫ້ ຂໍ້ມູນທີ່ແທ້ຈີງ ແກ່ປະຊາຊົນ

ການກໍ່ສ້າງເຂື່ອນ ໃສ່ແມ່ນໍ້າຂອງໃນຫລາຍພື້ນທີ່ຂອງລາວ ປາກົດວ່າເຂື່ອນປາກລາຍທີ່ແຂວງໃສ່ຍະບູລີ ຊຶ່ງມີເອກກະຊົນຈາກຈີນ ກໍາລັງສໍາຣວດຄວາມເປັນໄປໄດ້ຢູ່ໃນຂະນະນີ້ ມີການພະຍາຍາມ-ຊຸກຍູ້ໃຫ້ມີການດໍາເນີນໂຄງການ ໃນຕົວຈີງຢ່າງຮີບດ່ວນ -ຕາມຄໍາເວົ້າຂອງນັກວິຊາການ ຈາກເຄືຂ່າຍແມ່ນໍ້າເອເຊັຽຕາເວນອອກຊ່ຽງໄຕ້ ຫລື SEARIN ໃນວັນທີ27ກຸມພາ2008ນີ້. ທ່ານກ່າວໃນຕອນນຶ່ງວ່າ:

(ສຽງ) "ເຂື່ອນປາກລາຍມີຄວາມເປັນໄປໄດ້ສູງວ່າ ອາດໄດ້ເຮັດກ່ອນໄວໆນີ້ ເພາະວ່ານໍ້າ-ມັນປິດໄດ້ສອງຮ່ອງ ມັນເຫລືອອີກຮ່ອງນຶ່ງ ນໍ້າຊິໄປໄດ້ຢູ່ແລ້ວເດ ພໍດີໄດ້ຖາມໃທບ້ານຄົນທີ່ຂັບເຮືອ ໄປສົ່ງເຂົ້າສົ່ງນໍ້າພວກຄົນງານນັ້ນ ເຂົາເຈົ້າບອກວ່າ ຊິເລັ່ງໃຫ້ໄວທີ່ສຸດ ສໍາຣວດອີ່ຫຍັງຊິໃຫ້ແລ້ວພາຍໃນ2ປີ ແລ້ວກໍຊິເລີ່ມລົງມືສ້າງ."

ທ່ານກ່າວຕື່ມວ່າ ທາງເອກກະຊົນເຈົ້າຂອງໂຄງການດັ່ງກ່າວ ກໍຍັງບໍ່ທັນໃຫ້ຂໍ້ມູນລະອຽດ ພຽງພໍແກ່ຊາວບ້ານເທື່ອ ເພາະປົກກະຕິແລ້ວ ເຖີງແມ່ນວ່າໃນເຂດທີ່ຈະກໍ່ສ້າງເຂື່ອນ ເຖີງຈະມີຮ່ອງນໍ້າຂອງໄຫລຜ່ານ ເຖີງ3ຮ່ອງ ຊຶ່ງຖ້າຕັນໄວ້2ຮ່ອງ-ຍັງເຫລືອຮ່ອງນຶ່ງ ກໍຍັງເຮັດໃຫ້ມີນໍ້າໄຫລຜ່ານມາໄດ້ສະດວກຢູ່ ແຕ່ກໍຈະເຮັດໃຫ້ນໍ້າທີ່ໄຫລຜນ ມີຄວາມຮຸນແຮງຂຶ້ນກວ່າເກົ່າ ແລ້ວນໍ້າກໍຈະທັ່ງເຂົ້າມາຝັ່ງເມືອງປາກລາຍ ຫລາຍ. ນອກນັ້ນ ໃນຣະດູແລ້ງ ການຕັນຮ່ອງນໍ້າໃຫ້ເຫລືອພຽງຮ່ອງດຽວ ກໍຈະເຮັດໃຫ້ແມ່ນໍ້າແຫ້ງຂອດ ໄວຂຶ້ນ ຊຶ່ງເປັນບັນຫາທີ່ຊາວບ້ານບໍ່ຮູ້ ຮູ້ພຽງແຕ່ວ່າຈະມີການສ້າງເຂື່ອນ ແລະຈະເຮັດທາງນໍ້າໃຫ້-ບໍ່ມີບັນຫາ. ນັກວິຊາການທ່ານນີ້ ກ່າວຕໍ່ໄປວ່າ

(ສຽງ) "ໃທບ້ານວ່າ ມັນບໍ່ເປັນຫຍັງດອກ ມັນຊິມີທາງນໍ້າຢູ່ແລ້ວ ເຂົາກໍມາໄຊ້ເລື່ອງວ່າ ບໍຣິເວນນັ້ນ ມັນມີປາໄຫລໄຟຟ້າ ກໍເລີຍຕ້ອງຣະເບີດ ຕອນນີ້ເຣີ່ມຣະເບີດແລ້ວ ຣະເບີດຫີນໄຕ້ນໍ້າ ຣະເບີດມື້ລະ 14ລູກ."

ເຂື່ອນປາກລາຍ ຖືເປັນນຶ່ງໃນຈໍານວນທັງໝົດ 6ເຂື່ອນທີ່ຈະສ້າງທີ່ຈະສ້າງ ໃສ່ແມ່ນໍ້າຂອງສາຍຫລັກ ທີ່ຣັດຖະບານລາວໄດ້ລົງນາມ ໃນບັນທຶກຄວາມເຂົ້າໃຈກັບ ບໍຣິສັດຈາກປະເທດຈີນ ໄທ ວຽດນາມແລະມາເລເຊັຽ ໃຫ້ເຂົ້າມາສຶກສາຄວາມເປັນໄປໄດ້ ໃນການສ້າງ. ແຕ່ເຖີງຢ່າງໃດ ທາງການລາວກໍຄວນ ສຶກສາການສ້າງເຂື່ອນໃສ່ແມ່ນໍ້າຂອງ ໃນເຂດແດນຂອງຈີນ ທີ່ເຮັດໃຫ້ເຫັນວ່າ ຫາກມີການກໍ່ສ້າງເຂື່ອນກັ້ນແມ່ນໍ້າຂອງ ກໍຈະເຮັດໃຫ້ປະເທດທີ່ຢູ່ຕອນລຸ່ມ ໄດ້ຮັບຜົນກະທົບກະເທືອນຍ້ອນ -ເປັນຕົ້ນວ່າ ພັນປາແລະປະລິມານນໍ້າ ໃນເຂດປະເທດທີ່ຢູ່ໄຕ້ລົງມາ ລຸດໜ້ອຍຖອຍລົງຢ່າງຫລວງຫລາຍ ໃນປັດຈຸບັນ.

ມະນີຈັນ ຣາຍງານ