ຜູ້ທີ່ເຄີຽຕິດຝິ່ນ ຢູ່ໃນລາວ ຫລັງຈາກ ເຂົາເຈົ້າ ຢ່າຈາກຕິດຝິ່ນແລ້ວ ບາງຈຳນວນ ກໍຫັນມາໄຊ້ ຢາເສບຕິດ ປະເພດອື່ນ ອີກແທນ

ຜູ້ທີ່ເຄີຽຕິດຝິ່ນ ຢູ່ໃນລາວ ຫລັງຈາກ ເຂົາເຈົ້າຢ່າຈາກຕິດຝິ່ນແລ້ວ ບາງຈຳນວນ ກໍຫັນມາໄຊ້ຢາເສບຕິດ ປະເພດອື່ນອີກແທນ. ຕາມທີ່ເຈົ້າໜ້າທີ ່ຄະນະກັມະການ ກວດກາ ແລະຄວບຄຸມຢາເສບຕິດ ແຫ່ງຊາດລາວໄດ້ກ່າວ.

(ສຽງ) "ເຂົາເຈົ້າເຄີຽເສບຢາຝິ່ນ ຈນວນນຶ່ງ ເຮົາກໍປິ່ນປົວ ແຕ່ປິ່ນປົວ ບໍ່ທັນໝົດ ແລ້ວຈຳນວນນຶ່ງ ປົວແລ້ວກໍກັບຄືນ ມາເສບອີກ ແລ້ວພວກນີ້ ມີຄວາມຕ້ອງການເສບຢາບ້າ ຢາເຮໂຣອີນ ແທນຝິ່ນແລ້ວ ພວກນີ້ກໍມີຄວາມຕ້ອງການຫລາຍຂື້ນ ."

ຜ່ານມາ ຣັຖະບານລາວ ໄດ້ດຳເນີນການລຶບລ້າງ ການປູກຝີ່ນ ແລະໄດ້ປະສົບຜົນ ສຳເຣັດ ຕາມຄາດໝາຍ ທັງໄດ້ສົ່ງເສີມ ໃຫ້ປະຊາຊົນ ທີ່ເຊົາປູກຝິ່ນຫັນໄປປູກ ພືດກະເສດ ເພື່ອເປັນການທົດແທນ.

ໃນດ້ານຂອງຜູ້ຕິດຝິ່ນນັ້ນ ທາງການລາວ ກໍສາມາດ ປິ່ນປົວຜູ້ຕິດຝິ່ນ ໃຫ້ຫລຸດລົງຢ່າງຫລວງຫລາຍ. ແຕ່ວ່າມາຮອດປັດຈຸບັນ ນີ້ ຣັຖະບານລາວ ໄດ້ປະສົບກັບຄວາມຍຸ່ງຍາກ ໃນການຫ້າມບໍ່ໃຫ້ຄົນກັບຄືນໄປ ປູກຝິ່ນ ແລະຍຸ່ງຍາກ ໃນການເຮັດໃຫ້ຜູ້ເຊົາສູບຝິ່ນ ແລ້ວນັ້ນກັບຄືນໄປສູບຝິ່ນ ອີກໃໝ່ຫລືຫັນໄປ ໄຊ້ຢາເສບຕິດ ປະເພດອື່ນ ໂດຍປ່ຽນແປງວິທີໄຊ້ໄປເລື້ອຍໆ.

(ສຽງ) "ເຂົາກໍໄຊ້ ຢາພາຣາເຊຕາມອນຜະສົມຝິ່ນ ແລ້ວກໍເສບ ຈຳນວນນຶ່ງ ເຂົາກໍເສບຢາເຮໂຣອີນ ແລ້ວແຕ່ເງື່ອນໄຂ ຂອງແຕ່ລະຄົນ ມີເງື່ອນໄຂແນວໃດ ກໍຫາທຸກເງື່ອນໄຂເສບຄືນ ."

ຢາເຮໂຣອີນ ເປັນຢາເສບຕິດທີ່ມີຣາຄາແພງ ແລະບໍ່ແມ່ນທຸກຄົນ ສາມາດຜລິດໄດ້ ເວັ້ນເສັຽຈາກກຸ່ມຜລິດ ຢາເສບຕິດອາຊີບ ເພາະວ່າຕ້ອງຊື້ສານເຄມີ ປະເພດອື່ນ ມາປະສົມ. ມັນເປັນເຣື້ອງແປກໃຈ ທີ່ຊົນເຜົ້າທີ່ອາໃສ ຢູ່ໃນເຂດສອກຫລີກ ແລະຫ່າງໄກ ສາມາດເສບເຮໂຣອີນໄດ້.

ສົມເນ ຣາບງານ