ສປປລາວ ລົງນາມໃນສັນຍາ ເພື່ອໃຫ້ບໍຣິສັທ ອີຕາລຽນ-ໄທຽ ປັບປຸງສນາມບິນ ເມືອງປາກເຊ ແຂວງຈຳປາສັກ

ເຈົ້າໜ້າທີ່ກະຊວງໂຍທາ ແລະກາຣຂົນສົ່ງໄດ້ເປີດເຜີຽວ່າ: ທາງກາຣກ່ຽວຂ້ອງ ຂອງ ລາວໄດ້ລົງນາມ ໃນຂໍ້ສັນຍາ ອະນຸຍາດ ໃຫ້ທາງບໍຣິສັທອີຕາລຽນ-ໄທຽ ດຳເນີນກາຣປັບ ປຸງ/ຂຍາຍຕໍ່ເຕີມລານແລ່ນຂື້ນລົງ ຂອງເຮືອບິນ ທີ່ເດີ່ນເຮືອບີນ ເມືອງປາກເຊ ແຂວງ ຈຳປາສັກ ໃຫ້ຍາວອອກໄປຕື່ມອີກ ເຖີງ 2,800 ແມ໊ຕ.

ພ້ອມກັບ ໃຫ້ມີກາຣຕິດຕັ້ງອຸປ ກອນໄຟຟ້າ ໃນທົ່ວສນາມບິນ ເພື່ອໃຫ້ສາມາດ ຮອງຮັບເຮືອບິນ ຂນາດກາງເຊັ່ນ: Boeing 737 ຫລື Airbus ຂນາດ A320 ແລະ A321 ໃຫ້ໄດ້ ຊື່ງໂຄງກາຣດັ່ງ ກ່າວຕົກເປັນມູລຄ່າທັງໝົດ 230 ລ້ານບາທ ໂດຽມີກາຣຄາດໝາຍ ໃຫ້ສ້າງແລ້ວໝົດ ພາຍໃນ 15 ເດືອນ.

ເຈົ້າໜ້າທີ່ລາວດັ່ງກ່າວ ໄດ້ແຈ້ງເພີ່ມວ່າ: ໃນປັຈຈຸບັນນີ້ ສນາມບິນ ເມືອງປາກເຊ ດັ່ງກ່າວ ສາມາດຮອງຮັບໄດ ້ແຕ່ເຮືອບິນ ຂນາດນ້ອຍ ທີ່ບັນຈຸພຽງ 50-70 ທີ່ນັ່ງໂດຽມີ ແຕ່ສາຍກາຣບິນລາວ ແລະບາງກອກ ແອຣ໌ເວຍ໌ເທົ່ານັ້ນ ທີ່ໃຊ້ບໍຣິກາຣ ແລະເຊື່ອວ່າຖ້າ ມີກາຣສ້າງ ເປັນທີ່ສຳເຣັຈຮຽບຮ້ອຍແລ້ວ ກໍຍີ່ງຈະສ້າງຄວາມສະດວກ ທາງດ້ານພັທນາ ກາຣທ່ອງທ່ຽວ ຫລາຍເພີ່ມຂື້ນ ແລະວ່າຕລອດປີ 2007 ຜ່ານມາມີນັກທ່ອງທ່ຽວເຂົ້າ ມາທ່ຽວຊົມ ແຂວງຈຳປາສັກ ທັງໝົດປະມານ 165,700 ຄົນ ແຕ່ສະເພາະຜູ້ໂດຽສາຣ ທີ່ໃຊ້ສນາມບິນ ເມືອງປາກເຊ ກໍມີປະມານ 30,000 ຄົນ.

ເຖີງຢ່າງໃດກໍຕາມເງີນທຶນ ສຳຫລັບກາຣປັບປຸງ ສນາມບິນດັ່ງກ່າວ ແມ່ນທາງຣັຖ ບາລໄທຽ ໃຫ້ກູ້ຢືມໂດຽມີກາຣຕົກລົງ ໃນຂໍ້ສັນຍາກັນ ໃນເດືອນມີນາ 2007 ຜ່ານມາ ຊື່ງນອກຈາກໃຫ້ຢືມ ໃນອັຕຣາດອກເບັ້ຽຕໍ່າ ແລ້ວຍັງມີກາຣ ໃຫ້ແບບຊ່ວຍເຫລືອລ້າໆ 96 ລ້ານບາທຕື່ມອີກ.

ຫວາດ ສີມູນ ຣາຍງານ