ການເມືອງ ລາວ ພາຍໃຕ້ ຄໍາໄຕ ສີພັນດອນ ພາກ 4
2007.09.07
ບົດວິຈານ ໂດຍ: ລູກໄຜ່ໜາມ
ແນ່ນອນວ່າ ສະຖານະການ ແວດລ້ອມ ຕ່າງໆ ໃນປັດຈຸບັດ ຍ່ອມມີຄວາມແຕກຕ່າງກັບ ລະຍະ 5 ປີ ກ່ອນໜ້ານີ້ ສຳລັບອຳນາດທາງການເມືອງ ໃນລາວແລ້ວ ຍ່ອມບໍ່ມີຄວາມແຕກຕ່າງ ກັບເມື່ອ 5 ປີ ທີ່ແລ້ວ ແຕ່ຢ່າງໃດ.
ເພາະການຈະເພີ້ມ ຫຼື ລຸດຈຳນວນກົມການເມືອງ ແລະ ກັມມະການ ບໍຣິຫານງານ ສູນກາງພັກ ນັ້ນ ຜູ້ນຳຍ່ອມຈະມີຄຳອະທິບາຍ ທີ່ໜ້າຟັງສເມີ.
ດັ່ງກໍຣະນີ ຂອງການກຳນົດເປົ້າໝາຍ ທີ່ຈະນຳພາ ປະເທດຊາດ ເພື່ອໃຫ້ຫລຸດພົ້ນ ຈາກສະພາບ ດ້ອຍພັທະນາ ພາຍໃນ ປີ 2020 ນັ້ນ, ຈະວ່າໄປແລ້ວ ກໍບໍ່ແມ່ນເຣື້ອງໃໝ່ ແຕ່ຢ່າງໃດ ເພາະພັກ ໄດ້ກຳນົດເປົ້າໝາຍ ດັ່ງກ່າວນີ້ ນັບຕັ້ງແຕ່ກອງປະຊຸມໃຫຍ່ ຄັ້ງທີ 5 ເມື່ອປີ 1991 ມາແລ້ວ ພຽງແຕ່ວ່າ ລະຍະເວລາເທົ່ານັ້ນ ຍັງບໍ່ມີການກຳນົດລາຍຣະອຽດ ຂອງເປົ້າໝາຍໄວ້ ໃນແຜນການຢ່າງຄັກແນ່ ຄືໃນທຸກມື້ນີ້ເທົ່ານັ້ນ.
ແນ່ນອນວ່າ ສາເຫດທີ່ພັກປະຊາຊົນ ປະຕິວັດລາວ ຈຳເປັນຕ້ອງໃຫ້ ລາຍລະອຽດ ກ່ຽວກັບ ແຜນການເປົ້າໝາຍ ດັ່ງກ່າວນີ້ ກໍເພື່ອເຮັດໃຫ້ປະຊາຊົນລາວ ໄດ້ແລເຫັນອານາຄົດ ໃນວັນຂ້າງໜ້າ ຂອງພວກຕົນ ໄດ້ຢ່າງເປັນຮູບທັມຫລາຍຂຶ້ນ ວ່າການຫລຸດພົ້ນຈາກສະພາບ ດ້ອຍພັທະນາ ແລະ ຄວາມຍາກຈົນນັ້ນ ເປັນຢ່າງໃດ.
ເພາະສິ່ງທີ່ພັກ ໄດ້ປະກາດໄວ້ ກັບປະຊາຊົນລາວ ໃນລະຍະກ່ອນໜ້ານີ້ນັ້ນ ບໍ່ອາດທີ່ຈະເກີດຂຶ້ນ ໄດ້ ໃນຄວາມເປັນຈິງຢູ່ແລ້ວນັ້ນເອງ.
ສະນັ້ນ ການທີ່ພັກໄດ້ປະກາດ ແຜນການເປົ້າໝາຍໃໝ່ ດັ່ງກ່າວ ໃນດ້ານນຶ່ງນັ້ນ ຍ່ອມນັບເປັນ ຄຳໝັ້ນສັນຍາ ທີ່ຕ້ອງການ ຈະສົ່ງເສີມຄວາມເຊື່ອໝັ້ນ ຂອງປະຊາຊົນ ໃຫ້ກັບມາມີຕໍ່ພັກ ອີກເທື່ອນຶ່ງ, ແຕ່ໃນອີກດ້ານນຶ່ງນັ້ນ ຍ່ອມເປັນໄປບໍ່ໄດ້ເລີຍ ທີ່ຈະມີໃຜຄອຍຖ້າ ເຖິງ 20 ປີ ເພື່ອພິສູດວ່າ ຄຳໝັ້ນ ສັນຍາ ດັ່ງກ່າວ ຂອງພັກຈະເກີດຂຶ້ນ ແທ້ຈິງ ຫລືບໍ່.
ດ້ວຍເຫດນີ້ ຈຶ່ງເຮັດໃຫ້ພັກຈຳເປັນຕ້ອງກຳນົດແຜນການ ທີ່ຄັກແນ່ ແລະ ເປົ້າໝາຍ ຢ່າງເປັນຮູບທັມ ໃນລະຍະ 5 ປີ ຂ້າງໜ້ານີ້ ເຊັ່ນ ການລຸດຜ່ອນບັນຫາຄວາມຍາກຈົນ ຂອງປະຊາຊົນ ລາວ ໃຫ້ໄດ້ ຢ່າງໜ້ອຍເຄິ່ງນຶ່ງ ຈາກຣະດັບທີ່ເປັນຢູ່ ໃນປັດຈຸບັນ, ການຍຸຕິ ການປູກຝິ່ນໃນລາວ ໃຫ້ໄດ້ຢ່າງແທ້ຈິງ ໃນປີ 2005 ນັ້ນເອງ. ເພາະສະນັ້ນ ສິ່ງທີ່ຈະຕ້ອງຈັບຕາເບິ່ງ ຕໍ່ໄປ ກໍຄືຄຳໝັ້ນສັນຍາ ທັງ 3 ປະການ ດັ່ງກ່າວນີ້ ຈະສາມາດ ເກີດຂຶ້ນໄດ້ແທ້ຈິງ ຫລືບໍ່ ແຕ່ທີ່ແນ່ໆ ກໍຄື ບຸກຄະລາກອນສ່ວນໃຫຍ່ ໃນສູນກາງອຳນາດ ຂອງພັກ ປະຊາຊົນ ປະຕິວັດລາວ ໃນປັດຈຸບັນນີ້ ກໍຍັງຄົງເປັນ "ຄົນໜ້າເກົ່າ" ແຕ່ເຖິງຢ່າງໃດ ກໍດີ ກຸ່ມຄອງອຳນາດ ໃນລາວ ກໍບໍ່ໄດ້ນິ່ງນອນໃຈ ຕໍ່ເຫດການ 11 ກັນຍາ 2001 ທີ່ເກີດຂຶ້ນກັບສະຫະຣັດ ອາເມຣິກາ ພຽງແຕ່ວ່າ ຍັງເບິ່ງບໍ່ເຫັນຜົນສະທ້ອນ ອັນໃດທີ່ຈະມີຕໍ່ລາວ ນອກເໜືອໄປຈາກການທີ່ມີນັກທ່ອງທ່ຽວ ຈາກສະຫະຣັດ ອາເມຣິກາ ແລະ ຢູໂຣບ ເດີນທາງເຂົ້າໄປ ທ່ອງທ່ຽວ ໃນລາວໜ້ອຍລົງເທົ່ານັ້ນ. ສ່ວນການທີ່ຈະເຮັດໃຫ້ລາວ ຕ້ອງພົບພໍ້ກັບບັນຫາ ການກໍ່ການຮ້າຍສາກົນ ໂດຍຕຣົງນັ້ນ ຄົງບໍ່ແມ່ນປະເດັນ ທີ່ລາວ ຕ້ອງມີຄວາມກັງວົນໃຈ ແຕ່ຢ່າງໃດເລີຍ ຫາກຈະມີກໍຣະນີ ທີ່ກວນໃຈຢູ່ແດ່ ກໍຄື ການກໍ່ກວນ ຄວາມສະງົບ ຮຽບຮ້ອຍພາຍໃນລາວ ຂອງ "ກຸ່ມຄົນ ບໍ່ດີ" ເທົ່ານັ້ນ.
ທັງນີ້ ເນື່ອງຈາກໄດ້ເກີດເຫດການ ບໍ່ສະງົບຂຶ້ນ ໃນລາວຫລາຍເທື່ອ ຕິດຕໍ່ກັນ ນັບຈາກທ້າຍປີ 1999 ທີ່ນັກສຶກສາລາວ ຮວມຕົວກັນປະທ້ວງ ໃນໃຈກາງນະຄອນວຽງຈັນ ເພື່ອຮຽກຮ້ອງຄວາມມີ ປະຊາທິປະໄຕ ທາງການເມືອງ ໃນລາວ.
ຕໍ່ດ້ວຍການວາງລະເບີດ ໃນນະຄອນຫລວງວຽງຈັນ ຫລາຍກ່ວາ 10 ເທື່ອ ໃນລະຍະ 6 ເດືອນທຳອິດ ຂອງປີ 2000 ໂດຍທີ່ທາງການລາວ ບໍ່ສາມາດຈັບກຸມ ກຸ່ມທີ່ວາງລະເບີດ ດັ່ງກ່າວໄດ້ ແມ່ນແຕ່ຄົນດຽວ ເຊັ່ນດຽວກັນກັບການດັກຍິງ ຣົດໂດຍສານປະຈຳທາງ ເຖິງ 2 ເທື່ອ ໃນພື້ນທີ່ ແຂວງວຽງຈັນ ໃນຣະຫວ່າງເດືອນກຸມພາ ແລະ ເມສາ 2003 ຜ່ານມາ.
ສ່ວນກໍຣະນີ ທີ່ຖືວ່າ ມີພັທະນາການ ຢ່າງຕໍ່ເນື່ອງທີ່ສຸດ ຢ່າງກໍຣະນີ ຂອງຜູ້ຕ້ອງຫາໃນຄະດີ ດ່ານ ບ້ານວັງເຕົ່າ, ຊ່ອງເມັກ ຊຶ່ງທາງການລາວ ໄດ້ຢຳ້ມາໂດຍຕະລອດວ່າ ເປັນພຽງກຸ່ມໂຈນປຸ້ນຊັບ ແລະ ທຳລາຍຊັບສິນ ຂອງລາວ ເທົ່ານັ້ນກໍຕາມ.
ໃນຂະນະທີ່ສານອາຍາ ຂອງໄທ ໄດ້ຕັດສິນໄປແລ້ວ ໃນວັນທີ 11 ເດືອນມິຖຸນາ 2003 ທີ່ຜ່ານມານີ້ວ່າ ພຶດຕິການ ຂອງຜູ້ຕ້ອງຫາ ໃນກຸ່ມດັ່ງກ່າວນີ້ ເປັນການເຄື່ອນໄຫວ ທາງການເມືອງ ເພື່ອຮຽກຮ້ອງປະຊາທິປະໄຕ ໃນລາວ ຈຶ່ງເຮັດໃຫ້ທາງການໄທ ບໍ່ສາມາດສົ່ງຕົວໄປໃຫ້ທາງການລາວໄດ້ ໃນຖານະຜູ້ຮ້າຍຂ້າມແດນ.
ເຖິງຢ່າງໃດ ກໍຕາມ ທາງການລາວ ກໍໄດ້ຍື່ນອຸທອນ ເພື່ອຂັດຄ້ານ ຄຳຕັດສິນ ດັ່ງກ່າວ ຂອງສານອາຍາໄທ ຢ່າງເປັນທາງການແລ້ວ ໃນຂະນະນີ້.
ເພາະສະນັ້ນ ຈຶ່ງຍັງບໍ່ແນ່ນອນວ່າ ຄະດີດັ່ງກ່າວ ຈະຍືດເຍື້ອ ຕໍ່ໄປອີກດົນປານໃດ, ແຕ່ ທີ່ແນ່ໆ ກໍຄື ເຫດການທີ່ກ່າວມາທັງໝົດ ນັບຕັ້ງແຕ່ທ້າຍປີ 1999 ເປັນຕົ້ນມາ ຈົນຮອດສູ່ມື້ນີ້ນັ້ນ ລ້ວນແລ້ວ ແຕ່ເກີດຂຶ້ນ ໃນຍຸກທີ່ ພົນເອກ ຄຳໄຕ ສີພັນດອນ ຄອງອຳນາດສູງສຸດ ໃນລາວທັງນັ້ນ, ຈຶ່ງໜ້າ ຈະຖືໄດ້ວ່າ ເປັນຍຸກເຊື່ອມໂຊມທີ່ສຸດ ຂອງພັກປະຊາຊົນ ປະຕິວັດລາວ.