ການເມືອງ ລາວ ພາຍໃຕ້ ຄໍາໄຕ ສີພັນດອນ ພາກ 3
2007.09.07
ບົດວິຈານ ໂດຍ: ລູກໄຜ່ໜາມ
ທ່ານ ເຈີ ຍິງ ວັງ ເຈົ້າແຂວງ ແຂວງຫົວພັນ, ທ່ານ ສົມບັດ ເຢັຍ ລິ ເຮີ້ ເຈົ້າແຂວງ ແຂວງໄຊຍະບູຣີ, ທ່ານ ທອງບັນ ແສງອາພອນ ເຈົ້າແຂວງ ແຂວງບໍຣິຄໍາໄຊ, ທ່ານ ທອງຫວັງ ສີຫາຈັກ ເຈົ້າແຂວງ ແຂວງຈໍາປາສັກ ຄົນໃໝ່ ແລະ ທ່ານ ອ່ອນເນື້ອ ພົມມະຈັນ ຣັຖມົນຕຣີ ກະຊວງ ອຸດສາຫະກັມ-ຫັດຖະກັມ ຕ່າງກໍໄດ້ຖືກແຕ່ງຕັ້ງ ໃນຣະຫວ່າງ ທີ່ພົນເອກ ຄໍາໄຕ ເປັນປະທານປະເທດ ຄວບປະທານພັກ.
ສວ່ນ ທ່ານ ສຸບັນ ສະລິດທິລາດ ກໍໄດ້ຮັບໃຊ້ຜູ້ນຳປະເທດ ຢ່າງໃກ້ຊິດ ໃນຖານະ ຣັຖມົນຕຣີ ປະຈຳສຳນັກງານ ປະທານປະເທດ ຮັບຜິດຊອບ ດ້ານນະໂຍບາຍ ກ່ຽວກັບຢາເສບຕິດ ແລະ ການຮ່ວມມື ກັບຕ່າງປະເທດ ເປັນຫລັກ.
ໃນຂະນະທີ່ ທ່ານ ຊ່ຽນ ສະພານທອງ ໄດ້ຮັບໃຊ້ພັກ ໃນຖານະ Technocrat ທາງດ້ານ ກະເສດ ແລະ ປ່າໄມ້ ມາເປັນເວລານານກ່ວາ 25 ປີ ນັບຕັ້ງແຕ່ເກີດການປ່ຽນແປງ ທາງດ້ານການເມືອງ ໃນລາວ ເມື່ອປີ 1975, ທັງເປັນບຸກຄະລາກອນ ຣະດັບສູນກາງພັກ ພຽງຄົນດຽວ ເທົ່ານັ້ນ ທີ່ຈົບ ປຣິນຍາເອກ ໃນດ້ານກະເສດ ແລະ ປ່າໄມ້ ຈາກຣັດເຊັຍ ອີກດ້ວຍ. ເຊັ່ນດຽວກັນກັບ ທ່ານ ປອນເມກ ດາລາລອຍ ດຸສດີ ບັນດິດ ທາງການແພດ ຈາກຝຣັ່ງເສດ.
ທີ່ສໍາຄັນ ກໍຄືກຸ່ມປະເທດ ທີ່ໃຫ້ຄວາມຊ່ອຍເຫລືອ ແກ່ລາວ ໄດ້ເນັ້ນຄວາມສຳຄັນ ເປັນພິເສດ ຕໍ່ການເຄື່ອນໄຫວ ຂອງທາງການລາວ ກ່ຽວກັບ ແຜນການພັທະນາ ສາທາຣະນະສຸກ ຂັ້ນພື້ນຖານ ແລະ ແຜນການພັທະນາ ຊົນນະບົດ ເພື່ອແກ້ໄຂ ບັນຫາຄວາມຍາກຈົນ.
ດັ່ງຈະເຫັນໄດ້ ຢ່າງແຈ່ມແຈ້ງ ຈາກການກຳນົດໄວ້ ເປັນເງື່ອນໄຂ ປະກອບການພິຈາຣະນາ ຕັດສິນໃຈ ເພື່ອໃຫ້ການຊ່ອຍເຫລືອ ແກ່ລາວ ໃນລະຍະຕໍ່ໄປ. ຊຶ່ງບໍ່ແມ່ນເຣື້ອງແປກໃຈ ອີກເຊັ່ນກັນ ທີ່ພັກຈະຕ້ອງອາໃສ ຄວາມຮູ້ຄວາມສາມາດ ຂອງຄົນ ຢ່າງທ່ານ ສຸບັນ, ທ່ານ ຊ່ຽນ ແລະ ດຣ. ປອນເມກ ໃນຖານະ ທີ່ເປັນ Technocrat ທີ່ມີຄວາມຈຳເປັນ ຢ່າງຍິ່ງ ຕໍ່ການເສີມສ້າງຄວາມເຂັ້ມແຂງ ແລະ ປະສິດທິພາບ ຂອງພັກປະຊາຊົນ ປະຕິວັດລາວ ໃນການນຳພາ ປະເທດລາວ ຕໍ່ໄປ.
ສ່ວນການເຂົ້າມາໃນ ກັມມະການ ສູນກາງພັກ ຂອງຄົນອື່ນໆນັ້ນ ຍິ່ງເປັນເຣື້ອງທຳມະດາ ເພາະໂດຍທຳນຽມ ປະຕິບັດ ກໍຄື ການມີຕຳແໜ່ງ ໃນວົງການຈັດຕັ້ງມະຫາຊົນ ຂອງພັກ ຍ່ອມໝາຍເຖິງ ການທີ່ຈະຕ້ອງໄດ້ເຂົ້າມາຢູ່ ກັມມະການສູນກາງພັກ ຢູ່ແລ້ວ.
ທັງນີ້ ບໍ່ວ່າ ຈະເປັນ ທ່ານ ແຫວນທອງ ຫລວງວິໄລ ປະທານສູນກາງ ຊາວໜຸ່ມປະຕິວັດ, ທ່ານ ບົວລານ ສິຣິປັນຍາ ຊຶ່ງມາຈາກສະຫະພັນ ກັມມະບານ (ແຮງງານ) ຫລື ທ່ານ ສີໂຫ ບັນນະວົງ ທີ່ມາຈາກແນວລາວສ້າງຊາດ ກໍຕາມ.
ສ່ວນທີ່ຫລືອ ນອກນັ້ນ ກໍຄື ໂຄຕ້າ ຂອງຝ່າຍຄວາມໝັ້ນຄົງ ແລະ ປ້ອງກັນຄວາມສະງົບ ຮຽບຮ້ອຍ ພາຍໃນປະເທດ ເຊັ່ນ ກອງທັບປະຊາຊົນລາວ ຊຶ່ງມີພົນເອກ ຄຳໄຕ ເປັນຜູ້ມີອຳນາດສູງສຸດ ໃນການບັງຄັບບັນຊາ.
ເພາະສະນັ້ນ ຈຶ່ງບໍ່ໜ້າແປກໃຈ ແຕ່ຢ່າງໃດ ທີ່ຄະນະກັມມະການບໍຣິຫານງານ ສູນກາງພັກ ຈະລົງມະຕິ ຢ່າງເປັນເອກກະສັນ ເລືອກໃຫ້ພົນເອກ ຄຳໄຕ ເປັນປະທານພັກ ຕໍ່ໄປອີກ ນຶ່ງສມັຍ.
ນອກຈາກນີ້ ເຖິງແມ່ນວ່າ ພັກຈະໄດ້ອອກກົດຣະບຽບໃໝ່ ກຳນົດໃຫ້ສະມາຊິກແຕ່ລະຄົນ ສາມາດ ຢູ່ໃນຕຳ່ແໜ່ງ ທາງການເມືອງ ແລະ ການປົກຄອງໄດ້ບໍ່ເກີນ 2 ສມັຍ ຫຼື ບໍ່ເກີນ 10 ປີ ຕິດຕໍ່ ສະມາຊິກພັກ ໃນຄະນະຣັຖບານ ແລະ ຄະນະປົກຄອງແຂວງ ຊຸດປັດຈຸບັນນີ້ ແຕ່ຢ່າງໃດ.
ເນື່ອງຈາກກົດຣະບຽບໃໝ່ນີ້ ບໍ່ມີຜົນບັງຄັບ ຢ້ອນຫລັງ ແຕ່ຢ່າງໃດ ເຊັ່ນກົດຣະບຽບໃໝ່ສບັບນີ້ ມີຜົນບັງຄັບໃຊ້ ຢ່າງເປັນທາງການ ນັບຈາກວັນທີ 1 ພຶສພາ 2001 ເປັນຕົ້ນມາ, ແຕ່ການຈັດຕັ້ງ ຄະນະຣັຖບານຊຸດໃໝ່ ໄດ້ມີຂຶ້ນຕັ້ງແຕ່ເດືອນ ມີນາ 2001 ແລ້ວ.
ສະນັ້ນ ຈຶ່ງໝາຍຄວາມວ່າ ສະມາຊິກພັກ ທີ່ຢູ່ໃນຕຳແໜ່ງ ທາງການເມືອງ ແລະ ການປົກຄອງມາແລ້ວ 2 ສມັຍ ຫຼື 10 ປີ ຕິດຕໍ່ກັນ ຈົນເຖິງກ່ອນລະຍະ ເດືອນພຶສພາ 2001 ກໍຈະຍັງ ສາມາດໄດ້ຮັບແຕ່ງຕັ້ງກັບມາຢູ່ໃນຕຳແໜ່ງເດີມ ໄດ້ຕໍ່ໄປອີກ ເຖິງ 2 ສມັຍ ຫຼື 10 ປີ ນັ້ນເອງ.
ທີ່ຫນ້າສັງເກດ ອີກປະການນຶ່ງ ກໍຄື ຜູ້ນຳພັກປະຊາຊົນ ປະຕິວັດລາວ ອະທິບາຍເຖິງສາເຫດ ທີ່ຈຳເປັນຕ້ອງເພີ້ມຈຳນວນ ກັມມະການກົມການເມືອງ ແລະ ກັມມະການບໍຣິຫານງານ ສູນກາງພັກ ໃນເທື່ອຫລັງສຸດນີ້ວ່າ.
"… ເພື່ອໃຫ້ສອດຄ່ອງ ກັບສະຖານະການ ໃນປັດຈຸບັນ ເນື່ອງຈາກພາຣະກິດພັກ ໃນການນຳພາ ປະເທດຊາດ ມີຫລາຍຂຶ້ນ… "
ແຕ່ເມື່ອ 5 ປີກ່ອນໜ້ານີ້ ເຊັ່ນໃນກອງປະຊຸມໃຫຍ່ ຄັ້ງທີ 6 ຂອງພັກ ໃນປີ 1996 ຜູ້ນຳພັກ ກໍໄດ້ໃຫ້ເຫດຜົນ ກ່ຽວກັບການປັບລຸດ ຈໍານວນກົມການເມືອງ ຈາກ 11 ຄົນ ໃຫ້ເຫລືອພຽງ 9 ຄົນ ແລະ ລຸດຈຳນວນກັມມະການ ບໍຣິຫານງານ ສູນກາງພັກ ຈາກ 55 ຄົນ ເຫລືອ 49 ຄົນວ່າ "… ເພື່ອເຮັດໃຫ້ການບໍຣິຫານງານ ຂອງພັກ ມີຄວາມຄ່ອງຕົວ ຫລາຍຂຶ້ນກວ່າໃນອາດີດ… "