ການເມືອງ ລາວ ພາຍໃຕ້ ຄໍາໄຕ ສີພັນດອນ ພາກ 2
2007.09.07
ບົດວິຈານ ໂດຍ: ລູກໄຜ່ໜາມ
ກໍຣະນີ ທີ່ນັບວ່າ ເປັນການເຄື່ອນໄຫວໃໝ່ ທີ່ເກີດຂຶ້ນ ໃນວົງການອຳນາດ ທາງການເມືອງ ຂອງລາວ ໃນກອງປະຊຸມໃຫຍ່ ຂອງພັກປະຊາຊົນ ປະຕິວັດລາວ ຄັ້ງທີ 7 ກໍຄື ການປະກາດຈຸດຢືນ ໃນອັນທີ່ ຈະກະຈາຍອຳນາດ ການຕັດສິນໃຈ ແລະ ການບໍຣິຫານງານ ເພື່ອການພັທະນາ ໃນດ້ານຕ່າງໆ ໄປໃຫ້ ແກ່ອຳນາດການປົກຄອງ ສ່ວນທ້ອງຖິ່ນ ຫຼື ແຂວງ ຫລາຍຂຶ້ນ.
ພາຍໃຕ້ຍຸດທະສາດໃໝ່ ຂອງພັກ ໃນການພັທະນາປະເທດ ທີ່ກຳນົດໃຫ້ແຂວງ ເປັນຈຸດສູນຮວມ ຂອງຍຸດທະສາດ ການພັທະນາ ແລະ ເມືອງ ເປັນສູນຮວມທາງດ້ານແຜນການງົບປະມານ ສ່ວນໝູ່ບ້ານ ນັ້ນ ເປັນໜ່ວຍພື້ນຖານ ໃນການປະຕິບັດ ເພື່ອເສີມສ້າງຜົນຜລິດ ຫຼື ສິນຄ້າ ເພື່ອເສີມສ້າງຣາຍຮັບ.
ພ້ອມກັນນີ້ ພັກປະຊາຊົນ ປະຕິວັດລາວ ກໍໄດ້ປັບປຸງ ແກ້ໄຂ ກົດຣະບຽບ ຂອງພັກ ດ້ວຍການກຳນົດ ໃຫ້ສະມາຊິກພັກ ສາມາດທີ່ຈະຢູ່ໃນຕຳແໜ່ງ ທາງການເມືອງ ທັງໃນຄະນະຣັຖບານ ແລະ ຄະນະປົກຄອງແຂວງ ໄດ້ບໍ່ເກີນ 2 ສມັຍ ຫຼື ບໍ່ເກີນ 10 ປີ ຕິດຕໍ່ກັນ.
ການເຄື່ອນໄຫວໃໝ່ ໃນດ້ານອຳນາດ ດັ່ງກ່າວນີ້ ຜູ້ນໍາພັກປະຊາຊົນ ປະຕິວັດລາວ ໄດ້ອະທິບາຍວ່າ ເພື່ອເປັນການເປີດໂອກາດ ໃຫ້ຄົນຮຸ້ນໃໝ່ ຂອງພັກ ໄດ້ເຂ້ົາມາມີບົດບາດ ທາງການເມືອງ ແລະ ການພັທະນາ ປະເທດຊາດຫລາຍຂຶ້ນ, ຊຶ່ງຖ້າຫາກຈະພິຈາຣະນາ ຈາກ ບຸກຄະລາກອນ ຂອງພັກ ທີ່ໄດ້ຖືກແຕ່ງຕັ້ງ ໃຫ້ເຂົ້າໄປຢູ່ໃນຄະນະກັມການການເມືອງ ແລະ ຄະນະ ກັມມະການບໍຣິຫານງານ ສູນກາງພັກ ໃນຄັ້ງນີ້ ກໍເບິ່ງຄືວ່າ ພັກໄດ້ປະຕິບັດ ຕາມຈຸດຢືນ ກ່ຽວກັບ ການເປີດໂອກາດ ໃຫ້ຄົນຮຸ້ນໃໝ່ ໄດ້ເຂົ້າມາມີບົດບາດ ທາງການເມືອງ ຫລາຍຂຶ້ນ ດັ່ງທີ່ໄດ້ປະກາດໄວ້ ຢ່າງແທ້ຈິງ.
ເນື່ອງຈາກປະກົດວ່າ ມີສະມາຊິກ ທີ່ຖືວ່າ ເປັນຄົນຮຸ້ນໃໝ່ ຂອງພັກ ເຖິງ 3 ຄົນ ທີ່ໄດ້ຮັບ ການແຕ່ງຕັ້ງ ເປັນກົມການເມືອງ ໃນຂະນະດຽວກັນ ເກີດປະກົດວ່າ ມີຄົນຮຸ້ນໃໝ່ ຂອງພັກ ເຖິງ 12 ຄົນ ທີ່ໄດ້ເຂົ້າໄປຢູ່ ໃນຄະນະກັມມະການບໍຣິຫານງານ ສູນກາງພັກ ຊຶ່ງກໍເຮັດໃຫ້ສັດສ່ວນ ຂອງຄົນ ຮຸ້ນໃໝ່ ທີ່ຢູ່ໃນຄະນະກັມມະການບໍຣິຫານງານ ສູນກາງພັກ ມີຫລາຍກ່ວາ 71% ຈາກຈຳນວນ ຄະນະກັມມະການບໍຣິຫານ ສູນກາງພັກ ທັງໝົດ 53 ຄົນ.
ແຕ່ຢ່າງໃດ ກໍຕາມ ສັດສ່ວນດັ່ງກ່າວນີ້ ກໍບໍ່ແມ່ນສາຣະສຳຄັນ ຫຼື ອຳນາດສູງສຸດ ທີ່ແທ້ຈິງ. ໃນທາງການເມືອງ ຂອງລາວນັ້ນ ກໍຄື ກົມການເມືອງສູນກາງພັກ ຊຶ່ງໃນປັດຈຸບັນນີ້ ມີຈຳນວນ ທັງໝົດ 11 ຄົນ ໂດຍ 8 ຄົນ ໃນຈຳນວນນີ້ ກໍຄື "ຄົນເກົ່າແກ່" ຂອງພັກປະຊາຊົນ ປະຕິວັດລາວ ນັ້ນເອງ.
ນອກຈາກນີ້ ຖ້າພິຈາລະນາ ຈາກພື້ນຖານຄວາມຮູ້ ແລະ ໜ້າທີ່ການງານ ຂອງຜູ້ທີ່ເຂົ້າມາໃໝ່ ທັງ 3 ຄົນ ໃນກົມການເມືອງ ຂອງພັກປະຊາຊົນ ປະຕິວັດລາວ ເຊັ່ນ ທ່ານ ທອງລຸນ ສີສຸລິດ, ພົນຕຣີ ດວງໃຈ ພິຈິດ ແລະ ທ່ານ ບົວສອນ ບຸບຜາວັນ ກໍຍິ່ງເຮັດໃຫ້ເວົ້າໄດ້ວ່າ "ບໍ່ມີສິ່ງຜິດປົກະຕິ" ໃນວົງການອຳນາດ ສູງສຸດ ໃນລາວ. ເນື່ອງຈາກວ່າ ທ່ານ ທອງລຸນ ກໍຄື ຜູ້ທີ່ນັກປະຕິວັດ ຮຸ້ນທຳອິດ ໃນພັກ ຢ່າງທ່ານ ພູມີ ວົງວິຈິດ ສນັບສນູນ ສົ່ງເສີມເຂົ້າມາ ຢູ່ໃນກັມມະການສູນກາງພັກ ຕັ້ງແຕ່ປີ 1986, ສ່ວນພົນຕຣີ ດວງໃຈ ພິຈິດ ກໍຄື ນາຍທະຫານ ແຫ່ງກອງທັບປະຊາຊົນລາວ ທີ່ມີຄວາມໃກ້ຊິດ ແລະ ໄດ້ຮັບຄວາມໄວ້ວາງໃຈ ເປັນຢ່າງຍິ່ງ ຈາກພົນເອກ ຄໍາໄຕ ສີພັນດອນ. ເຊັ່ນດຽວກັນກັບ ທ່ານ ບົວສອນ ບຸບຜາວັນ ຊຶ່ງເຖິງແມ່ນວ່າ ຫາກໍໄດ້ຮັບການແຕ່ງຕັ້ງ ໃຫ້ເຂົ້າ ໄປຢູ່ໃນຄະນະກັມມະການບໍຣິຫານງານ ສູນກາງພັກ ເມື່ອປີ 1996 ກໍຕາມ ແຕ່ການທີ່ໄດ້ທຸ່ມເທ ຄວາມຮູ້ຢ່າງສຸດຄວາມສາມາດ ເພື່ອຮັບໃຊ້ພັກ ໃນຖານະ ຫົວໜ້າສຳນັກງານ ສູນກາງພັກ ໃນຣະຫວ່າງ ທີ່ພົນເອກ ຄຳໄຕ ເຣີ້ມດຳຣົງຕຳແໜ່ງ ປະທານພັກ ນັບຈາກປີ 1996 ເປັນຕົ້ນມາ.
ເພາະສະນັ້ນ ຈິ່ງບໍ່ແມ່ນເຣື້ອງແປກໃໝ່ ແຕ່ຢ່າງໃດ ທີ່ບຸກຄົນ ທັງ 3 ດັ່ງກ່າວນີ້ ຈະສາມາດ ເຂົ້າມານັ່ງ ໃນຄະນະກົມການເມືອງພັກ ຊຶ່ງຖືວ່າ ເປັນອົງການ ທີ່ມີອຳນາດ ຫລາຍທີ່ສຸດ ພາຍໃນພັກ ແລະ ປະເທດລາວ.
ຍິ່ງໄປກ່ວານັ້ນ ເມື່ອພິຈາລະນາ ປະກອບກັບແນວທາງ ຂອງພັກທີ່ໄດ້ປະກາດຢຳ້ ໃນກອງປະຊຸມ ໃຫຍ່ ຂອງພັກ ໃນຄັ້ງຫລັງສຸດນີ້ວ່າ ຈະດຳເນີການໃນທຸກວິຖີທາງ ເພື່ອຕໍ່ຕ້ານຣະບອບ ການເມືອງ ແບບຫລາຍພັກການເມືອງ ຢ່າງເຖິງທີ່ສຸດ ດ້ວຍການເຊີດຊູ ລັດທິ ມາກສ໌-ເລນິນ ຕໍ່ໄປຢ່າງບໍ່ຢຸດຢັ້ງນັ້ນ ຍິ່ງເຮັດໃຫ້ການກ້າວສູ່ ກົມການເມືອງ ຂອງທ່ານ ທອງລຸນ ແລະ ທ່ານ ບົວສອນ ດັ່ງກ່າວນີ້ ຈຶ່ງບໍ່ແມ່ນ ເຣື້ອງແປກໃຈ ແຕ່ຢ່າງໃດເລີຍ.
ເນື່ອງຈາກ ທັງທ່ານ ທອງລຸນ ແລະ ທ່ານ ບົວສອນ ຕ່າງກໍຈົບການສຶກສາ ໃນຣະດັບ ປຣິນຍາ ເອກ ທາງດ້ານທິສດີ ການເມືອງ ຈາກຣັດເຊັຍ ໂດຍຕຣົງ ຈຶ່ງນັບເປັນ ບຸກຄະລາກອນ ທີ່ສອດຄ່ອງ ກັບຄວາມຕ້ອງການ ຂອງພັກ. ສ່ວນຮຸ້ນໃໝ່ ອີກ 12 ຄົນ ທີ່ເຂົ້າມາຢູ່ໃນ ກັມມະການສູນກາງພັກ ຊຸດປັດຈຸບັນ ກໍບໍ່ແມ່ນ ອື່ນໄກ ເພາະສ່ວນໃຫຍ່ແລ້ວ ກໍຄື ຜູ້ທີ່ໄດ້ຮັບການສນັບສນູນ ສົ່ງເສີມ ຈາກ ພົນເອກ ຄຳໄຕ ໄດ້ໃຊ້ອຳນາດ ໃນຖານະ ປະທານປະເທດ ແຕ່ງຕັ້ງ ໃຫ້ເປັນເຈົ້າແຂວງ ຄຳມ່ວນ ເມື່ອທ້າຍປີ 2000 ນັ້ນເອງ.