ຣະບົບປ່າວເຕືອນພັຍເຂດ ຊົນນະບົດ

ຊາວບ້ານທີ່ປະສົບພັຍນໍ້າຖ້ວມ ໃນສອງສາມເດືອນຜ່ານມາ ຂໍຮ້ອງໃຫ້ ທາງການ ຕິດຕັ້ງ ຣະບົບ ກະຈາຍສຽງ ເພື່ອປະກາດປ່າວເຕືອນພັຍ ທັມມະຊາດ ທີ່ ຈະເກີດຂຶ້ນ ເຊັ່ນເຫດນໍ້າຖ້ວມແລະລົມພາຍຸ. ດັ່ງພໍ່ບ້ານ ໃນບ້ານນຶ່ງ ຂອງແຂວງອຸດົມໄຊເວົ້າວ່າ:

“ເປັນໄປໄດ້ ກໍຢາກຂໍຂັ້ນເທິງ ເພາະວ່າເພິ່ນຈັດບ້ານ ເປັນໃຫຍ່ບ້ານຍາວ ແລ້ວບັດນີ້ ການຮ້ອງການເອິ້ນ ການປ່າວກັນຍາກ ເລີຍຢາກໄດ້ ໂທຣະໂຄ່ງບໍ່ຈັ່ງຊັ່ນໜ໋າ ເພື່ອຈະໄດ້ເອີ້ນໄດ້ຮຽກກັນ ຍາມປະຊຸມ ຍາມລວມ ເພາະວ່າເພິ່ນຈັດຕັ້ງບ້ານ ເປັນບ້ານຍາວເດ່ດຽວນີ້.”

ທີ່ຜ່ານມາ ປະຊາຊົນລາວໄດ້ຮັບຜົນກະທົບຢ່າງໜັກ ຈາກໄພນໍ້າຖ້ວມ ເພາະບໍ່ມີຣະບົບປະກາດເຕືອນໄພ ຢ່າງຄັກແນ່. ດັ່ງຊາວບ້ານທີ່ໄດ້ຮັບ ຜົນກະທົບຢູ່ແຂວງບໍຣິຄຳໄຊເວົ້າວ່າ:

“ເຂົາບໍ່ໄດ້ແຈ້ງເລີຍເດີ ເຣື່ອງຝົນນໍ້າຖ້ວມ ເຂົາບໍ່ເຄີຍແຈ້ງໜ່າ ໄປວຽກແນວອື່ນເຂົາແຈ້ງຢູ່ ບ້ານບໍ່ໄດ້ຮັບ ບໍ່ໄດ້ຮັບເພິ່ນແຈ້ງມາ ບໍ່ໄດ້ຮັບເພິ່ນ ແຈ້ງມາຕົວນັ້ນ.”

ປັດຈຸບັນ ບ້ານອ່າວໃຫຍ່ແດ່ ກໍມີຣະບົບໂທຣະໂຄງຢູ່ແລ້ວ ແຕ່ບ້ານນ້ອຍໂດຍສະເພາະບ້ານຢູ່ໃນເຂດສອກຫລີກຫ່າງໄກ ຍັງບໍ່ມີເທື່ອ. ໃນຣະ ຍະນີ້ ສປປລາວ ປະສົບກັບລົມພາຍຸ ຝົນຕົກໜັກເລື້ອຍໆ ເພາະເມື່ອຝົນ ຕົກໜັກເທື່ອໃດ ນໍ້າຈະຖ້ວມທັນທີ ເພາະບໍ່ມີຕົ້ນໄມ້ປ່າໄມ້ ດູດເອົາ ນໍ້າໄວ້ຄືໃນແຕ່ກ່ອນ.

ອີງຕາມໜັງສືພິມ ຂ່າວສານ ປະເທດລາວ ຣະບົບໂທຣະໂຄ່ງຊຸດນຶ່ງ ຣາຄາປະມານ 9 ລ້ານກີບ. ແຕ່ບັນຫາມີຢູ່ວ່າ ປັດຈຸບັນ ຣັຖບານລາວ ກໍາ ລັງຂາດເຂີນງົບປະມານຢ່າງໜັກ ແມ້ແຕ່ເງິນເດືອນຂອງພະນັກງານ ຄຣູອາຈານ ກໍຍັງບໍ່ສາມາດຈ່າຍໄດ້ ສະນັ້ນ ຣັຖບານຄົງຈະບໍ່ມີເງິນ ຈະຕິດຕັ້ງຣະບົບ ໂທຣະໂຄ່ງ ໃຫ້ທົ່ວເຖິງກັນ ໃນອະນາຄົດອັນໃກ້ໆນີ້ ຢ່າງແນ່ນອນ.