ມາຕການສະກັດກັ້ນ ລັກຕັດໄມ້ ບໍ່ໄດ້ຜົນ

• ມະນີຈັນ
  2019-08-29

ມາຕການຂອງຣັຖບານລາວ ໃນການສະກັດກັ້ນ ການລັກຕັດໄມ້ ແລະ ຂາຍສົ່ງອອກຕ່າງປະເທດ ຍັງບໍ່ໄດ້ຜົນດີ ຍ້ອນເຈົ້າໜ້າທີ່ ເຫັນແກ່ ຜົລປະໂຫຍດສ່ວນຕົວ ແລະປະຊາຊົນຈຳນວນນຶ່ງ ຍັງລັກລອບຕັດໄມ້ ແລະຊຸກເຊື່ອງໄມ້ໄວ້ ເພື່ອນໍາສົ່ງຂາຍອອກ ຕ່າງປະເທດຫຼາຍຢູ່, ອີງຕາມຄໍາເວົ້າຂອງເຈົ້າໜ້າທີ່ ອຸດສາຫະກັມ ແລະການຄ້າ ທ່ານນຶ່ງຕໍ່ RFA ໃນມື້ວັນທີ 28 ສິງຫານີ້:

"ພາຍຫລັງທີ່ມີຄໍາສັ່ງ 15 ພວກເຮົາກໍເຮັດຕາມຣະບົບ ການເຄື່ອນໄຫວ ການຄຸ້ມຄອງ ການກະທໍາຜິດຂອງພາກສ່ວນທຸຣະກິດ ກະບໍ່ເຖິງ ວ່າມັນຈະຂາດໝົດ ໄປໄດ້ 100 ເປີເຊັນ ເຮົາກະບໍ່ປະຕິເສດເດ໋ ພະນັກງານກະບໍ່ດີ ໝົດທຸກຄົນ ຈໍານວນນຶ່ງ ປະຊາຊົນ ກະລັກຂາຍ ເຂົາບໍ່ທັນເຊື່ອມຊຶມຕໍ່ແນວທາງ ໂຕນີ້ມັນກໍຫລີກບໍ່ໄດ້ດອກ ທຸກຢ່າງມັນກະບໍ່ສາມາດ ເຮັດໄດ້ຮອດໝົດ ທຸກຄົນຫັ້ນແລ້ວ."

ທ່ານກ່າວຕື່ມວ່າສາເຫດ ທີ່ພາໃຫ້ມີຜູ້ລັກຕັດໄມ້ ແລະຂາຍອອກຕ່າງປະເທດຢູ່ນີ້ ສ່ວນນຶ່ງແມ່ນຍ້ອນການກວດກາ ຕາມຊາຍແດນ ຂອງເຈົ້າໜ້າທີ່ຍັງບໍ່ທົ່ວເຖິງ ເພາະມີຈຳນວນໜ້ອຍ ບໍ່ພຽງພໍໃນການກວດກາ ດັ່ງນັ້ນຈຶ່ງເຮັດໃຫ້ ການລັກຕັດໄມ້ເກີດຂຶ້ນ ຢູ່ເລື້ອຍໆ:

"ຄັນເວົ້າເຣື່ອງການຄຸ້ມຄອງນີ້ນະ ກະເປັນໜ້າທີ່ຂອງກະສິກັມ ຂະແໜງປ່າໄມ້ ແຕ່ວ່າມັນ ກະບໍ່ສາມາດ... ຂອບເຂດຢູ່ຊາຍແດນຕ່າງໆ ຫັ້ນແຫລະ ເຮົາເຂົ້າໃຈນໍາກັນວ່າ ພະນັກງານເຮົາກະມີ ຈໍາກັດຈະໃຫ້ທົ່ວເຖິງ ມັນກະສິບໍ່ໄດ້."

ປັດຈຸບັນ ປະເທດລາວ ມີປ່າປົກຫູ້ມພຽງແຕ່ 40 ເປີເຊັນ ຂອງພື້ນທີ່ທັງໝົດຫລຸດຈາກ 70 ເປີເຊັນ ເມື່ອ 30 ປີກ່ອນ ເຖິງແມ່ນວ່າຈະ ໄດ້ສັ່ງປິດໂຮງງານໄມ້ ແລະໂຮງເລື່ອຍ ທີ່ບໍ່ໄດ້ມາຕຖານ ແລະຜິດກົດໝາຍ 2 ພັນ ປາຍແຫ່ງ, ສັ່ງບໍ່ໃຫ້ຕັດໄມ້, ເຄື່ອນຍ້າຍໄມ້ ແລະ ສົ່ງໄມ້ອອກໄປຂາຍຕ່າງປະເທດ ຕາມດໍາຣັດ ຂອງນາຍົກຣັຖມົນເລກທີ 15 ທັບ ນ.ຍ ກໍຕາມ.

ອີງຕາມແຫລ່ງຂ່າວຂອງ ວຽດນາມ VNA, ການສົ່ງເຟີນີເຈີ ຂອງວຽດນາມ ອອກຂາຍຕ່າງ ປະເທດ ໃນປີ 2018 ມີມູນຄ່າສູງເຖິງ 8 ພັນ 850 ລ້ານໂດລາ ສະຫະຣັຖ ເພີ່ມຈາກ 7 ພັນ 700 ລ້ານໂດລາ ສະຫະຣັຖ ໃນປີ 2017.

ໃນຂນະດຽວກັນ ເວັບໄຊ Mongabay ຣາຍງານວ່າ ແຫລ່ງທີ່ມາຂອງວັດຖຸດິບ ທີ່ສໍາຄັນໃນການປຸງແຕ່ງໄມ້ ຂອງວຽດນາມ ແມ່ນເອົາມາ ຈາກປະເທດໃກ້ຄຽງ ເປັນຕົ້ນຈາກລາວ.