ກັບດໍາ(Black box)ຊອກເຫັນແລ້ວ

ເຈົ້າໜ້າທີ່ເກັບກູ້ຊາກຍົນ ສາຍການບິນ ລາວແອຣ໌ລາຍສ໌ ທີ່ຕົກລົງນໍ້າຂອງ ເມືອງປາກເຊ ເມື່ອວັນທີ່ 16 ຕຸລາ ຜ່ານມານີ້ເວົ້າວ່າ ສາມາດ ເອົາກັບດໍາຂຶ້ນມາແຕ່ນໍ້າໄດ້ແລ້ວໃນຕອນ 10 ໂມງເຊົ້າຂອງວັນທີ່ 31 ຕຸລາຕາມເວລາໃນທ້ອງຖິ່ນ ຫລັງຈາກໄດ້ພຍາຍາມມາຫລາຍມື້. ດັ່ງ ທ່ານໄດ້ກ່າວກັບເອເຊັຽເສຣີວ່າ:

"ກ່ອງດໍານີ້ ຂ່າວເຂົ້າມາວ່າ ເພິ່ນໄດ້ເກັບກູ້ເຂົ້າມາແລ້ວ ເມື່ອເຊົ້ານີ້ນະ ແຕ່ວ່າລາຍລະອຽດ ກໍຂໍໃຫ້ເຊັກທາງທິມທີ່ເພິ່ນຮັບຜິດຊອບ".

ໃນຂນະດຽວກັນ ໜັງສືພິມວຽງຈັນທາມສ໌ ລົງວັນທີ່ 1 ພືສຈິກາ ໃຫ້ລາຍລະອຽດຕື່ມ ໂດຍອີງຕາມຄໍາເວົ້າຂອງທ່ານ ຣັຕນະມະນີ ຂຸນນິວົງ ຮອງ ຣັຖມົນຕຣີກະຊວງໂຍທາທິການ ແລະຂົນສົ່ງທີ່ເປີດເຜີຽໃນວັນພະຫັດ ທີ່ 31 ຕຸລາ ຕາມເວລາ ທ້ອງຖິ່ນ ຂອງລາວວ່າ ໜ່ວຍເກັບກູ້ ສາມາດເອົາກັບດໍາ ກັບນຶ່ງຂຶ້ນມາໄດ້ແລ້ວ ໃນຕອນເຊົ້າ ແລະວ່າ ກັບທີສອງນັ້ນ ຄາດວ່າອາຈເອົາຂື້ນມາໄດ້ໃນຕອນບ່າຍ.

ອົງການຂ່າວເອພີລາຍງານ ທີ່ອ້າງຕາມຄໍາເວົ້າຂອງທ່ານ ຢາກົວ ລໍປາງກາວ ເອກອະທິບໍດີ ກົມການບິນລາວວ່າ ກັບດໍາກັບທໍາອິດທີ່ເອົາຂື້ນ ຈາກນໍ້ານັ້ນ ເປັນເຄື່ອງບັນທຶກການສື່ສານຂອງນັກບິນ, ສ່ວນກັບດໍາທີ່ສອງທີ່ຄາດວ່າ ຈະເອົາຂຶ້ນມາ ທີຫລັງນັ້ນ ບັນທຶກຂໍ້ມູນການບິນ. ຍັງບໍ່ ແນ່ນອນເທື່ອວ່າທັງສອງກັບທີ່ຢູ່ໃນຍົນ ATR-72 ນັ້ນຕ້ອງສົ່ງໄປວິເຄາະຢູ່ໃສ ອັນນີ້ຂຶ້ນຢູ່ກັບ ຄນະກັມມະການສອບສວນອຸບັດຕິເຫດ ໂດຍ ມີນັກຊ່ຽວຊານຄວາມປອດພັຍ ການບິນຂອງຝຣັ່ງເສສ ໃຫ້ການຊ່ວຍເຫລືອ.