ຊາວລາວໄຫວ້ອາລັຍແກ່ຜູ້ ເຄາະຮ້າຍ

ໃນເວລາ 14 ໂມງ 15 ນາທີ ຂອງວັນທີ 21 ຕຸລາ 2013 ຣັຖບານລາວ ໄດ້ແຈ້ງການໃຫ້ທຸກກະຊວງອົງການພັກອົງການຈັດຕັ້ງມະຫາຊົນ ສູນກາງ ບັນດາແຂວງທົ່ວປະເທດ ຮວມທັງປະຊາຊົນທົ່ວໄປໃຫ້ທຳພິທີໄຫວ້ອາລັຍ ແກ່ຜູ້ເສັຽຊິວິດ 49 ຄົນ ຈາກສາເຫດເຄື່ອງບິນຕົກເທື່ອນີ້ ໃຫ້ຢືນຂຶ້ນທໍາຄວາມສງົບ 1 ນາທີິ ພ້ອມກັນ. ດັ່ງຊາວລາວຄົນນື່ງເວົ້າວ່າ:

"ນຶ່ງນາທີເສັຽໃຈແລະເສົ້າໃຈ ເພາະວ່າພໍດີທໍາກັບງານລອຍກະໂທງ ຊ່ວງເຮືອ ຄົນທີ່ມາຕັ້ງຫນ້າຕັ້ງຕາມາລໍນີ້ແລະ ໃຜກໍວ່າຊີ່ຕ້ອງ ສັງສັນ ແຕ່ກໍບໍ່ມີ".

ສໍາລັບຄວາມຄືບຫນ້າ ຂອງສາເຫດຍົນຕົກ ທີ່ບິນຈາກນະຄອນຫລວງວຽງຈັນ ຫາເມືອງປາກເຊແລ້ວຕົກໃສ່ນໍ້າຂອງ ຢູ່ເຂດເມືອງໂພນທອງ ໃນມື້ວັນທີ 16 ຕຸລາ 2013 ທີ່ເຮັດໃຫ້ຄົນເສັຽຊີວິດ 49 ຄົນ ນັ້ນໃນປັດຈຸບັນ ໜ່ວຍກູ້ພັຍຮູ້ຈຸດຂອງ ຍົນຈົມນໍ້າ ແລ້ວ.

ໃນຂນະດຽວກັນ ສາຍການບິນລາວແອລາຍ ແລະບໍຣິສັດປະກັນພັຍຂອງບໍຣິສັດ ໄດ້ຈ່າຍເງິນຄ່າຫົວງວດທຳອິດໃຫ້ແກ່ຄອບຄົວຜູ້ທີ່ເສັຽຊິວິດ ຄອບຄົວ ລະ 5 ພັນໂດລາ ແລະ 20 ລ້ານກີບເພື່ອໃຊ້ຈ່າຍ ໃນການຊາປານະກິດສົບ ກ່ອນແລະງວດຕໍ່ໄປ ຈະເປັນເງິນຄ່າຊົດເຊີຍ.

ເຈົ້າຫນ້າທີ່ລາວ ທ່ານນຶ່ງເວົ້າວ່າ ໃນປັດຈຸບັນ ຫນ່ວຍກູ້ພັຍ ສາມາດຄົ້ນຫາສົບ ຜູ້ທີ່ເສັຽຊິວິດໄດ້ແລ້ວ 43 ສົບ ພ້ອມທັງຊິ້ນສ່ວນ ຂອງສົບ ອື່ນໆອີກ 17 ຊິ້ນ ແຕ່ຍັງບໍ່ສາມາດ ຣະບຸໄດ້ວ່າເປັນຂອງໃຜ ຈົນກວ່າຈະມີການພິສູດສົບ ໃນຂັ້ນຕໍ່ໄປ ສ່ວນສົບຄົນຕ່າງຊາດ ຈຳນວນນຶ່ງ ເອົາໃວ້ຢູ່ວັດຈີນຢູ່ເມືອງປາກເຊ ແລະອີກຈຳນວນນຶ່ງສົ່ງກັບປະເທດແລ້ວ ສ່ວນສົບທີ່ເປັນຄົນລາວ ຄອບຄົວກໍໄດ້ນໍາເອົາໄປ ທຳພິທີຊາປະນະ ກິດສົບ ຕາມຮີດຄອງປະເພນີແລ້ວ.