ກອງປະຊຸມສະພາ ໄດ້ປິດລົງ ຢ່າງເປັນທາງການ
2022.12.30
ສະພາແຫ່ງຊາຕ, ນະຄອນຫຼວງວຽງຈັນ, ວັນທີ 15 ພຶສຈິກາ ປີ 2022.
RFA
ກອງປະຊຸມສໄມ ສາມັນເທື່ອທີ 4 ຂອງສະພາແຫ່ງຊາຕ ຊຸດທີ 9 ຫຼື ກອງປະຊຸມ ສະພາແຫ່ງຊາຕ ໄດ້ປິດລົງຢ່າງເປັນທາງ ໃນວັນທີ 30 ທັນວາ 2022 ໂດຍ ມີ ທ່ານ ໄຊສົມພອນ ພົມວິຫານ ປະທານສະພາແຫ່ງຊາຕ, ບັນດາສະມາຊິກສະພາແຫ່ງຊາຕ ແລະ ຄະນະຣັຖບານເຂົ້າຮ່ວມ.
ທ່ານ ໄຊສົມພອນ ພົມວິຫານ ປະທານສະພາແຫ່ງຊາຕ ໄດ້ກ່າວວ່າ ປິດກອງປະຊຸມ ຕອນນຶ່ງ ວ່າ:
“ໃນໂອກາດອັນສງ່າລາສີນີ້, ຂ້າພະເຈົ້າ ໃນນາມປະທານກອງປະຊຸມ ຂໍປະກາດປິດກອງປະຊຸມ ສມັຍສາມັນເທື່ອທີ 4 ຂອງສະພາແຫ່ງຊາຕ ຊຸດທີ 9 ຢ່າງເປັນທາງການ ນັບແຕ່ນີ້ເປັນຕົ້ນໄປ, ຂໍຂອບໃຈ.”
ຢູ່ໃນກອງປະຊຸມສະພາແຫ່ງຊາຕ, ຣັຖບານ ໄດ້ຣາຍງານຫຼາຍບັນຫາ ກ່ຽວກັບວຽກງານ ທີ່ເຄີຍປະຕິບັດມາ ແລະ ວຽກງານທີ່ຈະປະຕິບັດໃນຕໍ່ໜ້າ ໂດຍ ສະເພາະ ການແກ້ໄຂບັນຫາເສຖກິຈ ແລະ ບັນຫາໄພເງິນເຟີ ທີ່ສົ່ງຜົລກະທົບຕໍ່ການດຳລົງຊີວິຕ ປະຊາຊົນ.
ສ່ວນວ່າ ຣັຖບານ ກໍໃຫ້ຄຳໝັ້ນສັນຍາວ່າ ຈະຕ້ອງຄວບຄຸມບັນຫາຢາເສບຕິດ, ບັນຫາຜົລກະທົບຈາກໂຄງການພັທນາ, ຄຳຕັດສິນຂອງສານ ແລະ ໄອຍະການ, ພະນັກງານຣັຖກອນຈຳນວນນຶ່ງ ທີ່ສ້ຳຣາສບັງຫຼວງ ແລະ ປະຕິບັດໜ້າທີ່ລະເມີດກົດໝາຍ.
ນອກຈາກນີ້ ຄະນະ ປະຈຳສະພາແຫ່ງຊາຕ ກໍໄດ້ຮຽກຮ້ອງໃຫ້ ຣັບຖານຕ້ອງປັບປຸງ ການກວດກາຢ່າງເຂັ້ມງວດ ແລະ ໂປ່ງໃສ. ພ້ອມດຽວກັນ ຄະນະປະຈຳສະພາແຫ່ງຊາຕ ກໍຍັງຂໍໃຫ້ຣັຖບານ ປະຕິບັດແຜນພັທນາເສຖກິຈສັງຄົມ ການດັດແກ້ແຜນງົບປະມານ ແຫ່ງຣັຖຂອງປີ 2022 ແລະ ແຜນການປີ 2023.
ທ່ານ ທັນຕາ ກອງຜາລີ ຕາງໜ້າກອງເລຂານຸການກອງປະຊຸມ ທີ່ຮັບຜິດຊອບຂອບເຂດ ວຽກງານແຜນການ-ການເງິນ ແລະ ການກວດສອບ ໄດ້ກ່າວຕອນນຶ່ງວ່າ:
“ກອງປະຊຸມເຫັນວ່າ ການຈັດຕັ້ງປະຕິບັດ ບາງຄາດໝາຍຂອງແຜນການພັທນາເສຖກິຈ-ສັງຄົມແຫ່ງຊາຕ 2022 ຍັງມີຄວມມຄືບໜ້າໜ້ອຍ. ບາງຄາດໝາຍກໍມີຄວາມສ່ຽງ ທີ່ຈະບໍ່ບັນລຸ ຕາມມະຕິຂອງສະພາແຫ່ງຊາດ ເຊິ່ງເປັນໂຕຊີ້ບອກຂອງຄວາມບອບບາງ ຂອງເສຖກິຈມະຫາພາກ. ຄວາມຫຍຸ້ງຍາກຂອງເສຖກິຈ-ການເງິນ ກະທົບການເປັນຢູ່ຂອງປະຊາຊົນ ເຊິ່ງຣັຖບານ ຈະຕ້ອງເອົາໃຈໃສ່ສືບຕໍ່.”
ບັນຫາຊຳເຮື້ອອີກຢ່າງນຶ່ງ ກໍຄື ສະມາຊິກສະພາແຫ່ງຊາຕ ໄດ້ສເນີໃຫ້ຣັບຖານອອກໃບຕາດິນໃຫ້ປະຊາຊົນ ທີ່ບໍ່ຕັດກັບກົດໝາຍມາດຕຣາ 44 ຂອງກົດໝາຍວ່າດ້ວຍທີ່ດິນ ເພື່ອໃຫ້ປະຊາຊົນ ໄດ້ມີໃບຕາດິນໄວ້ທຳມາຫາກິນ.
ທ່ານ ສະເຫຼີມສັກ ແກ້ວຈັນທະລາ ສະມາຊິກສະພາແຫ່ງຊາຕ ຈາກແຂວງຄຳມ່ວນ ໄດ້ກ່າວຕອນນຶ່ງວ່າ:
“ຢາກສເນີເພີ່ມບ່ອນວ່າ ຂແນງການທີ່ກ່ຽວຂ້ອງ ໂດຍສະເພາະຂແນງການກະສິກັມ ແລະ ປ່າໄມ້ ຊັພຍາກອນທັມຊາດ ແລະ ສິ່ງແວດລ້ອມ ຫັ້ນ ຄົ້ນຄວ້າຫາວິທີ ທີ່ເໝາະສົມ ເຮັດໃຫ້ທີ່ດິນ ຢູ່ໃນເຂດປ່າ 3 ປະເພດຫັ້ນ ໃຫ້ສາມາດໄດ້ອອກໃບຕາດິນໃຫ້ປະຊາຊົນ ຢູ່ເຂດນັ້ນ.”
ແລະສະມາຊິກສະພາແຫ່ງຊາຕ ຍັງສເນີໃຫ້ຣັຖບານແກ້ໄຂບັນຫາ ຄຣູອາສາ ແລະແພດອາສາ ທີ່ຍັງບໍ່ພຽງພໍກັບຄວາມຕ້ອງການ.
ທ່ານ ນົບພັນ ອຸສາ ສາມາຊິກສະພາແຫ່ງຊາຕ ຈາກແຂວງບໍລີຄຳໄຊ ໄດ້ກ່າວວ່າ:
“ອີກດ້ານໜຶ່ງເນາະ ຣັຖບານ ໃຫ້ຮີບຮ້ອນຄົ້ນຄວ້າ ພິຈາຣະນາ ກຳນົດບຸກຄະລາກອນຄຣູ ແພດອາສາສມັກເນາະ ເພື່ອສ້າງລະບົບທົດແທນອັດຕຣາສູນເສັຽ ໃນຮູບແບບຕ່າງໆ ໃນແຕ່ລະປີຫັ້ນ. ອັນພວກເຮົາເວົ້າມາຫຼາຍປີແລ້ວ.”
ຊາວລາວບາງຄົນກໍໂທເຂົ້າໄປສະແດງຄວາມຄິດເຫັນ ໃນເວລາດຳເນີນກອງປະຊຸມ, ແຕ່ ບາງຄົນ ກໍບໍ່ຢາກໂທເຂົ້າໄປ ຍ້ອນວ່າ ເຂົ້າເຈົ້າເຂົ້າໃນວ່າ ໂທໄປກໍບໍ່ມີຫຍັງປ່ຽນແຫງ. ຊາວລາວ ທ່ານນຶ່ງ ໄດ້ກ່າວວ່າ:
“ກະຊິມີໂທ ມີເວົ້າແດ່ ບັນຫາທີ່ວ່າໃຊ້ຊີວິດຕ ປະຈຳວັນ ຍາກຫຼາຍ. ໂທໄປ ກໍຊິທໍ່ນັ້ນ ກໍຊິໂທໄປເຮັດຫຍັງຄືເກົ່າ. ທາງເທິງເພິ່ນວ່າ ກັນເອງສາ ເພາະວ່າ ເພິ່ນກໍຮູ້ປະເດັນຢູ່ເດ້ ໃຜກໍຮູ້ ໃຜກໍເຫັນ ເພິ່ນແກ້ໄຂ ກໍແກ້ໄປຊັ້ນແຫຼະ ຢູ່ໄປມີຊ່ຳໃດ ກໍກິນຊ່ຳນັ້ນ ປະຢັດໄດ້ຊ່ຳໃດກໍໂອເຄ ວ່າຊັ້ນສາ.”
ສ່ວນວ່າ ຊາວລາວອີກທ່ານນຶ່ງທີ່ຕິດຕາມກອງປະຊຸມສະພາ ກໍເຫັນວ່າ ຜູ້ທີ່ມີບັນຫາໜັກໜ່ວງແທ້ໆ ຈຳເປັນຕ້ອງໄດ້ໂທຫາສາຍດ່ວນສະພາ ໂດຍ ສະເພາະບັນຫາທີ່ດິນ.
“ຕິດຕາມຢູ່ ມື້ນີ້ຕີ້ເພິ່ນປິດ ຄັນຜູ້ທີ່ວ່າຈຳເປັນ ບໍ່ມີບ່ອນເພິ່ງ ເຂົາເຈົ້າກໍຕ້ອງໄດ້ໂທໄປ ສົມມຸດເປັນບັນຫາເຣື່ອງທີ່ດິນ ພວກປົກຄອງ ທາງບ້ານ ມັນແກ້ໄຂບໍ່ໄດ້ ພັດທາງເທິງ ມັນມີຜູ້ມີອິດທິພົນແດ່ ເຂົາເຮັດຫຍັງບໍ່ໄດ້ ຈຳເປັນຕ້ອງໄດ້ຣາຍງານ ທາງສະພາເພິ່ນ.”
ນອກຈາກນີ້ ກອງປະຊຸມສະພາແຫ່ງຊາຕ ຍັງໄດ້ຮັບເອົາການສ້າງກົດໝາຍໃໝ່ 3 ສະບັບຄື ກົດໝາຍ ວ່າດ້ວຍ ຫໍພິພິທພັນ, ກົດໝາຍວ່າດ້ວຍການທາງນ້ຳ ແລະ ກົດໝາຍວ່າດ້ວຍໜັງສືຜ່ານແດນ. ສ່ວນວ່າ ກົດໝາຍທີ່ມີການປັບປຸງ 9 ສະບັບ ລວມມີ ກົດໝາຍວ່າດ້ວຍທະນາຍຄວາມ, ກົດໝາຍວ່າດ້ວຍທະບຽນສານ, ກົດໝາຍວ່າດວ້ຍ ການປ້ອງກັນ ແລະ ຄວາມຄຸມພະຍາດຕິດຕໍ່, ກົດໝາຍວ່າດ້ວຍ ວິສາຫະກິຈ, ກົດໝາຍວ່າດວ້ຍ ວິທະຍາສາຕ ແລະ ເທັກໂນໂລຢີ, ກົດໝາຍວ່າດ້ວຍ ອົງການໄອຍະການ ທະຫານ, ກົດໝາຍວ່າ ທຸຣະກັມທາງເອເລັກໂທຼນິກ, ກົດໝາຍວ່າດວ້ຍ ການກວດສອບແຫ່ງຣັຖ, ແລະ ການໝາຍວ່າດ້ວຍການກວດກາແຫ່ງຣັຖ.