ຜູ້ນຳ ສປປ ລາວ ສົ່ງສານ ສແດງຄວາມເສົ້າ ສລົດໃຈ
2022.09.13
AFP
ຂ່າວກ່ຽວກັບ ການມໍຣະນະກັມ (ສວັນນະຄົຕ) ຂອງ ສົມເດັຈພຣະຣາຊິນີ ເອລິຊາເບັທ ທີ II ແຫ່ງສະຫະ ຣາຊອານາຈັກ ແລະ ອຽກລັງເໜືອ ໃນມື້ວັນທີ 8 ກັນຍາ 2022 ໄດ້ແພ່ອອກໄປ ໃຫ້ປະຊາຊົນທົ່ວໂລກຮູ້. ສໍາລັບຢູ່ ສປປ ລາວ ກໍມີປະຊາຊົນ ຈໍານວນນຶ່ງຮູ້ ຊຶ່ງສ່ວນໃຫຍ່ ຮູ້ນຳຂ່າວໄທຍ ແລະສື່ສັງຄົມອອນລາຍນ໌ ແລະຈໍານວນຶ່ງກໍບໍ່ຮູ້ຂ່າວທີ່ວ່ານີ້ ແມ່ນແຕ່ຜູ້ຢູູ່ໃນຕົວເມືອງໃຫຍ່ ກໍຍັງບໍ່ຮູ້.
ດັ່ງປະຊາຊົນ ຢູ່ນະຄອນຫລວງວຽງຈັນ ຜູ້ນຶ່ງເວົ້າ ຕໍ່ວິທຍຸເອເຊັຽເສຣີ ໃນມື້ວັນທີ 13 ກັນຍານີ້ວ່າ ບໍ່ຮູ້ ແຕ່ກໍອາຈມີຜູ້ຮູ້ຢູ່.
“ບໍ່! ໂອຍຊິໄປຮູ້ເຮື່ອງນີ້. ເອີ! ຜູ້ຮູ້ກະຊິຮູ້ຫັ້ນແຫລະ. ຮູ້ຢູ່ ເຕະບານ ອັງກິດ ກໍຍັງງົດລະວາ.”
ສ່ວນປະຊາຊົນຜູ້ນຶ່ງ ຢູ່ໃນເມືອງ ຂອງແຂວງສວັນນະເຂດ ເວົ້າໃນມື້ດຽວກັນນີ້ວ່າ ຮູ້ແຕ່ບໍ່ໄດ້ເອົາໃຈໃສ່.
“ຮູ້ຢູ່! ຫາກບໍ່ຮູ້ຈັກມື້. ບໍ່ຈື່! ຮູ້ຈາກຂ່າວໄທຍ.”
ແລະຊາວລາວຜູ້ນຶ່ງ ຢູ່ນະຄອນປາກເຊ ແຂວງຈໍາປາສັກ ກໍເວົ້າຕໍ່ວິທຍຸເອເຊັຽເສຣີ ໃນມື້ດຽວ ກັນນີ້ວ່າ ຄົນລາວຮູ້ຂ່າວທີ່ວ່ານັ້ນ ທາງສື່ສັງຄົມອອນລາຍນ໌ ທີ່ສ່ວນຫລາຍ ກໍມີແຕ່ຂ່າວປົກກະຕິ ແລະສັງເກດເຫັນວ່າ ພວກເຂົາເຈົ້າ ບໍ່ມີຄວາມສຶກແນວໃດ.
“ແມ່ນໆ. ສ່ວນຫລາຍກະຊິມີແຕ່ຂ່າວ ປົກກະຕິຫັ້ນແຫລະ ຄັນເປັນງານອາລັຍ ແມ່ນຫຍັງນີ້ ມັນຈະເປັນຄ້າຍໆຄື ແບບວ່າ ຢູ່ລາວເຮົາເຣື່ອງ ສະຖາບັນເຈົ້າຊີວິຕ ມັນກະບໍ່ມີແລ້ວເດ໋ ມັນຈະເປັນແບບນັ້ນສ່ວນຫລາຍນ່າ.”
ທ່ານກ່າວຕື່ມວ່າ ເຫດການກ່ຽວກັບ ການມໍຣະນະກັມ ຂອງ ສົມເດັຈພຣະຣາຊິນີ ເອລິຊາເບັທ ທີ II ນີ້ ກໍອາຈມີຄົນລາວຈໍານວນນຶ່ງ ທີ່ມີຍາດພີ່ນ້ອງ ຢູ່ປະເທດອັງກິດ ຫລືມີໝູ່ເພື່ອນ ເປັນຊາວອັງກິດ ຫລືຜູ້ທີ່ໄດ້ຮຽນຈົບ ມາຈາກປະເທດອັງກິດ ຮູ້ສຶກຕົກໃຈ ແລະເສັຍໃຈກັບປະຊາຊົນອັງກິດ.
ຢູ່ແຂວງວຽງຈັນ ປະຊາຊົນລາວຜູ້ນຶ່ງ ເວົ້າໃນມື້ວັນທີ 13 ກັນຍານີ້ວ່າ ຄົນລາວ ແລະຄົນອັງກິດ ປະເທດລາວ ແລປະເທດອັງກິດ ຂ້ອນຂ້າງຈະຢູ່ຫ່າງໄກກັນ ແລະຄວາມສັມພັນ ທາງດ້ານຕ່າງໆ ກໍຫ່າງກັນ, ຄົນລາວບໍ່ໄດ້ເອົາໃຈໃສ່ ພໍເທົ່າໃດ ເມື່ອທຽບກັບປະເທດ ທີ່ເປັນພັນທະມິຕກັບລາວ. ດັ່ງນັ້ນຈຶ່ງເຫັນວ່າ ຊາວລາວທົ່ວໄປ ບໍ່ມີຄວາມຮູ້ສຶກຕົກໃຈ ແລະເສັຍໃຈ ນຳເຣື່ອງດັ່ງກ່າວ, ແຕ່ກໍມີຜູ້ຕິດຕາມຂ່າວ ກ່ຽວກັບພິທີໄວ້ອາລັຍ ສົມເດັຈພຣະຣາຊິນີ ເອລິຊາເບັທ ທີ II ນີ້ ທາງສື່ສັງຄົມອອນລາຍນ໌.
ດັ່ງທີ່ທ່ານກ່າວວ່າ:
“ກະບໍ່ໄດ້ຕົກໃຈ ເພາະວ່າມັນຄ້າຍໆ ແບບວ່າເຣື່ອງຂ່າວໂຕນີ້ ແມ່ນຄົນລາວເຮົາ ບໍ່ໄດ້ໃສ່ໃຈ ເຣື່ອງແບບນີ້ປານໃດຫັ້ນນ່າ ມັນຢູ່ໄກ ບໍ່ຮູ້ຄວາມເປັນມາ ເພິ່ນວ່າ ເພິ່ນເປັນຈັ່ງໃດ ບໍ່ຄ່ອຍໄດ້ສຶກສາປວັດປານໃດ.”
ແລະປະຊາຊົນລາວ ຢູ່ແຂວງຫລວງພຣະບາງ ຜູ້ນຶ່ງກໍເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ບໍ່ໄດ້ຕິດຕາມຂ່າວສານຫຍັງເລີຍ.
ດັ່ງນັ່ນຈຶ່ງບໍ່ຮູ້ຂ່າວ ກ່ຽວກັບການມໍຣະນະກັມ ຂອງ ສົມເດັຈພຣະຣາຊິນີ ເອລິຊາເບັທ ທີ II ແລະຕາມການສັງເກດ ໃນຊຸມຊົນ ກໍບໍ່ເຫັນວ່າມີຄົນເວົ້າເຖິງ ເຣື່ອງນີ້ແນວໃດ.
“ໂອ໋! ຄືບໍ່ຮູ້ໃດ໋ ເຈົ້າ. ບໍ່ມີຫຍັງນ່າ ບໍ່ເຫັນຂະເຈົ້າເວົ້າກັນ, ບໍ່ເຫັນລົມກັນ, ບໍ່ເຫັນຂະເຈົ້າແຈ້ງອິຫຍັງມານ່າ.”
ກ່ຽວກັບເຣື່ອງທີ່ວ່ານີ້ ອຳນາດການປົກຄອງ ຢູ່ແຂວງຕ່າງໆຂອງລາວ ກໍບໍ່ໄດ້ຕິດຕາມ, ບໍ່ໄດ້ຍິນຂັ້ນເທິງວ່າຫຍັງ, ບໍ່ໄດ້ເຮັດຫຍັງ ແລະເມື່ອເວົ້າເຖິງ ການຈັດພິທີໄວ້ອາລັຍ.
ເຈົ້າໜ້າທີ່ຫ້ອງວ່າການ ປົກຄອງແຂວງຫລວງພຣະບາງ ເວົ້າໃນມື້ວັນທີ 13 ກັນຍານີ້ວ່າ ຄືບໍ່ໄດ້ຍິນ ເຂົາເຈົ້າເວົ້າອີ່ຫຍັງ.
“ຈັດໄວ້ອາລັຍ ຄືບໍ່ເຫັນຂະເຈົ້າເວົ້າອິຫຍັງໄດ໋ ອ້າຍ. ທາງແຂວງພວກເຮົາ ກໍບໍ່ໄດ້ຍິນເວົ້າຫຍັງ ບໍ່ໆມີຫຍັງ ອ້າຍ. ຄືບໍ່ເຫັນໃຜເຮັດງານໄວ້ອາລັຍ ບໍ່ເຫັນຜແນກການໃດ ແຈ້ງອີ່ຫຍັງ.”
ແລະຢູ່ແຂວງວຽງຈັນ ເຈົ້າໜ້າທີ່ຫ້ອງວ່າການ ປົກຄອງແຂວງ ກໍເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ເຣື່ອງການມໍຣະນະກັມ ຂອງສົມເດັດພຣະຣາຊິນີ ເອລິຊາເບັທ ທີ II ຕິດຕາມຂ່າວແລ້ວ ກໍແລ້ວໄປ.
“ງານໄວ້ອາລັຍເບາະ. ຈັ່ງວ່າ ແລ້ວໂຕນີ້ນ່າ ຮູ້ແຕ່ວ່າຕິດຕາມຂ່າວແລ້ວກາແລ້ວ ປວັດສ່ວນຕົວ ເຮົາກະບໍ່ຮູ້ໄດ໋.”
ຫລັງຈາກການ ສວັນນະຄົຕ ຂອງ ສົມເດັຈພຣະຣາຊິນີ ເອລິຊາເບັທ ທີ II ແຫ່ງສະຫະຣາຊອານາຈັກ (ອັງກິດ) ແລະ ອຽກລັງເໜືອ ທ່ານ ທອງລຸນ ສີສຸລິດ ປະທານປະເທດ ກໍໄດ້ສົ່ງສານ ສແດງຄວາມເສົ້າສະຫລົດໃຈ ເຖິງສົມເດັຈພຣະຣາຊາ ຊາວສ໌ (Charles) ທີ III ໃນມື້ວັນທີ 10 ກັນຍານີ້. ໃນນັ້ນມີເນື້ອໃນວ່າ ຂ້າພະເຈົ້າ ມີຄວາມເສົ້າສະຫລົດໃຈ ຢ່າງສຸດຊຶ້ງ ເມື່ອໄດ້ຮູ້ຂ່າວວ່າ ສົມເດັຈພຣະຣາຊິນີ ເອລິຊາເບັທ ທີ II ແຫ່ງສະຫະຣາຊອານາຈັກ (ອັງກິດ) ແລະ ອຽກ ລັງເໜືອ ປະມຸກຣັຖ ທີ່ແສນເຄົາຣົບຮັກ ຂອງປະຊາຊົນອັງກິດ ແລະແມ່ທີ່ແສນຮັກ ຂອງພຣະອົງ ໄດ້ເຖິງແກ່ມໍຣະນະກັມ ໃນວັນທີ 8 ກັນຍາ 2022.
ການຈາກໄປຂອງ ສົມເດັຈພຣະຣາຊິນີ ເອລິຊາເບັທ ທີ II ແມ່ນເປັນການສູນເສັຍ ອັນຍິ່ງໃຫຍ່ສຳລັບຄອບຄົວ ແຫ່ງຣາຊວົງສ໌, ສະຫະຣາຊອານາຈັກ ແລະເຄືອຈັກກະພົບອັງກິດ ຕລອດເຖິງ ປະຊາຊົນອັງກິດ ທຸກຖ້ວນໜ້າ ເນື່ອງຈາກວ່າ ພຣະຣາຊິນີ ແມ່ນເປັນມານດາ ທີ່ເຄົາຣົບຮັກ ແລະເປັນຜູ້ນຳທີ່ຍິ່ງໃຫຍ່ ທີ່ໄດ້ອຸທິດ ຊີວິຈຕົນເອງເພື່ອຮັບໃຊ້ ປະຊາຊົນອັງກິດ ແລະເຮັດໃຫ້ປະຊາຊົນ ມີຊີວິຕການເປັນຢູ່ ທີ່ດີຕລອດໄລຍະຫລາຍກວ່າ 70 ປີ ທີ່ພຣະອົງຄອງຣາຊບັນລັງ.
ແລະ ຍານາງ ປານີ ຢາທໍ່ຕູ້ ຮອງປະທານປະເທດ, ໃນນາມຕາງໜ້າໃຫ້ຣັຖບານ, ປະຊາຊົນລາວ ແລະໃນນາມສ່ວນຕົວ ກໍໄດ້ນຳພາຄະນະເຂົ້າເຊັນປຶ້ມໄວ້ອາໄລ ຕໍ່ການເສັຍຊີວິຕ ຂອງສົມເດັຈພຣະຣາຊິນີ ເອລິຊາເບັທ ທີ II ແຫ່ງສະຫະຣາຊະອານາຈັກ (ອັງກິດ) ແລະ ອຽກລັງເໜືອ ທີ່ສະຖານທູຕອັງກິດ ປະຈຳ ສປປ ລາວ ໃນວັນທີ 12 ກັນຍາ 2022 ນີ້.
ແຕ່ຈະເຫັນວ່າ ການສວັນນະຄົຕ ຂອງອະດີຕກະສັດລາວ ເຈົ້າສີສະຫວ່າງວັດທະນາ ແລະອົງມົງກຸດຣາຊກຸມມານ ທາງການລາວ ບໍ່ໄດ້ສະແດງຄວາມເສົ້າສະຫລົດໃຈ ນຳແຕ່ຢ່າງໃດ.
ສະຖານທູຕອັງກິດ ທີ່ນະຄອນຫລວງວຽງຈັນ ເປີດໃຫ້ເຈົ້າໜ້າທີ່ລະດັບສູງ ແລະບຸກຄົນທົ່ວໄປ ລົງບັນທຶກໄວ້ອາລັຍນຳ ສົມເດັຈພຣະຣາຊິນີ ເອລິຊາເບັທ ທີ II ແຕ່ມື້ວັນທີ 12 ເຖິງ ວັນທີ 16 ກັນຍາ 2022 ແຕ່ເວລາ 14:00-16:00 ໂມງ.
ປະເທດລາວ ແລະ ສະຫະຣາຊອານາຈັກ ໄດ້ສ້າງຕັ້ງສາຍພົວພັນ ທາງດ້ານການທູຕນຳກັນ ໃນມື້ວັນທີ 5 ກັນຍາ 1955. ນັບຕັ້ງແຕ່ໄດ້ມີການປ່ຽນແປງ ລະບອບການປົກຄອງປະເທດ ເມື່ອປີ 1975 ມາຈົນເຖິງປີ 2012 ສະຫະຣາຊອານາຈັກ ຈຶ່ງໄດ້ເປີດສະຖານທູຕ ປະຈຳລາວຄືນໃໝ່ ແລະ ສປປ ລາວ ກໍໄດ້ເປີດສະຖານທູຕ ປະຈຳສະຫະຣາຊອານາຈັກ ຄືນໃໝ່ ໃນປີ 2013 ຈົນມາເຖິງປັດຈຸບັນ.