ພົບສານກັນບູດ ທີ່ຕລາດ ນະຄອນ ຫຼວງວຽງຈັນ

ການໃຊ້ສານກັນບູດ ຫຼືຟອກໂມນໃນຊີ້ນສັດ ຢູ່ນະຄອນຫລວງວຽງຈັນ ຍັງມີຫຼາຍ. ເມື່ອທ້າຍເດືອນເມສາທີ່ຜ່ານມາ ເຈົ້າໜ້າທີ່ທາງການ ສາມາດ ກວດ ແລະ ຍຶດຊີ້ນສັດ ທີ່ມີສານກັນບູດ ເຈືອປົນ ຢູ່ຕລາດສົດ 3 ແຫ່ງ ໃນນະຄອນຫຼວງ ວຽງຈັນ ໂດຍຊີ້ນສັດເຫຼົ່ານັ້ນ ຖືກນໍາເຂົ້າ ຈາກປະເທດວຽດນາມ ແລະ ພໍ່ຄ້າແມ່ຄ້າ ຄົນລາວ ເປັນຜູ້ລັກໃສ່ສານເອງກໍມີ, ອີງຕາມຄໍາເວົ້າ ຂອງເຈົ້າໜ້າທີ່ ກະສິກັມ ແລະ ປ່າໄມ້ ເມືອງໄຊເສດຖາ ຕໍ່ວິທຍຸ ເອເຊັຽເສຣີ ໃນວັນທີ່ 6 ພຶສພານີ້:

“ພວກເຮົາກໍໄດ້ເຄື່ອນໄຫວກວດກາ ຢູ່ທາງໃນນີ້ ຕາມຕລາດເຮົາກໍໄດ້ກວດພົບຢູ່ ເຂົ້າມາຈາກວຽດນາມ ກໍຫຼາຍ ທີ່ວ່າເຮົາກວດພົບຫັ້ນ ຜູ້ປະກອບການຫັ້ນ ເປັນຄົນປະສົມເອງກໍມີ ໂຕຢ່າງ ມາມີຫຼາຍໆໂຕຢ່າງ ພວກເຮົາສຸ່ມກວດ ມັນກໍປະກົດວ່າມີສານ ພວກເຮົາກໍໄດ້ ເຮັດບົດບັນທຶກ ກັບເຂົາ.”

ພາຍຫຼັງທີ່ເຈົ້າໜ້າທີ່ລົງກວດກາ ພື້ນທີ່ສຸ່ມກວດສານເປື້ອນໃນອາຫານ ທົ່ວເຂດນະຄອນຫລວງ ປະຈໍາ ເດືອນເມສາ ກໍພົບເຫັນ ຢູ່ຕລາດ ໜອງຈັນ, ຕລາດ ໂພນສະຫວ່າງ, ແລະ ຕລາດ ທາດຫຼວງ ຊຶ່ງເປັນຕລາດສົດຂນາດໃຫຍ່ ຂອງເມືອງເສດຖາ, ເມືອງສີສັດຕະນາກ ແລະ ເມືອງຈັນທະບູລີ ມີຊີ້ນສັດ 6 ຊະນິດ ທີ່ປົນເປືອນສານກັນບູດ ຄືປາມຶກສົດ, ຍໍງົວ, ຕັບ, ປອດ, ຫົວໃຈຄວາຍ ແລະ ຊີ້ນສ່ວນສັດປີກ.

ທ່ານວ່າ ໃນຈໍານວນຊີ້ນສັດ ທີ່ປົນເປື້ອນ ສານກັນບູດນັ້ນ ມີທັງນໍາເຂົ້າ ຈາກປະເທດວຽດນາມ 14 ຕົວຢ່າງ ສ່ວນຫລາຍ ແມ່ສັດປີກ ແລະ ອາຫານທະເລ ເປັນຕົ້ນ ເປັດ, ໄກ່, ປາ, ປາມຶກ ແລະກຸ້ງ ສ່ວນຊີ້ນງົວ, ຊີ້ນໝູ ແລະເຄື່ອງໃນສັດ 6 ຕົວຢ່າງ. ແມ່ນພໍ່ຄ້າ-ແມ່ຄ້າ ທີ່ຂາຍ ຢູ່ຕລາດ ເປັນຜູ້ລັກເຮັດເອງ ຊຶ່ງຮວມກັນແລ້ວ ຫຼາຍກວ່າ 2 ຮ້ອຍ ກິໂລ ແລະ ເຈົ້າໜ້າທີ່ ໄດ້ທໍາລາຍໝົດ ພ້ອມທັງເຮັດບົດບັນທຶກ ໄວ້ແລ້ວ:

“ພວກເຮົາກໍຈະກວດກາໃຫ້ມັນຕໍ່ເນື່ອງ ແລ້ວກໍໃຫ້ຄວາມຮູ້ ກັບຜູ້ບໍຣິໂພຄຫັ້ນແຫຼ້ວ ກໍຜູ້ທີ່ມາຈໍາໜ່າຍ ທີ່ມີອາຫານປົນເປືອນສານ ພວກເຮົາ ກໍໄດ້ເຮັດບົດບັນທຶກກັບເຂົາ ຖ້າກວດພົບບຸກຄົນໃດປະຕິບັດຊໍ້າຕື່ມອີກ ພວກເຮົາ ກໍຈະປະຕິບັດ ມາຕການເຂັ້ມງວດຂຶ້ນຕື່ມ.”

ທ່ານ ກ່າວມ້ວນທ້າຍ ວ່າ ໃນຣະຍະຜ່ານມາ ເຖິງແມ່ນວ່າ ທາງການ ຈະມີມາຕການເຂັ້ມງວດ ຕໍ່ຜູ້ຄ້າຂາຍຊີ້ນສັດ ປົນເປື້ອນສານກັນບູດ ມີການປັບໃຫມ ແລະ ໃສ່ໂທດເດັດຂາດກໍຕາມ  ແຕ່ 2-3 ປີມານີ້ ການນໍາໃຊ້ ສານກັນບູດ ກໍຍັງມີແຜ່ຫຼາຍເລື້ອຍຍມາ ໂດຍສະເພາະ ແມ່ນການເກັບອາຫານ ປະເພດ ດິບ ເປັນຕົ້ນ ຊີ້ນ, ປາ ບໍ່ໃຫ້ບູດ ແຕ່ສານດັ່ງກ່າວສົ່ງຜົນກະທົບຕໍ່ສຸຂພາບ ຂອງຜູ້ບໍຣິໂພຄ, ສະນັ້ນ ທາງການຈິ່ງ ຮຽກຮ້ອງໃຫ້ ພວກພໍ່ຄ້າຊາວຂາຍ ຈົ່ງຍຸດຕິ ການປະພຶດດັ່ງກ່າວ ຢ່າງເດັດຂາດ.