ການລ້າສັດປ່າ ຍາກທີ່ຈະຫ້າມໄດ້

ການຫ້າມ ປະຊາຊົນ ໂດຍສະເພາະ ຜູ້ທີ່ຢູ່ ໃນເຂດ ຊົນນະບົດ ຫ່າງໄກ ໃນເຂດ ແຂວງຕ່າງໆ ທົ່ວ ປະເທດລາວ ບໍ່ໃຫ້ ລ່າສັດປ່າ ໃນຊ່ວງ ຣະດູຝົນ ນັ້ນ ຍັງເປັນບັນຫາ ທີ່ ແກ້ໄຂ ໄດ້ຍາກ ຍ້ອນ ປະຊາຊົນ ຍັງຝ່າຝືນ ກົດຣະບຽບ ຢູ່ຄືເກົ່າ. ຕາມຄໍາເວົ້າ ຂອງ ເຈົ້າໜ້າທີ່ ກະຊວງ ກະສິກັມ ແລະ ປ່າໄມ້ ໃນວັນທີ 21 ມີຖຸນາ ນີ້:

"ສ່ວນໜຶ່ງ ກໍຄືວ່າ ຍັງ ອີງໃສ່ ທັມມະຊາດ ຢູ່ ສະນັ້ນ ຍັງ ປາສຈາກ ບໍ່ໄດ້ ເຣື່ອງການ ລ່າເນາະ ເຫດຜົລ ທີ່ຊາວບ້ານ ຍັງລ້າ ກໍບໍ່ແມ່ນວ່າ ເພື່ອ ເປັນສິນຄ້າ ລ່າ ເພື່ອແກ້ໄຂ ຊີວິດ ຄວາມເປັນຢູ່ ຂອງຂະເຈົ້າ ຢູ່ໃນເຂດ ຊົນນະບົດ ຊື່ໆເນາະ".

ທ່ານກ່າວ ຕື່ມວ່າ ໃນຊ່ວງ ຣະດູຝົນ ທຸກປີ ທາງ ຣັຖບານລາວ ຈະອອກ ກົດຣະບຽບ ບໍ່ໃຫ້ ປະຊາຊົນ ລ່າສັດປ່າ ຮວມທັງ ສັດນໍ້າ ເພື່ອ ອະນຸຮັກ ໃຫ້ສັດ ໄດ້ວາງໄຂ່ ຫລື ອອກລູກ ຕາມ ທັມຊາດ. ແຕ່ທຸກໆປີ ມີຣາຍງານວ່າ ຊາວບ້ານ ອອກ ລ່າສັດ ຢູ່ ເປັນປະຈໍາ. ສັດປ່າ ທີ່ຖືກລ່າ ນັ້ນ ສ່ວນໃຫຍ່ ເປັນຈໍາພວກ ລ້ຽງລູກ ດ້ວຍນໍ້ານົມ ເຊັ່ນ ກວາງ ຟານ ຊຶ່ງ ເປັນສັດ ທີ່ມີຊີ້ນ ຫລາຍ ແລະ ເປັນທີ່ ນິຍົມ ກັນ ຂອງ ຜູ້ຄົນ.

ເມື່ອບໍ່ນານ ມານີ້ ທາງ ຣັຖບານ ໄດ້ສັ່ງໃຫ້ ອໍານາດ ການປົກຄອງ ທຸກແຂວງ ໂຄສະນາ ແລະ ຫ້າມ ປະຊາຊົນ ໃນເຂດ ຮັບຜິດຊອບ ຂອງຕົນ ລ່າສັດ. ຫາກ ຝ່າຝືນ ກໍຈະຖືກ ປັບໃໝ ລົງໂທດ ຕາມຣະບຽບ ການ ທີ່ ກໍານົດໄວ້. ນອກຈາກ ຊາວລາວ ເປັນຜູ້ ລ່າສັດ ແລ້ວ ທີ່ຜ່ານມາ ມີຂໍ້ມູລວ່າ ຊາວ ຕ່າງປະເທດ ເປັນຕົ້ນ ວຽດນາມ ໄດ້ເຂົ້າມາ ລັກລ່າສັດປ່າ ໃນລາວ ໃນຊ່ວງ ຣະດູຝົນ ໂດຍສະເພາະ ຕາມເຂດ ແຂວງຊາຍແດນ ທາງພາກໃຕ້ ແລະ ແມ່ນແຕ່ ແຂວງ ໄຊຍະບູລີ ກໍເຂົ້າມາ ລັກລ່າ.