ຊາວບ້ານ ຍັງລໍຖ້າຄ່າຊົດເຊີຍ ຈາກໂຄງການ ສນາມບິນໜອງຄ້າງ
2022.05.16
ແຜນທີ່ສແດງ ເຂດກໍ່ສ້າງ ສນາມບິນໜອງຄ້າງ ເມືອງຊຳເໜືອ ແຂວງຫົວພັນ ໃນເນື້ອທີ່ 200 ເຮັກຕ້າຣ໌ ມູນຄ່າ 74 ລ້ານ ໂດລ້າຣ໌ ຕັ້ງແຕ່ປີ 2013 ຊຶ່ງເປັນໂຄງການ ຂອງບໍຣິສັດຮ່ວງແອງຍາລາຍ ຂອງວຽດນາມ.
ຮູບພາບ: Google Earth
ຊາວບ້ານໜອງຄ້າງ 20 ຄອບຄົວ ທີ່ຂຶ້ນກັບເມືອງຊຳເໜືອ ແຂວງຫົວພັນ ທີ່ເນື້ອທີ່ປູກເຂົ້າໄດ້ຮັບຜົລກະທົບ ຈາກການບຸກເບີກໂຄງການ ສນາມບິນໜອງຄ້າງ ຍັງລໍຖ້າການຊົດເຊີຍ. ຊາວບ້ານເຫຼົ່ານັ້ນ ຫຼາຍຄົນກໍໄດ້ຮັບຄວາມເດືອດຮ້ອນ ຍ້ອນວ່າບໍ່ສາມາດປູກເຂົ້າໄດ້ ບັບແຕ່ປີ 2018 ເປັນຕົ້ນມາ.
ຊາວບ້ານໃກ້ຄຽງທ່ານ ນຶ່ງ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 16 ພຶສພາ ວ່າ:
“ຊິມີ 10-20 ຄອບຄົວ ພຸ້ນ ປີທີ່ແລ້ວ ນີ້ ເພິ່ນຍັງບໍ່ໄດ້ມີການຊົດເຊີຍ ປະຊາຊົນຍັງບໍ່ທັນ ໄດ້ເງິນຊື້ເຂົ້າກິນ ເປັນການລໍຄອຍຢູ່ນ່າ ມັນນານີ້ ມັນຖືກດິນແດງແລ້ວ ມັນບໍ່ດີ ມັນບໍ່ເປັນນ່າ ຍັງຄາໂຕນີ້.”
ທ່ານ ກ່າວຕື່ມວ່າ ເມື່ອບໍດົນມານີ້ ກໍເຫັນເຈົ້າໜ້າທີ່ກ່ຽວຂ້ອງ ໄດ້ລົງພື້ນທີ່ມາຕິດຕາມສະພາບດັ່ງກ່າວແລ້ວ ແຕ່ກໍບໍ່ທັນໄດ້ຍິນວ່າ ມີຄວາມຄືບໜ້າແນວໃດ ແລະ ຈະໃຫ້ເງິນຊົດເຊີຍແກ່ຊາວບ້ານ ໃນເທື່ອໃດແທ້ ເຊິ່ງຊາວບ້ານຫຼາຍຄົນກໍຫວັງວ່າ ຈະໄດ້ຮັບຄວາມເປັນທັມ ໃນໄວໆນີ້ ກ່ອນທີ່ສນາມບິນແຫ່ງນີ້ ຈະເປີດໃຊ້ແບບເປັນທາງການ.
ວິທຍຸເອເຊັຽເສຣີ ໄດ້ຕິດຕໍ່ຫາ ຊາວບ້ານທີ່ໄດ້ຮັບຜົລກະທົບ ເພື່ອຖາມລາຍລະອຽດເພີ່ມຕື່ມ ແຕ່ ບໍ່ສາມາດຕິດຕໍ່ໄດ້.
ປັດຈຸບັນເຈົ້າໜ້າທີ່ ກຳລັງເກັບກຳຂໍ້ມູນ ຜົລກະທົບຈາກຊາວບ້ານ ແລ້ວຈະສົ່ງຂຶ້ນໄປຫາຂັ້ນແຂວງ ເພື່ອຈະຊົດເຊີຍຊາວບ້ານ 20 ຄອບຄົວ ທີ່ຍັງເຫຼືອ.
ເຈົ້າໜ້າທີ່ເມືອງຊຳເໜືອ ທ່ານນຶ່ງ ໄດ້ກ່າວວ່າ:
“ເກັບກຳຄືນບໍ່ທັນແລ້ວໂຕນີ້ ສັງລວມແລ້ວ ຈະສເນີຕໍ່ຂັ້ນເທິງຫັ້ນເນາະ ຊົດເຊີຍ ເປັນແນວໃດໆ ຊົດເຊີຍໝົດແລ້ວ ແຕ່ວ່າ ຍັງບາງຈຸດ ທີ່ວ່າມັນເກີດວຽກໃໝ່ ເປັນດິນມັນໄຫຼລົງໃສ່ທົ່ງນາປະຊາຊົນ ແຕ່ລະປີມັນເກີດຂຶ້ນມາອີກ.”
ໂຄງການສນນາມບິນໜອງຄ້າງ ມີຄວາມຄືບໜ້າ 92 ເປີເຊັນ ແລະ ເຖິງວ່າ ກະຊວງແຜນການ ແລະ ການລົງທຶນ ມີແຜນຊຸກຍູ້ໃຫ້ສໍາເຣັດພາຍໃນປີໄຕຼມາດ 3 ຂອງປີນີ້ ແຕ່ຜູ້ຮັບເໝົາທີ່ເປັນ ບໍຣິສັດ ຮ່ວງແອງ ອັດຕະປື ທີ່ເປັນຂອງນັກລົງທຶນວຽດນາມ ຍັງບໍ່ທັນໄດ້ເຂົ້າມາສືບຕໍ່ ການກໍ່ສ້າງແຕ່ແນວໃດ ຫຼັງຈາກການກໍ່ສ້າງໄດ້ຢຸດໄປ.
ເຈົ້າໜ້າທີ່ຜແນກໂຍທາທິການ ແລະ ຂົນສົ່ງ ແຂວງຫົວພັນ ໄດ້ກ່າວວ່າ:
“ເນື່ອງຈາກສະພາບໂຄວິດນີ້ແຫຼະ ຫຍຸ້ງຍາກຫຼາຍອັນ ຍັງບໍ່ທັນມີແຜນສືບຕໍ່ທີ່ວ່າ ເປັນແຜນວຽກລະອຽດເທື່ອ ມີແຕ່ຍັງລໍຖ້າເພິ່ນ ກະບໍ່ໝັ້ນໃຈເນາະ ຖ້າຫາກວ່າ ເຂົາຈະລົງມືກໍ່ສ້າງປະຕິບັດ ກະໜ້າຈະໄປຕາມແຜນ.”
ປັດຈຸບັນ ຢູ່ແຂວງຫົວພັນມີແຕ່ສນາມບິນນາທອງ ຢູ່ເມືອງຊຳເໜືອ ທີ່ເປີດບໍຣິການ ແຕ່ເປັນນາມບິນຂນາດນ້ອຍ ແລະ ຮອງຮັບຍົນຂນາດນ້ອຍ. ຊາວບ້ານເຊືອ່ວ່າ ຈະມີຄົນເດີນທາງດ້ວຍຍົນຫຼາຍຂຶ້ນ ຖ້າສນາມໜອງຄ້າງສ້າງສຳເຣັດ.
ຊາວບ້ານເມືອງຊຳເໜືອ ທ່ານ ນຶ່ງ ກ່າວວ່າ:
“ຄັນວ່າເກີດວ່າ ການແນ່ນອນຕ້ອງມີຫຼາຍຫັ້ນແຫຼະ ເຂົາເຈົ້າກະມັກເດີນທາງຍົນ ຄັນຖ້າບໍ່ມີພະຍາດນີ້ ເຂົາເຈົ້າກະເຮັດແລ້ວ ແລ້ວກະມີສັນຍາເຂົາເຈົ້າບໍ່ທັນເຮັດແລ້ວ.”
ມີຄວາມເປັນໄປໄດ້ວ່າ ຕ່າງປະເທດເຂົ້າມາລົງທຶນຢູ່ໃນແຂວງຫຼາຍຂຶ້ນ ຖ້າວ່າ ສນາມບິນສ້າງສຳເຣັດ. ເຈົ້າຂອງເຮືອນພັກ ທ່ານນຶ່ງ ໄດ້ກ່າວວ່າ:
“ມີຫຼາຍຢູ່ດອກບ້ານພັກ ບ້ານເຊົ່າຫັ້ນນ່າ ກໍອາຈຊິມີວຽດນາມບໍ່ ຕ່າງປະເທດບໍ່ ທີ່ວ່າ ເພິ່ນຈະມາລົງທຶນທາງແຂວງເຮົາ ວຽດນາມເພິ່ນກະເຣີ່ມເປີດປະເທດ ເຣີ່ມເຂົ້າໆ ອອກໆ ໄດ້.”
ບໍຣິສັດ ຮ່ວງແອງອັດຕະປື ທີ່ເປັນຂອງບໍຣິສັດ ຮ່ວງແອງຍາລາຍ ຂອງວຽດນາມ ໄດ້ເຣີ່ມສ້າງສນາມບິນໜອງຄ້າງ ໃນເນື້ອທີ່ 200 ເຮັກຕ້າຣ໌ ມູນຄ່າ 74 ລ້ານ ໂດລ້າຣ໌ ຕັ້ງແຕ່ປີ 2013 ໂດຍ ໄດ້ສົ່ງຜົລກະທົບຕໍ່ຫຼາຍຄອບຄົວ ແລະ ບໍຣິສັດ ບໍ່ໄດ້ເປີດເຜີຍຈຳນວນຄອບຄົວລະອຽດ ແຕ່ ໄດ້ຊົດເຊີຍໃຫ້ຊາວບ້ານໄປແລ້ວ 6 ຕື້ ກີບ ອີງຕາມຂໍ້ມູນຈາກທາງການແຂວງ.
ຮອດປີ 2015 ໂຄງການດັ່ງກ່າວ ໄດ້ໂຈະການກໍ່ສ້າງ ຍ້ອນບໍຣິສັດ ຂາດງົບປະມານ ແລະ ມີບັນຫາໜີ້ສິນ. ຈົນຮອດປີ 2018 ບໍຣິສັດ ຈຶ່ງຫັນມາສືບຕໍ່ ການກໍ່ສ້າງອີກ ແຕ່ ກໍໂຈະການກໍ່ສ້າງໃນປີເດືອນມີນາ 2020 ຈົນມາເຖິງປັດຈຸບັນ ກໍຍັງບໍມີການຢືນຢັນວ່າ ການກໍ່ສ້າງສນາມບິນດັ່ງກ່າວ ຈະສຳເຣັດເມື່ອໃດ.