ຊາວບ້ານ ປະຕິເສດ ບໍຣິສັດຈີນ ເຊົ່າດິນ ປູກໝາກໂມ

ໄຊຍາ
2022.02.11
ຊາວບ້ານ ປະຕິເສດ ບໍຣິສັດຈີນ ເຊົ່າດິນ ປູກໝາກໂມ ການເຮັດນາປີ ຂອງຊາວບ້ານ ໃນແຂວງພາກເໜືອຂອງລາວ
ນັກຂ່າວ ພົລເມືອງ

ເມື່ອບໍ່ດົນມານີ້ ເມືອງວຽງພູຄາ ແຂວງຫລວງນໍ້າທາ ໄດ້ຈັດພິທີເຊັນສັນຍາອະນຸຍາດໃຫ້ບໍຣິສັດ ໂຢປັງ ເຕັກນິກກະສິກັມ ຂາອອກ-ຂາເຂົ້າ ຈຳກັດຜູ້ດຽວຂອງນັກລົງທຶນຈີນ ເຊົ່າດິນຂອງຊາວບ້ານເພື່ອປູກໝາກໂມຢູ່ 9 ບ້ານເປົ້າໝາຽພາຍປີ 2022 ທັງໝົດ 161 ເຮັກຕ້າຣ໌ກຳນົດອາຍຸການເຊັນສັນຍາ 6 ເດືອນຄືເຣີ້ມແຕ່ເດືອນພຶສຈິກາ ຫາເດືອນເມສາ ຂອງແຕ່ລະປີ.

ຕໍ່ກໍຣະນີດັ່ງກ່າວຊາວບ້ານ 9 ບ້ານໃນເມືອງວຽງພູຄາ ທີ່ນອນຢູ່ໃນເປົ້າໝາຽນັ້ນບໍ່ຢາກຍົກດິນໃຫ້ ຍ້ອນຈະໄປສ້າງຜົລກະທົບ ຕໍ່ດິນທີ່ຊາວບ້ານເຮັດນາປີ ພາຍຫລັງທີ່ຜູ້ສັມປະທານດິນ ສົ່ງດິນຄືນ. ໂດຍຊາວບ້ານຕ້ອງໄດ້ຊັບສ່າວ ເກັບມ້ຽນດິນ ແລະປັບປຸງດິນ ໃຫ້ກັບມາເປັນສະພາບເດີມ ຈຶ່ງຈະປູກຝັງໄດ້.

ດັ່ງຊາວບ້ານນ້ຳໂອ ເມືອງວຽງພູຄາ ໄດ້ກ່າວຕໍ່ວິທຍຸເອເຊັຽເສຣີເມື່ອວັນທີ 11 ກຸມພາ ນີ້ວ່າ:

ຕາມເຂົາໄປກວດເບິ່ງຖືວ່າ ເອີແມ່ນສານເຄມີໄປຝັງໂຕ ເປັນເວລາຍາວເປັນກິນບໍ່ແຊບ ນອນບໍ່ລັບໜ້າຕາລ່າເຫລືອງ ຜອມ ແລ້ວກໍເປັນຕຸ່ມຜູ້ໃດປະກົດການ ແນວໃດກໍມີບາງຄົນໄປເວລາໄປມື້ນີ້ ເປັນມື້ອື່ນຄືວ່າຮູ້ສຶກວ່າໃນໂຕວ່າ ເອີຕາກໍຢາກມືດໆ ບໍ່ຫລືວ່າເປັນແນວໃດ ອອກຂີ້ຫູຂີ້ຕາເຂົາກໍເຊົາເລີຍ ບໍ່ໄປເຮົາໄປເນາະໄປອອກແຮງງານ ນຳຈີນເນາະຮູ້ສຶໃນໂຕເປັນແນວໃດ ເຂົາກໍຖອຍ.

ຊາວບ້ານກ່າວຕື່ມວ່າບໍຣິສັດຈີນ ຈະບໍ່ຮັບສມັກເອົາກັມມະກອນ ອາຍຸຫລາຍໄປເບິ່ງແຍງສວນໝາກໂມຂອງໂຕເອງ. ຈະຮັບສມັກແຕ່ກັມມະກອນ ວັຍໜຸ່ມອາຍຸ 18-20 ປີ ໄປເບິ່ງ ແຍງສວນໝາກໂມເທົ່ານັ້ນ. ໂດຍໃຫ້ຄ່າຈ້າງແຮງງານ ຂອງຄົນລາວມື້ລະ 60,000 ກີບ.

ທີ່ຜ່ານມາ ໃນແຕ່ລະປີ ບໍຣິສັດ ຈີນຈະເຊົ່າດິນຂອງຊາວບ້ານ ປູກໝາກໂມໃນຣະດູແລ້ງ ແຕ່ເດືອນພຶສຈິກາ ຫາເດືອນເມສາ ພາຍຫລັງທີ່ຊາວບ້ານເກັບກູ້ເຂົ້ານາປີ ສຳເຣັດແລ້ວ ແລະເປັນການເຊົ່າດິນປູກໝາກໂມ ທີ່ເປັນສັນຍາປີຕໍ່ປີເພື່ອສົ່ງເສີມ ໃຫ້ຊາວບ້ານມີຣາຍຮັບຈາກການບໍຣິສັດເຊົ່າດິນ ແລະເພື່ອໃຫ້ຊາວບ້ານມີວຽກເຮັດງານທັມ.

ແຕ່ໃນສະພາບຄວາມເປັນຈິງ ພາຍຫລັງທີ່ ບໍຣິສັດ ຈີນເກັບໝາກໂມອອກໄປຂາຍຈົ ນໝົດແລ້ວນັ້ນຊາວບ້ານເຈົ້າຂອງດິນ ກໍຕ້ອງຊັບສ່າວເກັບມ້ຽນດິນໂຕເອງ ທີ່ປສົບບັນຫາພົບເຫັນເສດຂີ້ເຫຍື້ອ ຕົກຄ້າງຢູ່ໃນດິນຢ່າງຫລວງຫລາຍ ທີ່ຜູ້ເຊົ່າດິນບໍ່ສະສາງໃຫ້. ອີກທັງເຂົ້ານາປີປີ ທີ່ຜ່ານມາໄດ້ຜົລຜລິດໜ້ອຍລົງ ເຂົ້າບໍ່ງາມ ເມັດລີບສີດຳ ຍ້ອນດິນເຊື່ອໂຊມ.

ດັ່ງຊາວບ້ານຢູ່ບ້ານນໍ້າຟ້າ ເມືອງວຽງພູຄາ ກ່າວໃນມື້ດຽວກັນວ່າ:

ປູກໝາກໂມສ່ວນຫລາຍ 2-3 ປີທຳອິດກໍຖືວ່າດີຢູ່ແຕ່ວ່າ ໄລຍະຫລັງນີ້ກໍຖືວ່າໂອ້ປະຊາ ຊົນກໍເຣີ້ມຊິບໍ່ຢາກໃຫ້ປູກແລ້ວມີຜົລກະທົບ ຫລາຍຢ່າງປີຫລັງນີ້. ຫລັງຈາກທີ່ພົ່ນປຸຍ ພົ່ນຫຍັງຢູ່ດິນນາຄືເຂົ້າບໍ່ງາມແລ້ວ, ນາທຸກລະດູເຂົາເຈົ້າ ເກັບກ່ຽວອອກແລ້ວພວກເຮົາ ໄປອານາມັຍໄປມ້ຽນມັດຄືວ່າມັນ ມີເສດແຜ່ນຢາງຕົກຄ້າງຢູ່ໄຮ່ນາຫລາຍ ຈົນບໍ່ສາມາດເກັບອອກໄດ້ນ່າ, ກໍບໍ່ຢາກໃຫ້ປູກປານໃດຖ້າມີພືດແນວອື່ນຫັ້ນໃຫ້ປະຊາຊົນເຮັດເອງ ກໍມີຕລາດໃຫ້ເຂົາ ຂາຍປະຊາຊົນສ່ວນຫລາຍ ເຂົາກໍຢາກເຮັດແບບນັ້ນ.”

ນອກຈາກນີ້ ຈີນຍັງໄດ້ຫລຸດຄ່າເຊົ່າດິນຊາວບ້ານ ລົງອີກເປັນຕົ້ນໃນປີ 2021-2022 ບໍຣິສັດ ຈີນໄດ້ຫລຸດຄ່າເຊົ່າດິນ ຂອງຊາວບ້ານເຫລືອເຮັກຕ້າຣ໌ລະ 12 ລ້ານກີບ ຊຶ່ງກໍເປັນອີກເຫຕ ຜົລນຶ່ງທີ່ເຮັດໃຫ້ຊາວບ້ານບໍ່ຢາກຍົກດິນໃຫ້ຈີນເຊົ່າປູກໝາກໂມ. ເນື່ອງຈາກຄ່າເຊົ່າທີ່ດິນຫລຸດລົງຈາກເກົ່າຫລາຍ, ອີກທັງການປູກໝາກໂມ ຂອງຈີນເຮັດໃຫ້ຄັນນາຂອງຊາວບ້ານເປ່ເພ ຍ້ອນຂຸດດິນປູກໝາກໂມເລິກຫລາຍ ເຮັດໃຫ້ການໄຖ ການຄາດ, ການຂຸດດິນ ເພື່ອຕຣຽມເຮັດນາປີ ມີຄວາມຫຍຸ້ງຍາກ.

ດັ່ງຊາວບ້ານ ຢູ່ບ້ານວຽງໃໝ່ເມືອງວຽງພູຄາກ່າວ ໃນມື້ດຽວກັນວ່າ:

ມີແຕ່ວ່າຄັນນາຫັ້ນເປ່ເພເນາະເປ່ເພ ຍ້ອນເຂົາເຈົ້າໄຖເນາະມັນຈະຄັນນາ ຄັນຫຍັງມັນຈະເພເນາະແຕ່ເຣື່ອງຄວາມພໍໃຈນີ້ ປະຊາຊົນເຂົາຢາກຂັດໜ້ອຍນຶ່ງເນາະ ເພາະວ່າເຮັກຕ້າຣ໌ນຶ່ງຕໍ່ 10 ລ້ານເນາະບາດນີ້ປະຊາຊົນເຂົາຢາກໄດ້ 12 ລ້ານເນາະຕໍ່ 1 ເຮັກຕ້າຣ໌ຫັ້ນນ່າແຕ່ວ່າ ຈີນເຂົາບໍ່ຈ່າຍເຂົາວ່າມັນມີພະຍາດໂຄວິດ-19 ເຂົາຈະຫລຸບທຶນຫລຸບທຶນຫຍັງຫັ້ນນ່າ ບາດນີ້ເຂົາກໍມາຂໍນຳປະຊາຊົນເຮັກຕ້າຣ໌ນຶ່ງ 10 ລ້ານກີບຫັ້ນນ່າ.

ຊາວບ້ານອີກທ່ານນຶ່ງ ໄດ້ກ່າວວ່າຖ້າຫາກຕ້ອງການແກ້ໄຂ ຜົລກະທົບດັ່ງກ່າວ ພາກສ່ວນທີ່ກ່ຽວຂ້ອງຕ້ອງໄດ້ຫາແນວພັນພືດອື່ນ ມາສົ່ງເສີມໃຫ້ປະຊາຊົນໃນ 9 ບ້ານເປົ້າໝາຽນັ້ນ ປູກພືດຣະດູແລ້ງແທນການໃຫ້ ບໍຣິສັດຈີນເຊົ່າ ປູກໝາກໂມ. ເນື່ອງຈາກຊາວບ້ານບໍ່ມີທຶນໃນ ການປູກພືດຣະດູແລ້ງ ອີກທັງພື້ນຖານຂອງຊາວບ້ານ ສ່ວນໃຫຍ່ປະກອບອາຊີບປູກເຂົ້ານາປີ ຈຶ່ງເຮັດໃຫ້ບໍ່ມີຄວາມຮູ້ເຕັກນິກ, ວິຊາການໃນການປູກພືດຣະດູແລ້ງ ອີກນຳ.

ດັ່ງຊາວບ້ານ ຢູ່ບ້ານນໍ້າໂອເມືອງວຽງພູຄາໄດ້ກ່າວໃນມື້ດຽວກັນວ່າ:

ບາງຄອບຄົວເຂົາວ່າ ເອີພາຍຫລັງເຮົາເກັບກູ້ເຂົ້າແລ້ວ ເຮົາປະດິນນາເຮົາລ້າໆ ມີຄົນໃຫ້ເຊົ່າເຮົາກໍໄດ້ເງິນພໍຈົກພໍຈ່າຍ ເຂົາຄິດແບບນັ້ນເຂົາບໍ່ຄິດເຖິງວ່າດິນ ຂອງເຮົາຈະເຮັດແນວໃດແລ້ວຊາວບ້ານກໍໄປອອກແຮງງານ ມັນເປັນຜົລສະທ້ອນແນວໃດເຂົາບໍ່ຄິດ ກໍຢາກຮຽກຮ້ອງພາກສ່ວນທີ່ກ່ຽວຂ້ອງຫາ ແນວອື່ນເຮັດພືດຣະດູແລ້ງຫັ້ນນ່າ ໃຫ້ເປັນສີນຄ້າເດ້.

ເຈົ້າໜ້າທີ່ທີ່ກ່ຽວຂ້ອງ ເມືອງວຽງພູຄາ ກ່າວໃນມື້ດຽວກັນວ່າ ພາກສ່ວນທີ່ກ່ຽວຂ້ອງບໍ່ສາມາດດຶງດູດຫາ ນັກລົງທຶນເຂົ້າມາສົ່ງເສີມໃຫ້ຊາວບ້ານ 9 ບ້ານເປົ້າໝາຽ ປູກພືດຣະດູແລ້ງໄດ້ມີແຕ່ນັກລົງທຶນຈີນ ເຂົ້າມາເຊົ້າດິນປູກໝາກໂມ, ຊາວບ້ານຈະໃຫ້ນັກລົງທຶນຈີນເຊົ່າດິນປູກໝາກໂມ ຫລືບໍ່ນັ້ນກໍຂື້ນກັບຄວາມສມັກໃຈ.

ເປັນຕົ້ນແມ່ນດຽວນີ້ ແມ່ນເອີ້ນວ່າວຽກການລົງທຶນຫັ້ນ ພວກເຮົາຫັ້ນບໍ່ສາມາດດຶງດູດ ໄດ້ເທົ່າທີ່ຄວນເນາະມີແຕ່ວ່າບາງບໍຣິສັດເຫັນວ່າ ໂອ້ຍຂ້ອຍຊິປູກໝາກໂມຂ້ອຍຊິປູກໝາກຖົ່ວແລ້ວ ກໍໃຫ້ເຂົາເຈົ້າເຮັດ.

ທ່ານໄດ້ກ່າວຕື່ມວ່າ ສ່ວນເຣື່ອງການໃຊ້ສານເຄມີ ປູກໝາກໂມຂອງບໍຣິສັດຈີນ ນັ້ນແມ່ນໄດ້ຮັບການກວດສອບຢ່າງຕໍ່ເນື່ອງ ຈາກເຈົ້າໜ້າທີ່ທີ່ກ່ຽວຂ້ອງຂັ້ນເມືອງ ແລະພາບຮວມຂອງການໃຊ້ສານເຄມີ ປູກໝາກໂມຂອງຈີນ ກໍມີຄວາມລະມັດລະວັງ ໃນການໃຊ້ສານເຄມີ, ຊຶ່ງກັມມະກອນລາວ ທີ່ອອກແຮງງານຢູ່ສວນໝາກໂມຈີນກໍມີສຸຂພາບບໍ່ແຂງແຮງ ແຕ່ກໍບໍ່ສາມາດຢັ້ງຢືນໄດ້ວ່າ ແມ່ນຍ້ອນສານເຄມີຈາກສວນໝາກໂມຂອງຈີນແທ້ບໍ່.

ຈຳນວນນຶ່ງບໍ່ເຂົ້າໃຈກໍຄິດວ່າ ໂອ້ຍເປັນສານເຄມີີທີ່ວ່າມີຜົລກະທົບ ແຕ່ວ່າໃນນາມວິຊາການຫັ້ນມັນກໍເປັນຝຸ່ນເນາະ ອາດຈະໃຫ້ທັງຮາກທັງໃບທັງດອກ ທັງໝາກເນາະໄທເຮົາກໍຈຳກັດ ທີ່ຈິງມັນກໍມີພາກສ່ວນນຶ່ງກໍໄປເທັສຜູ້ລົງທຶນກໍລະມັດລະວັງ ທີ່ສຸດຖ້າຫາກວ່າໄປກວດເກີນມາຕຖານແລ້ວ ເຂົາຈະບໍ່ເອົາເລີຍຫັ້ນນ່າສະແດງວ່າຜູ້ລົງທຶນຈະເສັຽທຶນ ຢູ່ໃນຈຸດນີ້ເຂົາກໍລະມັດລະວັງທີ່ສຸດ.

ບໍຣິສັດ ໂຢປັງ ເຕັກນິກກະສິກັມຂາເຂົ້າ-ຂາອອກ ຈຳກັດຜູ້ດຽວຂອງນັກລົງທຶນຈີນເຂົ້າມາເຊົ່າດິນຊາວບ້ານຢູ່ເມືອງວຽງພູຄາເພື່ອປູກໝາກໂມໄດ້ປະມານ 5 ຫາ 6 ປີແລ້ວ, ຮູບແບບການລົງທຶນແມ່ນບໍຣິສັດເປັນຜູ້ລົງທຶນ 100% ຊຶ່ງບ້ານເປົ້າໝາຽ ໃນການປູກໝາກໂມມີ 9 ບ້ານເປັນຕົ້ນ ບ້ານນໍ້າຟ້າ, ບ້ານວຽງໃໝ່, ບ້ານໜອງຄຳ, ບ້ານນໍ້າໂອ, ສ່ວນອີກ 5 ບ້ານແມ່ນຍັງບໍ່ຮູ້ຊັດເຈັນ. ປັດຈຸບັນໝາກໂມຂອງຈີນທີ່ປູກເມື່ອເດືອນພຶສຈິກາ ປີ 2021 ກໍເຣີ້ມອອກຜົລຜລິດ ແລະຈະອອກຜົລຜລິດເຕັມເມັດ ເຕັມໜ່ວຍປະມານເດືອນເມສາ ຂອງປີນີ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.