ຣັຖບານ ຕຣຽມສຶກສາ ທາງຣົຖໄຟ ສວັນນະເຂດ-ລາວບາວ

ຫຼັງ​ຈາກໂຄງ​ການ ​ທາງ​ຣົ​ຖໄຟ ​ລາວ-ຈີນ ມູນ​ຄ່າ​ປະ​ມານ 6 ຕື້ ໂດ​ລາຣ໌ ໄດ້​ ​ເປີດ​ດຳ​ເນີນ​ການ ​ໄປ​ແລ້ວ ໂດຍ​ສັດ​ສ່ວນ ​ຂອງ​ການ​ຖື​ຮຸ້ນ​ ຂອງ​ປະ​ເທດ​ລາວແມ່ນ 30% ສ່ວນ​ວ່າ ຈີນ 70%.

ໃນ​ການ​ດຳ​ເນີນ​ໂຄງ​ການ​ດັ່ງ​ກ່າວ ຣັ​ຖ​ບານລາວ ພຽງ​ແຕ່​ໃຊ້​ງົບ​ປະ​ມານ ​ປະ​ຈຳ​ປີ​ຂອງ​ໂຕ​ເອງ ເກືອບ 500 ລ້ານໂດ​ລາ​ຣ໌ເທົ່າ​ນັ້ນ ເຂົ້າ​ໃນ​ໂຄງ​ການ​ດັ່ງ​ກ່າວ ແຕ່ສ່ວນ​ທີ່ເຫຼືອ ​ແມ່ນເງິນ​ກູ້​ຢືມ ​ຈາກ​ຈີນ ມູນ​ຄ່າ​ປະ​ມານ 1 ຕື້ ໂດ​ລ້າ​ຣ໌ປາຍ.

ປັດ​ຈຸ​ບັນ ປະ​ເທດ​ລາວ ຕິດ​ໜີ້ ແລະ ຈະ​ຕ້ອງ​ຈ່າຍ​ໜີ້​ ຕ່າງ​ປະ​ເທດ​ລວມ​ທັງ​ຈີນ ໃນ​ມູນ​ຄ່າປະ​ມານ 1.2 ຕື້​ໂດ​ລ້າຣ໌, ໃນ​ແຕ່​ລະ​ປີ ບັບ​ແຕ່​ປີ 2022-2025 ອີງ​ຕາມ​ຂໍ້​ມູນ​ຈາກທາງ​ການ​ລາວ ແລະ ຍັງ​ມີ​ແນວ​ໂນ້ມ​ວ່າ ປະ​ເທດ​ລາວ​ ຈະ​ຜິດ​ນັດ​ການ​ຈ່າຍ​ໜີ້, ແຕ່​ ສິ່ງ​ທີ່​ຈະ​ເປັນ​ປະ​ເດັນ ​ຫຼາຍກວ່າ​ນັ້ນ ກໍ​ຄື ທາງ​ການ​ລາວ ແລະ ວຽດ​ນາມ ໄດ້​ສຶກ​ສາ ​ຄວາມ​ເປັນ​ໄປ​ໄດ້ ກ່ຽວ​ກັບ​ໂຄງ​ການ​ ທາງ​ຣົ​ຖ​ໄຟ ​ສວັນນະ​ເຂດ-ລາວ​ບາວ ເຣີ່ມ​ຈາກ​ແຂວງ​ສວັນ​ນະ​ເຂດ ໄປ​ຫາ ຊາຍ​ແດນ​ວຽດ​ນາມ ທີ່​ຕິດ​ກັບ​ແຂວງກວາງ​ຕ​ຣີ ມີ​ມູນ​ຄ່າປະ​ມານ 5 ຕື້ ໂດ​ລ້າ​ຣ໌ ແລະ ມີ​ຄວາມ​ຍາວ 220 ກິ​ໂລ​ແມັດ.

​​ເຈົາ​ໜ້າ​ທີ່ ແລະ ປະ​ຊາ​ຊົນຈຳ​ນວນ​ນຶ່ງ ຍັງ​ບໍ່​ເຫັນ​ວ່າ ທາງ​ຣົ​ຖ​ໄຟ ຜ່ານ​ມາ ແຂວງ​ສວັນ​ນະ​ເຂດ ຈະ​ມີ​ຄວາມ​ຈຳ​ເປັນ​ ໃນ​ການ​ສ້າງ ໂດຍ ສະ​ເພາະໂຄງ​ການ​ດັ່ງ​ກ່າວ ມີ​ມູນ​ຄ່າ​ປະ​ມານ 5 ຕື້ ໂດ​ລ້າ​ຣ໌. ຖ້າຣັ​ຖ​ບານລາວ ຢືມ​ເງິນມາສ້າງ ​ໂຄງ​ການນີ້​ເກີດຂຶ້ນ ຈະ​ເພີ່ມ​ໜີ້​ສິນ ​ໃຫ້​ປະ​ເທດ​ລາວອີກ ເພາະ​ວ່າ ຣັ​ຖ​ບານບໍ່​ມີ​ເງິນ ​ທີ່​ຈະ​ມາ​ສ້າງໂຄງ​ການ​ດັ່ງ​ກ່າວ ນອກ​ຈາກ​ຈະ​ກູ້​ຢືມ​ເງິນ​ ຈາກ​ຕ່າງ​ປະ​ເທດມາ​ສ້າງ ເຊິ່ງ​ເຈົ້າ​ໜ້າ​ທີ່​ບາ​ງຄົນ ກໍ​ເຫັນ​ວ່າ ຍັງ​ບໍ່​ມີ​ຄວາມ​ຈຳ​ເປັນ.

ເຈົ້າ​ໜ້າ​ທີ່ ​ທ່ານ​ນຶ່ງຜູ້​ທີ່ບໍ່​ປະ​ສົງ​ອອກ​ຊື່ ແລະ ຕຳ​ແໜ່ງ ໄດ້ກ່າວຕໍ່​ວິທຍຸ ເອ​ເຊັຽ​ເສ​ຣີ ​ວ່າ:

“ຂັ້ນ​ວ່າ ຣັ​ຖ​ບານ​ຊິ​ລົງ​ທຶນນີ້ ໂອ້ຍ ບໍ່​ຈຳ​ເປັນ​ຊິ​ລົງ​ທຶນດອກ ມັນ​ເສັ້ນ​ທາງ​ ມັນ​ໄລ​ຍະ​ຈໍ້ໆ ໂຕນີ້​ເນາະ ເພາະ​ວ່າ ມັນ​ຈະ​ບໍ່​ໄດ້​ຮັບ​ໃຊ້​ ທົ່ວ​ໄປ​ເດ້​ເນາະ. ຢູ່​ໃນ​ນີ້ ຈະ​ບໍ່​ໄດ້​ຮັບ​ໃຊ້​ການ​ບໍ​ຣິ​ການ​ ສັງ​ຄົມ​ທົ່ວ​ໄປ ຈະ​ຮັບ​ໃຊ້​ແຕ່​ກຸ່ມ​ການ​ຄ້າ ​ພາກ​ສ່ວນ​ອື່ນ​ພຸ້ນ​ບັນ​ຫານີ້.”

ຖ້າຣັ​ຖ​ບານ​ຊິ​ຢືມ​ເງິນ ​ມາ​ລົງ​ທຶນ​ໃສ່​ທາງ​ຣົ​ຖ​ໄຟ ແມ່ນບໍ່​ກຸ້ມ​ຄ່າ ເພາະ​ວ່າ ມັນ​ເປັນ​ໄລ​ຍະ​ສັ້ນ ປະ​ມານ 220 ກິ​ໂລ​ແມັດ.

ເຈົ້າ​ໜ້າ​ທີ່​ທ່ານນີ້ ກ່າວ​ຕື່ມ​ອີກວ່າ:

“ໂອ້ບໍ່​ເປັນ​ແຫຼ ບໍ່​ກຸ້ມ​ຄ່າ ເພາະ​ວ່າ ສະ​ຖານ​ນີ​ມັນ​ຫັ້ນ ຄັນ​ວ່າ​ຕັ້ງ​ແຕ່ມຸກ​ດາ​ຫານ ມາຮອດ ລາວບາວ ມັນ​ກະ 200 ກວ່າ​ຫຼັກ ມັນ​ກະ​ບໍ່​ໄດ້​ມີ​ຫຍັງ​ວ່າ ຄົນ​ລາວ​ເຮົາ​ຊິ​ໄປ​ ນຳ​ໃຊ້​ຢູ່​ໃນ​ຫັ້ນ ສູງ​ສຸດ​ເຂົາ​ກະ​ຊິ​ໄດ້​ຂີ່​ແຕ່​ທາງ​ຣົ​ຖ​ໄຟ ອັນ​ອື່ນ​ຊິບໍ່​ໄດ້​ມີ.”

ປະ​ເທດ​ລາວ ບໍ່​ມີ​ສິນ​ຄ້າ​ກະ​ສິ​ກັມ ທີ່​ຈະ​ສົ່ງ​ອອກ ໄປ​ຕ່າງ​ປະ​ເທດ ຜ່ານ​ທາງ​ຣົ​ຖ​ໄຟ ເມື່ອ​ທຽບ​ໃສ່​ປະ​ເທດ​ເພື່ອນ​ບ້ານ ​ຄື ວຽດ​ນາມ ແລະ ໄທ​ຍ.

ເຈົ້າ​ໜ້າ​ທີ່ ທ່ານນີ້ ກ່າວ​ຕື່ມ​ອີກວ່າ:

“ເພາະ​ບ້ານ​ເຮົາ ​ບໍ່​ໄດ້​ມີ​ສິນ​ຄ້າ​ ພໍ​ພິ​ລຶກ​ ຫຶກ​ໜາຫັ້ນ​ນ່າ ຢູ່​ບ້ານ​ເຮົາ ຄັນ​ດ້ານ​ກະ​ສິ​ກັມ ໄປ​ທຽບ​ໃສ່​ປະ​ເທດ​ໄທ​ຍ ກັບ ວຽດ​ນາມ ບໍໍ່​ໄດ້​ເຄິ່ງ​ນຶ່ງ​ ຂອງ​ເຂົາ​ຊ້ຳ.”

ຖ້າ​ຣັ​ຖ​ບານ​ຈະສ້າງ ຈະ​ຕ້ອງ​ມີການ​ຄ້ຳ​ປະ​ກັນ ເງິນ​ກູ້​ຢືມ ແຕ່ບໍ່​ແຮ່ ຢູ່​ປະ​ເທດ​ລາວ ກໍ​ເຣີ່ມ​ໜ້ອຍ​ລົງ, ແລະ ປະ​ຊາ​ຊົນ​ເຫັນ​ວ່າ ບໍ່​ຄວນ​ໃຫ້​ໄປ​ແຕະ​ຕ້ອງ ​ຜົ​ລ​ປ​ໂຍດ​ຂອງ​ປະ​ຊາ​ຊົນ ຫຼາຍ​ຈົນ​ເກີນ​ໄປ.  

ປະ​ຊາ​ຊົນ ທ່ານ​ນຶ່ງ ໄດ້​ກ່າວ​ວ່າ: ​

“ຂັ້ນ​ມັນ​ເກີດ​ຢ່າງ​ຈິງ​ໃຈ ໂດຍ​ທີ່​ວ່າ ເອີ ບໍ່​ໄດ້​ແຕະ​ຕ້ອງ​ຂອງ​ປະ​ຊາ​ຊົນ​ ຈົນ​ເກີນ​ໄປ ກະ​ຊົມ​ເຊີຍ​ຫັ້ນ​ແຫຼ ນັກ​ລົງ​ທຶນ​ເຂົາ​ເຮັດ ບໍ່​ແມ່ນ​ຣັ​ຖ​ບານ​ເຮັດ ຄັນ​ຣັ​ຖ​ບານ​ລົງ​ທຶນ​ ຊິ​ເອົາ​ຫຍັງ​ປະ​ກັນ​ເຂົາ​ບາດນີ້ ບໍ່​ຄຳ ​ບໍ່​ເງິນ ກະ​ບໍ່​ແມ່ນ​ໝົດ​ລະ​ເບາະ ຢູ່​ສວັນ​ນະ​ເຂດ ຄັນ​ນັກ​ລົງ​ທຶນ​ເຮັດ​ກະ​ດີ​ແລ້ວ ໃຫ້​ມັນ​ມີ​ກະ​ດີ.”

ແຕ່​ໃນ​ດ້ານ​ຄວາມ​ຄິດ​ ຂອງ​ນັກ​ທຸ​ຣະ​ກິຈ​ແລ້ວ, ​ການກໍ່​ລົງ​ທຶນ​ໃສ່​ໂຄງ​ສ້າງ​ພື້ນ​ຖານ ມັນ​ຈະ​ກຸ້ມ​ຄ່າ ແຕ່ວ່າ ການ​ລົງ​ທຶນ​ນັ້ນ​ ຕ້ອງ​ມີ​ຄວາມ​ໂປ່ງ​ໃສ ແລະ ບໍ່​ໂກງ​ກິນ.

ນັກ​ທຸ​ຣະ​ກິ​ຈ ທ່ານ​ນຶ່ງ ໄດ້​ກ່າວ​ວ່າ:

“ຄັນ​ການກໍ່​ສ້າງ​ພື້ນ​ຖານ​ ໂຄງ​ລ່າງ ນີ້ ເຮົາ​ເຫັນ​ດີ​ນຳ​ໝົດ ຊຸມ​ເຊີຍ ແຕ່​ຕ້ອງ​ຍຸ​ຕິ​ທັມ ຕໍ່​ປະ​ຊາ​ຊົນ ໃນ​ເມື່ອ​ຖືກ​ດິນ​ຂອງ​ເຂົາ​ ຕ້ອງ​ຊົດ​ໃຊ້​ໃຫ້​ເໝາະ​ສົມ ແລະ ສ້າງ​ໂອ​ກາດ​ໃຫ້​ເຂົາ​ ໃຫ້​ມັນ​ໄດ້ ຜ່ານ​ມານີ້ ບໍ່​ເໝາະ​ສົມ ຢາກ​ປ່ອຍ​ປະ​ລະ​ເລີຍ​ ເຂົາ​ຫຼາຍກວ່າ.”

ໂຄງ​ການ​ເສັ້ນ ທາງຣົ​ຖ​ໄຟ ສວັນ​ນະ​ເຂດ-ລາວ​ບາວ ມີ​ຄວາມ​ຍາວ 220 ກິ​ໂລ​ແມັດ ມີມູນ​ຄ່າ​ປະ​ມານ 5 ຕື້ ໂດ​ລ້າ​ຣ໌ ໃນ​ຂະ​ນະ​ທີ່ ໂຄງ​ການ​ຣົົຖ​ໄຟ​ ລາວ-ຈີນ ມີ​ຄວາມ​ຍາວ ປະ​ມານ 400 ກິ​ໂລ​ແມັດ ມີມູນ​ຄ່າ​ປະ​ມານ 6 ຕື້ ໂດ​ລ້າ​ຣ໌.

ອີງ​ຕາມ​ຂໍ້​ມູນ ​ຈາກ​ໂຄງ​ການ, ຈະ​ມີ​ການສຳ​ປະ​ທານ ​ທີ່​ດິນ​ສຳ​ລັບ​ ໂຄງ​ການ​ດັ່ງ​ກ່າວ ​ປະ​ມານ 4,100 ເຮັກ​ຕ້າຣ໌.

ປະ​ຊາ​ຊົນຈຳ​ນວນ​ນຶ່ງ ບໍ່​ໃຫ້​ຄວາມ​ສົນ​ໃຈ ​ເຣື່ອງ​ທາງ​ຣົ​ຖ​ໄຟ ແຕ່ໃຫ້​ຄວາມ​ສົນ​ໃຈ​​ ເສັ້ນ​ທາງຣົ​ຖທົ່ວ​ໄປ ຫຼາຍກວ່າ ເພາະ​ວ່າ ປັດ​ຈຸ​ບັນ​ ເສັ້ນ​ທາງ​ເລກ​ທີ່ 13 ໃຕ້​ ມີ​ການ​ເປ່​ເພ​ຫຼາຍ ສ້າງ​ຄວາມຫຍຸ້ງ​ຍາກ ​ໃນ​ການ​ເດີນ​ທາງ.

ຊາວ​ແຂວງ​ສວັນ​ນ​ະ​ເຂດ​ ທ່ານ​ນຶ່ງ ໄດ້​ກ່າວ​ຕໍ່ວິທຍຸ ​ເອ​ເຊັຽ​ເສ​ຣີ ວ່າ:

“ຢ່າ​ຟ້າວ​ເວົ້າ​ເຣື່ອງ​ທາງ​ຣົ​ຖ​ໄຟ ເບິ່ງ​ຫົນ​ທາງ​ທີ່​ຂ້ອຍ​ມາມື້ນີ້ ຂີ່​ຣົົຖ​ແຕ່​ສວັນ​ນະ​ເຂດ ຮອດ​ວຽງ​ຈັນ ໃຊ້​ເວ​ລາ 10 ຊົ່ວ​ໂມງ.”

ຊາວ​ແຂວງ​ສວັນ​ນະ​ເຂດ ທ່ານນີ້ ໄດ້ກ່າວ​ຕື່​ມີ​ອີກວ່າ:

“ຂ້ອຍ​ເອົາ​ຣົ​ຖ​ສ່ວນ​ໂຕ​ມາ ບໍ່​ຈັກ​ຫຼີກ​ຂຸມ ​ຫຼີກ​ຫຍັງ ທາງ​ເສັ້ນ​ເກົ່າ ​ທີ່​ຍັງ​ບໍ່​ທັນ​ໄດ້​ແປງ ​ແມ່ນ​ເຣີ່ມ ແຕ່​ສວັນ​ນະ​ເຂດ ​ໄປ​ຮອດ​ນ້ຳ​ທອນ ແຂວງ​ຄຳ​ມ່ວນ ແຕ່​ວ່າ ກາ​ຍ​ນ້ຳ​ທອນ​ລົງ​ໄປ​ ຮອດປາກ​ກະ​ດິງ ລົງ​ໄປ​ຮອດ​ວຽງ​ຈັນ ໂອ້ຍ ແມ່ນ​ຕາຍ​ເລີຍ.”

ຣັ​ຖ​ບານ​ລາວ ໄດ້​ອະ​ນຸ​ມັດ ເຫັນ​ດີ ໃຫ້​ມີ​ການ ດຳ​ເນີນ​ການ​ສຶກ​ສາ ​ຄວາມ​ເປັນ​ໄປ​ໄດ້ ຫຼື ເຮັດ​ບົດ​ວິ​ພາກ​ທາງ​ເສ​ຖ​ກິ​ຈ ສຳ​ລັບ​ການກໍ່​ສ້າງ ​ທາງ​ຣົ​ຖ​ໄຟ ເສັ້ນ​ທາງ ​ຈາກ​ແຂວງ​ສວັນ​ນະ​ເຂດ ໄປ​ຫາ ຊາຍ​ແດນ​ລາວ-ບາວ ທີ່​ຕິດ​ກັບແຂວງ ກວາງ​ຕ​ຣີ ຂອງວຽດ​ນ​າມ.
ເວບ​ໄຊ​ຕ໌ຂ່າວ ທີ່​ຊື່ວ່າ “Laotian Times” ໄດ້​ຣາຍ​ງານ​ວ່າ: “ບໍ​ຣິ​ສັດ ວິ​ສາ​ວະ​ກອນກໍ່​ສ້າງ ຈຽງ​ຊູ ເຮັງ​ຕົ້ງ ຈຳ​ກັດ (Jiangsu Hengtong Construction Engineering Co., Ltd) ໄດ້​ດຳ​ເນີນ​ການ​ສຳ​ຣວດ ໂຄງ​ການ ​ເສັ້ນ​ທາງ​ຣົ​ຖ​ໄຟ​ ດັ່ງ​ກ່າວ ໂດຍແມ່ນ ທ່ານ ເສດ​ຖາ​ບັນ​ດິນ ອິນ​ສີ​ຊຽງ​ໃໝ່ ຮອງ​ຣັ​ຖ​ມົນ​ຕ​ຣີ ກະ​ຊວງ ແຜນ​ການ ແລະ ການ​ລົງ​ທຶນ ໄດ້​ເຊັນ ບົດ​ບັນ​ທຶກ ​ຄວາ​ມ​ເຂົ້າ​ໃຈ ກັບໂຕ​ແທນ​ບໍ​ຣິ​ສັດ ດັ່ງ​ກ່າວ ເພື່ອ​ດຳ​ເນີນ​ການ​ສຶກ​ສາ ​ຄວາມ​ເປັນ​ໄປ​ໄດ້.”

ການ​ເຊັນ​ບົດ​ບັນ​ທຶກ​ ຄວາມ​ເຂົ້າ​ໃຈດັ່ງ​ກ່າວ ໄດ້​ມີ​ຂຶ້ນ​ໃນ​ວັນ​ທີ 13 ກັນ​ຍາ 2022 ທີ່​ຜ່ານ​ມາ. ໃນ​ເບື້ອງ​ຕົ້ນ ໂຄງ​ການ​ດັ່ງ​ກ່າວ ໄດ້​ເຣີ່ມ​ດຳ​ເນີນ​ການ​ແຕ່​ປີ 2013 ແຕ່ ບໍ່​ສາ​ມາດ​ດຳ​ເນີນ​ການ​ໄດ້ ໃນ​ເວ​ລາ​ນັ້ນ.
​ເວບ​ໄຊ​ຂ່າວ “Laotian Times” ໄດ້​ອ້າງ ຄຳ​ເວົ້າ​ຂອງ ທ່ານ ສອນ​ສັກ ນໍ ຫານ​ຊະ​ນະ ຜູ້​ປະ​ສານ​ງານ​ໂຄງ​ການ ທາງ​ຣົ​ຖ​ໄຟ ​ສວັນ​ນະ​ເຂດ-ລາວ​ບາວ ໄດ້​ກ່າວ​ວ່າ:

“ໂຄງ​ການ​ມີ​ມູນ​ຄ່າ 5 ຕື້ ໂດ​ລ້າ​ຣ໌ ຖ້າ​ວ່າ ໄດ້​ຮັບ​ການ​ອະ​ນຸ​ມັດ. ການ​ເຮັດ​ບົດ​ວິ​ພາກ ​ເສ​ຖ​ກິ​ຈ ຈະ​ໃຊ້​ເວ​ລາ 2 ປີ ແລະ ການກໍ່​ສ້າງ​ຈະ​ໃຊ້​ເວ​ລາອີກ 3 ປີ.” 

ບໍ​ຣິ​ສັດ ໄດ້​ຮຽກ​ຂໍ​ການ​ສັມ​ປະ​ທານ ​ທີ່​ດິນນຳ​ຣັ​ຖ​ບານ​ລາວ ໃນ​ເນື້ອ​ທີ່ 4,100 ເຮັກ​ຕ້າຣ໌ ເພື່ອ​ສ້າງ​ເປັນສະ​ຖານີ ​ຂ​ນາດ​ໃຫຍ່ 4 ແຫ່ງ ແລະ ຂ​ນາດ​ນ້ອຍ 7 ແຫ່ງ ຢູ່​ທີ່​ດິນ​ຕາມ​ແລວ​ທາງ​ຣົ​ຖ​ໄຟ.

ນອກ​ຈາກນີ້ ຍັງ​ມີ​ການ​ເຮັດ​ບົດ​ວິ​ພາກ ​ເສ​ຖ​ກິ​ຈ ໂຄງ​ການ​ເຊື່ອມ​ຕໍ່ທາງ​ຣົ​ຖ​ໄຟ​ ຈາກ​ນະ​ຄອນ​ຫລວງວຽງ​ຈັນໄປ​ຫາເມືອ​ງ​ທ່າ​ແຂກ ແຂວງ​ຄຳ​ມ່ວນ ກ່ອນ​ທີ່​ເຊື່ອມ​ຕໍ່​ໃສ່ ​ປະ​ເທດ​ວຽດ​ນາມ.

ຣັ​ຖ​ບານລາວ ໄດ້​ເຊັນ​ບົດ​ບັນ​ທຶກ​ຄວາມ​ເຂົ້າ​ໃຈ ໃນ​ວັນ​ທີ 30 ມິ​ຖຸ​ນາ 2022 ທີ່​ຜ່ານ​ມາ ກັບ ບໍ​ຣິດ Petro Trade ເພື່ອ​ດໍ​າ​ເນີນ​ການ ​ສຶກ​ສາຄວາມ​ເປັນ​ໄປ​ໄດ້ ຫຼື ເຮັດ​ບົດ​ວິ​ພາກ​ເສ​ຖ​ກິ​ຈ ໂຄງ​ການ​ທາງ​ຣົ​ຖ​ໄຟ​ທີ່​ເຊື່ອ​ຕໍ່ ຈາກ​ນະ​ຄອນ​ຫລວງວຽງ​ຈັນ ໄປຫາ ເມືອງ​ທ່າ​ແຂກ ແຂວງ​ຄຳ​ມ່ວນ. ໂຄງ​ການ​ດັ່ງ​ກ່າວ ຮູ້​ຈັກ​ກັນ​ໃນ​ນາມ ໂຄງ​ການຣົ​ຖ​ໄຟ​ລາວ-ວຽດ​ນາມ ເຊິ່ງ​ເປັນ​ໂຄງ​ການ​ທາງ​ຣົ​ຖ​ໄຟ ລາງດ່ຽວ ທີ່​ເຊື່ອມ​ຕໍ່​ ລະ​ຫວ່າງ ລາວ ແລະ ວຽດ​ນາມ. ໂຄງ​ການທາງ​ຣົ​ຖ​ໄຟ​​ດັ່ງ​ກ່າວ ມີ​ມູ​ນຄ່າ 5 ຕື້​ໂດ​ລ້າ​ຣ໌ ມີ​ຄວາມ​ຍາວ 452 ກິ​ໂລ​ແມັດ. ໄລ​ຍະທີ​ 1, ທາງ​ຣົ​ຖ​ໄຟ ຈະເຊື່ອມ​ຈອດ ລະ​ຫວ່າງ ເມືອງ​ທ່າ​ແຊກ ແຂວງ​ຄຳ​ມ່ວນຂອງ​ລາວ ກັບ ທ່າ​ເຮືອ ວຸງ​ອາງ (Vung Ang) ມີ​ຄວາມ​ຍາວເກືອບ 140 ກິ​ໂລ​ແມັດ.   

ສ່ວນ​ວ່າ ໄລ​ຍະ​ທີ 2 ຈະ​ເຊື່​ອມ​ຕໍ່ຈາກເມືອງ​ທ່າ​ແຂກ ແຂວງ​ຄຳ​ມ່ວນ ໄປ​ຫາ ນະ​ຄອນ​ຫລວງວຽງ​ຈັນ ມີ​ຄວາມ​ຍາວອີກ 312 ກິ​ໂລ​ແມັດ.  

ຍາ​ນາງ ຄຳ​ຄອນ ວົງ​ແສນ​ບູນ ຮອງ​ຣັ​ຖ​ມົນ​ຕ​ຣີ ກະ​ຊວງ​ແຜນ​ການ ແລະ ລົງ​ທຶນ, ແລະ ທ່ານ ວຽງ​ຄອນ ສິດ​ທິ​ໄຊ ຮອງປະ​ທານບໍ​ຣິ​ສັດ Petro Trade ໄດ້​ເຊັນ​ບົດ​ບັນ​ທຶກ ​ຄວາມ​ເຂົ້າ​ໃຈກ່ຽວ​ກັບ ​ໂຄງ​ການ​ສຳ​ຣວດ​ ຄວາມ​ເປັນ​ໄປ​ໄດ້. 

ທ່ານ ວຽງ​ຄອນ ສິດ​ທິ​ໄຊ ໄດ້​ກ່າວ​ໃນ​ພິ​ເຊັນ​ບົດ​ບັນ​ທຶກ ​ຄວາມ​ເຂົ້າ​ໃຈ ວ່າ ບໍ​ຣິ​ສັດ ໄດ້ຮັບ​ຄວາມ​ໄວ້​ໃຈ​ຈາກ​ຣັ​ຖ​ບານ​ ໃນ​ການ​ລົງ​ທຶນ ແລະ ພັ​ທ​ນາ​ໂຄງ​ການ​ຕ່າງໆ.

ທ່ານ ວຽງ​ຄອນ​ ກ່າວ​ວ່າ:

“ຈຸດ​ປະ​ສົງ​ລວມ ​ຂອງ​ໂຄງ​ການນີ້ ຈະ​ປະກອບ​ສ່ວນ​ເຂົ້າ​ ໃນ​ຄວາມ​ສຳ​ເຣັດ​ ໃນ​ການ​ຫັນ​ປະ​ເທດ​ລາວ​ ຈາກ​ປະ​ເທດ ບໍ່​ມີ​ທາງ​ອອກ​ສູ່​ທະ​ເລ ໃຫ້​ຫັນ​ມາ​ເປັນ​ປະ​ເທດ ​ທີ່​ເຊື່ອ​ມຈອດດ້ວຍເສັ້ນ​ທາງ.”