ຣັຖມົນຕຣີ ກະຊວງໂຍທາທິການ ແລະ ຂົນສົ່ງ ອອກມາຍອມຮັບວ່າ ການຈ່າຍຄ່າ ຊົດເຊີຍ ໃຫ້ແກ່ຜູ້ທີ່ໄດ້ຮັບຜົລກະທົບ ໂຄງການທາງຣົຖໄຟ ລາວ-ຈີນ ມີຄວາມ ຊັກຊ້າ ຍ້ອນວ່າ ວ່າ ຊາວບ້ານ ບໍ່ຍອມຮັບເງິນຄ່າຊົດເຊີຍ ທີ່ສະພາຮັບຮອງ. ທາງການລາວ ຊື້ແຈງ ຢູ່ກອງປະຊຸມ ສໄມສາມັນເທື່ອທີ 4 ຂອງສະພາແຫ່ງຊາຕຊຸດທີ 9 ຫຼື ກອງປະຊຸມສະພາແຫ່ງຊາຕ ກ່ຽວກັບສາເຫດທີ່ວຽກງານ ການຈ່າຍຄ່າຊົດເຊີຍ ໃຫ້ແກຊາວບ້ານ ທີ່ຖືກຜົລກະທົບຈາກໂຄງການ ກໍ່ສ້າງທາງຣົຖໄຟ ລາວ-ຈີນ ໄດ້ດຳເນີນການໄປແບບຊັກຊ້າ ແລະ ບໍ່ທັນສຳເຣັດ ຍ້ອນຊາວບ້ານຈຳນວນນຶ່ງ ບໍ່ຍອມຮັບເອົາຄ່າຊົດເຊີຍ.
ທ່ານ ວຽງສະວັດ ສີພັນດອນ ຣັຖມົນຕຣີ ກະຊວງໂຍທາທິການ ແລະ ຂົນສົ່ງ ໄດ້ກ່າວໃນວັນທີ 7 ທັນວາ ວ່າ:
" ຈ່າຍຄ່ າ ຊົດ ເຊີຍໂຕ ຈິງ ປະ ຊາ ຊົນ ແລ້ວ 1,651.29 ຕື້ ຍັງ ເຫຼືອ 64.59 ຕື້ ສ່ວນ ໃຫຍ່ ແມ່ນ ປະ ຊາ ຊົນ ຜູ້ ທີ່ຖືກ ຜົ ລ ກະ ທົບ ບໍ່ ຍອມ ຮັບ ລາ ຄາ ຊົດ ເຊີຍ ທີ່ ສະ ພາ ຂັ້ນ ແຂວງ ສະ ພາ ນະ ຄອນ ຫລວງ ຮັບ ຮອງ ອັນ ນີ້ ແມ່ນ ບັນ ຫາ ຕົ້ນ ຕໍ ທີ່ ຍັງ ຄ້າງ ຄາ ແກ່ ຍາວ ."
ທ່ານ ວຽງສະວັດ ສີພັນດອນ ຣັຖມົນຕຣີ ກະຊວງໂຍທາທິການ ແລະ ຂົນສົ່ງ ຍັງຣາຍງານຄວາມຄືບໜ້າ ຂອງການຈ່າຍຄ່າຊົດເຊີຍ ໃຫ້ແກ່ຊາວບ້ານ ທີ່ຖືກຜົລກະທົບ ຈາກໂຄງການທາງຣົຖໄຟ ລາວ-ຈີນ ວ່າ ມາຮອດເດືອນພຶສຈິກາ 2022 ສາມາດຊົດເຊີຍ ສຳເຣັດແລ້ວ 5,755 ຄອບຄົວ ແລະ ຍັງບໍ່ທັນໄດ້ຊົດເຊີຍ ຈຳນວນ 1,130 ຄອບຄົວ ເຊິ່ງເປັນຂໍ້ມູນອັບເດດຫຼ້າສຸດ.
ສ່ວນວ່າ ຊາວບ້ານກໍເຫັນວ່າ ບັນຫານີ້ ເປັນການຖິ້ມໂທດໃສ່ຊາວບ້ານ ໃນການຈ່າຍຄ່າຊົດເຊີຍຊັກຊ້າ ແຕ່ ຄວາມຈິງກໍຄື ຄ່າຊົດເຊີຍທີ່ດິນ ທີ່ໂຄງການຈ່າຍໃຫ້ນັ້ນ ບໍ່ສາມາດຊື້ດິນ ຕອນໃໝ່ບໍ່ໄດ້.
ຊາວນະຄອນຫລວງວຽງຈັນ ຜູ້ທີ່ຍັງບໍ່ໄດ້ຮັບຄ່າຊົດເຊີຍ ໄດ້ກ່າວຕໍ່ວິທຍຸ ເອເຊັຽ ເສຣີ ໃນວັນທີ 16 ທັນວາ ວ່າ:
" ມັນ ຫລ້າ ຊ້າ ມາ ຈັ່ງ ຊີ້ ກະ ແມ່ນ ຢູ່ ເພິ່ນ ເວົ້າ ກວມ ລວມ ເພິ່ນ ວ່າ ປະ ຊາ ຊົນ ບໍ່ ຍອມ ຮັບ ຄ່າ ຊົດ ເຊີຍຫັ້ນ ນ່າ ປະ ຊາ ຊົນ ຖືກ ຜົ ລ ກະ ທົບ ໃຫ້ ແມັດ ກາ ເລ້ 80,000 ກີບຕໍ່ ແມັດ ກາ ເລ້ ກະ ຮັບ ເອົາ ບໍ່ ໄດ້ ເພາະ ວ່າ ໄປ ຊື້ ດິນ ຊື້ດອນບໍ່ ໄດ້ ."
ການຈ່າຍຄ່າຊົດເຊີຍ ທີ່ດິນຕ່ຳກວ່າ ລາຄາທ້ອງຕລາດ. ຊາວນະຄອນຫລວງວຽງຈັນ ອີກທ່ານນຶ່ງ ໄດ້ກ່າວວ່າ:
" ເຂົາ ກະ ເວົ້າ ໄປ ແລ້ວແຫຼະ ເຂົາ ກະ ແຈ້ງ ໃນ ສະ ພາ ຫັ້ນ ແຫຼະເນາະ ບໍ່ ເອົາ ແລ້ວ ແຫຼະ ເຈົ້າ ສ ເນີ ໃຫ້ ຖືກ ເນາະ ເຂົາ ຂາຍ ໝ້ອງ ອື່ນ ໄດ້ ແມັດ ນຶ່ງ 2,000-3,000 ບາທ, ບາດນີ້ ເຈົ້າ ມາ ໃຫ້ ແມັດ ລະ 80,000 ກີບ ໃຜ ລະ ຊິ ຍອມ ເອົາ ."
ຊາວບ້ານບາງຄົນ ກໍບໍ່ເຂົ້າໃຈວ່າ ການຈ່າຍຄ່າຊົດເຊີຍ ຢູ່ບາງເຂດ ກໍໄດ້ສູງ ແຕ່ ບາງເຂດກໍ່ໄດ້ຕ່ຳ. ຊາວແຂວງຫລວງນ້ຳທາ ທ່ານນຶ່ງ ໄດ້ກ່ວຕໍ່ວິທຍຸ ເອເຊັຽ ເສຣີວ່າ:
" ກໍ ບໍ່ ເຂົ້າ ໃຈ ນຳ ເຂົາ ເຈົ້າ ເນາະ ຍ້ອນ ເຫດ ຜົ ລ ອີ່ ສັງ ເຮົາ ກໍ ບໍ່ ເຂົ້າ ໃຈ ໂຄງ ການ ໂຕ ດຽວ ກັນ ຄື ກັນ ຫັ້ນ ແຫຼະ ກົດ ໝາຍ ໂຕ ດຽວ ກັນນີ້ ຢູ່ ເຂດ ເຮົາ ຍັງ ຖື ວ່າ ໄດ້ ສູງ ."
ນອກຈາກນີ້ ໂຄງການທາງຣົຖໄຟ ລາວ-ຈີນ ທີ່ ຈ່າຍຄ່າຊົດເຊີຍແບບຫຼ້າຊ້າ ກໍຍັງເກີດບັນຫາອື່ນໆ ນຳດ້ວຍ ເປັນຕົ້ນ ບັນຫາທີ່ດິນທັບຊ້ອນກັນ ລະຫວ່າງ ເຈົ້າຂອງດິນຜູ້ໃໝ່ ແລະ ເຈົ້າຂອງທີ່ດິນຜູ້ເກົ່າ ທີ່ຍັງບໍ່ສາມາດໄກ່ເກັ່ຽກັນໄດ້.
ຊາວເມືອງໄຊ ແຂວງອຸດົມໄຊ ໄດ້ກ່າວວ່າ:
" ທາງ ຣົ ຖ ໄຟ ຫວະ ຍັງ ບໍ່ ໝົດ ນ່າ 2-3 ຄົນ ບໍ່ ໄດ້ ເຂົາ ຂຶ້ນ ແຜນ ດິນ ຜູ້ ນຶ່ງ ຂຶ້ນ ໃຫ້ ຜູ້ ນຶ່ງນ່າ ແມ່ນ ດິນ ທັບ ຊ້ອນ ."
ແຂວງທີ່ທາງຣົຖໄຟ ຕັດຜ່ານລວມມີ ແຂວງ ຫຼວງນ້ຳທາ, ອຸດົມໄຊ, ຫລວງພຣະບາງ, ວຽງຈັນ ແລະ ນະຄອນຫລວງວຽງຈັນ ເຊິ່ງຍັງບໍ່ມີແຂວງໃດ ສາມາດໃຊ້ຄ່າຊົດເຊີຍ ໃຫ້ແກ່ຜູ້ທີ່ໄດ້ຮັບຜົລກະທົບ ສຳເຣັດ. ທາງການ ແຂວງຫຼວງນ້ຳທາ ກໍໄດ້ມອບເຮືອນຈຳນວນ 159 ຫຼັງ ຢູ່ບ້ານນາເຕີຍ ແຂວງຫຼວງນ້ຳທາ ໃຫ້ແກ່ຊາວບ້ານ ທີ່ຖືກຍົກຍ້າຍທີ່ຢູ່ອາໄສ ແລະ ເສັຽທີ່ດິນ ໃຫ້ແກ່ໂຄງການ ທາງຣົຖໄຟ ລາວ-ຈີນ ນັບແຕ່ເດືອນກໍຣະກະດາ ທີ່ຜ່ານມາ.