ຫຼາຍແຂວງຂອງລາວ ຖືກນ້ຳຖ້ວມ ປະຊາຊົນຕ້ອງການຄວາມຊ່ວຍເຫຼືອ

ຫຼ້າສຸດນີ້, ສູນກາງຊາວໜຸ່ມລາວ ກໍໄດ້ເປີດຮັບບໍລິຈາກເຄື່ອງ ຢູ່ຈຸດບ້ານໂພນທັນ, ເມືອງໄຊເສດຖາ ນະຄອນຫຼວງວຽງຈັນ ເພື່ອນຳໄປຊ່ອຍເຫຼືອ ຜູ້ປະສົບໄພນ້ຳຖ້ວມ ຢູ່ແຂວງຫຼວງນ້ຳທາ ແລະ ແຂວງອື່ນໆ ທີ່ຖືກນ້ຳຖ້ວມ. ອີກທັງ ມີລາຍງານຕື່ມວ່າ ກອງພັນໃຫຍ່ 703 ຂອງກອງບັນຊາການ ທະຫານອາກາດ ກໍໄດ້ນຳກຳລັງທະຫານ ແລະ ເຮືອບິນ ອີກ 4 ລຳ ພ້ອມດ້ວຍເຮືອ ອີກຈຳນວນໜຶ່ງ ເພື່ອໄປຊ່ອຍເຫຼືອ ຜູ້ປະສົບໄພນ້ຳຖ້ວມ ທີ່ແຂວງຫຼວງນ້ຳທາ.

ສຳລັບເຫດການນ້ຳຖ້ວມ ຢູ່ແຂວງຫຼວງນ້ຳທາ ຍັງບໍ່ທັນມີລາຍງານ ມູນຄ່າຄວາມເສັຽຫາຍເທື່ອ, ແຕ່ໃນເບື້ອງຕົ້ນ ມີຊາວບ້ານ ເສຍຊີວິດ 1 ຄົນ ຍ້ອນຖືກນ້ຳພັດໄຫຼ ຈາກການທີ່ພະຍາຍາມ ເຂົ້າໄປຊ່ອຍ ຜູ້ປະສົບໄພນຳກັນ. ອີກທັງ ເຂື່ອນໄຟຟ້ານ້ຳທາ 3 ກໍຖືກນ້ຳຖ້ວມ ຈົນລົ້ນ ແລະ ໄດ້ເກີດຄວາມເສຍຫາຍ ແກ່ເຮືອນຈັກ ບາງສ່ວນ.