ບ້ານຫ້ອມ,ສີຖານໃຕ້ ນໍ້າຖ້ວມ ເຄື່ອງປູກ

• ອຸ່ນແກ້ວ ສຸກສະຫວັນ
  2018-08-24

ປະຊາຊົນຢູ່ບ້ານຫ້ອມ ແລະ ບ້ານສີຖານໃຕ້ ເມືອງຫາດຊາຍຟອງ ນະຄອນຫລວງວຽງຈັນ ຫລາຍກວ່າ 100 ຄອບຄົວ ທີ່ໄດ້ຮັບຜົນກະທົບ ຈາກນ້ຳຖ້ວມ ຮຽກຮ້ອງໃຫ້ ທາງການຊ່ວຍເຫລືອ ໂດຍສະເພາະ ເຣື້ອງເຂົ້າສານ ແລະແນວພັນ ຍ້ອນວ່າ ນາເຂົ້າ ແລະ ເຄື່ອງປູກຝັງ ຂອງເຂົາເຈົ້າໄດ້ຮັບຄວາມເສັຍຫາຍ. ດັ່ງປະຊາຊົນບ້ານຫ້ອມ ທ່ານນຶ່ງກ່າວຕໍ່ເອເຊັຍເສຣີ ໃນວັນທີ 23 ສິງຫາ ວ່າ:

"ມັນບົກແລ້ວດຽວນີ້ ຖ້ວມຢູ່ 33 ຄອບຄົວ ຈຳນວນ 148 ຄົນ ມີສວນຢູ່ປະມານ 2 ໄຣ່ ເຄິງ ນີ້ແຫລະ ເສັຍຫາຍ ຂະເຈົ້າກະຢາກໄດ້ ເປັນຕົ້ນແມ່ນເຂົ້າສານນີ້ແຫລະ ຄັນຊິວ່າ."

ໃນຂນະດຽວກັນ ປະຊາຊົນອີກ 69 ຄອບຄົວ ຢູ່ບ້ານສີຖານໃຕ້ ກໍໄດ້ຮັບຜົນກະທົບ ຈາກນ້ຳຖ້ວມ ໂດຍສະເພາະເນື້ອທີ່ ປູກພືດຜັກ ຂອງເຂົາເຈົ້າ ໄດ້ຖືກນ້ຳຖ້ວມເສັຍຫາຍໝົດ ແລະເຂົາເຈົ້າຮຽກຮ້ອງໃຫ້ທາງການ ຊ່ອຍແນວພືດພັນໃຫ້ໃໝ່ ເພາະວ່າມີຫຼາຍ ຄອບຄົວ ມີອາຊີບປູກຝັງເປັນຫລັກ, ດັ່ງເຈົ້າໜ້າທີບ້ານສີຖານໃຕ້ ໄດ້ກ່າວຕໍ່ເອເຊັຍເສຣີ ວ່າ:

"69 ຄອບຄົວ ບໍ່ເພ ບໍ່ຫຍັງ ນ້ຳເຂົ້າຊື່ໆ ກະຢາກໄດ້ຢູ່ຫັ້ນແຫລະ ເປັນພືດຜັກພວກໄຮ່ໝາກເຂືອບໍ່ ໄຮ່ເຫັດບໍ່ ກະຖ້າເບິ່ງນ້ຳບົກພຸ້ນແຫລະ ຄືຊິລະດົມເພິ່ນປູກພືດ."

ປັດຈຸບັນ ສະພາບນ້ຳຖ້ວມ ຢູ່ບ້ານຫ້ອມ ແລະບ້ານສີຖານໃຕ້ ໄດ້ປົກລົງແລ້ວ, ແຕ່ກໍມີລາຍງານວ່າ ປະຊາຊົນທີ່ປູກພືດຜັກ ຢູ່ແຄມຂອງ ອີກຫລາຍບ້ານ ໄດ້ຮັບຜົນກະທົບ ເຊັ່ນ; ບ້ານໂພສີ, ບ້ານປ່າຝາງ, ບ້ານສະຫວ່າງ, ບ້ານໂພເງິນ, ບ້ານຫາດກັ່ນຊາ, ບ້ານດອນ ແລະ ບ້ານໂຄກຊາຍ ທີ່ຂຶ້ນກັບເມືອງຫາດຊາຍຟອງ ກໍໄດ້ຮັບຜົນກະທົບ ເຊັ່ນດຽວກັນ ຍ້ອນວ່າ ພືດຜັກຂອງເຂົາເຈົ້າ ຖືກນ້ຳຖ້ວມທັງໝົດ.