ເຈົ້າໜ້າທີ່ ລາວ-ຈີນ ຝຶກອົບຮົມ

ສຳນັກຂ່າວຂອງຈີນ ໄດ້ຣາຍງານ ໃນເດືອນ ກໍຣະກະດາ ວ່າ ເຈົ້າໜ້າທີ່ ລາວແລະຈີນ ໄດ້ຝຶກອົບຮົມ ການບັງຄັບໃຊ້ ສົນທິສັນຍາ ວ່າດ້ວຍການ ຫ້າມຄ້າຂາຍ ສັດປ່າ ແລະ ພືດພັນ ທີ່ ໃກ້ສູນພັນ ຫລື ສົນທິສັນຍາ CITES ຢູ່ ແຂວງຢູນານ ຂອງຈີນ.

ປະເທດລາວ ແລະ ຈີນ ມີຊາຍແດນ ຕິດຈອດກັນ ຍາວປະມານ 700 ກິໂລແມັດ ມີພັນສັດ ແລະ ພືດ 130 ຊນິດ ຊຶ່ງ ໃນນັ້ນ ປະມານ 70 ຊນິດ ແມ່ນຖືກ ຂຶ້ນບັນຊີ ເກືອດຫ້າມຊື້ ແລະ ຂາຍ ຢູ່ໃນ ສົນທະສັນຍາ CITES.

ແຕ່ຜ່ານມາ ມີການຄ້າຂາຍ ສັດປ່າ ທີ່ ຜິດກົດໝາຍ ຢ່າງເປີດແປນ ຢູ່ຕາມ ຊາຍແດນ ເຖິງວ່າຈະມີ ການບັງຄັບໃຊ້ ກົດໝາຍ ຕໍ່ຜູ້ຣະເມີດ ກໍຕາມ ຊຶ່ງ ສ່ວນຫຼາຍແລ້ວ ສັດປ່າ ປະເພດ ຫວງຫ້າມ ແມ່ນມີ ການສູນພັນ ຢູ່ ປະເທດຈີນ.

ເຖິງຢ່າງໃດກໍຕາມ ອີງຕາມ ການສືບສວນ ສອບສວນ ເມື່ອບໍ່ດົນມານີ້ ພົບວ່າ ຊາວຈີນ ມັກເດີນທາງເຂົ້າມາ ປະເທດລາວ ເພື່ອ ກິນອາຫານ ທີ່ປຸງແຕ່ງ ດ້ວຍຊິ້ນສ່ວນ ສັດປ່າ ຫຼາຍກວ່າ ທີ່ ຈະນຳກັບໄປ ບໍຣິໂພຄ ຢູ່ປະເທດຈີນ, ຈຶ່ງສະແດງ ໃຫ້ເຫັນວ່າ ທາງການ ຂອງ ລາວແລະຈີນ ຕ້ອງຮ່ວມມືກັນ ບັງຄັບໃຊ້ ກົດໝາຍ.

ນອກຈາກນີ້ ບັນດາ ເຈົ້າໜ້າທີ່ ທີ່ເຂົ້າ ຝຶກອົບຮົມ ໄດ້ຮັບຟັງ ໃນຄວາມຈຳເປັນ ທີ່ຈະຕ້ອງ ມີການຮ່ວມມືກັນ ຣະຫວ່າງ ປະເທດ ເພື່ອ ປະຕິບັດ ພັນທະກິຈ ຂອງຕົນເອງ ທີ່ໄດ້ຣະບຸໄວ້ ຢູ່ໃນ ສົນທິສັນຍາ CITES, ຕົວຢ່າງ ການເສີມສ້າງ ຄວາມເຂັ້ມແຂງ ຂອງ ເຈົ້າໜ້າທີ່ ຕຳຣວດ ຂອງທັງສອງ ປະເທດ ໃນການ ບັງຄັບໃຊ້ ກົດໝາຍ ເພື່ອປາບປາມ ການຄ້າຂາຍ ສັດປ່າ ແລະ ພັນພືດ ທີ່ ໃກ້ຈະສູນພັນ.