ຈີນສັມປະທານ ຄອນພະເພັງ ຊາວຄ້າຂາຍ ເດືອດຮ້ອນ

ຜູ້​ທີ່​ຕັ້ງ​ຮ້ານ​ຂາຍ​ເຄື່ອງ ​ຢູ່​ເຂດ​ນ້ຳ​ຕົກ​ຕາດ ​ຄອນ​ພະ​ເພັງ ເມືອງ​ໂຂງ ແຂວງ​ຈຳ​ປາ​ສັກ ພາ​ກັນ​ໄດ້​ຮັບ​ຄວາມ​ເດືອດ​ຮ້ອນ ຈາກ​ການ​ຈ່າຍ​ຄ່າ​ເຊົ່າ​ ສະ​ຖານ​ທີ່​ຕັ້ງ​ຮ້ານຂາຍ​ເຄື່ອງແພງ​ຂຶ້ນ ຫຼັງ​ຈາກ ບໍ​ຣິ​ສັດຈີນ​ເຂົ້າ​ມາ ສັມ​ປະ​ທານ ເຂດ​ນ້ຳ​ຕົກ​ຕາດ ຄອນ​ພະ​ເພັງ, ຊາວ​ຄ້າ​ຂາຍ ຕ້ອງ​ໄດ້​ຈ່າຍ​ແພງ​ຂຶ້ນ ຈາກ 50,000 ຕໍ່ເດືອນ ມາ​ເປັນ 400,000 ຕໍ່ ເດືອນ.

ປະ​ຊາ​ຊົນ ຢູ່​ເຂດ​ດັ່ງ​ກ່າວ ໄດ້​ໃຫ້​ສັມ​ພາດ​ຕໍ່ວິທຍຸ ​ເອ​ເຊັຽ ​ເສ​ຣີ ວ່າ:

“ເຂົາ​ມາ​ສັມ​ປະ​ທານ ຄື​ຢູ່​ຣີ​ສອ​ດ​ຫັ້ນ​ຫຼະ ເຂົ​າ​ກະ​ມາ​ເຮັດ ບ່ອນ​ເຂົ​າ​ຢູ່​ຫັ້​ແຫຼະ ແຕ່​ລຸ່ມ​ບ້ານ​ເສັດ ລົງ​ມາ ຮອດ​ເວີນ​ຄາມ ຄື ແຫຼ່ງ ທ່ອງ​ທ່ຽວ​ຄອນ​ພະ​ເພັງ ເຂົາ​ກະ​ປະ​ມູນ​ເອົາ​ໝົດ​ລະ​ບາດນີ້. ພວກ​ປະ​ຊາ​ຊົນ​ຂາຍ​ເຄື່ອງ​ກະ​ໄດ້​ຈ້າງ​ເຂົາ​ຫັ້ນ​ແຫຼະ ເຂົາ​ກະ​ໄລ່​ໜີຫັ້ນ​ແຫຼະ ຜູ້ບໍ່​ຈ້າງ.”

ນັກ​ຂ່າວ: ຕ້ອງ​ໄດ້​ເສັຽ​ຄ່າ​ເຊົ່າ ​ໃຫ້​ບໍ​ຣິ​ສັດຈີນ ​ແມ່ນ​ເບາະ​ນີ້?

ປະ​ຊາ​ຊົນ: “ຕ້ອງ​ໄດ້​ເສັຽ​ຄ່າ​ເຊົ່າ​ໃຫ້​ເຂົາ​ແຫຼ ເພາະ​ເຂົາ​ສັມປະ​ທານ​ລະ​ເດ້ ບໍ່​ເສັຽ​ເຂົາ​ກະ​ໄລ່​ໜີ​ຫັ້ນ​ຕິ ດິນດອນ​ຕ່ອນ​ຫຍ້າ ຖືກ​ທົ່ງ​ໄຮ່​ທົງ​ນາ ລາງ​ເທື່ອ​ກະ​ບໍ່​ໄດ້​ເສັຽ​ກະ​ມີ​ນ່າ ຈັ່ງ​ໃດ​ກະ​ຍາກ ມະ​ຍຸ່ງ​ມະ​ເຍັ່ງ ດຸດ​ໄປ​ເລີຍ ດິນດອນ​ຕ່ອນ​ຫຍ້າ​ເຂົາ.”

ນັກ​ຂ່າວ: ກະ​ມີ​ຮ້ານ​ຄ້າ​ຈີນ​ເບາະ ຢູ່​ແຖວ​ນັ້ນ?

ປະ​ຊາ​ຊົນ: “ມັນ​ກະ​ຊ່ຳ​ຂອງ​ມັນ​ຫັ້ນ​ແຫຼ ຂັ້ນ​ເຮົາ​ຂາຍ ກະ​ຍັງ​ໄດ້​ເຊົ່າ​ມັນ​ເນາະ ເຈົ້າ​ບໍ່​ເຊົ່າ​ມັນ​ເຂົ້າ​ກະ​ບໍ່​ໄດ້​ຂາຍ ຕ້ອງ​ໄດ້​ເຊົ່າ​ນຳ​ມັນ ກະ​ຊ່ຳ​ວ່າ​ຮ້ານ​ຄ້າ​ມັນ​ຫັ້ນ​ຕີ້ ຂອງ​ມັນ​ປະ​ມູນ​ເອົາ​ໝົດ​ລະ.”

ນັກ​ຂ່າວ: ມີ​ຫຼາຍ​ຮ້ານ​ປານ​ໃດ ຢູ່​ຄອນ​ພະ​ເພັງ ທີ່​ວ່າ ເຊົ່າ​ນຳ​ຈີນ ຄື​ວ່າ ທຸກ​ຮ້ານ​ຕ້ອງ​ເຊົ່າ?

ປະ​ຊາ​ຊົນ: “ກະ​ແມ່ນ​ໝົດ​ແຫຼ ​ຂອງ​ມັນ​ປະ​ມູນ​ໝົດ ແມ່ນ​ໝົດ​ແຫຼ ໃນ​ແຫຼ່ງ​ທ່ອງ​ທ່ຽວ ​ຄອນ​ພະ​ເພັງ.”

ນັກ​ຂ່າວ: ມີ​ປະ​ມານ​ຈັກ​ຮ້ານ​ທີ່​ວ່າ ເຊົ່າ​ເຂົາ​ເຈົ້າ​ຢູ່ນີ້ ເອົາ​ສະ​ເພາະ​ຄອນ​ພະ​ເພັງ​ນີ້

ປະ​ຊາ​ຊົນ: “ວ່າ ຮ້ານ​ໃດ​ແດ່​ໄດ້​ເຊົ່າ​ມັນ​ໝົດ ໃນ​ແຫຼ່ງ​ທ່ອງ​ທ່ຽວ​ແມ່ນ​ໝົດ​ໂລດ​ແຫຼ ຂອງ​ເຂົາ​ປະ​ມານ​ໝົດ ແມ່ນ​ເຈົ້າ​ຕ້ອງ​ໄດ້​ເຊົ່າ​ຈາກ​ມັນ​ໝົດ. ນັບ​ແຕ່​ຮ້ານ​ນ້ອຍ​ຕ້ອງ​ໄດ້​ເຊົ່າ​ມັນ​ໝົດ 10 ປາຍ​ຮ້ານ ທັງ​ຮ້ານ​ນ້ອຍ​-ຮ້ານ​ໃຫຍ່ ຮ້າຍ​ອີ່​ຫຍັງ​ກະ​ຢ່າ​ແຫຼະ ຄັນ​ວ່າ ໄດ້​ຂາຍ ມັນ​ຕ້ອງ​ໄດ້​ເສັຽ​ເດ້.”

ນັກ​ຂ່າວ: ເສັຽ​ປະ​ມານ​ເດືອນ​ນຶ່ງ​ທໍ່​ໃດ ເຂົາ​ໄລ່​ເປັນ​ເດືອນ​ເບາະ?

ປະ​ຊາ​ຊົນ: “ອີງ​ຕາມ​ຮ້ານ ອີງ​ຕາມ​ລາຍ​ໄດ້ ລາຍ​ໄດ້​ຫຼາຍ​ບ່ອນ​ດີ ຮ້ານ​ໃຫຍ່​ເສັ​ຽ​ໃຫຍ່ ຮ້ານ​ນ້ອຍ​ເສັຽ​ນ້ອຍ ຊ່ຳ​ຂາຍ​ແບບ​ເຫຼົ້າ​ບອງ​ຢາ​ຊື່ໆ​ນ່າ ແບບ​ຄົນ​ໄປ​ນັ່ງ​ຂາຍນີ້ ເດືອນນຶ່ງ 400,000 ກີບ. ອັນ​ນີ້ ມາ​ຕ​ຖານ​ໂຕ​ຈິງ​ໃດ ບໍ່​ແມ່ນ​ປະ​ມານ​ໄດ໋​ອັນ​ນີ້ ໄດ້​ເຊົ່າ​ເຂົາ ໄດ້​ຈ້າງ​ເຂົາ ໂຕ​ດຽວ ໂຕ​ຊ່ຳ​ໂຕະໂຮງ​ຮຽນ​ນີ້​ແຫຼະ ເດືອນ​ນຶ່ງ 400,000 ກີບ.” 

ບໍ​ຣິ​ສັດ ຈີນ​ຈະ​ເກັບ​ຄ່າ​ເຊົ່າ​ ຕາມ​ຂ​ນາດ​ຂອງ​ຮ້ານ ເຊັ່ນ ຮ້ານທີ່​ມີ​ຂ​ນາດ 2 x 1.5 ແມັດ ຈະ​ຕ້ອງ​ເສັຽຄ່າ​ເຊົ່າ 400,000 ກີບ​ຂຶ້ນໄປ ແລະ ຮ້ານ​ທີ່​ໃຫຍ່​ກ່​ວານີ້ ກໍ​ຈະ​ເສັຽ​ສູງ​ຂຶ້ນ​ໄປ​ອີກ.

ປະ​ຊາ​ຊົນ ​​ຜູ້​ທີ່​ມີ​ຄອບ​ຄົວ​ ໄປ​ຕັ້ງ​ຮ້ານ​ຂາຍ​ເຄື່ອງ ໄດ້​ໃຫ້​ສັມພາດ​ຕໍ່ວິທະຍຸ ​ເອ​ເຊັຽ ​ເສ​ຣີ ວ່າ:

“ຮ້ານ​ນ້ອຍ 2x1.5 ແມັດ 400,000 ກີບ.”

ນັກ​ຂ່າວ: 400,000 ກີບ ເສັຽ​ທຸກ​ເດືອນ ອັນ​ນີ້​ເສັຽ​ໃຫ້​ໃຜ​ນິ?

ປະ​ຊາ​ຊົນ: “ເສັຽ​ໃຫ້​ຜູ້​ສັມ​ປະ​ທານ​ ຂອງ​ຈີນ ນີ້​ແຫຼະ.”

ນັກ​ຂ່າວ: ເຂົາ​ເຈົ້າ​ ກະ​ມີ​ເງິນ​ເສັຽຢູ່​ເບາະ ກະ​ໄດ້​ຂາຍ​ຢູ່​ເບາະ?

ປະ​ຊາ​ຊົນ: “ບໍ່​ແມ່ນ​ວ່າບໍ່​ມີ ຈຳ​ເປັນ​ກະ​ຕ້ອງ​ໃດ້​ຈ່າຍ​ຫັ້ນ​ແຫຼະ ເຮັດ​ໄດ້​ກະ​ເຮັດ ເຮັດ​ບໍ່​ໄດ້​ກະ​ຖອຍ.”

ນັກ​ຂ່າວ: ແຕ່​ກ່ອນ​ເດ້ ເຮົາ​ໄດ້​ເສັຽບໍ່?

ປະ​ຊາ​ຊົນ: “ເສັຽ​ພາ​ສີ ອາ​ກອນ​ທັມ​ມະດາ​.”

ນັກ​ຂ່າວ: ແຕ່​ວ່າ ຮ້ານ​ໃຫຍ່ໆ ກະ​ເສັຽ​ຫຼາຍ​ກ່ອນນີ້ ແມ່ນ​ເບາະ?

ປະ​ຊາ​ຊົນ: “ຮ້ານ​ປານ​ກາງ ລວມ​ໝົດ​ຮ້ານ​ໃຫຍ່ ຮ້ານ​ນ້ອຍ​ຫັ້ນ 14 ຮ້ານ.”

ນັກ​ຂ່າວ: ຄົນ​ກະ​ໄປ​ທ່ຽວ​ ຫຼາຍ​ຢູ່​ເບາະ ​ດຽວນີ້?

ປະ​ຊາ​ຊົນ: “ບໍ່​ຄື​ເກົ່າ.”

ນັກ​ຂ່າວ: ແປ​ວ່າ ແຕ່ກີ້ນີ້ ເຂົາ​ເຈົ້າ​ໄປ​ຂາຍ​ຫັ້ນ ເຂົາ​ເຈົ້າ​ບໍ່​ໄດ້​ເສັຽ​ຄ່າ​ເຊົ່າ ​ແມ່ນ​ເບາະ ເສັຽ​ຖືກບໍ່​ ແຕ່ກີ້ນີ້ ປະ​ມານ​ທໍ່​ໃດ?

ປະ​ຊາ​ຊົນ: “ເສັຽ​ຕາມ​ພາ​ສີ​ອາ​ກອນ ຕາມ​ຮ້ານ​ເລັກ ​ຮ້ານ​ນ້ອຍ ວ່າ​ແລ້ວ ກະ​ຖື​ກ​ແຫຼະ ວ່າ​ຊັ້ນ​ຊະ 40,000–50,000 ກີບ ມີ​ຫັ້ນ​ແຫຼ ຮ້ານ​ທັມມະ​ດາ ບາງ​ທີ​ເຂົາ​ກະ​ຂໍ​ກັນ​ໄດ້ ຜູ້​ລົງ​ກວດ​ກາ​ ເຂົາ​ກະ​ເບິ່ງ​ຕາມ​ຮ້ານ ຮ້ານ​ນ້ອຍ ຄື​ໂຕວ່າ ເດືອນ​ນຶ່ງ 400,000 ດຽວນີ້ ດີບໍ່​ດີ​ໄລ່​ຊ້ຳ​ນ່າ ຈັກ​ມັນ​ຊິ​ເປັນ​ຄື​ເກົ່າ​ອີກບໍ່ ອັນ​ວ່າ​ໄລ່​ຈັບ​ໄລ່​ຫຍັງ​ຫັ້ນ​ນ່າ ບໍ່​ໃຫ້​ຂາຍ​ຫັ້ນ​ນ່າ.”

ນັກ​ຂ່າວ: ແຕ່​ກີ້ນີ້ ບໍ່​ໄດ້​ເສັຽ​ເນາະ ຄື ເສັຽ​ໜ້ອຍ?

ປະ​ຊາ​ຊົນ: “ເສັຽໜ້ອຍ ວ່າ ບໍ່​ໄດ້​ເສັຽ ກະ​ເສັຽ​ທັມມະ​ດາ.”

ນັກ​ຂ່າວ: ເຮົາ​ຄຶດ​ຈັ່ງ​ໃດ​ນີ້ ຂັ້ນ​ເຂົາ​ເຈົ້າ​ມາ​ຕັ້ງ​ຮ້ານ ​ແບບນີ້​ລະ ໃຫ້​ຄົນ​ລາວ​ໄດ້​ເຊົ່າ​ນີ້ ເຮົາ​ເຫັນ​ວ່າ​ຈັ່ງ​ໃດ?

ປະ​ຊາ​ຊົນ: “ບໍ່​ເວົ້າ​ແຫຼະ ຫຍຸ້ງ​ຍາກ​ຖະ​ນັດ​ພຸ້ນ​ແຫຼະ ປະ​ຊາ​ຊົນ​ເຮົາ.”

ນັກ​ຂ່າວ: ເຂົາ​ເຈົ້າ​ເຣີ່ມ​ກັບ​ລະ​ຫວະ ເຣີ່ມ​ເສັຽ​ລະ​ຫວະ ຜູ້​ທີ່​ໄປ​ຂາຍ​ຢູ່​ຫັ້ນ?

ປະ​ຊາ​ຊົນ: “ແມ່ນ​ໂຕ 400,000 ກີບ​ຫັ້ນ ໄດ້​ຍິນ​ຄັກ​ແນ່ ລະ​ຈັດ​ສັນ ຫາກໍ່​ໄດ້​ໄປ​ຍໍ​ໂຕະ​ ປະ​ມານ 7 ມື້ ຫຼັງ ທິດ​ຫຼັງ ວ່າ​ຊັ້ນ​ເທາະ​ໄປ໋.”

ນັກ​ຂ່າວ: ເຮົາ​ຢາກ​ໃຫ້​ຂາຍ​ແບບ​ໃດ ຊາ​ແນວ​ຄິດ​ຂອງ​ເຮົາ​ນີ້?

ປະ​ຊາ​ຊົນ: “ຄື​ເກົ່າ​ຫັ້ນ​ແຫຼດີ ປະ​ຊາ​ຊົນ​ພະ​ກັນ ​ໄປ​ຫາ​ເງິນ​ຢູ່​ຫັ້ນ.”

ບໍ​ຣິ​ສັດ​ຈີ​ນ​ ເຂົ້າ​ມາ ສັມ​ປະ​ທານ ບໍ່​ສະ​ເພາະ​ຢູ່​ແຕ່​ຄອນ​ພະ​ເພັງ ເທົ່າ​ນັ້ນ ແຕ່ຢູ່​ຫຼາຍ​ພື້ນ​ທີ່ ຢູ່​ແຂວງ​ອື່ນໆໃນ​ປະ​ເທດ​ລາວ ກໍ​ເຊັ່ນ​ດຽວ​ກັນ.

ປະ​ຊາ​ຊົນ ແຂວງ​ອັດ​ຕະ​ປື​ທ່ານ​ນຶ່ງ ໄດ້​ໃຫ້​ສຳ​ພາດ​ຕໍ່ວິທຍຸ ​ເອ​ເຊັຽ​ ເສ​ຣີ:

“ມັນ​ເປັນ​ໝົດ​ ປະ​ເທດ​ຊາດ​ບ້ານ​ເມືອງ ມັນ​ບໍ່​ແມ່ນ​ເປັນ​ສະ​ເພາະ​ ຢູ່​ແຕ່​ຄອນ​ພະ​ເພັງ. ແຖວ​ອັດ​ຕະ​ປື ດິນດອນ​ຕ່ອນ​ຫຍ້າ​ ເຂົາ​ກະ​ເອົາ​ໃຫ້​ຈີນ​ໝົດ ມັນ​ບໍ່​ມີ​ລະ ມັນ​ບໍ່​ມີ​ຄຳ​ຊິ​ອະ​ທິ​ບາຍ ບໍ່​ມີ​ຄຳ​ຊິ​ເວົ້າ​ລະ. ດິນ​ຮົ້ວ​ດິນ​ສວນ ຜູ້​ໃດ​ມີ​ຫຼາຍ​ກະ​ໃຫ້​ຈີນ​ ເຂົ້າ​ໄປ​ສຳ​ປະ​ທານ ກະ​ເອົາໄປ​ໝົດ ບໍ່​ເວົ້າ​ແຕ່​ຄອນ​ພະ​ເພັງ. ຄອ​ນ​ພະ​ເພັງ​ຍັງ​ວ່າ ປະ​ຊາ​ຊົນ​ພວກ​ເຮົາ​ບໍ່​ມີ​ສ່ວນ ​ກ່ຽວ​ຂ້ອງ​ຫຼາຍ ດິນດອນ​ຕ່ອນ​ຫຍ້າ​ ຂອງ​ປະ​ຊາ​ຊົນ​ນີ້ ເຂົາ​ກະ​ຍັງ​ເອົາ​ໄປ​ໝົດ ປູກ​ມັນ​ແລ້ວ ເຂົາ​ກະ​ຍັງ​ດຸດ​ມັນ​ຖິ້ມ ເຮົາ​ບໍ່​ໃຫ້​ກະ​ບໍ່​ໄດ້ ມັນ​ດ້ວຍ​ການ​ບັງ​ຄັບ.”

ນັກ​ຂ່າວ: ເຮົາ​ບໍ່​ໄດ້​ຂໍ​ຄ່າ​ຊົດ​ເຊີຍ​ຫວະ?

ປະ​ຊາ​ຊົນ: “ຊົດ​ເຊີຍ ມັນ​ກະ​ບໍ່​ກຸ້ມ​ນ່າ ໃຫ້​ແຕ່​ຄ່າ​ມັນ​ຈັກ​ເລັກ​ຈັກ​ໜ້ອຍ ບ່ອນ​ເຂົາ​ຖືກ​ຫັ້ນ ແຕ່ວ່າ ເຈົ້າ​ມີ​ດິນ​ບ່ອນ 4-5 ເຮັກ​ຕ້າຣ໌ ບ່ອນ​ເຂົາເຮັດ ກະ​ເອົາ​ໄປ​ໝົດ ຜູ້​ລະ​ເຮັກ​ຕ້າຣ໌​ກະ​ມີ. 2 ເຮັກ​ຕ້າ​ກະ​ມີ ບ່ອນ​ໃດ​ກວມ ຖືກ​ໃນ​ແຜນ​ທີ່​ຂອງ​ເພິ່ນ ເພິ່ນ​ກະ​ເອົາ​ໝົດ. ເອົາ​ລະ​ມັນ​ກະ​ບໍ່​ມີ ບໍ່​ມີຄຳ​ຊິອ​ະ​ທິ​ບາຍ​ຍ່າ ມີ​ແຕ່​ປ່ອຍ​ໄປ​ຕາມ​ກຳ​ຕາມ​ເວນ ຊາ​ມັນ​ໝົດ​ບຸນ​ພວກ​ເຮົາ​ໄປ​ລະ​ກະ​ແລ້ວ ເຊັ່ນ​ລູກ​ເຊັ່ນ​ຫຼານ​ກະ​ຈັ່ງ​ວ່າ​ກັນ​ໃໝ່ ໝົດ​ຄຳ​ຊິ​ເວົ້າ​ລະ.”

ນັກ​ຂ່າວ: ເຮົາ​ໄດ້​ລົມ​ກະ​ເຈົ້າ​ໜ້າ​ທີ່ ທ້ອງ​ຖິ່ນບໍ່ ເພິ່ນ​ວ່າ ຈັ່ງ​ໃດ?

ປະ​ຊາ​ຊົນ: “ກະ​ເຂົາ​ມາ​ກັບ​ເຈົ້າ​ໜ້າ​ທີ ​ທ້ອງ​ຖິ່ນ​ຫັ້ນ​ລະ ເຂົາ​ພາ​ລົງ​ມາ ແຕ່​ວ່າ ທາງ​ກະ​ຊວງ​ເພິ່ນ​ກະ​ ອາດ​ຈະ​ບອກ​ໃຫ້​ເອົາ​ດິນ​ເປົ່າ​ວ່າງ ແຕ່​ວ່າ ມາ​ຮອດ​ທ້ອງ​ຖິ່ນ ​ມັນ​ຫາ​ດິນ​ເ​ປົ່າ​ວ່າງ ບໍ່​ມີ​ລະ​ກະ ບ່ອ​ນ​ໃດ​ມັນ​ເໝາະ​ສົມ​ລະ​ກະ​ເອົາ. ຄື​ກອງ​ປະ​ຊຸມ​ສະ​ພາ​ ເພິ່ນ​ກະ​ວ່າ ໃຫ້​ເອົາ​ດິນ​ເປົ່າ​ວ່າງ​ເນາະ ໄປ​ຖັງ​ຢູ່ກອງ​ປະ​ຊຸມ​ສະ​ພາ ແຕ່​ວ່າ ຫາກ​ລາມ​ໃສ່​ດິນ​ປະ​ຊາ​ຊົ​ນ​ຫັ້ນ​ນ່າ ສ່ວນ​ຫຼາຍມັນ​ກະ​ມີ​ແຕ່​ດິນ​ ປະ​ຊາ​ຊົນ ​ດິນ​ເປົ່າ​ວ່າງ ມັນ​ກະ​ຢາກ​ໝົດ​ລະ.”

ກ່ຽວ​ກັບ​ບັນ​ຫາ​ດັ່ງ​ກ່າວ ວິທຍຸ ເອ​ເຊັຽ ​ເສ​ຣີ ພະ​ຍາ​ຍາມ​ຕິດ​ຕໍ່​ຫາ ເຈົ້າ​ໜ້າ​ທີ່​ຜ​ແນກ ​ອຸດ​ສາ​ຫະ​ກັມ ແລະ ການ​ຄ້າ ແຂວງ​ຈຳ​ປາ​ສັກ, ແຕ່ ເຈົ້າ​ໜ້າ​ທີ່ບໍ່​ຮັບ​ໂທ​ລະ​ສັບ.

ເຖິງ​ຢ່າງ​ໃດ​ກໍ​ຕາມ ໃນ​ເດືອນ​ຕຸ​ລາ 2022 ທີ່​ຜ່ານ​ມາ, ແຂວງຈໍາສັກ ໃຫ້ບໍຣິສັດ ຮ່ວມພັທນາສີທັນດອນ ຈໍາກັດ ຂອງນັກລົງທຶນຈີນ ສັມປະທານແຫຼ່ງທ່ອງທ່ຽວ 2 ແຫ່ງ ຢູ່ເມືອງໂຂງ ຄື ເຂດນໍ້າຕົກຕາດ ຄອນພະເພັງ ແລະ ເຂດນໍ້າຕົກຕາດສົມພະມິດ ໃນ​ເນື້ອ​ທີ່ ປະ​ມານ 1,000 ເຮັກຕ້າຣ໌ ໂດຍບໍຣິສັດດັ່ງກ່າວນີ້ ມີເປົ້າໝາຍ ທີ່ຈະພັທນາແຫຼ່ງທ່ອງທ່ຽວ ທັງ 2 ແຫ່ງ ໃຫ້ມີຄວາມທັນສໄມ ແລະ ສິ່ງອໍານວຍ ຄວາມສະດວກ ຕ່າງໆຄົບວົງຈອນ.

ເຈົ້າໜ້າທີ່ ຜແນກແຜນການ ແລະການລົງທຶນ ແຂວງຈໍາປາສັກ ທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ວ່າ:

“ເພິ່ນກະເປີດເປັນທຸຣະກິຈ ຂອງເພິ່ນຫັ້ນ ລໍຖ້າແຕ່ວ່າ ເພິ່ນຈະມີຄໍາສັ່ງແບບໃດ ຈະມີເປົ້າໝາຍແນວອື່ນ ທີ່ຈະສ້າງຫັ້ນ ສະຖານທີ່ທ່ອງທ່ຽວນີ້ ເພິ່ນໄປເຮັດເພື່ອປັບປຸງ ໃຫ້ມັນມີສີສັນຂຶ້ນ ຫຼາຍຕື່ມ.”

ການເຂົ້າສັມປະທານ ແຫຼ່ງທ່ອງທ່ຽວທັງ 2 ແຫ່ງ ຂອງບໍຣິສັດຈີນ ແມ່ນຈະເຣີ່ມດໍາເນີນການ ນັບຕັ້ງແຕ່ວັນທີ 11 ຕຸລາ 2022 ນີ້ເປັນຕົ້ນໄປ ຄືຈະເຣີ່ມເຂົ້າໄປປັບປຸງພື້ນທີ່ ແລະສິ່ງອໍານວຍຄວາມສະດວກຕ່າງໆທີ່ມີຢູ່ແລ້ວ ເພື່ອໃຫ້ນໍ້າຕົກຕາດ ຄອນພະເພັງ ແລະນໍ້າຕົກຕາດສົມພະມິດ ໃຫ້ກັບມານໍາໃຊ້ໄດ້ເປັນປົກກະຕິ.

ພ້ອມກັນນີ້ ກໍຈະບຸກເບີກເນື້ອທີ່ ປະມານ 50 ເຮັກຕ້າຣ໌ ໃຫ້ເປັນບ່ອນຈອດຣົຖ ສໍາລັບແຂກຂອງຮ້ານອາຫານ, ໂຮງແຮມ ແລະສ້າງສິ່ງ ອໍານວຍຄວາມສະດວກ ຄົບວົງຈອນອື່ນໆ ເຊິ່ງຄາດຄະເນວ່າ ຈະໃຊ້ເງິນລົງທຶນ ປະມານ 500,000 ໂດລ້າຣ໌ສະຫະຣັຖ ແລະ ສາມາດຮອງຮັບ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ໄດ້ 5,000 ຄົນຕໍ່ມື້.

ນອກຈາກນີີ້ ຍັງໄດ້ບຸກເບີກ ເນື້ອທີ່ອີກ 125 ເຮັກຕ້າຣ໌ ເພື່ອຈະສ້າງ ເປັນສວນສະນຸກ, ຫໍພິພິທະພັນ, ຫໍວິທະຍາສາຕ, ເຮືອນພັກຕາກອາກາດ ເຊິ່ງປັດຈຸບັນ ແມ່ນຍັງຢູ່ໃນຂັ້ນຕອນ ຊອກຫານັກລົງທຶນ.

ທາງການແຂວງ ຈໍາປາສັກ ໄດ້ຣາຍງານ ໃນພິທີເຊັນສັນຍາ ສັມປະທານ ໃນມື້ວັນທີ 30 ກັນຍາ 2022 ທີ່ຜ່ານມາ ວ່າ ເຂດສັມປະທານ ແຫຼ່ງທ່ອງທ່ຽວ ທັງ 2 ແຫ່ງ ຢູ່ເມືອງໂຂງ ຈະມີຊາວບ້ານ ແລະຜູ້ປະກອບການ ຈໍານວນນຶ່ງ ໄດ້ຮັບຜົລກະທົບ ເຊິ່ງທາງບໍຣິສັດ ຜູ້ພັທນາໂຄງການ ໄດ້ປະເມີນເງິນຊົດເຊີຽ ໄວ້ປະມານ 18 ຕື້ກີບ ແຕ່ຍັງບໍ່ໄດ້ຣາຍງານວ່າ ຈະຊົດເຊີຽເງິນ ໃຫ້ກັບຜູ້ທີ່ໄດ້ຮັບຜົລກະທົບ ໃນມື້ໃດ.

ບໍຣິສັດ ຮ່ວມພັທນາ ສີທັນດອນ ຈໍາກັດ ແມ່ນເປັນບໍຣິສັດ ຂອງຄົນຈີນ ທີ່ຢູ່ໃນກຸ່ມບໍຣິສັດ ລາວ ມະຫາ ນາທີ ສີທັນດອນ (Laos Maha Nathi Sithandone, Hong Kong Investment) ທີ່ໄດ້ຮັບສັມປະທານ ຈາກທາງການລາວ ເກືອບ 10,000 ເຮັກຕ້າຣ໌ ເຊິ່ງຄອບຄຸມທັງດິນ, ດອນ ແລະແມ່ນໍ້າຂອງ ເພື່ອພັທນາໂຄງການ “ເຂດພັທນາ ເສຖກິຈໃໝ່ ສີທັນດອນ” ທີ່ມີມູນຄ່າ ການລົງທຶນ ປະມານ 9 ຕື້ໂດລ້າຣ໌.

ປັດຈຸບັນ ໂຄງການດັ່ງກ່າວ ຢູ່ລະຫວ່າງ ການດໍາເນີນການ ກໍ່ສ້າງໄລຍະທໍາອິດ ຈາກທັງໝົດ 6 ໄລຍະ ເຊິ່ງໃນໄລຍະທໍາອິດ ເຣີ່ມດໍາເນີນການ ມາຕັ້ງແຕ່ ເດືອນພຶສຈິກາ ປີ 2019 ໂດຍມີການກໍ່ສ້າງ ເສັ້ນທາງ, ລະບົບນໍ້າປະປາ, ໄຟຟ້າ, ອາຄານ ສໍານັກງານ ແລະປັບປຸງ ໂຮງແຮມ ໄປແລ້ວຈໍານວນນຶ່ງ ເຊິ່ງຈະສໍາເຣັດ ໃນປີ 2025.