ຊາວບ້ານເຂື່ອນແຕກ ໄດ້ຊົດເຊີຍໜ້ອຍ ແຕ່ພາກທຸຣະກິຈ ໄດ້ຫຼາຍ

ການ​ຊົດ​ເຊີຍ ຄວາມ​ເສັຽ​ຫາຍ ແກ່​ຊາວ​ບ້ານ ​ທີ່​ໄດ້​ຮັບ​ຜົລ​ກະ​ທົບ ຈາກ​ເຫດ​ການ​ ເຂື່ອນ​ເຊ​ປຽນ-ເຊ​ນ້ຳ​ນ້ອຍ ແຕກ ຢູ່​ເມືອງ​ສ​ນາມ​ໄຊ ແຂວງອັດ​ຕະ​ປື ຖືກ​ຕັດ​ ຄ່າ​ຫຼຸ້​ຍ​ຫ້ຽນອອກ 20 ເປີ​ເຊັນ, ໂດຍ​ສະ​ເພາະ ​ຄ່າ​ຊົ​ດ​ເຊີຍ ​ສຳ​ລັບ​ເຄື່ອງ​ໃຊ້ ​ຄົວ​ເຮືອນ ແລະ ຍານ​ພາ​ຫະ​ນະ. ໃນຂະ​ນະ​ທີ່ ການຈ່າຍ​ ຄ່າ​ຊົດ​ເຊີຍ ​ຄວາມ​ເສັຽ​ຫາຍ ມູລ​ຄ່າ 94 ຕື້ກີບ ໃຫ້​ແກ່ 32 ບໍ​ຣິ​ສັດ ຫ້າງ​ຮ້ານ ທີ່​ໄດ້​ຮັບ​ ຄວາມ​ເສັຽ​ຫາຍ ຈາກ​ເຫດ​ການ ​ເຂື່ອນ​ແຕກ ຈ່າຍພຽງ​ແຕ່​ ຄັ້ງ​ດຽວ​ເທົ່າ​ນັ້ນ ແລະ ບໍ່​ມີ​ກາ​ນ​ ຫັກ​ເປີ​ເຊັນ ຄ່າ​ຫຼຸ້ຍ​ຫ້ຽນ​ອອກ.

ຊາວ​ແຂວງ​ອັດ​ຕະ​ປື ຜູ້​ທີ່​ຮູ້​ເຫດ​ການ ທ່ານນຶ່ງ ທີ່ບໍ່​ປະ​ສົງ ​ອອກ​ຊື່ ແລະ ສຽງ ​​ໄດ້​ກ່າວ​ຕໍ່​ເອ​ເຊັຽ​ເສ​ຣີ ໃນ​ວັນ​ທີ 3 ສິງ​ຫາ ວ່າ ການ​ຈ່າຍ​ຄ່າ​ຊົດ​ເຊີຍ ​ໃຫ້​ແກ່ບໍ​ຣິ​ສັດ​ຫ້າງ​ຮ້ານ ມີ​ຊ່ອງ​ຫ່ວາງ​ຫຼາຍ. ເຈົ້າ​ຂອງ​ບໍ​ຣິ​ສັດ ຫ້າງ​ຮ້ານ ກັບເຈົ້າ​ໜ້າ​ທີ່ ​ຄ​ນະ​ກັມມະ​ການ ​ຂັ້ນ​ແຂວງ ​ຈຳ​ນວນ​ນຶ່ງ ເພີ່ມ​ຕົວ​ເລຂ ​ມູລຄ່າ​ຄວາມ​​ເສັຽ​ຫາຍ ໃຫ້ຫຼາຍ​ຂຶ້ນ ເພື່ອ​ຈະ​ໄດ້​ເງິນ ​ມາ​ປັນ​ກັນ.

ຊາວ​ແຂວງ​ອັດ​ຕະ​ປື ທ່ານນີ້ ກ່າວ​ວ່າ: "ບໍ​ຣິ​ສັດ​ທ່ອງ​ທ່ຽວ ຢູ່​ເຂດ​ເຊ​ພະ ເມືອງ​ສນາມ​ໄຊ ແຂວງ​ອັດ​ຕະ​ປື ໄດ້​ຮັບ​ຄວາມ​ເສັຽ​ຫາຍ ​ພຽງ​ແຕ່ຫ້ອງ​ນ້ຳ ສຳ​ລັບ​ນັກ​ທ່ອງ​ທ່ຽວ ແລະ ລົດ​ຖອກດິນ 2 ຄັນ ເທົ່າ​ນັ້ນ, ແຕ່​ໄດ້​ຮັບ ​ຄ່າ​ເສັຽ​ຫາຍ ຫຼາຍກ່​ວາ 30 ຕື້ກີບ."

ຊາວ​ແຂວງ​ອັດ​ຕະ​ປື​ ທ່ານນີ້ ກ່າວ​ຕື່ມ​ອີກວ່າ: "ຄ​ນະ​ກັມມະ​ການ ຂັ້ນ​ແຂວງ ບາງ​ທ່ານ ໄດ້​ເງິນຜູ້​ລະ 100 ລ້ານ, 200 ລ້ານ ກີບ. ເຮັດ​ໃຫ້ ​ເຈົ້າ​ຂອງ​ບໍ​ຣິ​ສັດ ທຸ​ຣະ​ກິຈ​ຫ້າງ​ຮ້ານ ມີ​ເງິນ​ຂຶ້ນ​ກັບ​ບາດ. ຕໍ່​ມາ ເຈົ້າ​ໜ້າ​ທີ່​ 2 ຄົນ ຢູ່​ຜ​ແນກຊັພ​ຍາ​ກອນ ທັມຊາດ ແລະ ສິ່ງ​ແວດ​ລ້ອມ, ຜ​ແນກແຜນ​ການ​ ແລະ ການ​ລົງ​ທຶນ​ ແຂວງ ຖືກ​ສັ່ງ​ຍ້າຍ ​ໄປຢູ່​ຜ​​ແນກ​ອື່ນ ຍ້ອນຊ່ອຍ​ໃຫ້ ຫົວ​ໜ່ວຍ​ທຸ​ຣະ​ກິຈ ​ໄດ້​ຄ່າ​ຊົດ​ເຊີຍຫຼາຍ."

ເຖິງຢ່າງ​ໃດ​ກໍ​ຕາມ, ທາງ​ການ​ແຂວງ​ອັດ​ຕະ​ປື ກໍ​ປະ​ຕິ​ເສດ​ວ່າ ບໍ່​ຮູ້​ເຫັນ​ເຣື່ອງນີ້ ແລະ ບໍ່​ພົບ​ຫຼັກ​ຖາ​ນ ​ກ່ຽວ​ກັບ ​ການ​ກະ​ທຳຜິດ​ດັ່ງ​ກ່າວ.

ທ່ານ ອຸ່ນ​ຫຼ້າ ໄຊ​ຍະ​ສິດ, ຮອງ​ເຈົ້າ​ແຂວງ ແຂວງ​ອັດ​ຕະ​ປື​ ໄດ້​ກ່າວ​ຕໍ່​ເອ​ເຊັຽ​ເສ​ຣີ ໃນທ້າຍ​ເດືອນກໍ​ຣະ​ກະ​ດາ ​ທີ່​ຜ່ານ​ມາ​ວ່າ: "ໃນ​ທັສ​ນະ​ຕາມ​ຫຼັກ​ການ​ແລ້ວ ເຮົາ​ກະ​ວ່າ ມັນ​ບໍ່​ມີ​ເນາະ, ແຕ່​ວ່າ ເຣື່ອງ​ຫາງ​ສຽງ​ສັງ​ຄົມ ​ຊິ​ວ່າ​ມັນ​ມີ ມັນ​ເປັນເຣື່ອງນີ້ ເຮົາ​ບໍ່​ສາ​ມາດ​ ໄປ​ຄາດ​ຄະ​ເນ​ໄດ້ ເຮົາ​ບໍ່​ສາ​ມາດ​ ຊິ​ອ່ານ​ໄດ້ ເປັນ​ຫຍັງ​ວ່າ ມັນ​ບໍ່​ມີ ຍ້ອນ​ວ່າ ມັນ​ບໍ່​ມີ​ການ​ຮ້ອງ​ຟ້ອງ ມັນບໍ່​ມີ​ໃຜ ​ຊິ​ກ້າ​ຢືນ​ຢັນ​ມາ​ວ່າ ໃນ​ກໍ​ລະ​ນີ​ໃດ ບຸກ​ຄົນ​ໃດ ຢູ່​ບ້ານ​ໃດ ແລະ ຜູ້​ໃດ ເປັນ​ຜູ້​ສວຍ​ໂອ​ກາດ ທີ່​ເຂົາ​ເຈົ້າ​ຣາຍ​ງານ​ ເປັ​ນ​ລາຍ​ລັກ​ອັກ​ສອນ ເຮົາ​ລະ​ວ່າ ມັນ​ບໍ່​ມີ ລະ​ມີ​ແຕ່​ເວົ້າ​ກັນ ​ໄປ​ຊື່ໆ ເປັນ​ການ​ຣະ​ແວງ ​ສົງ​ໄສ​ກັນ​ຊື່ໆ."

ກ່ຽວ​ກັບ ​ການ​ຈ່າຍ​ເງິນ​ຊົດ​ເຊີຍ ​ໃຫ້​ 32 ບໍ​ຣິ​ສັດ​ ຫ້າງ​ຮ້ານ 94 ຕື້ກີບນັ້ນ, ໃນ​ເບື້ອງ​ຕົ້ນ ບັນ​ດາ​ບໍ​ຣິ​ສັດ ​ຫ້າງ​ຮ້ານ ທີ່​ໄດ້​ຮັບ​ຜົລ​ກະ​ທົບ ​ຈາກ​ເຂື່ອນ​ແຕກ ຮຽກ​ຮ້ອງ​ຄ່າ​ເສັຽ​ຫາຍ 230 ຕື້ກີບ, ແຕ່​ຄ​ນະ​ກັມ​ມະ​ການ ​ກໍ​ໄດ້​ມີ​ການ ​ຄິດ​ໄລ່​ຄືນ ແລ້ວ​ຕົກ​ລົງ​ ຈ່າຍ​ໃຫ້ 94 ຕື້, ອີງ​ຕາມ ທ່ານ ອຸ່ນ​ຫຼ້າ ໄຊ​ຍະ​ສິດ, ຮອງເຈົ້າ​ແຂວງ ແຂວງ​ອັດ​ຕະ​ປື.

ທ່ານກ່າວຕື່ມ​ອີກ​ວ່າ ​ພະ​ນັກ​ນ​ງານ ຜູ້​ທີ່​ຖືກ​ຍ້າຍ​ໄປ​ນັ້ນ, ບໍ່​ແມ່ນ​ເປັນ​ຍ້ອນ ມີ​ຄວາມ​ຜິດ, ແຕ່​ເຂົາ​ເຈົ້າ ​ເຮັດວຽກ​ງານ​ ເກັບ​ກຳ​ຂໍ້​ມູນ ​ຜູ້​ປະ​ສົບ​ພັຍ ​ສຳ​ເຣັດ​ແລ້ວ:

"ໂຕນີ້​ນິ ສະ​ພາບ ມັນບໍ່​ແມ່ນ​ວ່າສັ່ງ​ຍ້າຍ​ ຍ້ອນ​ເຮັດ​ຜິດ, ແຕ່​ວ່າ​ເຮົາ​ຖອນນີ້ ແມ່ນ​ຖອນ​ພະ​ນັກ​ງານ ​ຂອງ​ແຂວງນີ້​ມາ ໝາຍ​ວ່າ ຂໍ້​ມູນ​ທີ່​ໄດ້​ເກັບ​ກຳ​ ຢູ່​ຮາກ​ຖານ ​ຢູ່​ຂັ້ນ​ບ້ານ ເຮົາ​ໄດ້​ເຮັດ​ສຳ​ເຣັດ ​ໂດຍ​ພື້ນ​ຖານ​ແລ້ວ ລະ​ແລ້ວ​ໝົດ​ແລ້ວ. ຍັງຂັ້ນ​ຕອນ ​ການ​ຊິ​ຈ່າຍ​ຫັ້ນ​ຊື່ໆ ຊິ​ສເນີໃຫ້​ບໍ​ຣິ​ສັດ ​ຈ່າຍ​ຫັ້ນ, ຈ່າຍ​ຄ່າ​ຊົດ​ເຊີຍ ​ໃຫ້​ປະ​ຊາ​ຊົນ​ນີ້ ມັນ​ຂັ້ນ​ຕອນ​ໂຕນີ້. ດັ່ງ​ນັ້ນ​, ວຽກ​ຢູ່​ຮາກ​ຖານ ​ມັນ​ແລ້ວ​ໝົດ​ແລ້ວ."

ສ່ວນ​ວ່າ​ ຄ່າ​ຊົດ​ເຊີຍ​ ໃຫ້​ຊາວ​ບ້ານ ​ຖືກ​ຫັ​ກຄ່າ​ຫຼຸ້ຍ​ຫ້ຽນ 20 ເປີ​ເຊັນ, ຊາວບ້ານ​ທ່າ​ແສງ​ຈັນ, ບ້ານຫີນ​ລາດ, ແລະ ບ້ານ​ໃໝ່ [ທ່າ​ຫີນ] ເມືອງ​ສ​ນາມ​ໄຊ ແຂວງ​ອັດ​ຕະ​ປື ທັງ​ໝົດ​ປະ​ມານ 500 ຄອບ​ຄົວ ທີ່​ຮັບ​ຜົລ​ກະ​ທົບ ​ຈາກ​ເຂື່ອນ​ເຊ​ປ່ຽນ-ເຊ​ນ້ຳ​ນ້ອຍ​ ແຕກ ​ບໍ່​ຍອມ​ເຊັນ​ຮັບ​ເອົາ ຄ່າ​ຊົດ​ເຊີຍ ສ່ວນ​ທີ່​ເຫຼືອ 50 ເປີ​ເຊັນ ຍ້ອນ​ວ່າ ຖືກ​ຫັກ​ ຄ່າ​ຫຼຸ້ຍ​ຫ້ຽນ 20 ເປີ​ເຊັນ.

ອີງ​ຕາມ​ຂໍ້​ມູນ ​ຈາກ​ທາງ​ການ​ ແຂວ​ງອັດ​ຕະ​ປື, ​ຄ່າ​ຫຼຸ້ຍ​ຫ້ຽນ ທີ່​ຖືກ​ຕັດ​ 20 ເປີ​ເຊັນ​ນັ້ນ, ຢູ່​ໃນ​ 2 ຣາຍ​ການ ເຊັ່ນ: 1.​ ພາ​ຫະ​ນະ ຂອງ​ປະ​ຊາ​ຊົນ, 2. ເຄື່ອງ​ໃຊ້​ຄົວ​ເຮືອນ, ແຕ່​ວ່າ ​ອີກ 3 ຣາຍ​ການ ເຊັ່ນ: 1. ທຸ​ຣະ​ກິຈ ​ຄົວ​ເຮືອນ, 2. ສັດ​ລ້ຽງ, 3. ອາ​ຫານ​ ແລະ ເຄື່ອງ​ມື​ນັ້ນ, ເຈົ້າ​ຂອງ​ໂຄງ​ການ ​ຈ່າຍ​ໃຫ້​ຊາວ​ບ້ານ ​ເຕັມ 100 ເປີ​ເຊັນ. ແຕ່​ຊາວ​ບ້ານ ທັງ​ 3 ​ບ້ານ, ຍັງ​ບໍ່​ເຊັນ​ຮັບ​ເອົາ ຍ້ອນ​ເຂົາ​ເຈົ້າ​ເຫັນ​ວ່າ ບ້ານ​ເຂົາ​ເຈົ້າ ​ໄດ້​ຮັບ​ຜົລ​ກະ​ທົບ ​ໜັກ​ທີ່​ສຸດ ຈາກ​ເຫດ​ການ ​ເຂື່ອນ​ເຊ​ປຽນ​-ເຊ​ນ້ຳ​ນ້ອຍ ​ແຕກ ຄັ້ງ​ວັນ​ທີ 23 ກໍ​ຣະ​ກະ​ດາ 2018.

ຊາວ​ບ້ານ​ທ່ານ​ນຶ່ງ ​ໄດ້​ກ່າວ​ຕໍ່​ເອ​ເຊັຽ​ເສ​ຣີ ໃນທ້າຍ​ເດືອນກໍ​ຣະ​ກະ​ດາ ວ່າ: "ດຽວນີ້ ມາ​ເວົ້າ​ກັນ ​ຢູ່​ຫ້ອງ​ການ​ເຈົ້າ​ເມືອງ ພໍ່​ແມ່​ປະ​ຊາ​ຊົນ ​ບໍ່​ຍອມ​ຮັບ​ ຊິ​ເຮັດ​ຈັ່ງ​ໃດ ເຮົາ​ກະ​ບໍ່​ຈັກ​ຊິເຊັນ. ພໍ່​ແມ່​ປະ​ຊາ​ຊົນ ​ບໍ່​ເຊັນ  ລະ​ເຮົາ​ບໍ່​ຈັກ​ຊິ​ເຊັນ. ພໍ່​ແມ່​ປ​ະ​ຊາ​ຊົນ ​ບໍ່​ພໍ​ໃຈ ​ຊິ​ເຮັດ​ຈັ່ງ​ໃດ ເຮົາ​ກະ​ບໍ່​ກ້າ​ເຊັນ​ແຫຼະ ຕາງ​ໜ້າ​ເຂົາ​ ເພາະ​ວ່າ ມັນເປັນ​ຊັພ​ສິນ ​ຂອງ​ໃຜ​ຂອງ​ມັນ."

ເຄື່ອງ​ໃຊ້ ແລະ ຊັພສິນ​ຕ່າງໆ ຂອງ​ປະ​ຊາ​ຊົນ ​ໄດ້​ພັງ​ເສັຽ​ຫາຍ ​ເກືອບ​ໝົດ ແລະ ບາງ​ບ້ານ ​ເຫຼືອແຕ່​ເຮືອນ​ຫລັງ​ດຽວ. ຊາວ​ບ້ານ​ທ່ານນີ້ ກ່າວ​ວ່າ: "ເຂົາ​ຕັດ 20 ເປີ​ເຊັນ ກະ​ບາງ​ຄົນ​ ກະ​ບໍ່​ເຫຼືອ​ຫຍັງ​ນ່າ ຈັກ​ຊິ​ກິນ​ຫຍັງ​ແຫຼະ​ ບາງ​ຄົນ ເພາະ​ວ່າ ຍັງ​ເຫຼືອແຕ່ລ້ານ​ນຶ່ງ ສອງ​ລ້ານ ມັນ​ຊິ​ເປັນ​ໄປ​ບໍ? ເງິນ 60 ລ້ານ, 70 ລ້ານ, ເຂົາ​ຕັດ 20 ເປີ​ເຊັນ ບໍ່​ແມ່ນ​ງ່າຍໆ. ຄື​ວ່າ ເພິ່ນ​ມາ​ເຊີນ ເຊີນ​ແຕ່​ບ້າ​ນ​ເຮົາ ບ້ານ​ເຮົາ​ບໍ່​ມີ​ອີ່​ຫຍັງ​ແຫຼະ ມີ​ແຕ່​ເຮືອນ​ຫຼັງດຽວ."

ຊາວ​ບ້ານທ່ານນີ້ ກ່າວ​ຕື່ມ​ອີກວ່າ: "ບ້ານ​ໃໝ່​ ຍັງເຫຼືອ​ຢູ່ 20 ເປີ​ເຊັນ ເສັຽຫາຍ 80 ເປີ​ເຊັນ, ບ້ານ​ຫ່າຫີນ ແລະ ທ່າ​ແສງ​ຈັນ ເສັຽຫາຍ 100 ເປີ​ເຊັນ​ເລີຍ. ສະ​ນັ້ນ, ​ພໍ່​ແມ່​ປະ​ຊາ​ຊົນ ບໍ່​ຍອມ​ຮັບ. ທັງ​ຍາ​ຕິ​ພີ່​ນ້ອງພໍ່​ແມ່ ຜູ້​ຕາຍ​ປະ​ຊັພ​ສິນ ​ສິ່​ງ​ຂອງ ​ກໍ​ຕາຍ​ໄປ​ແລ້ວ. ຜູ້​ຕາຍ​ປະ​ລູກ​ປະ​ເມັຽ ກໍຕາຍ​ໄປ​ແລ້ວ, ຜູ້​ຕາຍ​ປະ​ລູກ​ປະ​ຜົວ​ ກໍ​ຕາຍ​ໄປ​ແລ້ວ. ຈັ່ງ​ຊັ້ນ​ປະ​ຊາ​ຊົນ ປັດ​ຈຸ​ບັນ​ນີ້, ນອນ​ກັບ​ນ້ຳ​ຕາ ກິນ​ກັບ​ນ້ຳ​ຕາ."

ໃນ​ທ້າຍ​ເດືອນ​ກໍ​ຣະ​ກະ​ດາ ທີ່​ຜ່ານມາ, ຊາວ​ບ້ານທັງ​ 3 ບ້ານ ໄດ້​ຂຽນ​ຄຳ​ຮ້ອງ​ທຸກ ສົ່ງ​ໄປ​ຫາ ອຳ​ນາດ​ການ​ປົກ​ຄອງ​ເມືອງ ແລະ ສະ​ພາ​ປະ​ຊາ​ຊົນແຂວງ​ ເພື່ອ​ໃຫ້​ພິ​ຈາ​ຣະ​ນາ ເຣື່ອງບໍ່​ໃຫ້​ຕັດ​ເງິນ 20 ເປີ​ເຊັນ,  ແຕ່ມາ​ເຖິງ​ປັດ​ຈຸ​ບັນ ຊາວ​ບ້ານ​​ຍັງ​ບໍ່​ໄດ້​ຮັບ ​ຄຳ​ຕອບ​ຫຍັງ.

ຊາວ​ບ້ານ​ອີກທ່ານ​ນຶ່ງ ໄດ້​ກ່າວ​ຕໍ່​ເອ​ເຊັຽ​ເສ​ຣີວ່າ: "ແມ່ນ​ລະ ​ສົ່ງ​ໃຫ້​ເມືອງ​ລະ ສົ່ງ​ໃຫ້​ສະ​ພາ​ເພິ່ນ​ລະ ໂຕ​ບົດ​ບັນ​ທຶກ​ ຈາກ​ພໍ່​ແມ່​ປະ​ຊາ​ຊົນ, ​ຫັ້ນ​ນ່າ. ສົ່ງ​ໃຫ້​ສະພາ​ເພິ່ນ ລະ​ສະ​ພາ​ເພິ່ນ ​ຊິ​ສົ່ງ​ໃຫ້​ແຂວງ ຫຼືວ່າ​ແນວ​ໃດ, ສະ​ພາ​ປະ​ຊາ​ຊົນ ​ເພິ່ນ​ຫັ້ນ​ນ່າ."

ອີງ​ຕາມເອ​ກະ​ສານ ທີ່​ທາງ​ການ​ ແຂວງ​ອັດ​ຕະ​ປື ໄດ້​ບັນ​ທຶກ​ເອົາ​ໄວ້ ໃນ​ເດືອນເມ​ສາ 2020 ທີ່​ຜ່ານ​ມາ ໄດ້​ຣະ​ບຸ​ວ່າ:

• ບ້ານ​ທ່າ​ແສງ​ຈັນ ມູລຄ່າ​ຊົດ​ເຊີຍ​ ຄວາມ​ເສັຽຫາຍ ທັງ​ໝົດ 10 ຕື້​ກີບ, ຈ່າຍຜ່ານ​ມາ 5 ຕື້ ກີບ ແລະ ສ​ເນີຈ່າຍ ອີກ 5 ຕື້ ກີບ.
• ບ້ານ​ຫີນ​ລາດ ມູລຄ່າ​ຊົດ​ເຊີຍ 22 ຕື້​ກີບ, ຈ່າຍ​ແລ້ວ​ຜ່ານ​ມາ ເກືອບ 11 ຕື້ກີບ, ຍັງ​ຄ້າງ​ຈ່າຍ 11 ຕື້ປາຍກີບ. ​
• ບ້ານ​ໃໝ່ [ທ່າ​ຫີນ] ມູ​ລ​ຄ່າ​ຊົດ​ເຊີຍ 16 ຕື້ກີບ, ຈ່າຍ​ແລ້ວ 8 ຕື້ກີບ ຫຍັງ​ເຫຼືອຄ້າງ​ຈ່າຍ 8 ຕື້ ກີບ.

ການ​ຫັກຄ່າ​ຫຼຸ້ຍ​ຫ້ຽນ 20 ເປີເຊັນ, ບໍ່​ໄດ້​ຕັດ​ເປັນ​ເງິນ​, ແຕ່​ຈະ​ຕັດ​ເປັນ​ມູລ​ຄ່າ ​ວັດ​ຖຸ​ເຄື່ອງ​ໃຊ້ ​ຄົວ​ເຮືອນ ແລະ ພາ​ຫະ​ນະ ແລ້ວ​ບໍ​ຣິ​ສັດ ​ຈະ​ຈ່າຍ​ໃຫ້ ເຫຼືອ 80 ເປີ​ເຊັນ ໃຫ້​ຊາວ​ບ້ານ.

ທ່ານ ອຸ່ນ​ຫຼ້າ ໄຊ​ຍະ​ສິດ, ຮອງ​ເຈົ້າ​ແຂວງ ແຂວງ​ອັດ​ຕະ​ປື ໄດ້​ກ່າວ​ຕໍ່​ເອ​ເຊັຽ​ເສ​ຣີ ວ່າ: "ໂຕ 20 ເປີ​ເຊັນ​ນີ້ ບໍ່​ແມ່ນ​ເຮົາ​ໄປ​ຕັດ ​ເງິນ​ຂອງ​ປະ​ຊາ​ຊົນ ເປັນ​ມຸມມອງ​ ທີ່​ເຂົ້າໃຈ​ຜິດ​ພາດ, ​ຫັ້ນ​ນ່າ. ມັນ​ແມ່ນ​ເປີ​ເຊັນ​ ຫັກ​ຄ່າ​ສິ້ນ​ເປືອງ ການ​ນຳ​ໃຊ້​ຊັພ​ສິນ​ ຫຼື​ວ່າວັດ​ຖຸ​ ຂອງ​ປ​ະ​ຊາ​ຊົນ ​ຜ່ານ​ມາ​ຫັ້ນ​ນ່າ."

ທ່ານ ອຸ່ນ​ຫຼ້າ ໄຊ​ຍະ​ສິດ, ຮອງ​ເຈົ້າ​ແຂວງ ແຂວງ​ອັດ​ຕະ​ປື ​ກ່າວ​ຕື່ມ​ອີກວ່າ: "ດຽວນີ້ຫັ້ນ​ ປະ​ຊາ​ຊົນ​ຫັ້ນ ຍັງ​ບໍ່​ເຂົ້າ​ໃຈ ລະ​ເຂົ້າ​ໃຈ​ວ່າ ແມ່​ນ​ຄ​ນະ​ກັມມະ​ການ, ແມ່ນ​ຣັ​ຖ​ເບາະ ຫຼື ບໍ​ຣິ​ສັດ ໄປ​ຕັດ​ຂອງ​ເພິ່ນ 20 ເປີ​ເຊັນ ຫັ້ນ​ນ່າ. ຄວາມ​ຈິງ​ ມັນ​ບໍ່​ແມ່ນ​ຕັດ 20 ເປີເຊັນ ມັນ​ແມ່ນ​ຕັດ​ ຄ່າ​ຫຼຸ້ຍຫ້ຽນ ຄ່າ​ຊົດ​ໃຊ້ ​ວ່າ​ຊັ້ນ​ສາ, ເປັນ​ແນວ​ນັ້ນ."

ທາງ​ການ​ແຂວງ ແລະ ບໍ​ຣິ​ສັດ ມີ​ການ​ຄິດ​ໄລ່ ຄ່າ​ຫຼຸ້ຍ​ຫ້ຽນ ເຊັ່ນ ຣົດທີ່​ຊາວ​ບ້ານ ຊື້​ມາ​ໃຊ້​ ແລ້ວລາ​ຄາ​ຂອງ​ຣົດ ​ຈະ​ບໍ່​ຄື​ເກົ່າ - ໝາຍ​ຄວາມ​ວ່າ ລາ​ຄາ​ມັນ​ຕ້ອງ​ຫຼຸດ​ລົງ ເພາະ​ວ່າ ​ເຂົາ​ເຈົ້າ​ໄດ້​ໃຊ້​ແລ້ວ.

ທ່ານ ອຸ່ນ​ຫຼ້າ ໄຊ​ຍະ​ສິດ, ຮອງ​ເຈົ້າ​ແຂວງ ແຂວງ​ອັດ​ຕະ​ປື ກ່າວຕື່ມ​ອີກວ່າ: "ຕົວ​ຢ່າງວ່າ ຄັນ​ນຳ​ໃຊ້​ຣົດເນາະ ຊື້​ຣົດ​ມາ ​ເຂົາ​ໃຊ້​ງານ​ມາ 10 ປີກະ​ມີ, 5 ປີກະ​ມີ, 3 ປີ 4 ປີ. ຄັນ​ວ່າ ຣົດ​ໃຫຍ່​ ກະ​ປະ​ເພດ​ລົດ​ມື​ສອງ ມື​ສາມ ໂຕ​ໃໝ່ໆແທ້ນີ້​ ກະ​ຍາກ​ເນາະ. ບາດນີ້, ຊິ​ເປັນ​ປະ​ເພດ​ຣົດ​ໄຖ​ນາບໍ່ ອັນ​ນີ້ ໄດ້​ຜ່ານ​ການ​ໃຊ້​ງານ ​ມາ​ຫຼາຍ​ແລ້ວ. ດັ່ງ​ນັ້ນ, ​ໃນ​ເວ​ລາ​ປະ​ເມີນນີ້ ເອົາ​ປະ​ເມີນ ​ເອົາ​ມູລ​ຄ່າຊົມ​ໃຊ້​ ຫັກ​ອອກ."

ນອ​ກ​ຈາກນີ້, ການກໍ່​ສ້າງ ເຮືອນຢູ່​ຖາ​ວອນ ຈຳ​ນວນ 700 ຫຼັງ ໃຫ້​ແກ່​ປະ​ຊາ​ຊົນ ກໍ​ບໍ່​ໄດ້​ມີ​ການ​ປະ​ມູລ ຍ້ອນ​ວ່າ ມີ​ບໍ​ຣິ​ສັດ ທີ່​ສເນີ ໄດ້ສເນີລາ​ຄາ ຕໍ່າກ່​ວາ​ລາ​ຄາ ​ທີ່​ທາງ​ການຄິດ​ໄລ່​ອອກ​ມາ ກ່ອນໜ້ານີ້.

ອີ​ງ​ຕາມ​ບົດ​ຣາຍ​ງານ ​ຂອງ​ເຈົ້າ​ແຂວງ ແຂວງ​ອັດ​ຕະ​ປື, ລົງ​ວັນ​ທີ 7 ເມ​ສາ 2020, ເຖິງ​ທ່ານ ສອນ​ໄຊ ສີ​ພັນ​ດອນ, ຮອງ​ນາ​ຍົກ​ຣັ​ຖ​ມົນ​ຕຣີ, ບໍ​ຣິ​ສັດ ວັນ​ແສງ​ອັດ​ຕະ​ປື ກໍ່​ສ້າງ ແລະ ສ້ອມ​ແປງ​ ເຄ​ຫາ​ສະ​ຖານ ເປັນ​ຜູ້​ຮັບ​ເໝົາ​ ກໍ່​ສ້າງ​ເຮືອນຢູ່​ຖາ​ວອນ 700 ຫຼັງ ໃຫ້​ແກ່​ປະ​ຊາ​ຊົນ ທີ່​ໄດ້​ຮັບ​ ຜົລ​ກະ​ທົບ ​ຈາກ​ເຂື່ອນ​ແຕກ ໃນ​ລາ​ຄາ​ 24.5 ລ້ານ​ໂດ​ລ້າຣ ຕ່ຳ​ກ່​ວາລາ​ຄາ ​ທີ່​ຂແນງ​ການ​ໂຍ​ທາ​ທິ​ການ​ ແລະ ຂົນ​ສົ່ງ ຫຼື ຍ​ທ​ຂ ໄດ້​ປະ​ເມີນ​ໄວ້ ແມ່ນ 30 ລ້ານ​ໂດ​ລ້າຣ. ການ​ກໍ່​ສ້າງເຮືອນຢູ່ຖາ​ວອນ 700 ຫຼັງ ຫາກໍ່​ເຣີ່ມ​ລົງ​ມື ແລະ ຍັງ​ບໍ່​ມີ​ກຳ​ນົດ​ວ່າ ຈະ​ສຳ​ເຣັດ​ເມື່ອ​ໃດ.