ບ.ປຸ່ງຈອມແສງ ມ.ເມິງ ກັງວົນ ສວນກ້ວຍຈີນ

ປະຊາຊົນຢູ່ ບ້ານປຸ່ງຈອມແສງ ເມືອງເມິງ ແຂວງບໍ່ແກ້ວ ວິຕົກກັງວົນເຣື່ອງສວນກ້ວຍ ຂອງນັກລົງທຶນຈີນ ທີ່ກໍານົດມີເນື້ອທີ່ 100 ເຮັກຕາ ຊຶ່ງເປັນແຫ່ງທໍາອິດໃນເຂດບ້ານນັ້ນ ຈະສົ່ງຜົລກະທົບຕໍ່ຊີວິດ ການເປັນຢູ່ຂອງພວກຕົນ ໃນຂັ້ນຕໍ່ໄປ. ປັດຈຸບັນບໍຣິສັດ ປູກກ້ວຍຈີນ ໄດ້ຂຸດ ດິນນໍາເບັ້ຽກ້ວຍລົງປູກ 30 ເຮັກຕາແລ້ວ. ເຖິງຈະຍັງບໍ່ມີຜູ້ໃດ ໄດ້ຮັບຜົລກະທົບເທື່ອ ແຕ່ກໍຢາກໃຫ້ພາກສ່ວນທີ່ກ່ຽວຂ້ອງ ລົງຕິດຕາມກວດ ກາຢ່າງຕໍ່ເນື່ອງ, ອີງຕາມຄໍາເວົ້າຂອງຊາວບ້ານປຸ່ງຈອມແສງ ທ່ານນຶ່ງຕໍ່ RFA ໃນມື້ວັນທີ 8 ພຶສພາ ນີ້:

“ປະຊາຊົນນີ໊ ວ່າ ຄັນວ່າຄັນໃສ່ຫລາຍເກີນຫັ້ນນະເນາະ ມີຜົລກະທົບ ຂະເຈົ້າກໍຢ້ານ ບໍ່ຢາກໃຫ້ໃສ່ຫລາຍ ສະເພາະສານເຄມີຫັ້ນ. ອັນນັ້ນ ຢູ່ຂອບເຂດບ້ານເຮົາ ຍັງບໍ່ມີໃຜມາລົງທຶນ ເຮັດອັນນີ້ ອັນນັ້ນເທື່ອ ຫາສິມາເຮັດປີນີ້ນີ໋.”

ຊາວບ້ານອີກທ່ານນຶ່ງ ທີ່ຢູ່ໃກ້ສວນກ້ວຍຈີນ 2-300 ແມັດນັ້ນ ກໍກັງວົນຄືກັນ ຢ້ານວ່າຈະມີການໃຊ້ສານເຄມີ ອັນຈະສົ່ງຜົລກະທົບຕໍ່ສຸຂພາບ ຂອງຄອບຄົວຕົນ ແລະຊາວບ້ານ ຈຶ່ງຢາກໃຫ້ພາກສ່ວນທີ່ກ່ຽວຂ້ອງ ຊ່ວຍເອົາໃຈໃສ່ຕິດຕາມກວດກາ:

“ໂອ໊ ສານເຄມີກໍຢ້ານຫັ້ນແຫລະ ເຄໝອກເຄມີ ກໍ໊. ຄັນເຂົາໃຊ້ ອ້າຍກໍສິວ່າແຫລະ ອັນນີ໋ ກໍບໍ່ເຫັນເຂົາເຮັດຫຍັງເທື່ອເນາະ. ຢູ່ມໍ່ໆນີ໊ ບໍ່ໄດ້ ຢູ່ໄກ ຈາກເຂົາ ອອກຈາກອ້າຍໄປໜ້ອຍນຶ່ງ ບໍ່ໄດ້ໄກ.”  

ກ່ຽວກັບເຣື່ອງນີ້ ເຈົ້າໜ້າທີ່ຄະນະສະເພາະກິດ ດ້ານກະສິກັມ ແຂວງບໍ່ແກ້ວ ເວົ້າວ່າທາງພາກສ່ວນກ່ຽວຂ້ອງ ຈະລົງກວດກາການປູກກ້ວຍ 2 ເທື່ອຕໍ່ປີ ຕາມສັນຍາທີ່ຕົກລົງກັນຣະຫວ່າງບໍຣິສັດ ແລະທາງການ. ຫາກມີຫາງສຽງປະຊາຊົນ ໄດ້ຮັບຜົລກະທົບຈາກການໃຊ້ສານເຄມີ ຢູ່ສວນກ້ວຍຈີນ ແຫ່ງນີ້ກໍຈະມີການລົງກວດກາ ເປັນກໍຣະນີສະເພາະ:

“ຫລັງຈາກມັນມີຢູ່ໃນເນື້ອໃນສັນຍາແລ້ວກໍເຂົາ ຈັດຕັ້ງປະຕິບັດໄປແລ້ວ ເຂົາກໍລົງກວດ ໂດຍລວມແລ້ວ ປົກກະຕິປີນຶ່ງເທື່ອຫລື 2 ເທື່ອບໍ່ ເກີນຖ້າວ່າມີຜົລສະທ້ອນອັນບໍ່ດີ ມີຫາງສຽງມາ ພາກສ່ວນເຂົາກໍຈະລົງ ແຕ່ງຕັ້ງທີມງານ ລົງກວດກາສະເພາະຕື່ມ.”

ທາງດ້ານເຈົ້າໜ້າທີ່ບໍຣິສັດ ເຈີນຍຸຍເຊິນຂາເຂົ້າ-ຂາອອກ ກ່າວກ່ຽວກັບບັນຫານີ້ວ່າ ບໍຣິສັດຍັງຢູ່ໃນຂັ້ນຕອນ ຂຸດດິນລົງເບັ້ຽກ້ວຍເທົ່ານັ້ນ ນັບແຕ່ເດືອນມົກຣາ ມາຮອດປັດຈຸບັນ ບໍຣິສັດຍັງບໍ່ໄດ້ໃຊ້ສານເຄມີ ເນື່ອງຈາກຕ້ອງໄດ້ເຮັດ ການກະເສດສະອາດ ຕາມສັນຍາທີ່ຕົກລົງ ໄວ້ກັບຂັ້ນເທິງ. ຫາກຕໍ່ໄປ ກ້ວຍໃນສວນຕິດພຍາດ ກໍຈະໄດ້ຂຽນໃບສເນີຫາພາກສ່ວນກ່ຽວຂ້ອງ ຂໍອະນຸຍາດ ໃຊ້ສານເຄມີຕາມອັຕຣາ ສ່ວນ ທີ່ກໍານົດໃຊ້ໄດ້ນັ້ນ ເສັຽກ່ອນ:

“ໂອ໋ ດຽວນີ້ບໍ່ໃຊ້ແຫຼະ ສານເຄມີ ຈະໄປເອົາມາໃດ ປຸ໋ຍກໍປຸ໋ຍຊີວະພາບ. ຄັນວ່າບໍ່ເປັນພຍາດ ກໍບໍ່ໃສ່ເລີຍ. ກ່ອນສິໃສ່ເຮົາຕ້ອງໄດ້ຜ່ານ ຂແນງການ ທີ່ກ່ຽວຂ້ອງຫັ້ນນະ ຂະເຈົ້າຈະຢືນຢັນໃຫ້ວ່າ ເຮັດໄດ້ຢູ່ ກໍຂະເຈົ້າອະນຸມັດ ກໍສິໃສ່ໄດ້ ບໍ່ແມ່ນວ່າເອົາເຂົ້າມາ ກໍເອົາເຂົ້າມາ ບໍ່ມີການອະນຸຍາດອິສັ່ງ ຜ່ານຂັ້ນແຂວງບໍ່ ເປັນແນວນັ້ນ.”

ບໍຣິສັດ ເຈິນຍຸຍເຊິນຂາເຂົ້າ-ຂາອອກ ໄດ້ເຂົ້າມາສັມປະທານທີ່ດິນຂອງຣັຖ ແລະປະຊາ ຊົນຈໍານວນ 100 ເຮັກຕາເພື່ອປູກກ້ວຍ ຢູ່ບ້ານ ປຸ່ງຈອມແສງ ເມືອງເມິງ ແຂວງບໍ່ແກ້ວ ລົງທຶນທັງໝົດ 5 ແສນໂດລາ ສະຫະຣັຖ. ບໍຣິສັດດັ່ງກ່າວ ໄດ້ຊ່ອຍປັບປຸງເສັ້ນທາງ ແຕ່ບ້ານ ຊຽງກົກ ເມືອງລອງ ແຂວງຫລວງນໍ້າທາ ຫາເມືອງເມິງ ແຂວງບໍ່ແກ້ວ ອີກດ້ວຍ.