ຂຶ້ນຄ່າປີ້ຣົຖໄຟ ລາວ-ຈີນ ກະທົບຜູ້ໂດຍສານ ຈຳນວນຫຼາຍ

ໃນວັນທີ 01 ພຶສຈິກາ 2023 ນີ້ບໍຣິສັດ ທາງຣົຖໄຟ ລາວ-ຈີນ ຈໍາກັດ ໄດ້ປັບຂຶ້ນລາຄາປີ້ໂດຍສານ ຣົຖໄຟ ລາວ-ຈີນ ທຸກປະເພດ ແລະ ທຸກຊັ້ນບ່ອນໜັ່ງ ທັງຣົຖໄຟຂະບວນພາຍໃນປະເທດ ແລະ ຂະບວນລະຫວ່າງປະເທດ ໂດຍປັບຂຶ້ນຕາມອັດຕຣາແລກປ່ຽນ ລະຫວ່າງເງິນກີບ ກັບເງິນຢວນ ເປັນຕົ້ນຂະບວນຣົຖໄຟ EMU ພາຍໃນປະເທດ ບ່ອນໜັ່ງຊັ້ນ 2 ຈາກສະຖານີ ນະຄອນຫຼວງວຽງຈັນ ຫາ ສະຖານີຫຼວງພຣະບາງ ປັບຂຶ້ນເປັນລາຄາ 330,000 ກີບຕໍ່ຄົນ/ຖ້ຽວ ຈາກລາຄາເກົ່າ 275,000 ກີບຕໍ່ຄົນ/ຖ້ຽວ ແລະ ຂະບວນຣົຖໄຟ EMU ລະຫວ່າງປະເທດ ບ່ອນໜັ່ງຊັ້ນ 2 ຈາກສະຖານີ ນະຄອນຫຼວງວຽງຈັນ ຫາ ສະຖານີຄຸນໝິງໃຕ້ ປະເທດຈີນ ຖືກປັບຂຶ້ນເປັນລາຄາ 1,626,000 ກີບຕໍ່ຄົນ/ຖ້ຽວ ຈາກລາຄາເກົ່າ 1,355,000 ກີບຕໍ່ຄົນ/ຖ້ຽວ ໂດຍທຸກລາຄາ ຍັງບໍ່ລວມຄຳທຳນຽມປີ້. ອີງຕາມຂໍ້ມູນຫຼ້າສຸດຂອງບໍຣິສັດ ທາງຣົຖໄຟ ລາວ-ຈີນ ຈຳກັດວັນທີ 31 ຕຸລາ ທີ່ຜ່ານມານີ້.

ກ່ຽວກັບເຣື່ອງນີ້ ຊາວລາວທີ່ໄປຊື້ປີ້ຣົຖໄຟ ຢູ່ສະຖານີຕ່າງໆ ຢືນຢັນວ່າ ໃນວັນທີ 01 ພຶສຈິການີ້ ລາຄາປີ້ໂດຍ ສານໄດ້ຖືກປັບຂຶ້ນ ເປັນທີ່ຮຽບຮ້ອຍເຊິ່ງສ່ວນໃຫຍ່ ເຫັນວ່າມີລາຄາແພງກ່ອນເກົ່າ ຂ້ອນຂ້າງຫຼາຍ ແລະ ທາງບໍຣິສັດ ມີແຕ່ເພີ່ມຄ່າປີ້ໂດຍສານຂຶ້ນເລື້ອຍໆ ແບບບໍ່ມີການຫຼຸດຄ່າປີ້ ແຕ່ຢ່າງໃດ.

ດັ່ງຊາວລາວນາງນຶ່ງ ທີ່ໄປຊື້ປີ້ຣົຖໄຟຢູ່ສະຖານີນາເຕີຍ ແຂວງຫຼວງນໍ້າທາ ກ່າວຕໍ່ວິທຍຸເອເຊັຽ ເສຣີ ໃນວັນທີ 01 ພຶສຈິການີ້ວ່າ:

“ມື້ນີ້ລາຄາປີ້ຣົຖໄຟ ແມ່ນຈະເພີ່ມຂຶ້ນເດີ້ ເຂົາຈະປັບກັນແຕ່ມື້ນີ້ ໄປປົກກະຕິນັ້ນ ແມ່ນ 148,000 ກັບ 320,000 ດຽວນີ້ 381,000 ແລ້ວກາ 537,000. 3 ເດືອນ, 4ເດືອນ ແລ້ວເຂົາຈະປັບລາຄາຂຶ້ນ.”

ຜູ້ຊື້ປີ້ຣົຖໄຟ ລາວ-ຈີນ ຢູ່ສະຖານີນະຄອນຫຼວງວຽງຈັນ ເຫັນວ່າລາຄາປີ້ຣົຖໄຟ ທີ່ປັບຂຶ້ນແມ່ນເພີ່ມຂຶ້ນຕັ້ງແຕ່ 30,000 ກີບໄປຈົນຮອດຫຼັກ 100,000 ກີບເຊິ່ງຂຶ້ນກັບໄລຍະທາງໄກສໍ່າໃດ ແລະ ບໍ່ມີການຫຼຸດລາຄາ ໃຫ້ກັບຜູ້ໂດຍສານ ໃນທຸກກໍຣະນີ.

ດັ່ງທ່ານກ່າວວ່າ:

“ມື້ນີ້ເຂົາເຈົ້າລາຄາໃໝ່ແລ້ວ ແລ້ວແຕ່ໄລຍະທາງ ເຂົາເຈົ້າຈະປັບຂຶ້ນເປັນໄລຍະທາງ ລະ 30,000 ກີບອິຫຍັງຂຶ້ນໄປຫັ້ນນ່າ. ວັງວຽງຈະ 30,000 ກີບ. ໄປຫຼວງພຣະບາງແມ່ນຈະເພີ່ມຂຶ້ນ 70,000 ກີບ. ໄປເມືອງໄຊ ມັນຈະເພີ່ມຂຶ້ນ 100,000 ກີບ ອິຫຍັງພຸ້ນນ່າ.”

ສ່ວນຊາວລາວອີກນາງນຶ່ງ ທີ່ມັກຊື້ປີ້ຣົຖໄຟ ລາວ-ຈີນ ຢູ່ເລື້ອຍໆ ຢາກໃຫ້ທາງບໍຣິສັດທາງຣົຖໄຟ ລາວ-ຈີນ ຈຳກັດ ມີການຫຼຸດລາຄາປີ້ຣົຖໄຟ ຫຼື ມີໂປຣໂມຊັນຕ່າງໆ ໃນເທສການສຳຄັນ ເພື່ອສຳລັບໃຊ້ໃນການຫຼຸດຄ່າປີ້ເພາະວ່າ ຕາມທີ່ສັງເກດມາ ເຫັນວ່າມີແຕ່ປັບລາຄາປີ້ຂຶ້ນ ເລື້ອຍໆ ໂດຍສະເພາະລາຄາປີ້ຣົຖໄຟລະຫວ່າງປະເທດ ຈາກລາວໄປຈີນ ເຫັນວ່າມີການປັບຂຶ້ນ ຫຼາຍທີ່ສຸດ.

ດັ່ງຍານາງກ່າວວ່າເ

“ທາງບໍຣິສັດເພິ່ນ ເຂົາເຈົ້າປັບລາຄາຂຶ້ນ ທາງບໍຣິສັດເຂົາເຈົ້າມີ່ແຕ່ເພີ່ມຂຶ້ນ ວຽງຈັນໄປຄຸນໝິງເນາະ ດຽວນີ້ຖ້າວ່າແມ່ນຊັ້ນ 1 ເນາະ ກາ 2,592,000 ກີບ. ແລ້ວຊັ້ນ 2 ກາແມ່ນ 1,626,000 ກີບ. ແລ້ວອັນນີ້ວຽງຈັນໄປຫຼວງພຣະບາງ ຄວາມໄວສູງລວມຈອງນີ້ ກາແມ່ນ 380,000 ກີບ.”

ທາງດ້ານພະນັກງານ ປະຈໍາຈຸດຂາຍປີ້ຣົຖໄຟ ລາວ-ຈີນໄດ້ຢືນຢັນວ່າ ໃນວັນທີ 01 ພຶສຈິການີ້ ໄດ້ມີການປັບຂຶ້ນລາຄາ ປີ້ໂດຍສານທຸກປະເພດ ແລະ ທຸກສະຖານີຣົຖໄຟ ຕາມຣາຍລະອຽດ ທີ່ໄດ້ແຈ້ງການຜ່ານສື່ສັງຄົມອ໋ອນລາຍນ໌ ສ່ວນເຣື່ອງການຫຼຸດລາຄາປີ້ໂດຍສານ ຫຼື ໂປຣໂມຊັນຕ່າງໆ ນັ້ນຍັງບໍ່ມີແຜນເທື່ອ.

ດັ່ງຍານາງກ່າວວ່າ:

“ບໍ່ມີໂປຣໂມຊັນໃຫ້ເດີ້ ປັບແລ້ວເດີ້ ທຸກຊັ້ນ ທຸກສະຖານີ. ຂຶ້ນທຸກຊັ້ນເລີຍ ເບິ່ງຢູ່ໃນແຈ້ງການ ຢູ່ໜ້າເພຈຂອງສະຖານີ ກໍໄດ້.”

ກ່ຽວກັບການປັບ ຂຶ້ນລາຄາປີ້ໂດຍສານຣົຖໄຟ ລາວ-ຈີນ ໃນເທື່ອນີ້ ຊາວລາວຈໍານວນນຶ່ງ ກໍໄດ້ສະແດງຄວາມຄິດເຫັນ ຜ່ານສື່ສັງຄົມອ໋ອນລາຍນ໌ ວ່າ ລາຄາຖືກປັບຂຶ້ນຫຼາຍເກີນໄປ ຖ້າອີງໃສ່ສະພາບເສຖກິຈ ແລະ ເງິນເຟີ້ ພາຍໃນປະເທດ ແລະ ອີກຈຳນວນນຶ່ງ ເຫັນວ່າຖ້າມີການ ປັບຂຶ້ນລາຄາເລື້ອຍໆ ຕໍ່ໄປອາດເດີນດ້ວຍການຂີ່ຍົນ ຫຼື ໂດຍສານດ້ານອື່ນ ແທນ.

ກ່ອນໜ້ານີ້ບໍຣິສັດ ທາງຣົຖໄຟ ລາວ-ຈີນ ຈໍາກັດ ໄດ້ມີການປັບລາຄາປີ້ໂດຍສານ ຣົຖໄຟ ລາວ-ຈີນ ແລ້ວປະມານ 2 ເທື່ອນັບແຕ່ເປີດໃຫ້ບໍຣິການແຕ່ທ້າຍປີ 2021 ເປັນຕົ້ນມາ ຍົກໂຕຢ່າງຖ້ຽວສະຖານີນະຄອນຫຼວງວຽງຈັນ ຫາສະຖານີບໍ່ເຕັນ ຂະບວນຣົຖໄຟ EMU ບ່ອນໜັ່ງຊັ້ນ 2, ເທື່ອທຳອິດປັບຂຶ້ນເມື່ອວັນທີ 01 ມິຖຸນາ 2022 ໂດຍຂຶ້ນ 407,000 ກີບຕໍ່ຄົນ/ຖ້ຽວ ຈາກລາຄາເກົ່າ 333,000 ກີບຕໍ່ຄົນ/ຖ້ຽວ. ເທື່ອທີ 2 ໃນວັນທີ 01 ພຶສຈິກາ 2023 ນີ້ ປັບຂຶ້ນເປັນ 555,000 ກີບຕໍ່ຄົນ/ຖ້ຽວຈາກລາຄາກ່ອນໜ້ານັ້ນ 407,000 ກີບຕໍ່ຄົນ/ຖ້ຽວ.

ມາຮອດປັດຈຸບັນ ສະຖານີຣົຖໄຟ ລາວ-ຈີນ ໄດ້ເປີດບໍຣິການຂົນສົ່ງໂດຍສານແລ້ວ ທັງໝົດ 10 ສະຖານີໄດ້ແກ່:

1. ສະຖານີ ນະຄອນຫຼວງວຽງຈັນ,
2. ສະຖານີ ໂພນໂຮງ,
3. ສະຖານີ ວັງວຽງ,
4. ສະຖານີ ກາສີ,
5. ສະຖານີ ຫຼວງພຣະບາງ,
6. ສະຖານີ ເມືອງງາ
7. ສະຖານີ ເມືອງໄຊ,
8. ສະຖານີ ນາໝໍ້,
9. ສະຖານີ ນາເຕີຍ ແລະ
10. ສະຖານີ ບໍ່ເຕັນ.

ສ່ວນສະຖານີຣົຖໄຟ ປະເທດຈີນ ທີ່ເປັນເສັ້ນທາງຜ່ານ ຂອງຂະບວນຣົຖໄຟ ລາວ-ຈີນ ມີທັງໝົດ 4 ສະຖານີໄດ້ແກ່ ສະຖານີບໍ່ຫານ, ສະຖານີສິບສອງປັນນາ, ສະຖານີຜູ່ເອີ ແລະ ສະຖານີຄຸນໝິງ. ອີງຕາມຂໍ້ມູນຫຼ້າສຸດ ຂອງບໍຣິສັດ ທາງຣົຖໄຟ ລາວ-ຈີນ ຈຳກັດ.