ຄົນຈີນຢູ່ເຂດເສຖກິດ ບໍ່ເຕັນ

• ມະນີຈັນ
  2017-06-08

ຄົນຈີນຫລັ່ງໄຫລ ເຂົ້າມາຢູ່ໃນເຂດເສຖກິດສະເພາະ ບໍ່ເຕັນແດນງາມ ແຂວງຫຼວງນໍ້າທາ ເພີ່ມຂຶ້ນຮອດ 1 ພັນ ປາຍຄົນແລ້ວ ທັງເຂົ້າມາ ລົງທຶນຄ້າຂາຍ ແລະເຮັດວຽກ ຂນະທີ່ ບໍຣິສັດ ຂນາດນ້ອຍ ກໍເຂົ້າມາຫລາຍຂຶ້ນເລື້ອຍໆ. ຕາມຄໍາເວົ້າຂອງ ເຈົ້າໜ້າທີ່ ແຂວງຫຼວງນໍ້າທາ ທ່ານນຶ່ງ ໃນມື້ວັນທີ 7 ມີຖຸນາ ນີ້:

"ທັງພະນັກງານ ທັງກັມມະກອນ ທັງຜູ້ປະກອບການ ກະປະມານ 1 ພັນປາຍຄົນແລ້ວ ເດ້ດຽວນີ້ ກະນັບມື້ ນັບຫລາຍຂຶ້ນ ແລະບັນດາ ບໍຣິສັດຕ່າງໆ ໂດຍສະເພາະ ບໍຣິສັດ SME ເຂົາຫັ້ນແຫລະ ບໍຣິສັດ ໃຫຍ່ແທ້ ກະບໍ່ທັນ ມີຫລາຍ ປານໃດ".

ຄົນຈີນ ສ່ວນຫລາຍ ທີ່ເຂົ້າມາເຂດເສຖກິດແຫ່ງນີ້ ມີທັງເຮັດວຽກ ຕາມໂຮງແຮມ ຮ້ານອາຫານ ຮ້ານຄ້າ ປອດພາສີ ແລະ ຮ້ານບໍຣິການ ຕ່າງໆ ຊຶ່ງສ່ວນໃຫຍ່ ແມ່ນເດີນທາງ ເຂົ້າມາ ຢ່າງຖືກຕ້ອງ ຕາມຣະບຽບ ກົດໝາຍ. ແລະໃນຣະຍະປີ 2 ປີ ຂ້າງໜ້າ ຈໍານວນຄົນຈີນ ທີ່ຈະເຂົ້າມາເຮັດ ທຸຣະກິດ ແລະ ເປັນຄົນງານ ອາດເພີ່ມຂຶ້ນອີກ ເພາະບໍຣິສັດໃຫຍ່ ຂອງຈີນ ຈໍານວນນຶ່ງ ກຽມຈະເຂົ້າມາ ເປີດເພີ່ມຕື່ມ.

ທ່ານເວົ້າອີກວ່າປັດຈຸບັນ ເຣື່ອງຈໍານວນຄົນທັງໝົດ ໃນເຂດດັ່ງກ່າວຍັງບໍ່ທັນ ສລຸບໄດ້ແຕ່ໃນນັ້ນ ຄາດວ່າມີຄົນຈີນກວມເຖິງ 80 ສ່ວນຮ້ອຍ. ສ່ວນທີ່ເຫລືອ ແມ່ນຄົນລາວ ແລະຊາວຕ່າງປະເທດ ທີ່ເຮັດວຽກຢູ່ ໃນເຂດເສຖກິດສະເພາະ ບໍ່ເຕັນແດນງາມ ຊຶ່ງແຕ່ກ່ອນມີ ຊື່ວ່າເຂດ ເສຖກິດພິເສດບໍ່ເຕັນ ຊຶ່ງໄດ້ເລີ່ມສ້າງ ຕັ້ງມາແຕ່ປີ 2003 ໃນເນື້ອທີ່ທັງໝົດ 1 ພັນ 640 ເຮັກຕາ ໂດຍນັກລົງທຶນຈີນ ເປັນຜູ້ໄດ້ຮັບ ສັມປະທານ ເປັນເວລາ 50 ປີ, ໃຊ້ເງິນລົງທຶນ 500 ລ້ານ ໂດລາ ສະຫະຣັຖ. ເຂດເສຖກິດ ແຫ່ງນີ້  ຈະມີສະຖານີຣົດໄຟ ລາວ-ຈີນ 1 ແຫ່ງ ແລະຈະເປັນສະຖານີ ຖ່າຍເທສິນຄ້າ ຂນາດໃຫຍ່ ຣະຫວ່າງ ລາວ-ຈີນ.