ຕັ້ງຄະນະ ປະຕິຮູບ ຣັຖວິສາຫະກິຈ ການບິນລາວ

• ຈຳປາທອງ
  2022-08-23

ກະຊວງການເງິນ ໄດ້ປະກາດການ​ຈັດຕັ້ງ ຄະນະປະຕິຮູບຣັ​ຖວິສາຫະກິຈ ການ​ບິນ​ລາວ ໃນນີ້ວັນທີ 18 ສິງຫານີ້ ​ຕາມຂໍ້ຕົກລົງ​ຂອງ​ນາ​ຍົກ​ຣັ​ຖ​ມົນ​ຕ​ຣີ ວ່າ ດ້ວຍ ການແຕ່ງຕັ້ງຄະນະປະຕິຮູບຣັຖວິສາຫະກິຈການບິນລາວ ວັນທີ 13 ກໍຣະກະດາທີ່​ຜ່ານ​ມາ.

ຄະນະດັ່ງກ່າວ ປະກອບດ້ວຍເຈົ້າໜ້າທີ່ທັງໝົດ 9 ຄົນ ໂດຍມີ ທ່ານ ພູທະນູເພັດ ໄຊສົມບັດ ຮອງຣັຖມົນຕຣີກະຊວງການເງິນ ເປັນຫົວໜ້າຄະນະ ແລະ ທ່ານ ປະສົງ ເມືອງມະນີ ຮອງຣັຖມົນຕຣີ ກະຊວງໂຍທາທິການ ແລະຂົນສົ່ງ ເປັນຜູ້ຮອງ, ອີງຕາມການຣາຍງານ ຂອງກະຊວງການເງິນ ໃນມື້ວັນທີ 22 ສິງຫາ​ນີ້.

ເພື່ອຂໍຮູ້ຣາຍລະອຽດ ກ່ຽວກັບການແຕ່ງຕັ້ງ ຄະ​ນະ​ປະ​ຕິ​ຮູບ​ທີ່​ວ່ານັ້ນ ວິທຍຸເອເຊັຽເສຣີ ໄດ້ຕິດຕໍ່ໄປຫາກະຊວງການເງິນ ແຕ່ເຈົ້າໜ້າທີ່ທີ່ກ່ຽວຂ້ອງ ບໍ່ສະດວກທີ່ ຈະໃຫ້ຂໍ້ມູນເພີ່ມຕື່ມໄດ້.

ແຕ່ເຖິງຢ່າງໃດກໍຕາມ ເຈົ້າໜ້າທີ່ລາວທ່ານນຶ່ງ ທີ່ຕິດຕາມເຣື່ອງນີ້ ກໍໄດ້ກ່າວຕໍ່ ວິທຍຸເອເຊັຽເສຣີ ໃນມື້ວັນທີ 23 ສິງຫານີ້ວ່າ ການປະຕິຮູບ ຣັຖວິສາຫະກິຈການບິນລາວ ໃນເທື່ອນີ້ ຈະມີການປັບປຸງ ເຣື່ອງລະບົບບຸກຄະລາກອນພາຍໃນ ເປັນຫລັກ ແລະທັງຈະແກ້ໄຂບັນຫາ ການຫລຸບທຶນ ທີ່ສະສົມ​ມາເປັນເວລາຫລາຍປີ.

“ປະຕິຮູບກະຢູ່ໃນລະບົບເກົ່າ ຕ່າງແຕ່ວ່າ ຈັດສັນບຸກຄະລາກອນແນວໃດ. ຊິເຮັດ ແນວໃດ ຊິມີການຮ່ວມມືແນວໃດຫັ້ນນ່າ. ມີການຫລຸບທຶນອີ່ຫຍັງຕ່າງໆຫັ້ນແຫລະ ຂ້ອຍຄິດວ່າໃນລະບົບ ຂອງເພິ່ນນນີ້ ຕ້ອງດີຂຶ້ນກວ່າເກົ່າຫັ້ນແຫລະ ເພາະວ່າຈັດສັນ ເຣື່ອງບຸກຄະລາກອນ. ຊິເອົາບຸກຄົນມີຄວາມສາມາດ ແນວໃດ ດ້ານການພົວພັນສາກົລ ດ້ານການບໍຣິການ ອີ່ສັງຕ່າງໆ.”

ກ່ຽວ​ກັບເຣື່ອງການປະຕິຮູບ ຣັຖວິສາຫະກິຈການບິນລາວນີ້ ປະ​ຊາ​ຊົນລາວຜູ້ນຶ່ງ ເວົ້າວ່າ ຊາວລາວຫລາຍຄົນເຫັນວ່າ ຄວນມີການປະຕິຮູບ ມາຕັ້ງແຕ່ດົນແລ້ວ ເພື່ອປັບປຸງດ້ານການບໍຣິຫານ ແລະການໃຫ້ບໍຣິການ ຍ້ອນ ໃນໄລຍະຜ່ານມາ ຣັຖວິສາຫະກິຈການບິນລາວ ປະສົບບັນຫາຫລຸບທຶນ ຄືກັນກັບຫລາຍຣັຖວິສາ ຫະກິດອື່ນໆ.

“ປະຕິຮູບໃຫຍ່. ມັນກະໜ້າຈະດີກວ່າເກົ່າຫັ້ນແຫລະ. ຜ່ານມາມັນ ມີການຮົ່ວໄຫລ ຂອງເງິນທຶນຫລາຍຫັ້ນນ່າ ເພາະວ່າຜ່ານມາ ມັນຈະແມ່ນຣັຖ ເຂົ້າມາຖືຮຸ້ນເປັນສ່ວນໃຫຍ່ ຫັ້ນນ່າ ບາດນີ້ລະມັນຢາກມີການສວຍໂອກາດຫລາຍຫັ້ນນ່າ.”

​ຜູ້ປະກອບການ ຮັບຈ່ອງປີ້ເຮືອບິນທ່ານນຶ່ງ ກໍ​ເວົ້າຕໍ່ວິທຍຸເອເຊັຽເສຣີໃນມື້ ດຽວກັນນີ້ ກ່ຽວກັບການປະຕິຮູບ ຣັຖວິສາຫະກິຈການບິນລາວວ່າ ທ່ານເອງກໍບໍ່ສາມາດ ໃຫ້ຄວາມເຫັນຢ່າງກົງໄປກົງມາໄດ້, ແຕ່ເວົ້າໄດ້ພຽງແຕ່ວ່າ ນັບຕັ້ງແຕ່ເກີດການຣະບາດ ຂອງໂຄວິດ-19 ມາຮອດມື້ນີ້ ລູກຄ້າທີ່ຈ່ອງປີ້ເຮືອບິນ ຂອງ ສາຍການບິນລາວ ເພື່ອເດີນທາງຈາກລາວໄປຕ່າງປະເທດ ເປັນຕົ້ນໄປບາງກອກ, ປະເທດໄທຍ ແມ່ນມີໜ້ອຍ ຊຶ່ງໃນ​ນັ້ນ​​ສ່ວນ​ໃຫ​ຍ່ກໍ​ມີ​ແຕ່​ຄົນ​ລາວ, ຄົນ​ໄທ​ຍ, ສ່ວນ​ຄົນ​ປະ​ເທດ​ອື່ນໆ​ ບໍ່​ຄ່ອຍ​ມີ​ຫລາຍ.

“ໂຕນີ້ຂ້ອຍກະບໍ່ແນ່ຄືກັນໄດ໋ ເພາະວ່າໂຕຍີ້ມັນຂຶ້ນກັບຂອງການບິນລາວເນາະ. ໄປຕ່າງປະເທດສ່ວນຫລາຍ ກະມີແຕ່ຄົນລາວກັບຄົນໄທຍຫັ້ນແຫລະ, ແຕ່ວ່າຄົນປະເທດອື່ນໆຢູໂຣບ ແຖວຢູໂຣບ ບໍ່ຄ່ອຍມີຫລາຍເທື່ອ ເຂົາເຈົ້າມາທາງຣົຖນ່າ ບ່ອນມັນຫລາຍກວ່າໝູ່.”

ໃນຂະນະດຽວກັນ ຜູ້ປະກອບການຮັບຈ່ອງປີ້ເຮືອບິນ ອີກນາງນຶ່ງ ກໍເຫັນວ່າ ຄວນມີ​ການປະຕິຮູບຣັຖວິສາຫະກິຈ ການບິນລາວ ເພື່ອປັບປຸງດ້ານການໃຫ້ບໍຣິການ ຍ້ອນປັດຈຸບັນ ນັກທ່ອງທ່ຽວ ຕ່າງປະເທດ ແລະຄົນລາວຂີ່ເຮືອບິນ ຂອງສາຍການບິນລາວ ໜ້ອຍລົງ ຊຶ່ງສາເຫດນຶ່ງ ກໍເປັນຍ້ອນລາຄາປີ້ເຮືອບິນ ໄປຕ່າງປະເທດ ຂອງສາຍການບິນລາວ ຂ້ອນຂ້າງແພງກວ່າ ສາຍການບິນຄູ່ແຂ່ງ ຂອງປະເທດໃກ້ຄຽງ.

“ການບິນລາວລາຄາເຣີ່ມຕົ້ນ ມັນຈະແພງກວ່າສາຍການບິນອື່ນ. ແພງກວ່າ Thai Smile, Air Asia. ມີຍົນບິນ ແຕ່ວ່າແຂກເຮົາເດີນທາງ ຈະບໍ່ຫລາຍ. ເສັ້ນທາງຕ່າງປະເທດ ຈະບໍ່ຄ່ອຍຫລາຍປານໃດ.”

ກ່ຽວ​ກັບ​ເຣື່ອງ​ທີ່​ວ່ານີ້ ນັກວິຊາການດ້ານ ການທ່ອງທ່ຽວຢູ່ປະເທດໄທຍ ນາງນຶ່ງ ເວົ້າວ່າ ການຈັດຕັ້ງຄະນະປະຕິຮູບ ຣັຖວິສາຫະກິຈການບິນລາວ ສະແດງໃຫ້ ເຫັນວ່າ ໃນໄລຍະທີ່ຜ່ານມາ ການບໍຣິການພາຍໃນ ຂອງຣັຖວິສາຫະກິຈການບິນລາວ ອາຈຍັງຂາດຄວາມເປັນມືອາຊີບ ຫລືອາຈບໍຣິຫານແບບລະບົບໃຊ້ເສັ້ນສາຍ, ຄວນຈະຕ້ອງໄດ້ແກ້ໄຂ ບັນຫາເຫລົ່ານັ້ນໃຫ້ໝົດໄປ ເພື່ອຍົກລະດັບ ໃຫ້ທຽບເທົ່າ​ກັບສາຍການບິນສາກົລອື່ນໆ.

“ມັນເກີດຄໍາຖາມວ່່າ ທີ່ຜ່ານມາ ຜູ້ບໍຣິຫານຈັດການ ມີຄວາມເປັນມືອາຊີບແທ້ບໍ່? ຫລືເອົາຜູ້ທີ່ບໍຣິຫານແບບບໍ່ຈິງຈັງ ມາບໍຣິຫານ ຊຶ່ງຂ້າພະເຈົ້າຄິດວ່າ ຈະຕ້ອງມີຄວາມເປັນມືອາຊີບແທ້. ເຣື່ອງການບໍຣິການລູກຄ້າອີ່ຫຍັງຕ່າງໆ ກໍຕ້ອງດີ. ຫາກວ່າທາງອົງການໃດກໍຕາມ ບໍ່ຄັດເລືອກເອົາຜູ້ທີ່ມີຄຸນນະພາບມາເຮັດວຽກ ຫລືຍັງໃຊ້ລະບົບເສັ້ນສາຍ ແລະເອົາຄົນໃນຄອບຄົວມາເຮັດວຽກ ກໍມີໂອກາດທີ່​ຈະລົ້ມເຫລວໃນອະນາຄົຕ.”

ໃນໂອກາດການແຕ່ງຕັ້ງ ຄະນະປະຕິຮູບຣັຖວິສາຫະກິຈ ການບິນລາວນີ້ ທ່ານ ບຸນໂຈມ ອຸບົນປະເສີດ ຣັຖມົນຕຣີ ກະຊວງການເງິນ ໄດ້ກ່າວວ່າ ຄະນະປະຕິຮູບ ​ນີ້ຈະເຮັດວຽກທັງເປັນຄະນະປະຕິຮູບ ແລະສະພາບໍຣິຫານ ເພື່ອຄົ້ນຄວ້າກໍານົດ ທິດທາງ ແລະແຜນການ ປະຕິຮູບຮອບດ້ານ ແລະຮັບປະກັນໃຫ້ແຜນການດັ່ງກ່າວ ຖືກຈັດຕັ້ງປະຕິບັດສໍາເຣັດ ຕາມແຜນການ, ອີງຕາມການຣາຍງານຂອງ ກະຊວງການເງິນ.

ການປະຕິຮູບ ຣັຖວິສາຫະກິຈ ຕ່າງໆຂອງ​ລາວ ເຣີ່ມມີຂຶ້ນພາຍຫລັງ​ທີ່ ທ່ານ ພັນຄໍາ ວິພາວັນ ນາຍົກຣັຖມົນຕຣີ ​ໄດ້ກ່າວຕໍ່ກອງປະຊຸມ ສມັຍສາມັນເທື່ອທີ 3 ຂອງສະພາແຫ່ງຊາຕ ຊຸດທີ 9 ເມື່ອເດືອນມິຖຸນາ ທີ່ຜ່ານມາວ່າ ຣັຖວິສາຫະກິຈຫລາຍແຫ່ງ ປະສົບກັບບັນຫາຫລຸບທຶນ ທີ່ແກ່ຍາວ​ມາຫລາຍປີ ຍ້ອນມີການບໍຣິຫານ ທີ່​ມີລັກສະນະເຄືອຍາດ.

ດັ່ງທີ່ທ່ານກ່າວຕອນນຶ່ງວ່າ:

“ຣັຖວິ ສາຫະກິຈ ຮ້ອຍສ່ວນຮ້ອຍ ຍາກຈະມີກໍາໄລ ເພາະວ່າເຮົາເກື້ອກູນຫລາຍ ເຮັດບໍຣິສັດອັນໃດ ກະຄືເດ໋. ຊິມີ ເງິນມີຄໍາ ກະແມ່ນລູກຜູ້ນັ້ນຫລານຜູ້ນີ້ ລູກຕົວເອງ ເມັຽຕົວເອງ.  ເອົາເຂົ້າໝົດຫັ້ນແຫລະແລ້ວຈັ່ງໄປເອົາຜູ້ອື່ນ. ໄປກວດເບິ່ງແມ້ ຄັນບໍ່ເຊື່ອຄວາມຂ້າພະເຈົ້າ. ອັນນີ້ກໍແມ່ນຣັຖບານເຮົາປ່ອຍປະລະເລີຍ.”

ແຕ່ກະຊວງການເງິນ ບໍ່ໄດ້​ຣາຍງານ ຫລືເປີດເຜີຍຂໍ້ມູນວ່າ ຣັຖວິສາຫະກິຈການບິນລາວ ໄດ້ຫລຸບທຶນທີ່ສະສົມ​ມາ​ດົນ​ນັ້ນ ຈໍານວນເທົ່າໃດກັນແທ້ ມີແຕ່ຣາຍງານວ່າ ໃນປີທີ່ຜ່ານມາ ຫລາຍຣັຖວິສາຫະກິຈໃນລາວ ປະສົບບັນຫາຫລຸບ ທຶນສະສົມຫລາຍປີ ແລະໄດ້ສ້າງພາຣະໃຫ້ຣັຖບານ ທີ່ຈະຕ້ອງໄດ້ປະຕິຮູບໃຫ້ ເປັນມືອາຊີບ.