ຄົນຈີນ ກັບບັນຫາ ອາຊຍາກັມ ໃນລາວ

ນັບ​ແຕ່ປະ​ເທດ​ລາວ ໄດ້​ເປີດ​ກວ້າງ​ການຮ່ວມ​ມື​ ການລົງ​ທຶນ​ກັບຈີນ ນັ້ນ​ກໍ​ເຮັດ​ໃຫ້ການ​ລົງ​ທຶນຂອງ​ຈີນເປັນ​ອັນ​ດັບ​ທີ 1 ຢູ່​ໃນ​ປະ​ເທດ, ແຕ່ ໃນ​ຂະ​ນະ​ດຽວ​ກັນ ບັນ​ຫາ​ອາ​ຊ​ຍາ​ກັມ ທີ່​ກ່ຽວ​ຂ້ອງ​ກັບ​ຄົນ​ຈີນ ກໍເກີດ​ຂຶ້ນ​ຫຼາຍ. ອາ​ຊ​ຍາ​ກັມ​ດັ່ງ​ກ່າວ ຈ​ະ​ມາ​ໃນ​ຮູບ​ແບບ ການຈັບ​ຄົນ​ຮຽກ​ຄ່າ​ໄຖ່, ການ​ທວງ​ໜີ້, ການ​ອູ້ມຂ້າ ອຳ​ພາງ​ຄະ​ດີ ແລະ ການ​ຄາ​ຕ​ກັມ ອື່ນໆ ກໍ​ເກີດ​ຂຶ້ນ​ຢູ່​ໃນ​ປະ​ເທດ​ລາວ. ຄົນ​ຈີນ​ເຂົ້າ​ມາ​ຢູ່​ໃນ​ລາວ ມີ​ການ​ດຳ​ເນີນ​ທຸ​ຣະ​ກິ​ຈ ທີ່​ຖືກກົດ​ໝາຍ ແລະ ຜິດ​ກົດ​ໝາຍ ເຊິ່ງ​ໄດ້​ພົວ​ພັນ ກັບເຈົ້າ​ໜ້າ​ຢູ່​ໃນ​ເຄື່ອງ​ແບບ ຈຳ​ນວນ​ນຶ່ງ​.    

ບຸກ​ຄົນ​ທີ່​ໃຊ້​ຊິດ​ເຈົ້າ​ໜ້າ​ທີ່ ​ຕຳ​ຣວດ ທ່ານ​ນຶ່ງ ທີ່​ບໍ່​ປະ​ສົງ​ອອກ​ຊື່ ແລະ ສຽງ ໄດ້​ກ່າວ​ຕໍ່​ວິທຍຸ ເອ​ເຊັຽ​ເສ​ຣີ​ວ່າ “ຢູ່​ປະ​ເທດ​ລາວ ປັດ​ຈຸ​ບັນ​ນີ້ ມີ​ເຈົ້າ​ໜ້າ​ທີ່ ລະ​ດັບ​ນາຍ​ພົນ, ນາຍ​ພັນ ເຂົ້າ​ມາ​ພົວ​ພັນ ເຣື່ອງສິ່ງຜິດ​ກົ​ດ​ໝາຍ ​ກັບ​ກຸ່ມ​ມາ​ເຟັຽ​ຈີນ​ຫຼາຍ ໂດຍ ໄດ້​ຮັບ​ຄ່າ​ຈ້າງ ຈາກ​ກຸ່ມ​ຄົນ​ຈີນເພື່ອ​ ມາ​ທວງ​ໜີ້ ນຳ​ຄົນ​ຈີນ​ນຳ​ກັນ ຫຼື ຈັບ​ຄົນ​ຈີນ​ຮຽກ​ຄ່າ​ໄຖ່.”

ນຶ່ງ​ໃນ​ສາ​ເຫດ​ ຂອງ​ບັນ​ຫານີ້ ກໍ​ຄື ທາງ​ການ​ລາວ ເປີດ​ໃຫ້​ຄົນ​ຈີນ​ເຂົ້າ​ມາ​ຫຼາຍ ແລະ ຄວບ​ຄຸມ​ໄດ້​ຍາກ.

ພະ​ນັກ​ງານ​ບຳ​ນານທ່ານ​ນຶ່ງ ທີ່ໄດ້​ກ່າວ​ຕໍ່ວິທຍຸ ​ເອ​ເຊັຽ​ເສ​ຣີ ວ່າ “ຣັ​ຖ​ບານເປີດ​ໃຫ້​ຄົນ​ຈີນ ​ເຂົ້າ​ມາ​ຫຼາຍ​ຈົນ​ເກີນ​ໄປ ແລະ ບໍ່​ສາ​ມາດ​ຄວບ​ຄຸມ​ໄດ້. ເຂົ້າ​ມາແລ້ວ​ກໍ​ ມາ​ຍາດ​ໂຄງ​ການ​ກັນ ແລະ ຄົນ​ຈີນ​ຈຳ​ນວນ​ນຶ່ງ ກໍໜີ​ຄະ​ດີຈາກ​ປະ​ເທດຈີນ ມາ​ລີ້​ຢູ່​ປະ​ເທດ​ລາວ.”

ນອກ​ຈາກ​ນີ້, ບຸກ​ຄົນ​ທີ່​ໃກ້​ຊິດ​ເຈົ້າ​ໜ້າ​ທີ່ ​ຕຳ​ຣວດ​ລະ​ດັບ​ສູງ ອີກ​ທ່ານ​ນຶ່ງ ໄດ້​ກ່າວ​ຕໍ່ວິທຍຸ ​ເອ​ເຊັຽ​ເສ​ຣີ ວ່າ:

“ມາ​ເຟັຽຈີນ​ຢູ່​ເມືອງ​ລາວ ພິ​ເລິກ ບັນ​ຫານີ້ ຊິ​ເຮັດ​ແນວ​ໃດ ມັນ​ບໍ່​ແມ່ນ​ຮົ້ງກົງ ມັນ​ບໍ່​ແມ່ນ​ມາ​ເກົາ ແຕ່ວ່າ ມັນ​ຢາກ​ກາຍ​ຮົ້ງ​ກົງ ກາຍ​ມາ​ເກົາ​ລະ​ໄດ໋.” 

ບັນ​ຫາ​ອາ​ຊ​ຍາ​ກັມ ​ທີ່​ເກີດ​ຂຶ້​ນ​ໃນ​ປີນີ້:

• ກໍ​ລະ​ນີທີ 1 ເປັນ ​ຄະ​ດີ​ສະ​ເທືອນ​ຂ​ວັນ​ເກີດ​ຂຶ້ນ, ມີ​ການ​ອູ້ມ​ຂ້າ ຄົນ​ຈີນ​ສອງ​ຄົນ ຢູ່​ນະ​ຄອນ​ຫລວງວຽງ​ຈັນ ເດືອນມີ​ນາ 2022 ທີ່​ຜ່ານ​ມາ ໂດຍ ມີ​ຄົນຈີນ​ ຮ່ວມ​ຂະ​ບວນ​ການ 4 ຄົນ ແລະ ຄົນ​ລາວ 13 ຄົນ ຮ່ວມ​ກັນໄປ​ອູ້ມ​ຂ້າ ຄົນຈີນອີກ 2 ຄົນ, ແລ້ວເອົາ​ໄປ​ຝັງ​​ດິນ ເຊິ່ງ​ຄະ​ດີ​ດັ່ງ​ກ່າວ ມີ​ເຈົ້າ​ໜ້າ​ທີ່ ​ຢູ່​ໃນ​ເຄື່ອງ​ແບບ​ເຂົ້າ​ໄປ​ພົວ​ພັນ.

ບຸກ​ຄົນ​ທີ່​ໃກ້​ຊິດ ​ເຈົ້າ​ໜ້າ​ທີ່​ຕຳ​ຣວດ ໄດ້​ກ່າ​ວ່າ:

“ຄົນ​ຈີນ​ຂັດ​ຜົ​ລ​ປ​ໂຍດ​ກັນ ແລ້ວມາ​ຈ້າງ​ຄົນ​ລາວ ໄປອູ້ມ​ຄົນ​ຈີນ 2 ຄົນ ແລ້ວ ຫຼັງ​ຈາກ​ນັ້ນ ກໍ​ຄາຕ​ກັມ. ຄົນ​ຈີນ​ທີ່​ເສັຽ​ຊີ​ວິຕ ເປັນ​ລູກ​ເຈົ້າ​ໜ້າ ​ທີ່​ຂັ້ນ​ສູງ​ຂອງ​ຈີນ ແລ້ວເຈົ້າ​ໜ້າ​ທີ່​ ຕຳ​ຣວດ​ມາ​ຈັບໄດ້​ທັງ​ໝົດ ຜູ້​ຮ່ວມ​ຂບວນ​ການ 13 ຄົນ.”

• ກໍ​ລະ​ນີທີ 2 ໃນວັນທີ 15 ກັນຍາ ທີ່ຜ່ານມາ, ມີຊາວບ້ານ ບ້ານທາດ ເມືອງໂພນໂຮງ ແຂວງວຽງຈັນ ພົບເຫັນຊາກສົບ ຄົນເສັຽຊີວິຕ ບັນຈຸໃສ່ໃນເປົ໋າ ຖິ້ມລົງເຂດເຂື່ອນໄຟຟ້າ ນໍ້າລີກ 1 ເຂດບ້ານຂາມ ເມືອງໂພນໂຮງ, ຫລັງຈາກນັ້ນ ຊາວບ້ານໄດ້ແຈ້ງ ເຈົ້າໜ້າທີ່ຕຳຣວດ ວິຊາສະເພາະ ປກສ ແຂວງວຽງຈັນ ສົມທົບກັບເຈົ້າໜ້າທີ່ ຕຳຣວດ ນິຕິວິທຍາ ປກສ ເມືອງໂພນໂຮງ ລົງຊັນນະສູຕຊາກສົບ ແລະ ສະຖານທີ່ເກີດເຫດ ຈຶ່ງຮູ້ວ່າ ຊາກສົບຜູ້ເສັຽຊີວິຕ ຊື່ ທ້າວ ຕູຫາຍຢ໋າງ ອາຍຸ 37 ປີ ເຊື້ອຊາຕ ແລະສັນຊາຕຈີນ ເຊິ່ງຜູ້ກ່ຽວມາດຳເນີນທຸຣະກິຈ ຢູ່ໂຮງງານຫລອມເຫລັກ ຕັ້ງຢູ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫລວງວຽງຈັນ. ສ່ວນສາເຫດໂຕຈິງ ທີ່ນັກທຸຣກິຈຈີນ ຖືກພົບເປັນສົບນັ້ນ ຍັງຢູ່ໃນຂັ້ນຕອນ ສືບສວນ-ສອບສວນ.
• ກໍ​ລະ​ນີ​ທີ 3 ເຈົ້າໜ້າທີ່ ໜ່ວຍຮັກສາຄວາມສງົບ ຕາມລໍາແມ່ນໍ້າຂອງ ແຂວງນະຄອນພະນົມ ຂອງໄທຍ ໄດ້ພົບສົບແມ່ຍິງລາວຜູ້ນຶ່ງ ຢູ່ໃນກະເປົ໋າເດີນທາງ ທີ່ໄຫລໄປທາງຝັ່ງໄທຍ ໃນມື້ວັນທີ 29 ກັນຍາ 2022 ຊຶ່ງຕໍ່ມາຮູ້ວ່າ ເປັນສົບຂອງນາງ ວິພາພອນ ກອນສີ ປະທານ ບໍຣິສັດ ລາວວີໄອພີ ພັທນາການລົງທຶນ ຈໍາກັດຜູ້ດຽວ. ເຟສບຸກສ່ວນໂຕ ຂອງນາງ ວິພາພອນ ກອນສີ ນັກທຸຣະກິຈລາວ ທີ່ຖືກຄາຕກັມ ຊຶ່ງໃສ່ຊື່ວ່າ ລີ ຈຸນ ວີພີ (Lì Jūn Vp) ໄດ້ຂຽນໄວ້ວ່າ ນາງເປັນນັກທຸຣະກິຈ ຜູ້ນຶ່ງທີ່ມີຊື່ສຽງໃນລາວ, ມີໜັງສືເດີນທາງ (ຜ່ານແດນ) ຫລືPassport  2 ຫົວ ຄືຂອງ ສປປ ລາວ ແລະຂອງຈີນ.
• ກໍ​ລະ​ນີ ທີ 4 ກໍ​ແມ່ນ ຄົນ​ງານ​ລາວ​ຫຼາຍ​ຄົນ ຖືກ​ຕົວະ​ໄປ​ເຮັດ​ວຽກຕອບ​ແຊັດ ຢູ່​ເຂດ​ເສ​ຖ​ກິ​ຈ​ພິ​ເສດສາມ​ຫລ່ຽມ​ຄຳ ໂດຍ ນາຍ​ຈ້າງຈີນບອກວ່າ ຈະ​ໃຫ້​ເງິນ​ເດືອນ ແລະ ຄ່າ​ຕອບ​ແທນ​ສູງ, ແຕ່ ເມື່ອ​ໄປ​ແລ້ວ ກໍ​ບໍ່​ເປັນ​ຢ່າງ​ທີ່​ເວົ້າ​ກັນ ຫຼາຍ​ຄົນເຮັດ​ວຽກ​ເກີນ​ໂມງ ບໍ່​ໄດ້​ຄ່າ​ຈ້າງ ຕົກ​ເປັນ​ໜີ້ເປັນ​ສິນ. ນາຍ​ຈ້າງ​ຈີນບໍ່​ອະ​ນຸ​ຍາດ​ ໃຫ້​ຄົນ​ງານ​ລາວ​ກັບ​ບ້ານ ແຕ່​ຖ້າ​ຈະ​ກັບ​ບ້ານ ຈະ​ຕ້ອງ​ໄດ້​ຈ່າຍ​ເງິນ​ຄືນ​ໃຫ້ນາຍ​ຈ້າງຄົນ​ຈີນ ຫຼາຍ​ສິບ​ລ້ານ​ກີບ, ​ພະ​ນັກ​ງານ​ຍິງບາງ​ຄົນ ​ກໍ​ຖືກນາຍ​ຈ້າງ​ຈີນບັງໃຫ້​ຂາຍ​ບໍ​ຣິ​ການ ​ທາງ​ເພດ ແລະ ພະ​ນັກ​ງານ​ບາງ​ຄົນຖືກ ​ທຳ​ຮ້າຍ​ຮ່າງ​ກາຍ​ກໍ​ມີ.

ຄົນ​ງານ​ຄົນ​ນຶ່ງ ຜູ້​ທີ່​ສາ​ມາດ​ໜີ​ອອກ ​ຈາກ​ເຂດ​ເສ​ຖ​ກິ​ຈ​ພິ​ເສດ​ສາມ​ຫຼ່ຽມ​ຄຳ ໄດ້​ໃຫ້​ສັມ​ພາດ​ຕໍ່ວິທຍຸ ​ເອ​ເຊັຽ​ເສ​ຣີ​ ວ່າ:

“ລະ​ບາດນີ້ ເຮົາ​ໄປ​ແລ້ວ​ປະ​ມານ​ອາ​ທິດ​ແລກ ເຮົາ​ແຊັດ​ຫາ​ໃຜ​ບໍ່​ໄດ້​ເລີຍ ແຈ້ງ​ຫາ​ກະ​ຄື​ວ່າ ບໍ​ຣິ​ສັດ​ທີ່​ຢູ່​ຊັງ​ຈຽງ​ນີ້ ຖື​ວ່າ ແຊັດ​ຫາ​ໄດ້​ແຕ່​ຜູ້​ດຽວ ແລະ ເຮົາ​ກະ​ບອກວ່າ ໃຫ້​ຢູ່.”

ນັກ​ຂ່າວ: ທຳ​ອິດ​ເຂົາ​ໄດ້​ເວົ້າ​ກັບ​ເຈົ້າ​ບໍ່​ວ່າ ທຸກ​ຢ່າງ ແມ່ນ​ຄ່າ​ໃຊ້​ຈ່າຍ ບໍ​ຣິ​ສັດ ຮັບ​ຜິດ​ຊອບ​ໝົດ?

ຄົນ​ງານ​ລາວ: “ເຂົາ​ເຈົ້າ​ເປັນ​ຄົນ​ເວົ້າ​ວ່າ ຟຣີ​ໝົດ​ທຸກ​ຢ່າງ ເຮົາ​ກະ​ຖາມ​ຢ້ຳ​ອີກ​ເທື່ອ​ນຶ່ງວ່າ ແມ່ນ​ເຮົາ​ບໍ່​ໄດ້​ເຮັດ​ວຽກ​ໃຊ້​ໜີ້ແມ່ນບໍ່, ເຂົາ​ເຈົ້າ​ກະ​ວ່າບໍ່ ທຸກ​ຢ່າງ​ຄື ບໍ​ຣິ​ສັດ​ອອກ​ໃຫ້​ເອງ​ ຟຣີໝົດ.”

ນັກ​ຂ່າວ: ຕອນ​ໃດ ທີ່​ໄປ​ສ​ມັກ​ນີ້?

ຄົນ​ງານ​ລາວ: “ປະ​ມານ​ເດືອນ 2 ນີ້​ລະ​ອ້າຍ. ວັນ​ທີ 10 ນີ້​ລະ ໄປ​ສ​ມັກ​ລະ ລະ​ວັນ​ທີ 16 ເດືອນ​ທາງ​ໄປ.”

ນັກ​ຂ່າວ: ໄດ້​ລົມ​ກັນ​ບໍ່​ວ່າ ເງິນ​ເດືອນ​ທໍ່​ໃດ? ການ​ເຮັດ​ວຽກ​ຈັກ​ໂມງ​ຫາ​ຈັກ​ໂມງ? ໄດ້​ລົງ​ຣາຍ​ລະ​ອຽດ​ກັນ​ບໍ່?

ຄົນ​ງານ​ລາວ: “ກະ​ຄື​ມີ​ແຕ່​ລົມ​ກັນ​ທາງວອດ​ແອບ ບໍ່​ໄດ້​ລົງ​ລາຍ​ລະ​ອຽດ​ຫຍັງ​ເລີຍ ມີ​ແຕ່​ລົມ​ກັນ​ທາງວອດ​ແອບ ​ລະ​ກະໂທ​ລົມ​ແດ່. ເບື້ອງ​ຕົ້ນ​ເຂົາ​ເວົ້າ​ວ່າ ເຮັດ​ວຽກ​ນີ້ ໄດ້ 12 ຊົ່ວ​ໂມງ, ເງິນ​ເດືອນ 4,000 ຢວນ ປະ​ມານ 7 ລ້ານ ​ກີບ.”

ນັກ​ຂ່າວ: ຄ່າ​ໃຊ້​ຈ່າຍນີ້ ເຂົາ​ບອກບໍ່​ວ່າ ມັນ​ມີ​ຄ່າ​ໃຊ້​ຈ່າຍ​ຫຍັງ​ແດ່ ໃນ​ເວ​ລາ​ທີ່​ໄປ​ຮອດ​ລະ?

ຄົນ​ງານ​ລາວ: “ທຸກ​ຢ່າງ​ເລີຍ​ອ້າຍ ຕັ້ງ​ແຕ່​ຄ່າ​ນ້ຳ​ຄ່າ​ໄຟ ເຂົາ​ໄລ່​ໝົດ​ເລີ​ຍ ທີ່​ເປັນ​ຂອງ​ເຂົາ ເຂົາ​ໄລ່​ໝົດ​ເລີຍ ເຮົາ​ກິ​ນ​ເຂົ້າ ເຂົາ​ກະ​ເອົາ ເຮົາ​ໃຊ້​ຫຍັງ​ເຂົາ​ກະ​ເອົາ​ນຳ.”

ນັກ​ຂ່າວ: ຕົກ​ເປັນ​ມື້​ນຶ່ງ​ເທົ່າ​ໃດ ຄ່າ​ໃຊ້​ຈ່າຍ?

ຄົນ​ງານ​ລາວ: “ໂຕນີ້ ເຮົາ​ໄດ້​ຂໍ​ຣາ​ຍ​ລະ​ອຽດ​ ໄປ​ນຳ​ຜູ້​ທີ່​ເກັບ​ເງິນ​ນຳ​ເຮົາ​ແລ້ວ ຄ້າຍໆ​ແບບ​ລາວ ເວົ້າ​ອອກ​ມາ​ຊື່ໆ ຫັ້ນ​ນ່າ, ແຕ່​ວ່າ ເຮົາ​ຂໍ​ຣາຍ​ລະ​ອຽດ​ເອີ ຄ່ານີ້​ທໍ່​ໃດ ເປັນ​ບິນ​ຫັ້ນ​ນ່າ ເປັນ​ລາຍ​ລັກ​ອັກ​ສອນ​ຫັ້ນ​ນ່າ ເຂົາ​ກະ​ບໍ່​ເຮັດ​ໃຫ້​ເຮົາ.”

ນັກ​ຂ່າວ: ສັນ​ຍົງ​ສັນ​ຍາ ແຮງ​ງານ​ທີ່ ເຮົາ​ໄດ້​ເຊັນ​ກັບ​ເຂົາ​ເດ້?

ຄົນ​ງານ​ລາວ: “ແມ່ນ​ມັນ​ຄາດ​ເຄື່ອນ​ ຈາກ​ທີ່​ຕົກ​ລົງ​ກັນ​ໄວ້​ກ່ອນ​ທີ່​ເຮົາ​ຈະ​ໄປ ມັນ​ຄາດ​ເຄື່ອນ​ຫຼາຍ ມັນ​ຕ່າງ​ກັນ​ແບບ​ຄື​ພິກ​ມື​ ເລີຍ​ອ້າຍ ລະ​ນາ​ທີ​ນັ້ນ​ຄື​ປະ​ຕິ​ເສດບໍ່​ໄດ້. ປະ​ຕິ​ເສດ​ຄື​ຈ່າຍ​ເງິນ​ຢ່າງ​ດຽວ.”

ນັກ​ຂ່າວ: ໃນ​ສ່ວນ​ຂອງ​ເຈົ້າ ​ຕົກ​ເປັນ​ໜີ້​ທໍ່​ໃດ?

ຄົນ​ງານ​ລາວ: “15,000 ຢວນ. ທຸກ​ຄົນ​ໄປ ຈະ​ເປັນ​ໜີ້​ໝົດ​ເລີຍ. ໄປ​ຄາ​ຊິ​ໂນ ແມ່ນ​ເປັນ​ໜີ້​ເລີຍ.”

ນັກ​ຂ່າວ: ເຮັດ​ໄດ້​ດົນ​ປານ​ໃດ?

ຄົນ​ງານ​ລາວ: “ຂອງ​ເຮົາ​ຫັ້ນ ແມ່ນ 2 ອາ​ທິດ. ຄວາມ​ຮູ້​ສຶກວ່າ ເຮົາ​ຖືກ​ຕົວະ​ລະ. ບໍ່​ໄດ້​ລະ ນອນ​ກະ​ບໍ່​ໄດ້​ນອນ​ລະ. ເຂົາ​ລົມ​ນຳ​ເຮົາ​ເນ​າະ 12 ຊົ່ວ​ໂມງ​ເຮັດ​ວຽກ ແຕ່​ທີ່​ໄລ່ໆ​ນີ້ ມັນ​ບໍ່​ແມ່ນ. ມັນ​ກາຍ 12 ຊົ່ວ​ໂມງ ມັນ 14-15 ຊົ່ວ​ໂມງ. ລະ​ມັນ​ຍາກ​ບ່ອນ​ໄປ​ໃສ​ກະ​ບໍ່​ໄດ້ ເຮັດ​ຫຍັງ​ແບບ​ຊີ​ວິຕ ​ຂອງ​ຕົວ​ເອງບໍ່​ມີ​ເລີຍ. ຄື​ຖືກ​ຄວບ​ຄຸມ​ ໂດຍ​ເຂົາ​ເຈົ້າ​ເລີຍ​ຫັ້ນ​ນ່າ.”

ປະ​ເທດ​ລາວ ເອົາ​ໂຕ​ແບບ​ການ​ພັ​ທ​ນາ ​ເສ​ຖ​ກິ​ຈ​ຂອງ​ຈີນ​ ເປັນ​ຕົ້ນ​ແບບ ແລະ ເປີດ​ໃຫ້​ນັກ​ລົງ​ທຶນ​ຈີນ ​ເຂົ້າ​ມາ​ໃນ​ລາວ​ຫຼາຍ.

ທ່ານ ສົມ​ສະ​ຫວາດ ເລັ່ງ​ສະ​ຫວັດ ອະດີຕ​ຮອງ​ນາ​ຍົກ​ຣັ​ຖ​ມົນ​ຕ​ຣີ ເປັນຜູ້​ທີ່ມີ​ບົດ​ບາດ ແລະ ເປັນ​ບຸກ​ຄົນ​ຫຼັກ ໃນ​ການ​ນຳ​ເອົາ​ນັກ​ລົງ​ທຶນ​ຈີນ ​ເຂົ້າ​ມາ​ໃນ​ປະ​ເທດ​ລາວ.

ໃນ​ວັນ​ທີ 11 ກັນຍາ 2022 ທີ່​ຜ່ານ​ມາ, ທ່ານ ສົມ​ສະ​ຫວາດ ເລັ່ງ​ສະ​ຫວັດ ໄດ້​ໃຫ້​ສັມ​ພາດ​ຕໍ່ນັກ​ຂ່າວ ວິ​ທະ​ຍຸ ໂທ​ລະ​ພາບ ສູນ​ກາງ​ຈີນ ຫຼື CMG ໃນ​ຮູບ​ແບບ ໂຄ​ສະ​ນາ​ໃຫ້ປະ​ເທດ​ຈີນ ຕອນ​ນຶ່ງ ວ່າ:  

“ແຕ່​ວ່າ ມາ​ເບິ່ງ​ແລ້ວ ມີ​ກາ​ນ​ພັ​ທ​ນາ​ກ້າວ​ໄປ​ເລື້ອຍໆ ສະ​ເພາະ 10 ປີ ຫຼັງ​ມານີ້ ແຫ່ງ​ພັ​ທ​ນາ ອັນ​ສ​ລຸບ​ລວມ​ລະ​ແມ່ນ​ພັ​ທ​ນາ ດີ​ປານ​ໃດ​ຫັ້ນ​ນະ ແມ່ນ​ເບິ່ງ​ພື້ນ​ຖານ​ເສ​ຖ​ກິ​ຈ ຂອງ​ຈີນ​ຈົນ​ກາຍ​ເປັນ​ອັນ​ດັບ​ ທີ​ 2 ​ຂອງ​ໂລກ.”

ອີງ​ຕາມ​ຂໍ້​ມູນ​ ຈາກກະ​ຊວງ ​ແຜນ​ການ ແລະ ການ​ລົງ​ທຶນ, ​ການ​ລົງ​ທຶນ​ຂອງ​ຈີນ ​ມາ​ເປັນ​ອັນ​ດັບ​ທີ 1 ນັບ​ແຕ່ປີ 2016 ຫາ ປີ 2021:  

​      ປີ 2016 ມູນ​ຄ່າ​ການ​ລົງ​ທຶນ ​ຂອງ​ຈີນ ແມ່ນ 2.7 ຕື້​ໂດ​ລ້​າ​ຣ໌

ປີ 2017 ມູນ​ຄ່າ​ການ​ລົງ​ທຶນ ​ຂອງ​ຈີນ ແມ່ນ 170 ລ້ານ ໂດ​ລ້າ​ຣ໌

ປີ 2018 ມູນ​ຄ່າ​ການ​ລົງ​ທຶນ ​ຂອງ​ຈີນ ແມ່ນ 750 ລ້ານ​ໂຕ​ລ້​າ​ຣ໌

ປີ 2019 ມູນ​ຄ່າ​ການ​ລົງ​ທຶນ​ ຂອງ​ຈີນ ແມ່ນ 1 ຕື້​ໂດ​ລ້າ​ຣ໌

ປີ 2020 ມູນ​ຄ່າ​ການ​ລົງ​ທຶນ​ ຂອງ​ຈີນເກືອບ 2.6 ຕື້​ໂດ​ລ້າ​ຣ໌

ປີ 2021 ມູນ​ຄ່າ​ການ​ລົງ​ທຶນ​ ຂອງ​ຈີນ ແມ່ນ 1.2 ຕື້​ໂດ​ລ້າ​ຣ໌

ເຖິງ​ຢ່າງ​ໃດ​ກໍ​ຕາມ, ການ​ເຂົ້າ​ມາ​ຂອງ​ຄົນ​ຈີນ ແລະ ການ​ລົງ​ທຶນຂອງ​ຈີນ ກໍ​ນຳ​ມາ​ເຊິ່ງ​ຄວາມ​ຂັດ​ແຍ່ງ ​ທາງ​ດ້ານ​ທຸ​ຣະ​ກິຈ ແລະ ມີບັນ​ຫາ​ອາ​ຊ​ຍາ​ກັມ​ຕາ​ມ​ມາ. ບັນ​ຫາ​ອາ​ຊ​ຍາ​ກັມ ທີ່​ເກີດ​ຂຶ້ນໃນ​ປີ​​ຜ່ານ​ມາ​ເຊັ່ນ:  

• ໃນ​ວັນ​ທີ 12 ສິງ​ຫາ 2018, ທ້າວ Li Zhao Peng, ຫົວ​ໜ້າ​ສະ​ພາ​ການ​ຄ້າ​ ແຂວງ​ເຫີ ນານ ປະ​ເທດ​ຈີນ ກໍ​ຖືກ​ຄາ​ຕ​ກັມ ​ຢູ່​ບ້ານ​ພັກ ​ເມືອງ​ສີ​ໂຄດ​ຕະ​ບອງ ນະ​ຄອນ​ຫລວງວຽງ​ຈັນ.
• ໃນ​ເດືອນ​ກັນ​ຍາ 2017, ທ້າວ Su Wang Tien ນັກ​ທຸ​ຣະ​ກິ​ຈ ຈີນ​ໄຕ້​ຫວັນ ເຈົ້າ​ຂອງ​ຫ້າງ​ສັບ​ພະ​ສິນ​ຄ້າ​ສີ​ໄຄ ພ​ລ່າ​ຊ້າ ກໍ​ຖືກ​ຍິງ​ເສັຽ​ຊີ​ວິຕ ຢູ່​ນະ​ຄອນ​ຫລວງວຽງ​ຈັນ.
• ໃນ​ເດືອນ​ກໍ​ຣະ​ກະ​ດາ 2016, ນາງ Lee-Yen Tin, ທີ່​ເປັນ​ຜູ້​ຈັດ​ການ​ ຕ​ລາດ​ຊັງ​ຈຽງ ​ກໍຖືກຍິ່ງ​ເສັຽ​ຊີ​ວິຕ ຢູ່ນະ​ຄອນ​ຫລວງວຽງ​ຈັນ.