ລາວໃຊ້ງົປມານໃນຢາວັກຊິນ ປ້ອງກັນ ພຍາດ

ສປປລາວ ເປັນ ປະເທດນຶ່ງ ໃນພາກພື້ນ ທີ່ ມີອັຕຣາ ການເຕີບໂຕ ທາງ ເສຖກິດ ສູງທີ່ສຸດ ໃນ ຫລາຍປີ ຜ່ານມາ ຄື ປະມານ 8 ສ່ວນຮ້ອຍ ແຕ່ໃນ ເວລາ ດຽວກັນ ກໍຂາດເຂີນ ງົບປະມານ. ສະນັ້ນ ຈຶ່ງ ໝາຍຄວາມ ວ່າ ພະນັກງານ ພັກ-ຣັຖ ຮວມທັງ ທ່ານໝໍ ແລະ ນາງ ພຍາບານ ກໍບໍ່ໄດ້ ຮັບ ເງິນເດືອນ ເປັນ ເວລາ ຫລາຍໆ ເດືອນ ນໍາດ້ວຍ. ຕາມຣາຍງານ ຂ່າວ ທີ່ ຂຽນໂດຍ Steve Finch ຈາກ ນະຄອນ ຫລວງ ວຽງຈັນ ໃນວັນທີ 23 ມີຖຸນາ 2014.

ໃນຂະນະ ທີ່ ຣັຖບານ ລາວ ມີບັນຫາ ດ້ານ ງົບປະມານ ຢູ່ນີ້ ເຈົ້າໜ້າທີ່ ຕ່າງປະເທດ ທີ່ ຊ່ວຍເຫລືອ ເປັນຫ່ວງວ່າ ຣັຖບານ ລາວ ຈະບໍ່ ສາມາດ ປະຕິບັດ ພັນທະ ດ້ານ ການເງິນ ໄດ້ ໃນເມື່ອ ງົບປະມານ ຂາດໆເຂີນໆ ແຕ່ກໍຕ້ອງ ໃຫ້ມີການ ສັກຢາ ປ້ອງກັນ ພຍາດ ໃຫ້ ປະຊາຊົນ ທີ່ ທົ່ວເຖິງ ຂຶ້ນ.

ໃນ ວັນທີ 12 ພຶສພາ ຜ່ານມາ ອົງການ ແມ່ ແລະ ເດັກ UNICEF ຣາຍງານ ວ່າ ຣັຖບານ ລາວ ໄດ້ມອບເງິນ 530 ພັນ ໂດລາ ສະຫະຣັຖ ແກ່ ໂຄງການ ສັກຢາ ກັນ ພຍາດ immunization ອັນເປັນການ ຢືນຢັນ ເຖິງການ ປະຕິບັດ ພັນທະ ປະກອບ ສ່ວນ ເຂົ້າໃນ ງົບປະມານ ທັງໝົດ 7 ລ້ານ 9 ແສນ ໂດລາ ໃນປີ 2014 ນີ້. ການ ປະຕິບັດ ພັນທະ ຂອງລາວ ເຮັດໃຫ້ ຕ່າງ ປະເທດ ທີ່ ໃຫ້ການ ຊ່ວຍເຫລືອ ໂລ່ງໃຈຂຶ້ນ.

ຫົວໜ້າ UNICEF ປະຈໍາລາວ Julia Rees ເວົ້າວ່າ ຖ້າມກາງ ສະພາບ ງົບປະມານ ຄືແນວນັ້ນ ເປັນເຣື້ອງ ທີ່ດີ ທີ່ ຣັຖບານ ລາວ ປະຕິບັດ ພັນທະ ທາງ ການເງິນ ຊຶ່ງຈະມີ ຜົລຫລາຍ ໃນການເຂົ້າ ຊ່ວຍຊີວິດ ຂອງ ເດັກນ້ອຍ ເປັນຕົ້ນ ເຣື້ອງການ ສັກຢາ ກັນ ພຍາດ.