ລາວ, ຈີນ ເຊັນບົດບັນທຶກ ສົ່ງເສີມສິນຄ້າ ກະສິກັມ
2022.08.29
ຂະບວນຣົຖໄຟສິນຄ້າ ລາວ-ຈີນ ທີ່ພວມເດີນທາງ ເຂົ້າສູ່ສະຖານີ ນະຄອນຫຼວງວຽງຈັນ ອັນເປັນສະຖານີຂົນສົ່ງສິນຄ້າ ຈາກໄທຍມາລາວ ແລ້ວໄປສູ່ຈີນ ແລະ ຈາກຈີນມາລາວ ແລ້ວໄປສູ່ໄທຍ (TS), ເດືອນພຶສພາ 2022.
RFA
ກະຊວງກະສິກັມ ແລະ ປ່າໄມ້ ຂອງລາວ ແລະ ອົງການປົກຄອງ ປະຊາຊົນ ເມືອງຫູໜານ ຂອງຈີນ ໄດ້ເຊັນບົດບັນ ທຶກຄວາມເຂົ້າໃຈ ການຮ່ວມມື ສ້າງໂຄງການນຶ່ງທາງ ສອງເຂດ ເພື່ອສົ່ງເສີມການຜລິຕສິນຄ້າກະສິກັມ ແລະ ນຳໃຊ້ເສັ້ນທາງຣົຖໄຟ ລາວ-ຈີນ ໃນການຂົນສົ່ງສິນຄ້າ.
ທັງສອງຝ່າຍ ໄດ້ເຊັນບົດບັນທຶກຄວາມເຂົ້າໃຈ ໃນວັນທີ 26 ສິງຫາ 2022 ໂດຍ ມີຈຸດປະສົງເພື່ອສ້າງເຂດພັທນາ ອຸດສາຫະກັມ-ກະສິກັມ ທັນສໄມ ຢູ່ນະຄອນຫລວງວຽງຈັນ ແລະ ເຂດພັທນາເສຖກິຈຈິນເຊີຍ ນະຄອນຊາງຊາ ແຂວງຫູໜານຂອງຈີນ ອີງຕາມຂໍ້ມູນຈາກກະຊວງກະສິກັມ ແລະ ປ່າໄມ້.
ບົດບັນທຶກດັ່ງກ່າວ ເປັນພຽງແຜນການ, ແຕ່ ຍັງບໍ່ມີກຳນົດວ່າ ຈະມີການລົງມືປະຕິບັດເມື່ອໃດ ເຊິ່ງຝ່າຍລາວ ມີແຜນການສ້າງເຂດພັທນາ ອຸດສາຫະກັມ ແລະ ກະສິກັມ ທັນສໄມ ຢູ່ເມືອງຫາດຊາຍຟອງ ນະຄອນຫລວງວຽງຈັນ.
ເຈົ້າໜ້າທີ່ ກະຊວງອຸດສາຫະກັມ ແລະ ປ່າໄມ້ ໄດ້ກ່າວຕໍ່ເອເຊັຽເສຣີ ໃນວັນທີ 29 ສິງຫາ ວ່າ:
“ຍັງບໍ່ທັນໄດ້ຈັດຕັ້ງປະຕິບັດ ໝາຍຄວາມວ່າ ເຂດທີ 1 ແມ່ນເຂດເສຖກິຈ ແຂວງຫູໜານເນາະ. ເຂດທີ 2 ນີ້ເຂດເສຖກິຈຂອງລາວ ເຂດສັນຂົວມິຕພາບຫັ້ນແຫຼະ. ລັກສະນະດຶງດູດການລົງທຶນຂອງຈີນ ແລ້ວ ກະຂອງຕ່າງປະເທດ ແນໃສ່ ນຳໃຊ້ບໍຣິການຂົນສົ່ງ ຣົຖໄຟລາວ-ຈີນ.”
ທ່ານ ກ່າວຕື່ມວ່າ ເປົ້າໝາຍຂອງການສ້າງເຂດພັທນາ ອຸດສາຫະກັມ ແລະ ກະສິກັມ ທັນສໄມ ຢູ່ເຂດເມືອງຫາດຊາຍຟອງ ເພື່ອດອງດູດນັກລົງທຶນຈີນ ແລະ ຕ່າງປະເທດ ເຂົ້າມາສົ່ງເສີມການປູກພືດ ກະສິກັມ ແລ້ວເຮັດການປຸງແຕ່ງ ຜົລຜລິດກະສິກັມ ສົ່ງອອກໄປຈີນ, ແຕ່ຍັງບໍ່ມີຣາຍລະອຽດເທື່ອວ່າ ບໍຣິສັດໃດ ຈະເຂົ້າມາສັມປະທານ ແລະ ເຂົ້າຮ່ວມລົງທຶນໃນໂຄງການດັ່ງກ່າວ.
ໃນຂະນະດຽວກັນ ຊາວກະສິກອນລາວ ຍັງບໍ່ທັນຮູ້ຣາຍລະອຽດເຣື່ອງນີ້ ເພາະວ່າ ເຂົາເຈົ້າສ່ວນຫຼາຍກໍຜລິຕກະສິກັມ ເພື່ອພາຍໃນເມືອງ ແລະ ແຂວງຂອງຕົນເອງ.
ຊາວສວນສາລີ ທ່ານນຶ່ງ ໄດ້ກ່າວວ່າ:
“ເຂົາມີຫຼາຍຄົນດຽວນີ້ ແຕ່ວ່າ ເວົ້າເຣື່ອງການສົ່ງເສີມນີ້ ສ່ວນຫຼາຍມັນຢູ່ພີ້ ມັນເຮັດໃຜ ເຮັດມັນ. ມັນບໍ່ມີກຸ່ມມາສົ່ງເສີມ. ປູກເອງ ແລ້ວກະປູກເອງ ຂາຍພາຍໃນນີ້ ບໍ່ໄດ້ເອົາອອກຕ່າງເມືອງ ຕ່າງແຂວງຫຍັງດອກ. ພວກຈີນເຂົາກະມາຊື້ຄືກັນ.”
ຊາວກະສິກັມ ອີກຄົນນຶ່ງ ໄດ້ກ່າວວ່າ ຖ້າມີໂຄງການແບບນີ້ ກໍເປັນການສົ່ງເສີມຊາວກະສິກັມ:
“ຄັນມີຄົນມາສົ່ງເສີມກະດີ. ບໍຣິສັດ ມາສົ່ງເສີມໃຫ້ເຮັດຫັ້ນນ່າ ເພາະວ່າ ດິນມັນຫຼາຍເດ້. ກະມີຢູ່ໃດ ເຂົາເຮັດນ່າ ແຕ່ວ່າ ເຫັນເຂົາເຮັດຢູ່ໄຊຍະ ຄົນຈີນມາເຮັດຫັ້ນນ່າ.”
ບໍຣິສັດດ້ານການກະເສຕ ຂອງນັກລົງທຶນຕ່າງປະເທດບາງແຫ່ງ ຢູ່ເມືອງຊາຍຊາຍຟອງ ນະຄອນຫລວງວຽງຈັນ ກໍຍັງບໍ່ຮູ້ ແລະ ຍັງບໍ່ແນ່ໃຈວ່າ ຈະເຂົ້າຮ່ວມລົງທຶນ ໃນໂຄງການນີ້.
ພະນັກງານຢູ່ ບໍຣິສັດ ປູກກ້ວຍແຫ່ງນຶ່ງ ຢູ່ເມືອງຫາດຊາຍຟອງ ໄດ້ກ່າວວ່າ:
“ຢູ່ທາງສວນເຮົາຢູ່ປາກຊັນພຸ້ນ ເຮົາຈຳໜ່າຍຢູ່ແຕ່ນະຄອນຫລວງວຽງຈັນ. ເຮົາຍັງບໍ່ຮູ້ນຳຫົວໜ້າ ເພາະວ່າ ຫົວໜ້າເພິ່ນກັບປະເທດ. ເພິ່ນຍັງບໍ່ທັນໄດ້ມາເທື່ອນ່າ ອັນນີ້ ເຮົາກະໃຫ້ຄຳຕອບບໍ່ໄດ້.”
ນັກວິຊາການດ້ານກະສິກັມ ກໍໃຫ້ວ່າ ເປັນຜົລດີ ຖ້າມີການລົງທຶນ ໃນຂແນງການນີ້:
“ໂອ ຄັນວ່າ ເພິ່ນມີທຶນຮອນມາເຮັດ ກະເປັນຜົລດີໃຫ້ແກ່ປະຊາຊົນແຫຼະ. ສະເພາະເວົ້າເຣື່ອງການສົ່ງເສີມດ້ານກະສິກັມນີ້, ທາງພາກເອກຊົນນີ້ນ່າ ຖ້າພາກສ່ວນໃດມີເງື່ອນໄຂເນາະ ຫາກວ່າ ມາລົງທຶນສົ່ງດ້ານນີ້ ກະຖືວ່າ ເປັນຜົລດີໃຫ້ແກ່ປະຊາຊົນ ຫັ້ນແຫຼະເນາະ.”
ນອກຈາກນີ້ ທາງການລາວ ແລະ ຈີນ ຍັງເຫັນດີນຳກັນວ່າ ເຂດພັທນາເສຖກິຈທັງ 2 ເຂດດັ່ງກ່າວ ຈະເປັນຈຸດສູນກາງ ຂອງຄວາມຮ່ວມມືລະຫວ່າງ ລາວ-ຈີນ ໃນດ້ານການຄ້າ, ການຂົນສົ່ງ ແລະ ການເງິນ ເພື່ອຮອງຮັບການຜລິຕກະສິກັມ ທີ່ສາມາດນໍາໃຊ້ຣົຖໄຟລາວ-ຈີນ ໃນການຂົນສົ່ງສິນຄ້າໄປຈີນ.
ນອກຈາກນີ້ ກະຊວງກະສິກັມ ແລະ ປ່າໄມ້ ກໍມີແຜນສ້າງໂຮງງານປຸງແຕ່ງ ຜົລຜລິຕດ້ານກະສິກັມ ທັນສໄມ ເພື່ອສົ່ງສິນຄ້າ ໄປປະເທດເພື່ອນບ້ານ ອີງຕາມການຣາຍງານ ຂອງໜັງສືພິມວຽງຈັນທາມສ໌.
ເຖິງຢ່າງໃດກໍຕາມ, ໃນໄລຍະຜ່ານມາ ທາງການລາວ ແລະ ຈີນ ກໍໄດ້ຮ່ວມມືກັນ ດ້ານການສົ່ງອອກງົວໄປປະເທດຈີນຈຳນວນ 500,000 ໂຕ ຕໍ່ປີ ແຕ່ ໃນໂຕຈິງ ລາວສາມາດ ສົ່ງອອກງົວໄປໄດ້ ພຽງແຕ່ 50,000 ໂຕ ຕໍ່ປີເທົ່ານັ້ນ ອີງຕາມຂໍ້ມູນ ຂອງກະຊວງກະສິກັມ ແລະ ປ່າໄມ້ໃນປີຕົ້ນປີ 2022.