ທາງການລາວປະກາດຂຶ້ນລາຄານ້ຳມັນ ຢ່າງຕໍ່ເນື່ອງ
2021.10.25
ຣາຄານ້ຳມັນ ປັບໂຕຂຶ້ນ ຢ່າງຕໍ່ເນື່ອງ
ນັກຂ່າວ ພົລເມືອງ
ສະເພາະໃນເດືອນຕຸລາ 2021 ທາງການລາວ ໄດ້ປະກາດຂຶ້ນລາຄານ້ຳມັນໄປແລ້ວ 2 ຄັ້ງ ແລະ ລວມທັງໝົດນັບແຕ່ຕົ້ນປີ ຈົນມາເຖິງປັດຈຸບັນ ທາງການໄດ້ປະກາດ ຂຶ້ນລາຄານ້ຳໄປແລ້ວ 16 ຄັ້ງ. ການຂຶ້ນລາຄານ້ຳຄັ້ງຫຼ້າສຸດໃນມີຜົລບັງຄັບໃຊ້ໃນວັນທີ 20 ຕຸລາ 2021 ເຊັ່ນ ນ້ຳມັນແອັດຊັງພິເສດປັບຂຶ້ນ 450 ກີບ ຕໍ່ລິດ, ແອັດຊັງທັມດາປັບຂຶ້ນ 420 ກີບ ຕໍ່ລິດ, ນ້ຳມັນກະຊ້ວງປັບຂຶ້ນ 380 ກີບ ຕໍ່ລິດ ໄດ້ສົ່ງຜົລກະທົບຕໍ່ ຊີວິດການເປັນຢູ່ຂອງປະຊາຊົນ. ປະຊາຊົນທ່ານນຶ່ງ ໄດ້ໃຫ້ສຳພາດຕໍ່ເອເຊັຽເສຣີ ວ່າ ການຂຶ້ນລາຄານ້ຳມັນ ໄດ້ສົ່ງຜົລກະທົບເປັນຕ່ອງໂສ້ໄປໝົດ.
ປະຊາຊົນ: “ບໍ່ກະທົບຈັ່ງໃດ ຂອງໂຕພາໃຫ້ຍ່າງ ນ້ຳມັນຂຶ້ນປຶບ ມັນກະທົບ ປັບໂລດຕິຂອງ ຫົວອາຫານຂອງຊື້ມາລ້ຽງໄກ່ພໍໄດ້ກິນໄດ້ຢູ່ ແຕ່ກີ້ 140,000 ກີບ ເມື່ອສອງເດືອນກ່ອນ ເມື່ອ 3 ເດືອນກ່ອນ ດຽວນີ້ 163,000 ກີບ. ສອງອາທິດມານີ້ ຂຶ້ນ 2 ເທື່ອຈາກ 155,000 ກີບ ມາເປັນ 163,000 ກີບ ຕໍ່ກະສອບ ຈັກໜ້ອຍຂຶ້ນອີກນິ ນ້ຳມັນຂຶ້ນ ມັນຂຶ້ນໂລດຕິ ຂອງຄ່າຂົນສົ່ງມັນຂຶ້ນ. ເຂົາຊິ ຈົກເງິນເຂົາມາຈ່າຍຈັກເທື່ອ ເຂົາກໍໃຫ້ຜູ້ຊື້ຕີ້ຈ່າຍໃຫ້ເຂົາ ສົມມຸດເຂົາຂົນສົ່ງຖ້ຽວນີ້ ມີມູນຄ່າມັນບັນທຸກມາ 100 ລ້ານ ກີບ, ນ້ຳມັນເຂົາເຄີຍໃຊ້ມາ 100 ລິດຄືກັນ ແຕ່ວ່າ ລາຄາມັນ 9 ແສນ ກີບ ເຂົາຂຶ້ນເປັນລິດນຶ່ງ 11 ພັນກີບ ເປັນ ລ້ານນຶ່ງແສນ ກີບ ເຂົາກໍໄປບວກຕີ້. ມູນຄ່າ 100 ລ້ານ ມັນເກີນ ເຂົາກໍມາຂາຍ 102 ລ້ານຕີ້ ເຂົາຊິເປັນບ້າຂາຍ 100 ລ້ານ ກີບ ຈັກເທື່ອ. ບາດ 2 ລ້ານ ເຂົາເອົາມາກໍຈາຍ ສິນຄ້າໃຫ້ປະຊາຊົນຊື້ ມັນກະຂຶ້ນ. ຊິມາບອກວ່າ ເອີນັ່ງຂາຍຢູ່ນີ້ ເຄີຍຂາຍ 40 ພັນ ເອີຂາຍແດ່ ຊິເຮັດແນວໃດ ເຂົາມາສົ່ງ 39 ພັນລະ ທັງຄ່າຂຽງມັນອີກ ຊິໃຫ້ມັນກິນ 500 ກີບ ມັນຊິໄປກິນ ມັນຊິມີພໍໃຊ້ ມັນເຄີຍກິນ 2,000 ກີບ.”
ນັກຂ່າວ: ມັນມີອາຫານປະເພດໃດແດ່ ທີ່ຂຶ້ນລາຄາລະຕອນນີ້ນະ.
ປະຊາຊົນ: ດຽວນີ້ຫັ້ນນະ ຂຶ້ນໝົດລະເບາະ ຕັ້ງແຕ່ຜັກ ມັນກໍຍັງຂຶ້ນ ມັນກໍຂຶ້ນທຸກບ່ອນຫັ້ນລະ ຫາກແຕ່ວ່າ ມັນຂຶ້ນຕ່າງກັນ ມັນເອົາສິນຄ້າມາຈາກໃສ ຕົ້ນທຶນເຂົາທໍ່ໃດ ມາໄກຫຼາຍຕໍ່ ມັນກໍແພງ ມາໃກ້ຕໍ່ດຽວກໍຖືກ ຂຶ້ນທຸກບ່ອນ.
ຮຳກໍຍັງຂຶ້ນ, ຂຶ້ນ 40 ພັນ ຕໍ່ 30 ກິໂລກຼາມ ດຽວນີ້ 60 ພັນ ກີບ. ຈາກ 40 ພັນ ມາເປັນ 60 ພັນ ຂຶ້ນ 20 ພັນ. ບາດນີ້ ໄປຊື້ໄກ່ຊີ້ເປັດນ້ຳເຂົາຊິໃຫ້ເຂົາຂາຍຖືກ ໃຜຊິໄປຂາຍຖືກ ມັນກະຕ້ອງແພງຂອງຊື້ມາແພງ. ຖາມເຂົາວ່າ ເປັນຫຍັງຈັ່ງຂາຍແພງ ຂົນມາ ໄປຊື້ນ້ຳມັນຄືເກົ່າມັນບໍ່ໄດ້ ກໍຈຳເປັນໄດ້ຂຶ້ນອີກເຂົາວ່າ. ມັນໄປໝົດ ຄັນນ້ຳມັນຂຶ້ນ ລະແມ່ນຕາຍໝົດທຸກຢ່າງນະ.”
ນັກຂ່າວ: ການດຳລົງຊີວິດເຮົາເປັນຈັ່ງໃດຕອນນີ້?
ປະຊາຊົນ: “ເອີກໍຫຍຸ້ງຍາກໝົດ ມັນແພງໝົດທຸກຢ່າງ ມັນກໍຫຍຸ້ງຍາກໝົດ ສິນຄ້າແພງ ຄ່າແຮງຖືກ ລາຍໄດ້ຕໍ່າ ມັນສວນກັນ ມັນກໍຍາກໄດ໋ອ້າຍ ມັນມີແຕ່ແນວຂັດສົນນຳກັນ ຄ່າຄອງຊີບ ລາຍໄດ້ຕ່ຳ ມັນກໍຕາຍ ມັນກໍຢູ່ຍາກຕີ້.”
ປະຊາຊົນ ທ່ານນຶ່ງຢູ່ແຂວງອຸດົມໄຊ ກ່າວວ່າ ລາຄານ້ຳມັນຂຶ້ນ ສ່ວນຫຼາຍເຮັດໃຫ້ປະເພດອາຫານ ການກິນທີ່ນຳເຂົ້າຈາກຕ່າງປະເທດ ມີລາຄາສູງຂຶ້ນ ໂດຍສະເພາະອາຫາທະເລ.
ນັກຂ່າວ: ເຮົາໄດ້ຊື້ຫຍັງແດ່ລະມັນຂຶ້ນ ສິນຄ້າຫຍັງແດ່?
ປະຊາຊົນ: ຕອນນີ້ ຢູ່ບ້ານເຮັດເຄື່ອງປີ້ງຂາຍ ໃຫ້ຊາວບ້ານ ໃຫ້ນັກຮຽນຊັ້ນນ່າ. ຕີນໄກ່, ຮອດດອກ (Hotdog), ລູກຊີ້ນ ຈັ່ງຊີ້ນ່າ ລາຄາມັນກໍຂຶ້ນ ຄືລູກຊີ້ນ, ຮອດດອກ ຖົງນຶ່ງກໍ 15,000–16,000 ກີບ ແຕ່ດຽວນີ້ ຖົງນຶ່ງກໍຮອດ 18,000-19,000 ກີບ. ຕີນໄກ່ເນາະ ແຕ່ກີ້ກໍຊື້ 20,000-22,000 ກີບ ດຽວນີ້ກໍຂຶ້ນ 28,000-30,000 ກີບ ເປັນໂລ. ຕີນໄກ່ເອົາມາປີ້ງຂາຍ ຂຶ້ນໄປຕາມໆ ກັນລະ ສິນຄ້າດຽວນີ້ກໍ ຊື້ກໍຢາກຍາກຫັ້ນລະ ຊື້ແພງກະໄດ້ກຳໄລໜ້ອຍ.
ນັກຂ່າວ: ຊື້ອັນອື່ນເດ້?
ປະຊາຊົນ: ຄັນເຮົາຊື້ມາຈາກຕ່າງປະເທດ ກໍຈະແພງແດ່ຈັ່ງຊີ້ຫັ້ນນ່າ ເປັນຕົ້ນວ່າ ກຸ້ງ, ປາເມຶກ, ຕີນໄກ່,ຕັບໄກ່ ຈັ່ງຊີ້, ລູກຊີ້ນ, ອາຫານທະເລ ກໍແພງນະ ອາຫານທະເລນະ.
ນັກຂ່າວ: ທໍ່ໃດລະປາເມຶກ ເປັນອີ່ຫຍັງ?
ປະຊາຊົນ: ເປັນປາເມຶກດຽວນີ້ ຄັນເປັນໜວດຫັ້ນ ໂລນຶ່ງຮອດ 50,000 ພຸ້ນເບາະດຽວນີ້ຫັ້ນ. ຊື້ມື້ນັ້ນ 25,000. ເປັນກຸ້ງກໍ 70,000-80,000 ກີບ ພຸ້ນໂອ້.
ນັກຂ່າວ: ແຕ່ກີ້ທໍ່ໃດລະ?
ປະຊາຊົນ: ແຕ່ກີ້ ເຄີຍຊື້ກິນນີ້ກໍ ເຄີຍຊື້ກິນນີ້ ກໍໂລນຶ່ງ 40,000 ຫຼື 45,000 ກີບ ດຽວນີ້ກໍແພງລະ ດຽວນີກໍ.
ນັກຂ່າວ: ດຽວນີ້ທໍ່ໃດລະ?
ປະຊາຊົນ: ດຽວນີ້ກະ 50,000 ກີບ ແລ້ວ ຄັນວ່າເປັນໜວດແລ້ວນະ. ຊີ້ນນີ້ແພງຫຼາຍ, ຄັນເປັນງົວ ເປັນຄວາຍ ໂລນຶ່ງ 80,000 ກີບ, ຄັນເປັນຊີ້ນໝູໂລນຶ່ງ 50,000 ກີບ.
ນັກຂ່າວ: ແຕ່ກີ້ທໍ່ໃດ ຊີ້ນງົວ ຊີ້ນຄວາຍ?
ປະຊາຊົນ: ຊີ້ນງົວ, ຊີ້ນຄວາຍ ຕອນໂຄວິດຍັງບໍ່ຣະບາດ ກໍ 65,000 ກີບ ປະມານນີ້ລະ ແຕ່ມາດຽວນີ້ກະຂຶ້ນຮອດ 80,000 ກີບ ພຸ້ນໂອ້.
ເຈົ້າໜ້າທີ່ຣັຖກອນທ່ານນຶ່ງ ໃຫ້ເຫດຜົລວ່າ ລາຄານ້ຳມັນເຮັດໃຫ້ລາຄາສິນຄ້າເໜັງຕິງ ໃນຂນະທີ່ຣັຖກອນທີ່ມີເງິນເດືອນປະມານ 2 ລ້ານປາຍກີບ ສາມາດໃຊ້ຈ່າຍໄດ້ພຽງແຕ່ 2 ອາທິດເທົ່ານັ້ນ ເງິນກໍໝົດແລ້ວ.
ຣັຖກອນ: ໂອ້ ມັນກໍສົ່ງຜົລກະທົບໄປໝົດຫັ້ນແຫຼ ຂັ້ນນ້ຳມັນ ມັນຂຶ້ນ. ເບິ່ງຊີ້ນນີ້ ກິໂລນຶ່ງ 50 ພັນ ກີບ ດຽວນີ້ ກິໂລນຶ່ງ 70 ພັນກີບ.
ນັກຂ່າວ: ຊີ້ນຫຍັງລະ?
ຣັຖກອນ: ຊີ້ນງົວນີ້ແຫຼະ ຂຶ້ນຈົນໝົດ. ຢາສູບເຄີຍຊື້ 8,000 ດຽວນີ້ຊື້ 12,000 ກີບ, ຊອງແຂງນີ້ 10,000 ຫວ່າງຫັ້ນ ລະ 6,000 ພັນ.
ນັກຂ່າວ: ແລ້ວໂຕອື່ນເດ້ ມີຫຍັງຂຶ້ນແດ່?
ຣັຖກອນ: ຂຶ້ນລະທຸກຢ່າງນະ ຄັນເວົ້າລະ ພວກອຸປະໂພ ບໍລິໂພກ ຂຶ້ນໝົດ ນ້ຳມັນນີ້ກໍເດືອນນຶ່ງ 2 ເທື່ອລະ ປັບຄ່ານ້ຳມັນເອີ ເທື່ອທີສອງລະນີ້ ມັນ 400 ປາຍ ປັບຂຶ້ນ.
ນັກຂ່າວ: ຢູ່ຈັ່ງໃດຊັ້ນນະ ອັນໃດກະແພງຈັ່ງຊີ້?
ຣັຖກອນ: ຫາກິນເອງ ຢູ່ແຖວຂ້ອຍນີ້ກໍ ເຮືອນຫັ້ນ ຄອບຄົວຊູຂ້ອຍມັນມີນາເນາະ ມີນາລະກໍ ມີປານຳກາງໄຮ່ ກາງນາຫັ້ນເດ້ ມີກົບມີຂຽດ ໄປຈັ່ງຊັ້ນແຫຼ ສ່ວນຫຼາຍກໍແມ່ນ ລົງຫຼັງເຮືອນຫັ້ນ ກໍໄປຫາເອົາ ພໍໄດ້ກິນ. ຄັນວ່າ ອາໄສແຕ່ເງິນເດືອນຫັ້ນ 5 ມື້ ກໍໝົດລະເງິນເດືອນ ລົງເຮືອນໄປໃສ່ນ້ຳຣົດ ແຕ່ກີ້ໃສ່ ແສນນຶ່ງ ຍັງໄດ້ 10 ປາຍລິດເດ້, ດຽວນີ້ ໃສ່ ແສນນຶ່ງ ໄດ້ແຕ່ 8 ລິດປາຍ.
ນັກຂ່າວ: ແຕ່ກີ້ໃສ່ ແສນນຶ່ງ ໄດ້ 10 ປາຍລິດ ທໍ່ໃດ?
ຣັຖກອນ: 11 ລິດ ເດ້ ດຽວນີ້ ປະມານ 8 ລິດນ່າ.
ນັກຂ່າວ: ເງິນເດືອນຂັ້ນເຮົາໃຊ້ແທ້ໆ ເງິນເດືອນປະມານລ້ານປາຍຫວະ ຄື ສອງລ້ານ?
ຣັຖກອນ: 2 ລ້ານປາຍ.
ນັກຂ່າວ: ສອງລ້ານປາຍ ຄັ້ນໃຊ້ແທ້ໆ ປະມານຈັກມື້?
ຣັຖກອນ: ປະຢັດທີ່ສຸດລະບໍ່ເກີນ 15 ມື້ ແມ່ນໝົດລະ. ປະຢັດແທ້ໆ 15 ມື້ລະແມ່ນໝົດ.
ນັກຂ່າວ: ສົມມຸດວ່າ ເຂົາຊື້ເຂົ້າກິນ ຊື້ອາຫານການກິນປະມານເທົ່າຕໍ່ມື້?
ຣັຖກອນ: ຄັນວ່າເຂົ້າເນາະ ຄັນເຮົາຊື້ເຂົ້ານີ້ກໍ ມື້ນຶ່ງປະມານ 40,000 ກີບ ບາດນີ້ອາຫານ ຊີ້ນກິໂລນຶ່ງກໍ 70,000 ກີບ, ກຸ້ມມື້ດຽວກໍແສນກວ່າກີບລະເດ້ ຍັງອັນອື່ນອີກ ຍັງເກືອ ໝາກເຜັດ ແປ້ງນົວ ປາແດກເດ້ ກໍຊື້. ມື້ນຶ່ງນີ້ ເກືອບຢາກ 2 ແສນກີບ ນ່າ ພໍດີກຸ້ມຄອບຄົວນຶ່ງ.
ການຂຶ້ນລາຄານ້ຳມັນ ອີງໃສ່ກົນໄກຕລາດໂລກ, ເຈົ້າໜ້າທີ່ກົມການຄ້າພາຍໃນ ກະຊວງອຸດສາຫະກັມ ແລະ ການຄ້າ ຜູ້ທີ່ບໍ່ປະສົງອອກຊື່ ໄດ້ກ່າວ ຕໍ່ເອເຊັຽເສຣີ ທີ່ຜ່ານມາ ວ່າ:
“ແມ່ນເພາະວ່າລາຄາເຮົາປັບ ມັນກໍອີງຕາມຕລາດໂລກຢູ່ແລ້ວ ອໍ ໂຕນີ້ ຜ່ານມາ ເຮົາກະມີການຄັງແຮ ຊ້ວງໃດມັນຂຶ້ນຫຼາຍໆ ຣັຖບານກໍເອົາຄັງແຮ ມານ້ຳໃຊ້ ອໍ ໂຕນີ້ແຕ່ລະຄັ້ງ ກໍບໍ່ຄືກັນ ມັນແລ້ວ ແຕ່ວ່າ ລາຄາມັນຂຶ້ນໜ້ອຍ ຂຶ້ນຫຼາຍ ໂຕນີ້ ເຮົາບໍ່ມີເປັນຫຼັກການຕາຍໂຕໄວໃນນັ້ນ ມັນຂຶ້ນກັບໂຕເລກທີ່ວ່າ ມັນ ເໜັງຕີງ ແຕ່ລະຄັ້ງ”
ທ່ານ ກ່າວຕື່ມອີກວ່າ ທາງການລາວ ໄດ້ກຳນົດ ໃຫ້ນຳມັນເປັນສິນຄ້າຄວບຄຸມ ເນື່ອງຈາກເປັນສິນຄ້າທີ່ຈຳເປັນຕໍ່ການດຳລົງຊີວິດ ມີຄວາມສຳຄັນໃນການ ຜລິດສິນຄ້າ ແລະ ບໍຣິການ ແລະ ສິນຄ້າທີ່ມີລາຄາປ່ຽນແປງໄປຕາມຕລາດໂລກ. ອີງຕາມຂໍ້ມູນຈາກທາງການລາວ, ໃນຮອບປີນີ້ ໄດ້ມີການຂຶ້ນລາຄາໄປແລ້ວ 16 ຄັ້ງ. ການຂຶ້ນລາຄານ້ຳຄັ້ງຫຼ້າສຸດ ມີຜົລບັງຄັບໃຊ້ໃນວັນທີ 20 ຕຸລາ 2021. ສະເພາະລາຄານ້ຳຢູ່ນະຄອນຫລວງວຽງຈັນ:
- ນ້ຳມັນແອັດຊັງພິເສດປັບຂຶ້ນ ແຕ່ກ່ອນລາຄາ 13,170 ກີບ ຕໍ່ລິດ ປັດຈຸບັນຂາຍໃນລາຄາ 13,620 ກີບ ຕໍ່ລິດ
- ແອັດຊັງທັມດາປັບຂຶ້ນ ຈາກແຕ່ກ່ອນລາຄາ 11,370 ກີບ ຕໍ່ລິດ ມາເປັນ 11,790 ກີບ ຕໍ່ລິດ ໃນປັດຈຸບັນ.
- ນ້ຳມັນກະຊ້ວງປັບຂຶ້ນ ຈາກແຕ່ກ່ອນລາຄາ 9,920 ກີບ ຕໍ່ລິດ ມາເປັນ 10,300 ກີບ ຕໍ່ລິດ ໃນປັດຈຸບັນ
ສ່ວນວ່າ ລາຄານ້ຳມັນຢູ່ຕ່າງແຂວງກໍມີຄວາມ ແຕກຕ່າງກັນໄປ ຂຶ້ນກັບແຂວງໃຫຍ່ ແຂວງນ້ອຍ.