ມໍຣະດົກໂລກ ທົ່ງໄຫຫິນ

• ສຸພັດຕາ
  2019-11-21

ທົ່ງໄຫຫິນ ແຂວງຊຽງຂວາງ ໄດ້ຮັບໃບຢັ້ງຢືນເປັນ ມໍຣະດົກໂລກ ຢ່າງເປັນທາງການແລ້ວ ຈາກ ຢູເນັສໂກ ໃນວັນທີ 18 ພຶສຈິກາ 2019 ທີ່ ນະຄອນຫຼວງ ປາຣີ ປະເທດຝຣັ່ງເສດ, ອີງຕາມຄໍາເວົ້າ ຂອງຫົວໜ້າຜແນກວັທນະທັມ ແລະທ່ອງທ່ຽວ ແຂວງຊຽງຂວາງ ຕໍ່ວິທຍຸເອເຊັຽ ເສຣີ ໃນວັນທີ 20 ພຶສຈິກາ ນີ້:

“ແມ່ນ ເປັນທາງການແລ້ວ ປະທານຢູເນັສໂກ ເປັນຜູ້ມອບ ຣັຖມົນຕຣີເປັນຜູ້ໄປຮັບເນາະ ກັບຫົວໜ້າກົມມໍຣະດົກ ມັນມີ 11 ແຫ່ງ ເປັນຕົວແທນບັນດາໄຫຫິນ ໝົດເກືອບ 2 ພັນກວ່າໜ່ວຍ ເນາະ ກະພູມໃຈຫຼາຍຫັ່ນແລ້ວເນາະ ກະຄືວ່າສູ້ຊົນມາເກືອບ 20 ກວ່າປີ ແລ້ວການສເລີມສລອງໄຫຫິນ ມໍຣະດົກໂລກ ຊິແມ່ນ 21 ເດືອນສາມເດີ້ 2020.”

ຈໍານວນໄຫຫິນປະມານ 2 ພັນກວ່າໜ່ວຍມີເນື້ອທີ່ 200 ເຮັກຕາ ກວມເອົາ 4 ເມືອງ ຄື: ເມືອງຄໍາ, ເມືອງຜາໄຊ, ເມືອງແປກ ແລະ ເມືອງພູກູດ ມີທັງໝົດ 11 ແຫ່ງ ໂດຍໄດ້ຜ່ານການຮັບຮອງ ຈາກອົງການເກັບກູ້ຣະເບີດແລ້ວ ສາມາດໃຫ້ນັກທ່ອງທ່ຽວ ຢ້ຽມຊົມໄດ້ ຢ່າງປອດພັຍ, ດັ່ງເຈົ້າໜ້າທີ່ ເກັບກູ້ຣະເບີດ ແຂວງຊຽງຂວາງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນັ້ນວ່າ:

“ມັນມີແຕ່ 11 ແຫ່ງ ທົ່ງໄຫຫິນທີ່ຮອງຮັບ ເຂົ້າມໍຣະດົກໂລກ ທີ່ພວກເຮົາກວດກູ້ຣະເບີດແລ້ວ ຈະບໍ່ມີບັນຫາ ຈະມີໃບຢັ້ງຢືນຄວາມປອດພັຍ ບັດນີ້ພວກເຮົານໍາທ່ຽວດອກ ໃນແຕ່ລະບ່ອນເຂົາຈະມີ ພາກສ່ວນເຈົ້າໜ້າທີ່ ຮັບຜິດຊອບຂອບເຂດຂະເຈົ້າ.”

ຫົວໜ້າຜແນກວັທນະທັມ ແລະທ່ອງທ່ຽວກ່າວຕື່ມວ່າ ຜ່ານມາໄດ້ມີການປັບປຸງເຮືອນພັກ ຮ້ານອາຫານ ແລະສະຖານທີ່ທ່ອງທ່ຽວໃຫ້ດີຂຶ້ນ:

“ດຽວນີ້ ຄວາມພ້ອມກຽມຮັບແຂກ ຣັຖບານກໍາລັງສ້າງສນາມບິນສາກົລ ຢູ່ແຂວງຊຽງຂວາງ ໂຮງແຮມ, ເຮືອນພັກ ຮ້ານອາຫານ ແລ້ວກະ ເລື້ອງ ຄົມມະນາຄົມ ດຽວຣົດບໍຣິການເນາະ ກະບໍ່ສາມາດ ເປີດບໍຣິການໄດ້ໝົດ 11 ແຫ່ງ ບາງຈຸດຍັງຢູ່ເຂດນອກ ສ່ວນຫຼາຍເອົາຣົດໄປ ຈອດຢູ່ຈຸດ ແລ້ວຍ່າງທ່ຽວເລາະ.”

ທົ່ງໄຫຫິນຖືວ່າເປັນມໍຣະດົກໂລກແຫ່ງທີ່ 3 ຂອງລາວ. ນະຄອນຫຼວງພຣະບາງ ເປັນມໍຣະດົກໂລກແຫ່ງທີ່ 1 ໃນປີ 1995 ຈາກນັ້ນ ວັດພູ ຈໍາປາສັກ ກໍຖືກຮັບຮອງ ເປັນມໍຣະດົກໂລກ ແຫ່ງທີ່ 2 ໃນປີ 2001.