ດັ່ງທີ່ໄດ້ ກ່າວມາແລ້ວ ໃນຕອນຕົ້ນໆ ກ່ຽວກັບ ຊົນຊາຕອ້າຍລາວ ຊື່ງດຽວນີ້ ຊົນຊາຕ ດັ່ງກ່າວ ເອີ້ນຕົນເອງ ພຽງຄໍາວ່າ ລາວ. ກາຣບໍ່ຍອມ ປ່ຽນຊື່ຂອງຊາຕ ໄປເປັນ ຢ່າງອື່ນ ແຕ່ຍັງຮັກສາ ເຄົ້າມູລ ຕົ້ນຕະກູລ ຂອງຊາຕໄວ້ນັ້ນ ເປັນກາຣສະແດງ ໃຫ້ເຫັນວ່າ ລາວ ເປັນຊົນຊາຕ ທີ່ມີອາຣະທັມ ສູງມາແລ້ວ ຢ່າງໝັ້ນຄົງ ຖາວອນ. ເຖີງລາວ ຈະໄດ້ຮັບ ອິທິພົລ ຈາກປະເທສ ເພື່ອນບ້ານໃກ້ຄຽງ ແລະ ອິທິພົລ ໃນທາງສາສນາ ເຊັ່ນ ສາສນາພຸທ ເປັນຕົ້ນ, ແຕ່ເຖີງປານນັ້ນ ລາວ ກໍຍັງບໍ່ ປະຖິ້ມ ສາສນາ ເດີມທີ່ ບັຣພະບຸຣຸສ ພານັບຖືມາ ຄືຮີຕຄອງ ປະເພນີ ນັບຖືຜີຟ້າ, ຜີແຖນ, ວິນຍານ ຂອງ ບັຣພະບຸຣຸສ ຊື່ງເອີ້ນອີກ ຢ່າງນື່ງວ່າ ປູ່ເຍີ, ຍ່າເຍີ ກໍຄືວິນຍານ ປູ່ຍ່າ ຕາຍາຍ ນັ້ນເອງ.