ငါးနှစ်နီးပါး အခက်အခဲတွေ ရင်ဆိုင်နေရတဲ့ စစ်တွေမြို့က စစ်ဘေးဒုက္ခသည်များ

၂၀၁၈ ခုနှစ်၊ ဒီဇင်ဘာလမှာဖြစ်ခဲ့တဲ့ စစ်တပ်နဲ့ ရက္ခိုင့်တပ်တော် (AA) တို့ရဲ့ တိုက်ပွဲတွေကြောင့် စစ်တွေမြို့ပေါ်ကို ထွက်ပြေးခိုလှုံလာကြတဲ့ စစ်ဘေးဒုက္ခသည်တွေဟာ စစ်တွေမြို့မှာ ဒုက္ခသည်ဘ၀နဲ့ နေလာကြရတာ အခုဆိုရင် ငါးနှစ်နီးပါး ရှိနေပါပြီ။

သူတို့ဟာ ၂၀၁၉ ခုနှစ်၊ နှစ်စပိုင်းကတည်းက စစ်ဘေးဒုက္ခသည်စခန်းတွေမှာပဲ အလှူရှင်တွေ၊ နိုင်ငံတကာ အဖွဲ့အစည်းတွေနဲ့ စစ်တပ်ရဲ့ ထောက်ပံ့မှုတွေနဲ့ ရပ်တည်ခဲ့ကြတာပါ။

လက်ရှိမှာတော့ အလှူရှင်တွေရဲ့ အကူအညီတွေလည်း မရတော့သလို စစ်ကောင်စီကလည်း ထောက်ပံ့မှုတွေ မပေးတော့တာ တစ်နှစ်ကျော်ရှိနေပြီလို့ စစ်ဘေးဒုက္ခသည်တွေက RFA ကို ပြောပါတယ်။

ကမ္ဘာ့စားနပ်ရိက္ခာအစီအစဉ် (WFP) က ထောက်ပံ့တဲ့ လူတစ်ဦး တစ်လ ၂၇,၀၀၀ ကျပ်နဲ့ပဲ ဖြစ်သလို စားသောက်နေကြရပြီး ရပ်တည်ရေး ခက်ခဲနေတယ်လို့ ဆိုပါတယ်။

ကြုံရာကျပန်း နေ့စားအလုပ်တွေ ရှားပါးလာပြီး ကုန်စျေးနှုန်းမြင့်တက်လာတာကြောင့် စားရေးသောက်ရေး ခက်ခဲနေတာလို့လည်း ဒုက္ခသည်တွေက ပြောပါတယ်။

ဒုက္ခသည်တွေရဲ့ ရွာအနီးအနားတွေမှာ စစ်ကောင်စီတပ်က အခုအချိန်အထိ နေရာယူထားဆဲ ဖြစ်ပါတယ်။

တချို့ဒုက္ခသည်တွေကတော့ သူတို့ရဲ့ ရွာတွေ အရင်တိုက်ပွဲကာလမှာ မီးရှို့ဖျက်ဆီးခံလိုက်ရတာကြောင့် ပြန်မယ့်အိမ် မရှိကြတော့ပါဘူး။