မြန်မာ့ရိုးရာ အလှမီးပုံးလုပ်ငန်း

သီတင်းကျွတ် အခါသမယရောက်ရင် ဗုဒ္ဓဘာသာ မြန်မာလူမျိုးတွေဟာ အိမ်မှာ မီးပုံးအလှတွေ ချိတ်ဆွဲလေ့ရှိကြပါတယ်။

ရန်ကုန်တိုင်း၊ ကြည့်မြင်တိုင်မြို့နယ်၊ ဗားကရာအနီးဝန်းကျင်မှာ နေထိုင်သူတွေဟာလည်း သီတင်းကျွတ်ခါနီးတိုင်း မီးပုံးလုပ်ငန်း လုပ်ကိုင်ကြပါတယ်။

မီးပုံးလုပ်ငန်းကို ခါတော်မီလုပ်ငန်းလို့လည်း ခေါ်ကြပါတယ်။ ကလေးငယ်တွေကတော့ လက်နဲ့တွန်းလို့ရတဲ့ အရုပ်ပုံအမျိုးမျိုး မီးပုံးတွေနဲ့ ဆော့ကစားကြပါတယ်။

ဒီနှစ်မှာတော့ မီးပုံးလုပ်ငန်းအတွက် အသုံးပြုတဲ့ စက္ကူနဲ့ဝါးတွေ အရင်နှစ်ထက် နှစ်ဆကျော် စျေးတက်လာပါတယ်။

ကုန်စျေးနှုန်းတက် အရောင်းအဝယ် အရင်လောက် အဆင်မပြေပေမယ့် ဒီမီးပုံးလုပ်ငန်းကိုတော့ ရိုးရာမပျက် ဆက်လက်ထိန်းသိမ်းပြီး လုပ်နေကြတာလည်း ဖြစ်ပါတယ်။

လွန်ခဲ့တဲ့ ၁၀ နှစ်ကျော်လောက်ကတည်းက တရုတ်မီးပုံးတွေ ပေါ်လာပေမယ့် မြန်မာ့လက်မှု မီးပုံးတွေကတော့ လက်ရှိအချိန်အထိ ရောင်းနေရဆဲ ဖြစ်ပါတယ်။

လက်ရှိ မီးပုံးတွေကိုတော့ မြန်မာငွေ ၁၅၀၀ ကျပ်ကနေ တစ်သောင်းကျော်အထိ ပုံစံပေါ်မူတည်ပြီး စျေးအမျိုးမျိုးနဲ့ ရောင်းနေကြပါတယ်။