နှစ် ၁၆၀ ကျော်သက်တမ်းရှိ ရှေးဟောင်း ပီလခတ်ဟိန္ဒူဘုရားကျောင်း

ဗြိတိသျှကိုလိုနီခေတ် ၁၈၆၀ ပြည့်နှစ်က ရန်ကုန်တိုင်း၊ ကျောက်တန်းမြို့နယ် ပီလခတ်ရွာမှာ အိန္ဒိယနွယ်ဖွား တမီလ်လူမျိုးလယ်သမားတွေ လာရောက်အခြေချ နေထိုင်ခဲ့ပါတယ်။

တမီလ်လယ်သမားကြီး ပူကူးဆာမိက စိုက်ပျိုးရေးလုပ်ရင်း တောထနေတဲ့အပင်ရိုင်းတွေကို ခုတ်ထွင်ရှင်းလင်းပြီး "စရီအန်ဂါလဲ အီစ်ဝရီ-စရီ မဟာမူနီ(စ်)ဝရရ် ဟိန္ဒူဘုရားကျောင်း" (Sri Angala Eswari and Muneeswarar Temple) ကို ဆောက်လုပ်ခဲ့ပါတယ်။

မြန်မာနိုင်ငံတွင်းမှာ သက်တမ်းအရင့်ဆုံး ဟိန္ဒူဘုရားကျောင်းဖြစ်သလို ထီးတင်ပွဲလုပ်တဲ့ ပထမဆုံးဘုရားကျောင်းလည်း ဖြစ်ပါတယ်။ အရင်တုန်းက ဓနိမိုးကျောင်းကို ၂၀၀၃ ခုနှစ်မှာ အုတ်နဲ့ ပြန်လည်တည်ဆောက်ခဲ့ပါတယ်။

ပီလခတ်ဟိန္ဒူဘုရားကျောင်းဟာ ဆုတောင်းပြည့်တယ်လို့ ကျော်ကြားတဲ့အတွက် လာရောက်ဆုတောင်း အဓိဋ္ဌာန်ပြုသူတွေ မပြတ်ရှိနေပါတယ်။

အိန္ဒိယနဲ့ မလေးရှားအပါအဝင် အာရှနိုင်ငံတွေက ဧည့်သည်တွေလည်း လာရောက်ဆုတောင်းကြပါတယ်။ လာရောက်သူမှန်သမျှကို ထမင်းနဲ့ရေ ပြတ်လတ်မှုမရှိစေဘဲ ငှက်ပျောဖက်ခင်းပြီး သားသတ်လွတ်ဟင်းနဲ့ ချက်ပြုတ်ကျွေးမွေးပါတယ်။

ဘုရားကျောင်းပိုင်လယ်မြေတွေမှာ ထွန်ယက်စိုက်ပျိုးပြီး ထွက်သမျှဆန်စပါးကို ပြန်လည်မရောင်းချဘဲ ဘုရားဖူးလာသူတွေကို ပြန်လည်ကျွေးမွေးတာပါ။

ပီလခတ်ဟိန္ဒူဘုရားကျောင်းကို သားတော်ကျောင်း (ဆုတောင်းပြည့် စရီမဟာမူနီ(စ်)ဝရရ် ဘုရား)၊ မယ်တော်ကျောင်း (ဆုတောင်းပြည့် စရီအန်ဂါလဲ အီ(စ်)ဝရီ) နဲ့ကွင်းပိုင်ကြီးကျောင်း(ပူကျီအယား) တွေနဲ့ စုစည်းထားပါတယ်။