ဒီးမော့ဆိုမြို့နယ်က စစ်ဘေးဒုက္ခသည်များ

ကယား (ကရင်နီ) ပြည်နယ်မှာ စစ်ကောင်စီနဲ့ ဒေသခံ တိုင်းရင်းသားလက်နက်ကိုင်တပ်တွေကြား တိုက်ပွဲတွေကြောင့် ဒေသခံတွေ ဘေးလွတ်ရာကို ထွက်ပြေးနေကြရဆဲ ဖြစ်ပါတယ်။

ဒီးမော့ဆိုမြို့နယ်၊ အိုးခုရီနဲ့ နောင်ပုလဲရွာတွေက စစ်ဘေးဒုက္ခသည် လေးရာလောက်ဟာလည်း ဘေးလွတ်ရာကို ထွက်ပြေးတိမ်းရှောင်ကြရင်း ငြိမ်းတောင်ဒုက္ခသည်စခန်းကို ကိုယ်ထူကိုယ်ထ ဆောက်လုပ်ထားကြတာပါ။

ငြိမ်းတောင်ဒုက္ခသည်စခန်းမှာ ခိုလှုံနေရတာ တစ်နှစ်လောက်ရှိပြီမို့ သောက်သုံးရေနဲ့ စားနပ်ရိက္ခာအတွက်လည်း အခက်အခဲဖြစ်နေတယ်လို့ ဆိုပါတယ်။

" ကျနော်တို့ကတော့ အိမ်ပြန်ချင်တာပေါ့။ ကိုယ့်အိမ်ကိုယ့်ယာနဲ့ မနေရတာလည်း တစ်နှစ်နီးပါးရှိနေပြီ။ ဘာမှလည်း လုပ်ကိုင်စားသောက်လို့မှ မရတာ" လို့ နောင်ပုလဲရွာကနေ ထွက်ပြေးလာရတဲ့ အသက် ၃၀ ကျော်အရွယ် စစ်ဘေးဒုက္ခသည် အမျိုးသားတစ်ဦးက ပြောပါတယ်။

ပြီးခဲ့တဲ့ နှစ် မေလမှာ စစ်ကောင်စီတပ်တွေဟာ ဒီးမော့ဆိုမြို့နယ်၊ ဒေါငံခါးကျေးရွာကို လေကြောင်းထိုး တိုက်စစ်ဆင်ခဲ့တာကြောင့် အဲဒီအနီးနား ရွာတွေက ဒေသခံတွေ ထွက်ပြေးခဲ့ကြရတာလို့ ဆိုပါတယ်။

အဲဒီနောက်ပိုင်းကစလို့ အခုအချိန်ထိ တိုက်ပွဲတွေ ဖြစ်နေသေးတာမို့ နေရပ်မပြန်ရသေးဘူးလို့ ပြောကြပါတယ်။ ထပ်မံထွက်ပြေးလာရတဲ့ ဒုက္ခသည်တွေလည်း တိုးလာနေတယ်လို့လည်း ဆိုပါတယ်။

စစ်ကောင်စီဘက်ကတော့ ကယားပြည်နယ်ထဲက နေရာဒေသတချို့မှာ တည်ငြိမ်အေးချမ်းနေလို့ ဒေသခံတွေ နေရပ်ပြန်နေကြပြီလို့ ထုတ်ပြန်ထားပါတယ်။

ကရင်နီ လူ့အခွင့်အရေးအဖွဲ့တွေရဲ့ စာရင်းတွေအရ စစ်တပ်က အာဏာသိမ်းပြီးနောက် ပြည်နယ်တွင်း နေရပ်စွန့်ခွာထွက်ပြေးရတဲ့ ဒုက္ခသည် နှစ်သိန်းလောက် ရှိပါတယ်။