ရေကြီးပြီးနောက် ကလောမြို့က မီးရထားလမ်းမြင်ကွင်း

ရှမ်းပြည်နယ်၊ ကလောမြို့က မီးရထားသံလမ်းတွေကို စက်တင်ဘာလ ၂၄ ရက်နေ့က မြင်တွေ့ရတာဖြစ်ပါတယ်။

မန္တလေးတိုင်း သာစည်ကနေ ရှမ်းပြည်တောင်ပိုင်း ညောင်ရွှေမြို့ကို ပြေးဆွဲနေတဲ့ မီးရထားလမ်းဖြစ်ပြီး၊ ကလောဘူတာနဲ့ မြင်းဒိုက်ဘူတာကြား ရထားလမ်းပိုင်းတွေ အခုလိုပျက်စီးနေတာပါ။

ဒီရထားလမ်းဟာ စစ်ကောင်စီ လက်နက်ခဲယမ်းတွေ သယ်တဲ့နေရာမှာသုံးတဲ့ ရထားလမ်းလည်းဖြစ်တယ်လို့ မြို့ခံတစ်ယောက်က ပြောပါတယ်။

"ဒီနေရာက ကလောဘူတာနဲ့ နီးတဲ့နေရာပါ၊ ကလောဘူတာက နာမည်ကြီးပေမဲ့ မီးရထားကို ပြည်သူတွေ သိပ်မစီးကြပါဘူး။ ရထားလမ်းပျက်သွားတာက ပြည်သူတွေအတွက် မထိခိုက်ပါဘူး။ သူတို့ (စကစ) အဖွဲ့ပဲ လက်နက်ခဲယမ်းတွေကို ဒီရထားလမ်းကနေ သယ်နေတာမို့ သူတို့ပဲ ထိခိုက်မှာပါ"

စက်တင်ဘာလအစောပိုင်းက ကလောမှာ ရေကြီးရေလျှံပြီး မြေပြိုခဲ့တာကြောင့် လူနေအိမ်တွေ၊ ဆေးရုံတွေ ရေမြုပ်ခဲ့တာဖြစ်ပါတယ်။

လမ်းတွေပျက်စီးနေတာကြောင့် လမ်းပန်းဆက်သွယ်ရေးခက်ပြီး၊ ကူညီထောက်ပံ့ရေးပစ္စည်းတွေကို လိုတဲ့သူတွေဆီ အရောက်ပို့နိုင်ဖို့ ခက်ခဲနေတယ်လို့ အကူအညီပေးနေသူတွေကပြောပါတယ်။

ရေကြီးမြေပြိုလို့ နိုင်ငံတစ်ဝန်းသေဆုံးသူ အယောက် ၄ဝဝ ကျော်ရှိတယ်လို့ စစ်ကောင်စီက ပြောထားပါတယ်။

ကလောမှာတော့ သေဆုံးတဲ့သူ အယောက် ၁ဝဝ ကျော်၊ လူ ၂ဝဝ ကျော်ပျောက်ဆုံးနေတယ်လို့ အကူအညီပေးနေသူတွေကပြောပါတယ်။