ရသေ့တောင်တိုက်ပွဲမှာ ရဲ နှစ်ဦး ပျောက်ဆုံးကြောင်း တပ်မတော် ပြော

ရသေ့တောင်မြို့နယ် သဇင်မြိုင်ရဲစခန်းက ရဲဝန်ထမ်းတွေအတွက် လစာသွားထုတ်တဲ့ ရဲဝန်ထမ်း လေးဦးထဲက နှစ်ဦးနဲ့ လစာငွေတွေကို AA အဖွဲ့က မနေ့က မနက်ပိုင်းမှာ ပစ်ခတ်ယူဆောင်သွားတယ်လို့  တပ်မတော်က  ပြောပါတယ်။

ရသေ့တောင်မြို့နယ် သဇင်မြိုင် ရဲစခန်းဝန်ထမ်းတွေရဲ့ လစာတွေကို သွားထုတ်တဲ့ ရဲတပ်ဖွဲ့ဝင် လေးဦးနဲ့ ရက္ခိုင့်တပ်တော် AA တို့ စေတီပြင်ကျေးရွာအနီး မနက် ၁၀ နာရီခွဲလောက်က ပစ်ခတ်မှုဖြစ်ပွားပြီး ရဲဝန်ထမ်း နှစ်ဦး ပျောက်ဆုံးသွားကြောင်း၊ ပါသွားတဲ့ ငွေပမာဏ အတိအကျကို မသိရှိရသေးကြောင်း  တပ်မတော် သတင်းမှန်ပြန်ကြားရေးအဖွဲ့ အတွင်းရေးမှူး ဗိုလ်မှူးချုပ် ဇော်မင်းထွန်းက ပြောပါတယ်။

ပျောက်ဆုံးသွားတဲ့ ရဲဝန်ထမ်း နှစ်ဦးဟာလည်း ရဲစခန်းကိုဒီနေ့ထိ ပြန်မရောက်လာသေးကြောင်း တပ်မတော် သတင်းမှန်ပြန်ကြားရေးအဖွဲ့ အတွင်းရေးမှူး ဗိုလ်မှူးချုပ် ဇော်မင်းထွန်းက ပြောပါတယ်။

“ကျတော်တို့ ဖမ်းဆီးတဲ့ သတင်းတော့ မရသေးဘူး မနေ့ကတော့ ရသေ့တောင်က သတင်းသဇင်မြိုင် ရဲကင်းစခန်းက လေးယောက် စေတီပြင်ကို လစာသွားထုတ်တာပေါ့ လစာသွားထုတ်ရင်းနဲ့ ပြန်ထွက်တဲ့ နေရာမှာ စေတီပြင်ရဲ့အနောက်မြောက်ဘက်လောက်မှာ AA ကနေပြီး လက်နက်ငယ်နဲ့ ပစ်ခတ်ခဲ့တယ် ရဲအဖွဲ့ကလည်း ပြန်ပစ်တယ် ပြန်ပစ်ပြီးတော့ကျတော့ လေးဦး ပါသွားတယ်လို့တော့ သိရတယ်ဗျ နှစ် ဦးကတော့ ရဲကင်းစခန်း ပြန်ရောက်ခဲ့ပြီး နှစ်ဦးကတော့ ပျောက်နေတယ် ဖမ်းခေါ်သွားတာလား ကျတော် သိရသလောက်တော့ ဒီမနက်ထိတော့ မတွေ့သေးဘူးလို့ သိရတယ်”

ရက္ခိုင့်တပ်တော် AA ရဲ့ ပြောရေးဆိုခွင့်ရှိသူ ခိုင်သုခ ကတော့ လစာထုတ်ပြီး ပြန်လာတဲ့ ရဲဝန်ထမ်းတွေကို ဖမ်းဆီးတယ်ဆိုတဲ့ သတင်းတော့ မရောက်သေးကြောင်း ပြောပါတယ်။

“ကျတော်တို့ဘက်က ဖမ်းဆီးတယ်ဆိုတဲ့ ဖြစ်စဉ်မျိုးတော့ ကျတော့်ဆီကို ဘာမှရောက်လာတာတော့ မရှိသေးဘူး ဒါမယ့် ဖြစ်နိုင်ချေရှိတာကတော့ လစာသွားထုတ်သူဆိုတဲ့ဟာက အထုတ်ကိုယူလာပြီး တော့မှ သူ့ဟာသူထွက်ပြေးသွားတာတွေလည်း ဖြစ်နိုင်ချေရှိတာပေါ့ ဘာကြောင့်လဲဆိုလို့ရှိရင် ရခိုင် ပြည်တွင်းထဲမှာ ရှိနေတဲ့ ရဲတပ်ဖွဲ့တွေက သူတို့မှာလည်း စိတ်ဓာတ်ရေးရာတွေ ပျက်ပြားပြီးတော့မှ အကြောက်တရားတွေ လွှမ်းမိုးပြီးတော့ နေရတာ လစာသွားထုတ်လို့ရှိရင် အဲဒီပိုက်ဆံ ယူပြီးတော့ ပြေးသွားတာလည်း ဖြစ်နိုင်သလို ဘူးသီးတောင်နဲ့ ရသေ့တောင်ဘက်မှာက မြန်မာစစ်တပ်ကနေပြီး တော့ မွေးစားထားတဲ့ လူဆိုးဒါးမြတွေလည်း ရှိတယ်ဗျ ဂိုဏ်းတွေလေ”

ရသေ့တောင်မြို့နယ် ပြည်သူ့လွှတ်တော် ကိုယ်စားလှယ် ဒေါ်ခင်စောဝေကလည်း ပစ်ခတ်မှုဖြစ်စဉ်နဲ့  ပတ်သက်ပြီး မှန်ကန်ကြောင်း စေတီပြင်ကျေးရွာအနီး သေနတ်သံတွေကြားရတဲ့အကြောင်း  ကျေးရွာသားတွေဆီက သိရတယ်လို့ ပြောပါတယ်။

“သဇင်မြိုင်ရဲစခန်းက လစာလာထုတ်တာပေါ့ အန်တီတို့လည်း ရွာသားတွေ ပြောတဲ့အတွက် သိရတာပါ ဝန်ထမ်းလာစာတွေကို ထုတ်ဖို့လာတယ်ပေါ့ စေတီပြင်ကို အဲဒီမှာ အပြန်မှာ နည်းနည်း သေနတ်သံတွေ ကြားလိုက်ကြတယ်တဲ့ ရဲသားနှစ်ဦး ဖမ်းခံရတယ်ဆိုတာတော့ ဒေသခံတွေပြောစကားအရ သိရတာပါ ”

လစာလာထုတ်တဲ့ ရဲတပ်ဖွဲ့ဝင်တွေကို ဘယ်အဖွဲ့ကဖမ်းဆီးသွားဆိုတာ မသိရှိကြောင်း လစာငွေတွေကို ယူဆောင်သွားခြင်း ရှိမရှိကို မသိကြောင်း ဒေါ်ခင်စောဝေက ပြောပါတယ်။

လစာသွားထုတ်တဲ့ ရဲဝန်ထမ်း လေးဦးထဲက နှစ်ဦးကတော့ ပြန်ရောက်လာကြပြီး ပျောက်ဆုံးနေတဲ့ ရဲဝန်ထမ်း နှစ်ဦးနဲ့ ပတ်သက်ပြီး သက်ဆိုင်ရာ ရဲစခန်းကို ဆက်သွယ်ပေမယ့်  ဖုန်းလက်ခံဖြေကြားခြင်း မရှိပါဘူး။

ရခိုင်ပြည်နယ်မြောက်ပိုင်းက မြို့နယ်တွေမှာ တပ်မတော်နဲ့ AA တို့ တိုက်ပွဲတွေပြင်းထန်နေပြီး ဒီဇင်ဘာ ၂၈ ရက်နေ့က ရခိုင်ပြည်နယ် မြောက်ပိုင်းမှာ တာဝန်ထမ်း ဆောင်နေတဲ့ ခမရ ၅၃၆ က ဗိုလ်မှူး  တစ်ယောက် ကျဆုံးသွားကြောင်း နာရေးဖိတ်စာ တစ်စောင်ဟာ လူမှုကွန်ရက်စာမျက်နှာပေါ်မှာ တက်လာပါတယ်။

အဲဒီအရာရှိ ကျဆုံးတယ် ဆိုတဲ့ကိစ္စနဲ့ပတ်သက်လို့  တပ်မတော် သတင်းမှန် ပြန်ကြားရေးအဖွဲ့  အတွင်းရေးမှူး ဗိုလ်မှူးချုပ်  ဇော်မင်းထွန်းက အတည်မပြုနိုင်ကြောင်း ပြောပါတယ်။

ရခိုင်ပြည်နယ်မှာ မြန်မာ့တပ်မတော်နဲ့ AA တို့ရဲ့ တိုက်ပွဲတွေကြောင့် ၂၀၁၉ ခုနှစ်အတွင်း စစ်ဘေး  ဒုက္ခသည် ၁ သိန်းကျော်ရှိခဲ့ပြီး ထိခိုက်ဒဏ်ရာရှိသူ ၁၂၀ ကျော်၊ သေဆုံးသူ ၉၀ နီးပါးရှိနေပြီလို့ အရပ်ဖက်အဖွဲ့တွေရဲ့  စာရင်းတွေအရ သိရပါတယ်။