မြန်မာ့နိုင်ငံရေး ပိုမိုပြောင်းလဲဖို့ လိုသေး ကိုဇာဂနာ ပြော
ကိုမင်းကိုနိုင် အပါအဝင် နိုင်ငံရေး အကျဉ်းသား အတော်များများ လွတ်လာတယ် ဆိုပေမယ့် ပုဒ်မ ၄၀၁ နဲ့ လွှတ်ပေး လိုက်တာဖြစ်လို့ အပြည့်အဝ ဝမ်းသာစရာ မဟုတ်ဘူးလို့ အမေရိကန် ပြည်ထောင်စုကို ခေတ္တ ရောက်နေတဲ့ လူရွှင်တော် ကိုဇာဂနာက မနေ့က ပြောလိုက်ပါတယ်။
-
2012-01-31 -
-
-
အမေရိကန်နိုင်ငံ ဒါးလပ်စ်လေဆိပ်သို့ ရောက်ရှိလာသော ဟာသပညာရှင် ဇာဂနာကို RFA မှတွေ့ဆုံမေးမြန်းနေစဉ်
RFA
လက်ရှိ မြန်မာ့နိုင်ငံရေးဟာ ပြောင်းလဲ နေတယ်ဆိုပေမယ့် ဒီထက်မက ပိုပြီးလုပ်ရမှာတွေ ရှိသေးတယ်လို့ ကိုဇာဂနာက ပြောပါတယ်။ အမေရိကန် ပြည်ထောင်စု အရှေ့ဘက်ခြမ်း ဒါးလပ်စ်လေဆိပ် အရောက်မှာ အာအက်ဖ်အေကို ပြောလိုက်တာပါ။
ကိုဇာဂနာနဲ့အတူ NLD က ဒေါ်ခင်သန်းမြင့်၊ NDF ပါတီက ဒေါ်ဘောက်ဂျာတို့ဟာ မနက်ဖြန် ဖေဖေါ်ဝါရီ ၂ ရက် မနက်မှာတော့ ဝါရှင်တန် ဒီစီမြို့တော်မှာရှိတဲ့ National Endowment for Democracy လို့ခေါ်တဲ့ မြန်မာအပါအဝင် ကမ္ဘာတစ်ဝန်း ဒီမိုကရေစီရေးကို ထောက်ပံ့ နေတဲ့အဖွဲ့က ကြီးမှူးကျင်းပတဲ့ မြန်မာ့အရေး ဟောပြောပွဲမှာ တက်ရောက် ဆွေးနွေးမှာ ဖြစ်ပါတယ်။
ကိုဇာဂနာဟာ ဖေဖော်ဝါရီ ၄ ရက်မှာတော့ မေရီလန်း၊ ဗာဂျီနီးယားနဲ့ ဝါရှင်တန် ဒီစီပြည်နယ် ၃ ခုမှာ နေထိုင်တဲ့ မြန်မာတွေနဲ့ တွေ့ဆုံပါမယ်။ အဲဒီနောက် နယူးယောက်မြို့ကို ခရီးဆက်မှာ ဖြစ်ပြီး မိသားစုရှိရာ လော့စ်အိန်ဂျလိစ်မြို့ကိုသွားဖို့လည်း စီစဉ်ထားပါတယ်။