တောင်ကြီးနဲ့ ချောင်းဆုံ NLD ပါတီအလုပ်အမှုဆောင်တွေကိစ္စ စုံစမ်းစစ်ဆေးမည်

ဗဟိုအလုပ်အမှုဆောင်အစည်းအဝေး ဆုံးဖြတ်ချက်အရ ဖွဲ့စည်းလိုက်တဲ့ အဲဒီစစ်ဆေးရေးအဖွဲ့ဟာ တစ်လအတွင်း စစ်ဆေးသွားမှာဖြစ်တယ်လို့လည်း ဦးဝင်းထိန်က ပြောပါတယ်။

တောင်ကြီးမြို့NLD ပါတီ ဥက္ကဌ၊ ဒုတိယဥက္ကဌ အပါအဝင် အလုပ်အမှုဆောင် ၁၄ ဦးကို ဦးဝင်းထိန် လက်မှတ်နဲ့ ထုတ်ပယ်လိုက်ကြောင်း ပြီးခဲ့တဲ့ ဇူလိုင်လ ၅ ရက်နေ့က အကြောင်းကြားစာ ပေးပို့ခဲ့တာဖြစ်တယ်လို့ သတင်းမီဒီယာတွေမှာ ဖော်ပြခဲ့ကြတာဖြစ်ပါတယ်။

တောင်ကြီးက NLD ပါတီအလုပ်အမှုဆောင် ၁၄ဦးထဲမှာ ကိုယ်တိုင်နှုတ်ထွက်စာ တင်ထားသူတွေ ရှိသလို ပါတီနဲ့ ကင်းကွာနေသူတွေ ပါဝင်တယ်လို့လည်း ဦးဝင်းထိန်က ပြောပါတယ်။

ပြီးခဲ့တဲ့ ကြားဖြတ်ရွေးကောက်ပွဲမှာ ချောင်းဆုံမြို့နယ် ကိုယ်စားလှယ်လောင်း ရွေးချယ်မှုအပေါ် မကျေနပ် တာကြောင့် ဆန္ဒပြတာ၊ အောင်နိုင်ရေး မလုပ်တာတွေကြောင့် အမျိုးသားဒီမိုကရေစီအဖွဲ့ချုပ်ပါတီ ချောင်းဆုံမြို့နယ် အလုပ်အမှုဆောင်အဖွဲ့ဝင် ၂၁ ဦးကို တာဝန်ကနေယာယီရပ်ဆိုင်းထားပြီး စစ်ဆေးနေတာဖြစ်တယ်လို့ သိရပါတယ်။

ဒီနေ့ ကျင်းပတဲ့ ဗဟိုအလုပ်အမှုဆောင်ကော်မတီ အစည်းအဝေးမှာ ပါတီလူငယ်စည်းရုံးရေးအတွက် ကော်မတီ တစ်ရပ် ဖွဲ့စည်းဖို့လည်း ဆုံးဖြတ်ခဲ့တယ်လို့ သိရပါတယ်။

အစည်းအဝေးကို ပါတီရဲ့ ဗဟိုအလုပ်အမှုဆောင်အဖွဲ့ဝင်တွေဖြစ်တဲ့ ဦးဝင်းထိန်၊ ဦးဝင်းမြင့်၊ ဒေါက် တာဇော်မြင့်မောင်၊ ဦးဖြိုးမင်းသိန်း၊ ဒေါက်တာမေဝင်းမြင့်တို့ အပါအဝင် ၁၄ ဦး တက်ရောက်ခဲ့ပါတယ်။