ရောဂါဆန်းကြောင့် ဝက်များ သေဆုံးမှု ပိုမိုတိုးပွား

• 
  2011-06-01

ပြီးခဲ့တဲ့ မေလ ၂၅ ရက်နေ့က ဒီသတင်းနဲ့ ပတ်သက်လို့ RFA က ထုတ်ပြန်ခဲ့ရာမှာ ဖော်ပြခဲ့တဲ့ ဝက်သေဆုံးမှုထက် အဲဒီနောက်ပိုင်း ဒီနေ့အထိ သေဆုံးမှုဟာ ၃ ဆလောက် ပိုတိုးနေပြီလို့ သိရပါတယ်။

မြို့နယ်အာဏာပိုင်တွေကတော့ အခြား ကိစ္စမျိုးတွေဆိုရင် လိုက်လံ ကြေညာတာတွေ ရှိခဲ့ပြီး အခု ဝက်တွေ ရောဂါကူးစက်ပြီး သေဆုံးနေတဲ့ ကိစ္စမှာတော့ အသိပေးတာ၊ ကူညီတာ မရှိဘူးလို့ ဒေသခံတွေက ပြောပါတယ်။

ဒီအခြေအနေနဲ့ ပတ်သက်လို့ နတ္တလင်းမြို့က ဝက်မွေးမြူရေးလုပ်ငန်းရှင် ဦးလှဦးက အခုလိုပြောပါတယ်။

“ကျွန်တော်ဆိုရင် ဝက်ခြံမှာ အခု အကောင် ၅၀ ကျော်၊ အခု ဟိုဟာ ၁၈ ကောင်ပဲ ရှိတော့တယ်။ ၃၀ လောက်က သေသွားပြီ။ ၃၁ ကောင် သေလို့ မြှုပ်ပြီး ခုပဲ မြှုပ်ပြီး ခဏ ပြန်လာတုန်း ရှိသေးတယ်။ တချို့နေရာမှာဆို ရောဂါကူးလို့ ခွေးတောင်မှ သေတယ် ပြောနေကြပြီ။ အမှန်ဆိုရင်တော့ပေါ့ဗျာ၊ ကိစ္စဝိစ္စ ရှိတယ်ဆို အရင် သူတို့ အသံချဲ့စက်နဲ့ ဘာနဲ့ ဒီလိုပဲ တမြို့လုံးလိုက် အော်တာပေါ့။ ထုံးစံရှိတာ။ ဒီဥစ္စာဆိုလည်း အမှန် မြို့နယ်ကို အသိပေးဖို့တော့ ကောင်းတာပေါ့။ ကျွန်တော်တို့ ကြောက်တာက ဝက်တွေ ခွေးတွေကတဆင့် တခါ လူတွေကို ကူးလာရင် ဘယ်လိုလုပ်မလဲ။ တာဝန်ရှိသူတွေက ကြပ်ကြပ်မတ်မတ်နဲ့ တခါတည်း ကျင်းနက်နက် တူးမြှုပ်တာတို့ ဒါမျိုးတွေ ဖြစ်စေချင်တာပေါ့။”