စိုက်ပျိုးစရိတ်ချေးငွေ ပြန်ဆပ်ရမယ့် ကာလကို ရွှေ့ဆိုင်းပေး ဖို့ မြောက်ဦးတောင်သူတွေ ဆန္ဒပြ

• 
  2017-02-25

ရခိုင်ပြည်နယ်၊ မြောက်ဦးမြို့နယ်မှာ စပါးဈေးနှုန်းတွေ ကျဆင်းနေပြီး ဝယ်ယူသူမရှိဖြစ်နေတဲ့အတွက်  စိုက်ပျိုးစရိတ် ချေးငွေ ပြန်လည်ပေးဆပ်ရမယ့်ကာလကို ရွှေ့ဆိုင်းပေးဖို့ ဒေသခံ တစ်ထောင် ခန့်က ဒီနေ့ ဆန္ဒပြတောင်းဆိုကြပါတယ်။

ဒေသခံတောင်သူတွေဆီမှာ စပါးတောင်း တစ်ထောင်ကနေ သောင်းနဲ့ချီပြီး အရောင်းဝယ်မဖြစ်ဘဲ ရှိနေတယ်လို့ ဆန္ဒပြပွဲမှာပါဝင်တဲ့ မြောက်ဦးမြို့နယ် ထမ္မရာဇ်ရပ်ကွက်က ဦးလှအောင်စိန် က ပြောပါတယ်။

"ဧကများရင် များသလောက်ပေါ့နော် အနည်းဆုံးလယ်သမားတွေဆီမှာ တစ်ထောင်၊ နှစ်ထောင် သောင်းကို ချီပြီးရှိတာပေါ့။ တစ်ထောင်ကနေပြီး သောင်းကိုချီလို့ရှိပါတယ်။ အန်ကယ်တို့က အခက်အခဲရှိတာက စိုက်ဘဏ်ကနေ အန်ကယ်တို့ကို နောက်ဆုတ်ပေးဖို့ ဆိုင်းငံ့ပေးဖို့နဲ့ နည်းနည်းလောက် စာနာထောက် ထားပေးဖို့ပေါ့နော်။ "

မြောက်ဦးမြို့နယ် ထမ္မရာဇ်၊ အုတ်ဖိုကန်၊ မောင်ရွှေကန်၊ သံချောင်းရွာသစ်နဲ့ ရွာဟောင်း၊ ပီပင်ရင်း ၊ ပေါက်တောပြင်၊ ဝေသာလီ စတဲ့ကျေးရွာ ၂၀ ခန့်က ဒေသခံတောင်သူ တစ်ထောင်ခန့်ဟာ မြောက်ဦးမြို့နယ် ရှစ်သောင်းဘုရားကြီးရှေ့ကနေ စတင်ပြီး မြို့တပတ် လမ်းလျှောက် ဆန္ဒထုတ်ဖော်ခဲ့ကြတာ ဖြစ်ပါတယ်။

ဒေသခံတွေအနေနဲ့ တစ်ဧကကို တစ်သိန်းခွဲနှုန်းနဲ့ အများဆုံး ကျပ် ၁၅ သိန်းခန့် စိုက်ပျိုးရေးနဲ့ မွေးမြူရေးဘဏ် က ချေးငွေယူထားတာဖြစ်ပြီး လာမယ့် ဧပြီလ ၁၅ ရက်နေ့ နောက်ဆုံးထားပြီး ချေးငွေတွေကို အတိုးနဲ့ပြန် လည်ပေးဆပ်ရမှာ ဖြစ်ပါတယ်။

ဒေသခံတွေကြုံတွေ့နေရတဲ့အခက်အခဲတွေကို ကူညီဖြေရှင်းပေးဖို့ ဒီလဆန်းပိုင်းမှာ တောင်သူ ၄၀၀ ကျော်က စုပေါင်းလက်မှတ်ရေးထိုးပြီး နိုင်ငံတော်သမ္မတနဲ့ နိုင်ငံတော် အတိုင်ပင်ခံပုဂ္ဂိုလ်ထံ မေတ္တာရပ်ခံစာပေးပို့ ထားပေမယ့် ထူးခြားမှုမရှိသေးတာကြောင့် ဒီနေ့ ဆန္ဒထုတ်ဖော်ကြတာ ဖြစ်တယ်လို့ ဆန္ဒပြသူတွေ က ပြောပါတယ်။