မင်းရွာအုပ်ချုပ်ရေးမှူးက ဦးလှဆွေ ကို တရားစွဲ
မကွေးတိုင်း၊ ဂန့်ဂေါမြို့နယ်၊ မင်းရွာ အုပ်ချုပ်ရေးမှူးက အမျိုးသားလွှတ်တော် ကိုယ်စားလှယ်ဟောင်း ဦးလှဆွေ ကို ဆက်သွယ်ရေး ဥပဒေပုဒ်မ ၆၆ ဃ နဲ့အမှုဖွင့်ထားပါတယ်။
-
2016-12-21 -
-
-
မကွေးတိုင်း၊ ဂန့်ဂေါမြို့နယ်၊ မင်းရွာအုပ်ချုပ်ရေးမှူးက အမျိုးသားလွှတ်တော်ကိုယ်စားလှယ်ဟောင်း ဦးလှဆွေ ကို ဆက်သွယ်ရေး ဥပဒေပုဒ်မ ၆၆ ဃ နဲ့ အမှုဖွင့်ထားပါတယ်။
ရဲတပ်ဖွဲ့က အမှုလာဖွင့်တဲ့ တရားလိုဘက်က သက်သေတွေကို စစ်ဆေးနေဆဲဖြစ်တယ်လို့ ဂန့်ဂေါမြို့နယ် ရဲတပ်ဖွဲ့မှူးရဲမှူး ဝင်းထွဋ်က ပြောပါတယ်။
"မှန်ပါတယ်ခင်ဗျ။ မှန်ပါတယ်။ ဂန့်ဂေါမြို့မ ရဲစခန်းကနေ အမှုဖွင့်ထားပါတယ်ခင်ဗျ။ အခုတော့ ကျနော်တို့ တရားလိုသက်သေတွေကို စစ်ဆေးနေတုန်းပေါ့နော်။ ကျန်တာတွေကတော့ အမှုက စစ်ဆေးဆဲကာလ ဆိုတော့ ပြောလို့မရသေးပါဘူးခင်ဗျ"
ပြီးခဲ့ဲဲတဲ့ စက်တင်ဘာလ ၂၀ ရက်နေ့တုန်းက ဦးလှဆွေ က သူ့ရဲ့ Facebook စာမျက်နှာမှာ မင်းရွာနဲ့ အဲဒီနားက ရွာတချို့မှာ စုန်းအတတ် တဖက်ကမ်းခတ်သူတွေ ရှိတယ်ဆိုပြီး ရေးသားခဲ့ပါတယ်။
အဲဒီလိုရေးသားခဲ့တဲ့အတွက် ဦးလှဆွေ ကို Facebook ပေါ်ကနေ ပြန်လည်တုန့်ပြန်ရေးသားခဲ့တဲ့ မင်းရွာသူ မဇင်မာကြည် ကို ဦးလှဆွေ က ဆက်သွယ်ရေး ဥပဒေပုဒ်မ ၆၆ (ဃ) နဲ့ ဒီဇင်ဘာ ၁၇ ရက်နေ့က အမှုဖွင့်ခဲ့ပါတယ်။
မင်းရွာအုပ်ချုပ်ရေးမှူး ဦးတင်မြတ် က သူတို့ရွာကို ဂုဏ်သိက္ခာကျဆင်းအောင် Facebook ပေါ်မှာ ရေးသားခဲ့တယ် ဆိုပြီး ဦးလှဆွေကို ဂန့်ဂေါမြို့နယ် ရဲစခန်းမှာ ဒီဇင်ဘာလ ၁၉ ရက်နေ့က ဆက်သွယ်ရေးဥပဒေ ပုဒ်မ ၆၆ (ဃ) နဲ့ပဲ ပြန်လည်အမှုဖွင့်ခဲ့တာ ဖြစ်ပါတယ်။
ဦးလှဆွေဟာ ပြီးခဲ့တဲ့ ပထမအကြိမ် လွှတ်တော်သက်တမ်းတုန်းက ထီးလင်းမြို့နယ်၊ ဆောမြို့နယ်နဲ့ ဂန့်ဂေါမြို့နယ်ကို ကိုယ်စားပြုတဲ့ အမျိုးသားလွှတ်တော် ကိုယ်စားလှယ်တစ်ယောက် ဖြစ်ပါတယ်။