အာဏာသိမ်းပြီးနောက် ကယားမှာ အရပ်သားလေးရာကျော် သတ်ဖြတ်ခံရ

• RFA Burmese
  2023-07-22

စစ်အာဏာသိမ်းပြီးနောက် ကယား(ကရင်နီ)ပြည်နယ်မှာ အရပ်သားလေးရာကျော် သတ်ဖြတ်ခံခဲ့ရတယ်လို့ ကရင်နီလူမှုအသင်းအဖွဲ့များကွန်ရက်က ထုတ်ပြန်ပါတယ်။

အာဏာသိမ်းစစ်ကောင်စီဟာ အရပ်သားပြည်သူတွေကို ပစ်မှတ်ထားတိုက်ခိုက်ခဲ့ကြောင်း နိုင်ငံတကာတရားရုံးတွေမှာ သက်သေအဖြစ်တင်သွင်းနိုင်ဖို့ အချက်အလက်တွေကို ကရင်နီလူမှုအသင်းအဖွဲ့များကွန်ရက်က စာရင်းပြုစုနေတာဖြစ်ပါတယ်။

အာဏာသိမ်းတဲ့ ၂ဝ၂၁ ခုနှစ် ဖေဖော်ဝါရီလကစလို့ ဒီနေ့အထိ ကယားပြည်နယ်မှာ တိုက်ပွဲတွေကြား နေရပ်စွန့်ခွာထွက်ပြေးရတဲ့ ဒုက္ခသည် နှစ်သိန်းသုံးသောင်းကျော် ရှိတယ်လို့လည်း ဆိုပါတယ်။

ကရင်နီလူမှုအသင်းအဖွဲ့ကွန်ရက် တာဝန်ခံ ခူးကိုရယ်က " ဘာသာရေးအဆောက်အအုံတွေ၊ အရပ်သားတွေရှိတဲ့နေရာတွေ၊ IDP စခန်းတွေအထိ လေကြောင်းတွေတိုက်ခိုက်တဲ့ ကြီးမားတဲ့လူ့အခွင့်အရေးချိုးဖောက်မှုတွေအများကြီးရှိတယ်။ တစ်နေ့နေ့ကျရင် ဒီအချက်အလက်တွေကနေ ဘယ်လိုများတရားပြန်စွဲနိုင်မလဲဆိုတဲ့အဆင့်အထိ ရောက်အောင်သွားဖို့တော့ ကျွန်တော်တို့ရှိတယ်" လို့ပြောပါတယ်။

ကယားပြည်နယ်တွင်း လတ်တလောတိုက်ပွဲတွေ ပြင်းထန်နေပေမဲ့ စစ်ကောင်စီကတော့ ကယားပြည်နယ်မှာ တိုက်ပွဲတွေမရှိတော့ဘဲ ဒေသခံတွေနေရပ်ပြန်နေပြီဖြစ်ကြောင်း သတင်းစာတွေမှာ မကြာခဏဖော်ပြလေ့ရှိပါတယ်။

အရပ်သားတွေသတ်ဖြတ်ခံရတာနဲ့ ပတ်သက်လို့ မေးမြန်းဖို့ စစ်ကောင်စီ ကယားပြည်နယ်ပြောခွင့်ရသူဆီ RFA က ဖုန်းဆက်မေးမြန်းခဲ့ပေမဲ့ ဖြေဆိုတာ မရှိပါဘူး။

ကယားပြည်နယ်တွင်း တိုက်ပွဲတွေကြောင့် ဒေသခံတွေဟာ နီးစပ်ရာတောတောင်တွေထဲ ထွက်ပြေးတိမ်းရှောင်နေရပြီး၊ ဒေသခံကိုးထောင်ကျော် ထိုင်းနိုင်ငံဘက်ကို ထွက်ပြေးနေရတယ်လို့ အကူအညီပေးနေသူတွေကပြောပါတယ်။