အလွတ်သတင်းထောက်နှစ်ဦး အသတ်ခံရမှု RSF တုန်လှုပ်ချောက်ချား

• RFA Burmese
  2024-08-26

မွန်ပြည်နယ် ကျိုက်ထိုမြို့မှာ အလွတ်သတင်းထောက် ကိုဝင်းထွဋ်ဦးနဲ့ ကိုထက်မြတ်သူတို့ကို စစ်ကောင်စီတပ်ဖွဲ့ဝင်တွေက ဒီလ ၂၁ ရက်က ပစ်သတ်မှုကို တုန်လှုပ်ချောက်ချားရတယ်လို့ နယ်စည်းမခြား သတင်းထောက်များအဖွဲ့ (RSF) က သြဂုတ် ၂၆ ရက်ကထုတ်ပြန်တဲ့ ကြေညာချက်မှာ ဖော်ပြလိုက်ပါတယ်။

ဒီသတင်းထောက်တွေနဲ့ပါဆို ၂၀၂၁ စစ်အာဏာသိမ်းပြီးချိန်ကစလို့ သတင်းသမား ခုနစ်ယောက် သေဆုံးရပြီလို့ ဆိုပါတယ်။

ကိုထက်မြတ်သူအိမ်ကို စစ်ကောင်စီတပ်သား ၂၀ စီးနင်းဝင်ရောက်ချိန်မှာ သတ်ဖြတ်လိုက်တာဖြစ်ပြီး စစ်သားတွေက ချက်ချင်း သင်္ဂြိုဟ်လိုက်တယ်လို့ RSF က ပြောပါတယ်။

စစ်ကောင်စီကို လိုလားတဲ့ အဖွဲ့တွေက ဒီသတင်းထောက်နှစ်ယောက်ဟာ ‌စစ်ကောင်စီကို တိုက်ခိုက်နေတဲ့တပ်ဖွဲ့ဝင်တွေလို့ လူမှုမီဒီယာတွေမှာ ရေးသားပေမဲ့ သူတို့တွေဟာ သတင်းထောက်အလုပ်ဆက်လုပ်နေတယ်လို့ သူတို့လုပ်ကိုင်ခဲ့ဖူးတဲ့ ဒီမိုကရက်တစ် မြန်မာ့အသံ (DVB) နဲ့ The National Voice တို့က အတည်ပြုပြောကြားတယ်လို့ ကြေညာချက်မှာ ပါရှိပါတယ်။

RSF က ပြုစုတဲ့ ၂၀၂၄ သတင်းလွတ်လပ်ခွင့်ညွှန်းကိန်းမှာ မြန်မာနိုင်ငံဟာ နိုင်ငံ ၁၈၀ မှာ အဆင့် ၁၇၁ မှာရှိနေပြီး ကမ္ဘာမှာ သတင်းသမားတွေကို ထောင်အချဆုံး တစ်နိုင်ငံဖြစ်ပါတယ်။

တရုတ်နိုင်ငံပြီးရင် ဒုတိယမြောက် သတင်းသမားတွေကို အကျဉ်းအချဆုံး နိုင်ငံဖြစ်ပြီး အခုဆို သတင်းသမား ၆၂ ယောက် အကျဉ်းကျနေပါတယ်။