ပဲခူးဗုံးခွဲမှုမှာ မတရား ဖမ်းဆီးခဲ့ကြောင်း အာရှလူ့အခွင့်အရေး ကော်မရှင်က ကုလသမဂ္ဂကို တင်ပြ

• 
  2011-08-19

အင်းစိန်ထောင်တွင်း အထူးတရားရုံးက စစ်ဆေးချက်တွေမှာ တရားခံအဖြစ် စွပ်စွဲခံထားရသူတွေ အနေနဲ့ ဗုံးပေါက်ကွဲမှုမှာ ပါဝင် ပတ်သက် ပါတယ်ဆိုတဲ့ သက်သေ အထောက်အထား ခိုင်ခိုင်လုံလုံ မပြနိုင်တဲ့အပြင် အမှုတွဲမှာ ပါဝင်တဲ့ သက်သေခံ ပစ္စည်းတွေကိုလည်း မတင်ပြနိုင်ခဲ့ကြောင်း၊ သက်သေခံ စာရင်းတွေကလည်း လုပ်ထုံး လုပ်နည်းနဲ့ အညီမဟုတ်ကြောင်း၊ ဥပမာ စာရွက်လွတ် ပေါ်မှာ လက်မှတ် ထိုးခိုင်းတာတွေ ရှိကြောင်း ကော်မရှင်ရဲ့ ပြောခွင့်ရပုဂ္ဂိုလ် ရှေ့နေ ဦးမင်းလွင်ဦးက ပြောပါတယ်။

ဒါကြောင့် အရပ်သား (၁၁) ဦးလုံးဟာ မတရား ဖမ်းဆီးထိန်းသိမ်း ခံထားရသူတွေဖြစ်ကြောင်း ပေါ်လွင်တဲ့ အထောက်အထား၊ စာရွက် စာတမ်းတွေကို စုစည်းပြီး ကုလသမဂ္ဂ လူ့အခွင့်အရေး ကောင်စီနဲ့ နိုင်ငံတကာ လူ့အခွင့်အရေး အဖွဲ့တွေကို ဒီကနေ့ရက်စွဲနဲ့ တင်ပြ လိုက်တယ်လို့ ဦးမင်းလွင်ဦး က ပြောပါတယ်။

သူတို့ (၁၁) ဦးအမှုအတွက် အကျိုးဆောင်ရှေ့နေ အဖြစ် အမျိုးသား ဒီမိုကရေစီ အဖွဲ့ချုပ် ဥပဒေ အထောက်အကူပြုအဖွဲ့ဝင် ရှေ့နေ ဦးကျော်ဟိုး က လိုက်ပါ ဆောင်ရွက်နေပါတယ်။ စွပ်စွဲခံထားရသူ အများစုဟာ ကရင် တိုင်းရင်းသားတွေ ဖြစ်ပြီး( ၉) ဦးက အမျိုးသား၊ ကျန် (၂) ဦးက အမျိုးသမီးတွေ ဖြစ်ပါတယ်။