မြန်မာ့အရေး ပစ်ပယ်မထားကြဖို့ တိုရူကူဘိုတာ တောင်းဆို

• စောဖိုးခွား (ဝါရှင်တန်ဒီစီ)
  2022-12-08

အင်းစိန်ထောင်ကနေ ပြန်လွတ်လာတဲ့ မှတ်တမ်းရုပ်ရှင်ရိုက်ကူးသူ ဂျပန်နိုင်ငံသား တိုရူကူဘိုတာက သူအပါအဝင် ဖမ်းဆီးခံ နိုင်ငံခြားသားတွေကို ပြန်လွှတ်ပေးလိုက်ရုံနဲ့ စစ်ကောင်စီရဲ့ ရက်စက်ယုတ်မာမှုတွေကို ဖုံးကွယ်ထားလို့ရမှာ မဟုတ်ဘူးလို့ RFA နဲ့ သီးသန့်မေးမြန်းခန်းမှာ ပြောဆိုလိုက်ပါတယ်။ သူ့ကို ဖမ်းဆီးတဲ့ ပထမဆုံးရက်မှာ ကောင်းကောင်းမွန်မွန် ဆက်ဆံပေမဲ့ သူရိုက်ထားတဲ့ ရိုဟင်ဂျာမှတ်တမ်းရုပ်ရှင်ကို ရှာဖွေတွေ့ရှိသွားတဲ့နောက်မှာတော့ ငရဲခန်းကို ပို့မယ်ဆိုပြီး ဆက်ဆံရေးတွေပြောင်းသွားတယ်လို့ ဆိုပါတယ်။ မြန်မာစစ်သားတွေဟာ ရိုဟင်ဂျာကို ရန်သူလို သဘောထားနေတယ်လို့လည်း ပြောပါတယ်။ ယူကရိန်းကို ကူညီသလို မြန်မာ့အရေးကိုလည်း ပစ်မထားကြဖို့နဲ့ ဂျပန်အစိုးရအပါအဝင် နိုင်ငံတကာအနေနဲ့ စစ်ကောင်စီရဲ့ငွေရလမ်းပေါက်တွေကို ပိတ်ဆို့ဖို့လည်း သူကတောင်းဆိုပါတယ်။ RFA ဝိုင်းတော်သား စောဖိုးခွား ပြီးခဲ့တဲ့ အင်္ဂါနေ့က ဆက်သွယ်မေးမြန်းထားပါတယ်။
​__________
မေး - ပထမဆုံးအနေနဲ့ မစ္စတာ တိုရူကူဘိုတာက ဘာကြောင့် မြန်မာနိုင်ငံမှာ ရှိနေရတာလဲခင်ဗျာ့။

■ ကျွန်တော် မြန်မာနိုင်ငံကို ဒါပထမဆုံးသွားတာမဟုတ်ပါဘူး။ အာဏာမသိမ်းခင်ကလည်း ဆယ်ခေါက်ထက်မနည်းကို ရောက်ဖူးပါတယ်။ ရိုဟင်ဂျာကိစ္စတွေ တခြားကိစ္စတွေ ကျွန်တော်မှတ်တမ်းရိုက်ဖူးပါတယ်။ အာဏာသိမ်းမှုလည်းဖြစ်ရော မြန်မာပြည်အတွက် ကျွန်တော် တစ်ခုခုလုပ်ချင်တယ်။ ကျွန်တော့်သူငယ်ချင်းတွေကလည်း အဲဒီမှာ ဒုက္ခရောက်တဲ့သူတွေကို ဝေငှကျွေးတာတွေ လုပ်နေတယ်။ ဒါတွေကို ကျွန်တော်မှတ်တမ်းတင်ချင်တာနဲ့ပဲ မြန်မာပြည်ကို ထပ်ရောက်ခဲ့တာပါ။

မေး - ဆယ်ခေါက်တောင် ရောက်ဖူးတယ်ဆိုတော့ အာဏာမသိမ်းခင် မြန်မာနိုင်ငံနဲ့ အခု အာဏာသိမ်းပြီး ဘာကွာခြားပါသလဲ။

■ ကျွန်တော် ရိုက်ကူးရေးစလုပ်တော့ တော်တော်ကို သိသာပါတယ်။ လူတွေဟာ ဖိနှိပ်ခံထားရတော့ အရမ်းကိုကြောက်လန့် တိတ်ဆိတ်နေကြတယ်။ ဥပမာ - ကျွန်တော့်သူငယ်ချင်းနဲ့ ကျွန်တော်လမ်းပေါ်မှာ တွေ့ခဲ့တဲ့ အဒေါ်ကြီးတစ်ယောက်ဆိုရင် သူ့ကို ရဲတွေက ရိုက်နှက်ပြီး သူရှိစုမဲ့စု ရှာထားတဲ့ ပိုက်ဆံကို ယူသွားတယ်လို့ လာပြောပါတယ်။ အဲဒီလိုလာပြောနေတဲ့တစ်ချိန်တည်းမှာပဲ ဘယ်သူကများ သူပြောတာကို နားထောင်နေမလဲဆိုတဲ့ ကြောက်စိတ်နဲ့ ဘေးဘယ်ညာကိုလည်း ကြည့်နေပါသေးတယ်။ ဒါဟာ ဒီနေ့မြန်မာပြည်ရဲ့ တကယ့်အခြေအနေပါ။

မေး - စစ်ကြောရေးမှာ ခင်ဗျားကို ခြောက်ရက် စစ်ခဲ့တယ်လို့ ကျွန်တော် သိထားပါတယ်။ ခင်ဗျားကို ရိုက်နှက်ညှဉ်းပန်းနှိပ်စက်တာမျိုး ရှိခဲ့ပါသလား။

■ သူတို့ ကျွန်တော့်ကို ညှဉ်းပန်းနှိပ်စက်တာတော့ မရှိပါဘူး။ ကျွန်တော်အချုပ်ထဲမှာရော စစ်ကြောရေးစခန်းမှာရော နေခဲ့ရပါတယ်။ အဲဒီမှာ သိပ်ရယ်စရာကောင်းတာက ပထမညတုန်းကတော့ ကျွန်တော့်ကို ရဲအရာရှိရဲ့ အခန်းထဲမှာ အဲယားကွန်းတွေ ဘာတွေနဲ့ နေခွင့်ပြုခဲ့ပါတယ်။ နောက်တစ်နေ့လည်းကျရော သူတို့ ကျွန်တော့်ကို စစ်ကြဆေးကြပါတယ်။ ဒါပေမဲ့ ရိုက်တာပုတ်တာ၊ ကိုယ်ထိလက်ရောက်တော့ ဘာမှမလုပ်ပါဘူး။ အဲဒီမှာပဲ သူတို့က ကျွန်တော်ရိုက်ထားတဲ့ ရိုဟင်ဂျာအကြောင်း မှတ်တမ်းရုပ်ရှင်ကို တွေ့သွားပါတော့တယ်။ အဲဒီကစလို့ ကျွန်တော့်အပေါ် သူတို့ဆက်ဆံရေးတော်တော် ခက်ထန်သွားတယ်။ ကျွန်တော့်ကို ရွံစရာလူတစ်ယောက်လို ကြည့်ကြပါတယ်။ ကျွန်တော့်ရဲ့ မှတ်တမ်းရုပ်ရှင်ကို မုန်းတဲ့ပုံတွေ တွေ့ရပါတယ်။ ကျွန်တော့်ကို ငရဲပြည် ပို့မယ်လို့လည်း ပြောပါတယ်။ စစ်ကြောရေးမှာတော့ ၁၆ ပေ ၆ ပေ ပတ်လည်ရှိတဲ့အခန်းထဲမှာ လူ ၂ဝ လောက်ကို ပိတ်လှောင်ထည့်ထားတော့တာပဲ။ အဲဒီမှာ တော်တော့်ကို စိတ်ပျက်စရာကောင်းပြီး အိမ်သာကလည်း တစ်လုံးတည်းရှိပါတယ်။ နံစော်နေတာပါပဲ။ ကျနော်တို့ ခြေဆန့် လက်ဆန့်လို့တောင် မရဘူး။ တစ်ယောက်ကို တစ်ယောက် ထပ်အိပ်ခဲ့ရတဲ့အထိပါပဲ။ အဲဒီမှာ ကျွန်တော်နားလည်လိုက်တာ ရဲအရာရှိပြောတဲ့ ငရဲဆိုတာ ဒါပဲလို့။ ကျွန်တော်နှစ်ရက်လောက် နေခဲ့ရတယ်။ တကယ် တော်တော့်ကိုဆိုးတဲ့ နေရာပါဗျာ။

မေး - ဘာကြောင့် သူတို့က ခင်ဗျားရိုက်ထားတဲ့ ရိုဟင်ဂျာမှတ်တမ်းရုပ်ရှင်နဲ့ ပတ်သက်လို့ ဆတ်ဆတ်ထိမခံဖြစ်ကြရတာလဲ။

■  မြန်မာတပ်မတော်ရဲ့ အဓိက အကြောင်းပြချက်ကတော့ သူတို့ဟာ ဗုဒ္ဓဘာသာဝင်တွေကို ကာကွယ်ပေးနေတယ်။ အစ္စလာမ်တပ်ဖွဲ့တွေရဲ့ ကျူးကျော်ရန်ကို ကာကွယ်နေတယ်။ အဲဒီလိုဗျူဟာနဲ့ သူတို့ကိုထောက်ခံအောင် သူတို့ တရားဝင်မှုရအောင် လုပ်နေတယ်။လူတော်တော် များများကလည်း ဒီလိုလှည့်စားတာကို ယုံနေကြတယ်။ ရိုဟင်ဂျာတွေက နယ်မြေကျူးကျော်နေပြီး၊ တပ်မတော်က သူတို့ကို ကာကွယ်ပေးနေတယ်လို့ လူတွေက ယုံကြတယ်။ တပ်မတော်က အာဏာတည်မြဲရေး ဒီလမ်းကိုကောင်းကောင်းအသုံးချတယ်။ မြန်မာစစ်တပ်ရဲ့ တပ်သားတွေက ရိုဟင်ဂျာတွေကို ရန်သူတွေလို့ကို ယုံနေကြတာ။ နိုင်ငံခြားသားသတင်းထောက်တွေ ကျွန်တော့်လို မှတ်တမ်းရုပ်ရှင် ရိုက်ကူးရေးသမားတွေကို OIC က ထောက်ပံ့တယ်လို့ စွပ်စွဲနေကြတာ။

မေး - ခင်ဗျားကို ဘယ်လိုမေးခွန်းတွေမေးတာလဲ တိတိကျကျပြန်ပြောပြနိုင်မလားဗျာ့။

■ ဒီလိုရိုက်ဖို့ ပိုက်ဆံဘယ်ကရလဲဆိုတာကို ထပ်ခါတလဲလဲကို မေးတာပဲဗျာ့။ ကျွန်တော်က ကိုယ့်ပိုက်ဆံနဲ့ကိုယ် ရိုက်ပါတယ်လို့ ပြောတာကိုလည်း ဘယ်လိုမှမ ယုံကြဘူး။ ကျွန်တော်အဲဒီမှတ်တမ်းရုပ်ရှင်အတွက် ဆုရထားတဲ့ ဆုတံဆိပ်နဲ့ ဓာတ်ပုံကို ပြပြပြီး အဲဒီငွေတွေ ဘယ်ကရလဲ၊ မင်းဘယ်လောက်ရလဲဆိုတာချည်း မေးတယ်။ ကျွန်တော်ဒီငွေတွေကို မွတ်စလင်အဖွဲ့အစည်းတွေက ကျွန်တော့်ကို ထောက်ပံ့နေတယ်ဆိုတဲ့ ပုံစံမျိုး သူတို့က လုပ်ချင်ပုံရပါတယ်။

မေး - ခင်ဗျားကိုယ်တိုင် ဆန္ဒဝင်ပြခဲ့လို့ ဖမ်းရတာလို့ စစ်တပ်ပြောခွင့်ရ ဗိုလ်ချုပ်ဇော်မင်းထွန်းက ပြောပါတယ်။ အဲဒါ တကယ်ဟုတ်ပါသလား။

■ ဆန္ဒပြတဲ့အထဲမှာ ကျွန်တော်လုံးဝမပါပါဘူးဗျာ။ ကျွန်တော်က ဆန္ဒပြတဲ့သူတွေနောက်ကနေ မှတ်တမ်းရိုက်နေတာ သိသာလွန်းပါတယ်။ ဒါပေမဲ့ သူတို့ ကျွန်တော့်ကို ဖမ်းမိသွားတော့ ဆန္ဒပြသူတွေ သုံးခဲ့တဲ့ ကြွေးကြော်သံဆိုင်းဘုတ်ကို ကိုင်ခိုင်းတယ်။ ပြီးတော့ သူတို့ဓာတ်ပုံရိုက်ယူတယ်။ အဲဒီဓာတ်ပုံကို အသုံးချပြီး ကျွန်တော်ဆန္ဒပြပွဲမှာပါတယ်လို့ စွပ်စွဲတာပါ။ မြန်မာလို မရေးတတ်တဲ့ ကျွန်တော်ကို သူတို့က အဲဒီကြွေးကြော်သံ ဆိုင်းဘုတ်ရေးတယ်လို့တောင် စွပ်စွဲတာပါဗျာ။

မေး - ခင်ဗျားသုံးလ နေခဲ့ရတဲ့ အင်းစိန်ထောင်အကြောင်းပြောကြရအောင်၊ ခင်ဗျား အတွေ့အကြုံအရ အင်းစိန်ထောင်ထဲမှာ ဘယ်လိုရှိသလဲဗျာ့။

■ ထောင်ထဲမှာ ကျွန်တော်နိုင်ငံခြားသားတစ်ယောက်အနေနဲ့ ဖြတ်သန်းခဲ့ရတာတွေက မြန်မာလူမျိုးတွေ ဖြတ်သန်းနေရတာနဲ့စာရင် အများကြီးတော်ပါသေးတယ်။ ကျွန်တော့်ကို တခြားသူတွေနဲ့တွဲမထားဘူး။ တစ်ယောက်တည်းထားတယ်။ ၂ မီတာ လေးမီတာ အခန်းကျဉ်းလေးထဲမှာ နေရပါတယ်။ နေ့ခင်းနေ့လယ်ဆိုရင်တော့ အများအတွက် ထားထားပေးတဲ့နေရာမှာတော့ နေခွင့်ရပါတယ်။ ထောင်ထဲမှာ လူတစ်ယောက်က ကျွန်တော့်ကို မြန်မာစာသင်ပေးတယ်။ ကျွန်တော်ကလည်း သူ့ကို ဂျပန်စာပြန်သင်ပေးတယ်။ တခြားနိုင်ငံရေးအကျဉ်းသားတွေနဲ့ ကျွန်တော့်ကိုခွဲထားတော့ ကျွန်တော်သတင်းတွေတော့ သိပ်မရခဲ့ဘူး။ ဒါပေမဲ့ ကျွန်တော်နိုင်ငံရေးအကျဉ်းသားတွေကို တွေ့ခဲ့ပါတယ်။ သူတို့က ကျွန်တော့်ကိုလည်း အားတင်းထား၊ အားတင်းထားဆိုပြီး မသိမသာ လက်သုံးချောင်းထောင်ပြတာမျိုးတွေ ရှိပါတယ်။

မေး - ကျွန်တော်တို့ သတင်းတွေရပါတယ်။ နိုင်ငံရေးအကျဉ်းသားတွေကို ထောင်အာဏာပိုင်တွေက ရိုက်နှက်တာမျိုး၊ အစာငတ်ခံဆန္ဒပြကြတာမျိုး၊ အဲဒါတွေ ခင်ဗျား မျက်မြင်ကြုံတွေ့ခဲ့ရသေးလား။

■ ကျွန်တော်လည်း စစ်ကြောရေးမှာ ခြောက်ရက် အစာငတ်ခံဆန္ဒပြခဲ့တယ်။ ကျွန်တော့်ကို ဂျပန်သံရုံးနဲ့ ဆက်သွယ်ပေးဖို့ပြောတာ သူတို့က ဆက်သွယ်မပေးဘူး။ ဒါနဲ့ ကျွန်တော်လည်း သံရုံးနဲ့ ဆက်သွယ်လို့ မရရင် အစားမစားဘူးလို့ပြောတယ်။ သူတို့ ကျွန်တော့်ကို ရိုက်တော့ မရိုက်ဘူး။ ခင်ဗျားမစားရင်ကျန်းမားရေး ထိခိုက်လိမ့်မယ်ဆိုပြီး စားခိုင်းတယ်။ ခင်ဗျားမေးသလို နိုင်ငံရေးအကျဉ်းသားတွေကို ရိုက်နှက်တာတွေ ရှိလားဆိုတာကတော့ ကျွန်တော်သတင်းကောင်းကောင်းမရတော့ မပြောနိုင်ဘူးဗျာ့။

မေး - ထောင် ၁ဝ နှစ်ချခံထားရပေမယ့် အခုပြန်လွတ်လာပြီပေါ့ဗျာ။ ဘာကြောင့် ခင်ဗျားကို ပြန်လွှတ်ပေးလိုက်တယ်လို့ ထင်ပါသလဲ။

■ သေချာတာတစ်ခုက ဂျပန်သံရုံးရဲ့ ဖိအားတွေကြောင့် ကျွန်တော့်ကိုလွှတ်ပေးလိုက်တာပါ။ နောက်တစ်ခုကတော့ ကျွန်တော်တို့ နိုင်ငံခြားသားတွေကို လွှတ်ပေးပြီး မြန်မာစစ်တပ်က သူတို့သဘောထားပျော့ပျောင်းလာပြီဆိုတာကို နိုင်ငံတကာကို ပြဖို့ ကျွန်တော်တို့ကို ဝါဒဖြန့် လက်နက်အဖြစ်သုံးတာလေ။ သူတို့လုပ်ခဲ့တဲ့ ရက်ရက်စက်စက် သတ်ဖြတ်မှုတွေကို ဖုံးကွယ်ဖို့ လွှတ်ပေးတာပေါ့။ ကျွန်တော်တို့ကို လွှတ်ပေးလိုက်ရုံနဲ့ အကြမ်းဖက်သတ်ဖြတ်မှုတွေကို ဖုံးကွယ်လို့မရပါဘူး။ စစ်တပ်ရဲ့ဝါဒဖြန့်လက်နက်အနေနဲ့ အသုံးခံခဲ့ရတယ်ဆိုရင်တော့ ကျွန်တော်အရမ်းရှက်တယ်ဗျာ။ စစ်တပ်က အကြမ်းဖက်မှုတွေ ဆက်ကျူးလွန်နေဆဲပါ။ လူတွေကို သတ်ဖြတ်နေဆဲပါ။ ဥပမာပြောရရင် အခုဒဂုံတက္ကသိုလ်ကျောင်းသားတွေကို သေဒဏ်ပေးတာပဲ ကြည့်လေဗျာ။

မေး - မြန်မာပြည်သူတွေကတော့ ကမ္ဘာကြီးဟာ သူတို့ကို ပစ်ထားတယ်လို့ခံစားနေကြပါတယ်။ နိုင်ငံခြားသား တစ်ယောက်အနေနဲ့ရော၊ သတင်းသမားတစ်ယောက်အနေနဲ့ပါ အခုလက်ရှိ မြန်မာ့အရေးကို ဘယ်လိုထင်ပါသလဲ။

■ မြန်မာ့အရေးဟာ ယူကရိန်းလို၊ တခြားကမ္ဘာ့အရေးတွေလို အလေးပေးမခံရတာတော့ အမှန်ပဲ။ မြန်မာပြည်မှာ ဖြစ်ပျက်နေတာတွေက လူတွေကို အစုလိုက်အပြုံလိုက်သတ်ဖြတ်နေတာ၊ လူသားမျိုးနွယ်တွေအပေါ် ရာဇဝတ်မှုတွေ ကျူးလွန်နေတာ၊ ဂျီနိုဆိုက် ဖြစ်နေတာပါ။ ပြည်တွင်းရေးလို့ ပြောပြီး ကမ္ဘာက လက်ရှောင်နေလို့မရပါဘူး။ အားလုံး အတူတူရပ်တည်ဖို့ လိုပါတယ်။ လူတွေသတ်တာရပ်အောင် နိုင်ငံရေးအကျဉ်းသားတွေ အားလုံးကို ပြန်လွှတ်အောင် မြန်မာစစ်တပ်ကို ဖိအားပေးဖို့ လိုပါတယ်။ ကျွန်တော်တို့ မြန်မာ့အရေးကိုလည်း အာရုံစိုက်ဖို့ လိုပါတယ်။

မေး - ခင်ဗျားတို့ ဂျပန်က စစ်တပ်ကို အထောက်အပံ့ဖြစ်မယ့် စီးပွားရေးတွေ လုပ်နေဆဲပဲလို့ တက်ကြွလှုပ်ရှားသူတွေ အဖွဲ့အစည်းတချို့က ထောက်ပြတာတွေ ကျွန်တော်ကြားနေ မြင်နေရပါတယ်။ ဂျပန်အစိုးရဘက်က မြန်မာ့အရေး ဘာလုပ်ပေးစေချင်ပါသလဲ။

■ မဲခေါင် watch လိုအဖွဲ့တွေက ဂျပန်ကို မြန်မာစစ်တပ်က အသုံးချနေတယ်လို့ ထောက်ပြတာတွေ ကျွန်တော်လည်းတွေ့ပါတယ်။ ဂျပန်နိုင်ငံသား တစ်ယောက်အနေနဲ့ ဒါတွေကို တာဝန်ယူဖို့ ဂျပန်အစိုးရကို ပြောဖို့လိုပါတယ်။ ဂျပန်အစိုးရဘက်က မြန်မာနိုင်ငံက ဒုက္ခသည်တွေကို လက်ခံပေးဖို့လည်း တောင်းဆိုချင်တယ်။ ဒုက္ခသည်ကွန်ဗန်းရှင်းလက်မှတ်ထိုးထားပေမယ့် ဂျပန်ဟာ ဒုက္ခသည်လက်ခံတဲ့အရေအတွက် တော်တော်နည်းပါတယ်။

မေး - အာဏာသိမ်းပြီးနောက် စစ်တပ်က နိုင်ငံရေးသမားတွေတင်မက သတင်းသမားတွေကိုပါ ဘာကြောင့် သတ်ဖြတ်ဖမ်းဆီးနေတယ်လို့ ယူဆပါသလဲ။

■ သူတို့က သတင်းသမားတွေကို သတ်ဖြတ်ဖမ်းဆီးနေမှာပေါ့ဗျာ။ မြန်မာစစ်တပ်က သူတို့လုပ်နေတဲ့ အကြမ်းဖက်သတ်ဖြတ်မှုတွေကို ဖုံးကွယ်ချင်တာကို၊ သူတို့က ကမ္ဘာကြီးကို ဒီသတင်းတွေ မပြန့်စေချင်ဘူးလေ။

မေး - ခင်ဗျား မြန်မာပြည်ကို ပြန်သွားချင်တဲ့ဆန္ဒရှိသေးလား။

■ ကျွန်တော် ပြန်သွားချင်တာပေါ့ဗျာ။ ဒါပေမဲ့ အခုတော့ မြန်မာနိုင်ငံကို ကျွန်တော်သွားလို့မရတော့ပါဘူး။ ဆန္ဒပြပွဲကို မှတ်တမ်းရိုက်ရုံနဲ့ ဖမ်းဆီးမခံရတဲ့တစ်နေ့ ကျရင် ကျွန်တော်ပြန်သွားမှာပါ။ မြန်မာနိုင်ငံဟာ သတင်းသမားတွေအတွက် လုံခြုံစိတ်ချရမယ့်နေရာတစ်နေရာ ဖြစ်လာဖို့ ကျွန်တော်အရမ်းမျှော်လင့်ပါတယ်။ အခု ပြည်တွင်းမှာ တော်တော် အန္တရာယ်များပေမယ့် မြန်မာသတင်းသမားတွေဟာ အန္တရာယ်တွေကြားက အလုပ်လုပ်နေဆဲပဲနော်။ သူတို့တစ်ယောက်ချင်းဆီတိုင်းကို ကျွန်တော် တော်တော်လေးစားပါတယ်ဗျာ။ မြန်မာပြည်အရေးအတွက် လုပ်နေသူတိုင်းကို ကျေးဇူးတင်ကြောင်း ကျွန်တော်ပြောချင်ပါတယ်။